Baibolo yupeleka umboni wowoneka luweme wowonesha kuti Yehova angakwanishe kunenelatu vinthu vakusogolo. (Yes. 45:21) Koma yove yufotokozalini vonse panena za mwangachitile vinthu vamene ivi Yehova olo nthawe yake yangachite vamene ivo, komasoti kupaka kwa vinthu vangakonde kuti aziŵiletu. Tetyo, sewo tingakwanishelini kuziŵa kukula kwa luso ya Mulungu yoziŵilatu vinthu vakusogolo. Koma olo n’tetyo, pali vinthu viyakine vokhuza yove vatingakwanishe kuziŵa.

Yehova ali na mphamvu zokwanisha kuchita chilichonse chakufuna, koma nthawe ziyakine yove osankha kusachitapo kalikonse. Chifukwa chakuti ali na mphamvu ziliye malile, Yehova angakwanishe kulosela chilichonse chakufuna. (Alo. 11:33) Koma pankhani ziyakine, yove angasankhe kuti osati aziŵiletu vinthu viyakine vakusogolo chifukwa yove ni wangwilo komasoti ni wolilesha.—Yelekezelani na Yesaya 42:14.

Yehova otisimikijila kuti chifunilo chake chizachitike. Kansi vamene ivi vuwonesha tyani luso yalinayo Mulungu yoziŵilatu vinthu vakusogolo? Lemba ya Yesaya 46:10 yufotokoza kuti: “Newo niye nulaŵila zamapeto kufumila poyamba. Kuyambila kale-kale nulaŵila za vinthu vikaliye chitika, ‘Newo niye nulaŵila kuti vanuganiza nizavichite chendi nizachite chilichonse chanufuna.’”

Chifukwa chimozi chamene chuchitisha Yehova kuti akwanishe kunenelatu za vinthu vakusogolo, nichakuti yove ali na mphamvu zopangisha chinthu kuchitika. Mosiyana na sewo taŵanthu amene tudalila kumapeto kwa buku kuti tiziŵe nkhani zake—Yehova ofunikilalini kuwona vochitika va muli chino chalo kuti aziŵe vinthu vikuti vichitike kusogolo. Koma mmalo mwake, Yehova angasankhe kunenelatu nthawe yakufuna kuti chinthu chiyakine chichitike. Ndipo yove angachitishe kuti chinthu chamene icho chichitike panthawe yake ngayo-ngayo—Eks. 9:5, 6; Mat. 24:36; Mach. 17:31.

N’chifukwa chake Baibolo yukatishila ntchito mawu monga akuti, “namanga,” “napanga“, komasoti nakonza” pofotokoza vakuchita Yehova ponena za vinthu vikuti vizachitike kusogolo. (2 Maf. 19:25; Yes. 46:11) Mawu amene aŵa eŵamasulila kufumila kuchilaŵilo choyambilila chamene ni cholingana na mawu ayakine amene otanthauza “woumba.” (Yer. 18:4) Molingana na woumba waluso wamene angakwanishe kuumba lito kunkhala chiya chiweme, Yehova okwanishasoti kupanga vinthu pofuna kuti vinthu vakufuna vichitike.—Aife. 1:11.

Yehova epasa munthu aliyense ufulu wosankha vochita ndipo yove olemekeza ufulu wasu. Ndipo osankhilalini munthu aliyense vochita; Mulungu ochitishalini kuti ŵanthu aweme mitima achite vinthu viyakine viipa vamene vingaŵaletele mavuto komasoti vamene vingachitishe kuti azawonongewe. Yove olola kuti munthu aliyense akolisankhila yeka njila yangafune kuyendamo, ndipo Mulungu ochita kuŵasenga ŵanthu mopapatila kuti akoyenda munjila iweme.

Ganizilani chisanzo cha ŵanthu amene enzenkhala ku Nineve. Yehova enze enenelatu kuti tauni yamene iyo izawonongewe chifukwa ŵanthu ŵake enze aipa. Koma ŵanthu onkhala mu tauni yamene iyo pechilapa, Yehova “echinja maganizo ŵake ndipo aliyeŵaletele soka yamene yenzefuna kuti aŵaletele.” (Yon. 3:1-10) Yehova echinja maganizo ŵake okhuza vinthu venze enenelatu vokhuza tauni ya Nineve, chifukwa ŵanthu enzenkhala m’tauni yamene iyo ekatishila ntchito ufulu wawo wosankha pomvwila uthenga wa Yona. Ove elapa ndipo aliyewonongewe.

Chisanzo chiyakine ni cha ulosi wokhuza nsogoleli muyakine zina yake Koresi wamene enzeyembekezela kuzamasula Ayuda ku ukapolo nolamula kuti kachisi wa Yehova amangiwesoti. (Yes. 44:26–45:4) Mfumu Koresi yaku Perisiya ikwanilisha ulosi wamene uyo. (Ezara 1:1-4) Yehova ekatishila ntchito Koresi pokwanilisha ulosi wake, koma yove aliyechite kumukakamija nsogoleli wamene uyu kuti akomulambila. Mwanjila iyakine tinganene kuti Koresi enze na ufulu wolisankhila yeka vochita na wosankha Mulungu wangakonde kuti akomulambila.—Miy. 21:1.

N’chendi kuti pali vinthu viyakine vinyinji vokhuza luso ya Mulungu yoziŵilatu vinthu vikuti vizachitike kusogolo. Ndipo kulaŵila chendi, paliye munthu aliyense wamene angakwanishe kumvwisha luweme njila za Yehova, olo kuti kaganizidwe kake na vochita vake. (Yes. 55:8, 9) Koma vinthu vakutiululila Yehova, vutiyavya kutang’isha chikhulupililo chasu kuti yove nthawe zonse ochita vinthu viweme vamene vupamikijaposoti nkhani yoziŵilatu—vinthu vikuti vizachitike kusogolo.