1. Ndaŵa yanji tufunika kusogolelewa na Yehova? Pelekani chisanzo.

 YELEKEZELANI kuti muli nsanga ndipo mwaluŵila. Komasoti muli pakati pa vinthu vinyinji voyofya: vinyama vakusanga, tudoyo tuyambisha mayenda, vomela va poizoni, komasoti malo amyala yamene ingakuwonongeni. Mwewo mungatembeje ngako kunkhala na muyanu okusogolelani wamene oziŵa malo amene ni oyofya ngako na mwangakutetezeleni! Chalo masiku ŵano chili monga ni sanga yolingana na yamene iyi. Chove chili zule na vinthu vinyinji vamene vingatiwononge sewo makamaka ushamwali wasu na Yehova. Koma sewo tili na nsogoleli muweme ngako—wamene ni Yehova. Yove otiyavya kupewa vinthu vamene ivi voyofya ndipo otisogolela pa njila yasu yoluta ku moyo—wamene ni moyo wosasila mu chalo cha nyowani.

2. Kansi Yehova otisogolela tyani?

² Kansi Yehova otisogolela tyani? Choyamba, Mulungu otisogolela kupitila m’Mawu ŵake Baibolo. Koma olo n’tetyo, yove okatishilasoti ntchito ŵanthu amene omupanamila. Mwachisanzo, Mulungu okatishila ntchito “kapolo wokhulupilika na wanzelu” potipasa chakulya chauzimu chamene chutiyavya kupanga vosankha mwanzelu. (Mat. 24:45) Yehova okatishilasoti ntchito ŵanthu ayakine oyenelela kuti akotisogolela. Mwachisanzo, opanamila dela komasoti akulu ampingo otitang’isha komasoti kutipasa malangizo amene angatiyavye kupilila pa nthawe yovuta. Tutembeja kuti Mulungu otisamalila luweme ngako masiku ŵano osilijila amene ni ovuta! Vamene ivi vutiyavya kunkhala ovomelejeka pa menso pa Yehova nopitilija kuyenda pa njila ya kumoyo.

3. Kansi tikambilane chinji munkhani ino?

³ Koma olo n’tetyo, nthawe ziyakine vingativute kukonkheja malangizo a Yehova, ngako-ngako keno malangizo amene awo ofumila kuli ŵanthu aliye ungwilo. Ndaŵa yanji? Chifukwa chakuti nthawe ziyakine tingasangalale lini na malangizo ŵatapasiwa. Olo tingaganize kuti malangizo amene awo ni osayavya ngako ndipo aliyefumile  kwa Yehova. Pa nthawe monga ni yamene iyi, niye patufunika kukhulupilila kuti Yehova niye wamene osogolela gulu yake komasoti kuti nthawe zonse tudalisiwa tikakonkheja malangizo ŵake. Pofuna kutiyavya kuwona mwatingatang’ishile chikhulupililo chasu, munkhani ino tikambilane (1) vechichita Yehova posogolela ŵanthu ŵake nthawe za m’Baibolo, (2) vakuchita potisogolela masiku ŵano, komasoti (3) madaliso ŵatufwana tikapitilija kumvwila malangizo ŵake.

VENZECHITA YEHOVA POSOGOLELA NTUNDU WA AISIRAELI

4–5. Kansi Yehova ewonesha tyani kuti niye enzekatishila ntchito Mose posogolela ntundu wa Isiraeli? (Onani chithunzi chapachikuto.)

⁴ Yehova esankha Mose kuti asogolele ntundu wa Aisiraeli pofuma ku iguputo. Ndipo yove epasa Aisiraeli umboni wowonekela luweme wakuti niye enzeŵasogolela pokatishila ntchito Mose. Mwachisanzo, yove enzekatishila ntchito chipilala cha nkumbi nzuŵa ndipo usiku enzekatishila ntchito mulilo. (Eks. 13:21) Mose pamozi na Aisiraeli ekonkhelela chipilala cha nkumbi pechenzeŵasogolela ku Nyanja isweta. Koma pavuli pake, Aiguputo eutukila Aisiraeli. Chifukwa cha vamene ivi, Aisiraeli echita wowa ngako chifukwa enzeganiza kuti Aiguputo aŵapaye. Ove enze eyamba kuganiza kuti Mose waŵaphoniyela poŵasogolela kuti alute ku Nyanja isweta. Koma yove enzeveŵaphoniyele. Yehova echitila lona kusogolela ŵanthu ŵake kuti alute kwamene uko pokatishila ntchito Mose. (Eks. 14:2) Pavuli pake, Mulungu eŵapulumusha mwanjila yodabwisa ngako.—Eks. 14:26-28.

⁵ Kwa vyaka 40, Mose epitilija kudalila chipilala cha nkumbi posogolela ŵanthu a Mulungu nchipululu. a Kwa nthawe itali, Yehova enzeika chipilala palulu pa tenti ya Mose, ndipo Mwisiraeli aliyense enzekwanisha kuchiwona. (Eks. 33:7, 9, 10) Yehova enzelaŵila na Mose kupitila mu chipilala cha nkumbi, ndipo pavuli pake yove enzepeleka malangizo amene awo kuli ŵanthu a Mulungu. (Sal. 99:7) Aisiraeli enze na umboni wamphamvu wowonesha kuti Yehova enzekatishila ntchito Mose poŵasogolela.

6. Kansi Aisiraeli enzechita tyani akalondela malangizo ofumila kwa Yehova? (Numeri 14:2, 10, 11)

⁶ N’vomvwisha chisoni kuti Aisiraeli anyinji ekana umboni wowoneka luweme wakuti Yehova enzekatishila ntchito Mose monga womulaŵilila. (Ŵelengani Numeri 14:2, 10, 11.) Ove enzekana moweleja-weleja kuti Yehova enzekatishila ntchito Mose poŵasogolela. Monga vokonkhapo vake, Mulungu ekana kuti m’badwo uliye chikhulupililo wa Aisiraeli uloŵe mu chalo cholonjezewa.—Num. 14:30.

7. Fotokozani visanzo va ŵanthu amene ekonkheja malangizo a Yehova. (Numeri 14:24) (Onanisoti chithunzi.)

⁷ Koma olo n’tetyo, Aisiraeli ayakine enzemvwila malamulo a Yehova. Mwachisanzo, Yehova enena kuti: “Kalebe . . . wankhala onikonkha na ntima wonse.” (Ŵelengani Numeri 14:24.) Mulungu emudalisa Kalebe, mpaka efwika pomuuja kuti asankhe malo aliwonse ŵangakonde kunkhala mu chalo cha Kanani. (Yos. 14:12-14) M’badwo wokonkhapo wa Aisiraeli nawo wepeleka chisanzo chiweme pankhani yomvwila malangizo a Yehova. Yoswa pechiloŵa mmalo mwa Mose monga nsogoleli wosankhiwa na Mulungu kuti asogolele ŵanthu ŵake Aisiraeli, “eyamba kumulemekeza ngako masiku onse a moyo wake.” (Yos. 4:14) Monga vokonkhapo vake, Yehova eŵadalisa poŵaloŵesha mu chalo chechiŵalonjeza.—Yos. 21:43, 44.

8. Fotokozani venzechita Yehova posogolela ŵanthu ŵake mu nthawe ya mafumu a Isiraeli. (Onanisoti chithunzi.)

⁸ M’vyaka vokonkhapo, Yehova eyamba kuika oweluza kuti akosogolela ŵanthu ŵake. Pavuli pake, mu nthawe ya mafumu Achiisiraeli, Yehova eika aneneli kuti akosogolela ŵanthu ŵake. Mafumu okhulupilika enzekonkheja malangizo ofumila kuli aneneli. Mwachisanzo, Mfumu Davide evomekeja molichefya mneneli Natani pechimuzuzula. (2 Sam. 12:7, 13; 1 Mbiri 17:3, 4) Mfumu Yehosafati  yenzedalila mneneli Yahazieli kuti akoipasa malangizo, ndipo itang’isha a Yuda kuti ‘akokhulupilila aneneli a [Mulungu].’ (2 Mbiri 20:14, 15, 20) Panthawe yenze pamavuto, Mfumu Hezekiya eluta kuyawonana na mneneli Yesaya kuti akamuyavye. (Yes. 37:1-6) Nthawe zonse mafumu Achiisiraeli akokonkheja malangizo a Yehova, yove enzeŵadalisa komasoti enzeteteza ŵanthu antundu wake. (2 Mbiri 20:29, 30; 32:22) Munthu aliyense sembe ekwanisha kuwona kuti Yehova enzekatishila ntchito aneneli posogolela ŵanthu ŵake. Koma olo n’tetyo, mafumu anyinji komasoti ŵanthu enzekana kumvwila aneneli a Yehova.—Yer. 35:12-15.

VENZECHITA YEHOVA POSOGOLELA AKHILISITU OYAMBILILA

9. Kansi Yehova enzekatishila ntchito ŵani posogolela mpingo wa Chikhilisitu mu nthawe ya atumwi? (Onanisoti chithunzi.)

⁹ Mu nthawe ya atumwi, Yehova enkhazikisha mpingo wa Chikhilisitu. Kansi yove enzeusogolela tyani mpingo wa Akhilisitu oyambilila? Mulungu esankha Yesu kunkhala mutu wa mpingo wa Chikhilisitu. (Aife. 5:23) Koma Yesu enzelaŵilalini na wophunzila aliyense mwasiteleti pomuuja vangafunikile kuchita. Yove enzekatishila ntchito atumwi komasoti akulu aku Yerusalemu kuti akosogolela mipingo. (Mach. 15:1, 2) Komasoti Akhilisitu ayakine esankhiwa kunkhala akulu kuti akosogolela mipingo.—1 Ates. 5:12; Tito 1:5.

10. (a) Kansi Akhilisitu oyambilila enzechita tyani akalondela malangizo? (Machitidwe 15:30, 31) (b) Ndaŵa yanji ŵanthu ayakine otomolewa m’Baibolo ekana kumvwila ŵanthu ŵenzekatishila ntchito Yehova poŵasogolela? (Onani bokosi yakuti “ Chifukwa chake ŵanthu ayakine ekana umboni wowoneka luweme.”)

¹⁰ Kansi mipingo ya Akhilisitu oyambilila ichita tyani? Mipingo inyinji yenzekonkheja mosangalala malangizo ŵeyenzelondela. Kulaŵila chendi, mipingo yamene iyo “yenzesangalala chifukwa cha mawu otang’isha” amene ŵeyenzelondela. (Ŵelengani Machitidwe 15:30, 31.) Lomba kansi Yehova wankhala osogolela tyani ŵanthu ŵake masiku ŵano?

VAKUCHITA YEHOVA POTISOGOLELA MASIKU ŴANO

11. Pelekani chisanzo chuwonesha vakuchita Yehova poyavya ŵanthu amene otisogolela masiku ŵano.

¹¹ Yehova opitilija kusogolela ŵanthu ŵake masiku ŵano. Yove wankhala ochita vamene ivi kupitila m’Mawu ŵake komasoti muli mwana wake wamene niye mutu wa mpingo. Kansi pali umboni uliwonse watuwona wamene uwonesha kuti Yehova okatishila ntchito ŵanthu potisogolela masiku ŵano? Eye. Mwachisanzo, ganizilani za vinthu vamene vechitika pavuli pa chaka cha 1870. M’bale  Charles Taze Russell pamozi na ayake eyamba kumvwisha kuti chaka cha 1914, chizankhale chaka chofunika ngako ponena za Ufumu wa Mulungu. (Dan. 4:25, 26) Kuti akwanishe kuchita vamene ivi, ove enzedalila ulosi wa m’Baibolo. Kansi Yehova enzeŵasogolela penzefufuza za nkhani yamene iyi m’Baibolo? Mosakaikila yove enzeŵasogolela chendi. Vinthu vechitika mu 1914, vesimikijila kuti Ufumu wa Mulungu wenze weyamba chendi kulamulila. M’chaka chamene ichi pechitika Nkhondo yoyamba yapachalo chonse, milili, vivomelezi, komasoti njala. (Luk. 21:10, 11) Kulaŵila chendi, Yehova enzekatishila ntchito Akhilisitu aweme ntima amene awo pofuna kuyavya ŵanthu ŵake.

12–13. Kansi ni makonzedwe otyani amene epangiwa pofuna kupitisha pasogolo ntchito yolalikila nophunzisa panthawe ya Nkhondo yachiŵili ya pachalo chonse?

¹² Ganizilani soti vinthu vechitika pa Nkhondo yachiŵili ya pachalo chonse . Abale osogolela kulikulu yapa chalo chonse ephunzila lemba ya Chivumbuluso 17:8, ndipo kufumila pa vechiphunzila pa lemba yamene iyi, ove eziŵa kuti Nkhondo yachiŵili yapa chalo chonse iyambishelini nkhondo ya Aramagedo. Tetyo, ove eziŵilatu kuti pavuli pa nkhondo yamene iyo pachalo pazankhale ntendele wamene uzachitishe kuti Amboni za Yehova akwanishe kulalikila kuli ŵanthu anyinji. Tetyo, olo kuti pa nthawe yamene iyo sembe viwoneka monga n’vosayavya, abale osogolela enkhazikisha sikulu ya giliyadi pofuna kuti aphunzise amishonale mwangakatile ntchito yolalikila nophunzisa pachalo chonse. Amishonale eyamba kutumijiwa olo kuti nkhondo yenze ikaliyesila. Kuyangijila pamene apo, kapolo wokhulupilika elinganija Kosi ya utumiki wa Mulungu, b pofuna kuti ayavye abale onse m’mipingo kuti ankhale olalikila komasoti aphunzisi aweme a Mawu a Mulungu. Kuchita vamene ivi kweyavya ŵanthu a Mulungu kunkhala okonzeka kuti azakwanishe kukata ntchito yolalikila yamene yenzeyembekezela kuikata.

¹³ Masiku ŵano, sewo tukwanisha kuwona umboni wowoneka luweme wakuti Yehova enzesogolela ŵanthu ŵake pa nthawe yovuta yamene iyo. Pa nthawe ya Nkhondo yachiŵili yapa chalo chonse, ŵanthu a Yehova enzekata ntchito yolalikila mwaufulu m’vyalo vinyinji. Kulaŵila chendi, ŵanthu anyinji amuziŵa Yehova, ndipo atumiki a Mulungu okata ntchito yolalikila pa chalo chonse.

14. Ndaŵa yanji sewo tufunika kudalila malangizo ŵakutipasa Yehova kupitila mugulu yake komasoti muli akulu osankhiwa? (Chivumbuluso 2:1) (Onanisoti chithunzi.)

 ¹⁴ Masiku ŵano, abale am’Bungwe yutonga opitilija kudalila Khilisitu kuti akoŵasogolela. Ove ofuna kuti malangizo ŵakupeleka kuli abale, akowonesha nzelu zofumila kululu. Komasoti abale amene aŵa okatishila ntchito opanamila dela na akulu popeleka malangizo kumipingo. c Akulu osankhiwa na Mulungu ali “kukwanja ngayo” ya Khilisitu. (Ŵelengani Chivumbuluso 2:1.) N’chendi kuti akulu amene aŵa aliye ungwilo ndipo ophoniyesha vinthu viyakine. Mose na Yoswa enzephoniyesha vinthu nthawe ziyakine, n’chimozi-mozisoti na atumwi. (Num. 20:12; Yos. 9:14, 15; Alo. 3:23) Koma pali umboni wowoneka luweme wakuti Yesu niye osogolela kapolo wokhulupilika komasoti akulu osankhiwa, ndipo apitilije kuchita vamene ivi “masiku onse mpaka nthawe ya mapeto a nthawe ino.” (Mat. 28:20) Tetyo, sewo tili na vifukwa viweme ngako vokhulupilila malangizo ŵatulondela kufumila kuli ŵanthu ŵawasankha Mulungu kuti akotisogolela.

TUFWANA MADALISO TIKAPITILIJA KUMVWILA MALANGIZO A YEHOVA

15-16. Kansi muphunzila chinji kufumila pa vechitikila ŵanthu amene ekonkheja malangizo a Yehova?

¹⁵ Sewo tikapitilija kumvwila malangizo a Yehova tulondela madaliso, olo palipano. Mwachisanzo, Andy pamozi na Robyn ekonkheja malangizo ofumila kuli kapolo wokhulupilika okhuza kunkhala moyo wosafuna vinthu vinyinji. (Mat. 6:22) Monga vokonkhapo vake, ove enkhala na mwayi wotumikila monga olipeleka pa ntchito zomanga mu gulu yasu. Robyn enena kuti: “Nthawe ziyakine sewo tenzenkhala m’mang’anda atontho-atontho ngako amene nthawe ziyakine enzenkhala aliye olo malo ŵatingapikileko chakulya. Ndipo newo negulisa makamela ŵangu anyinji olo kuti nenzekonda kuchosa ŵanthu mafoto. Newo nelila penigulisa vinthu vamene ivi. Koma molingana na mwechichitila Abulahamu na mwanakazi wake Sara, newo nenzewosimikija ntima kuika maganizo ŵangu pa vinthu vakusogolo osati pa vinthu vakuvuli.” (Ahe. 11:15) Kansi banja yamene iyi ifwana chinji pa vinthu vonse veikumana navo? Robyn enena kuti: “Sewo tili na moyo wokhutila ngako chifukwa choziŵa kuti tupeleka kwa Yehova chilichonse chatili nacho. Mwanalume wangu na newo tikochita utumiki wawatipasa Yehova kuti tiukate, tukwanisha kuwona mwaukuti uzankhalile moyo mu chalo chanyowani.” Povomekeja Andy enena kuti: “Sewo tili na moyo wokhutila chifukwa chakuti tankhala na nthawe ikulu yochita vinthu vopitisha pasogolo ntchito za Ufumu.”

¹⁶ Kansi tupindulasoti mwanjila yotyani tikapitilija kukonkheja malangizo a Yehova? Mwachisanzo, pavuli pakuti wasilija maphunzilo ŵake akusekondale, Marcia ekonkheja malangizo onena za kuchita upainiya. (Mat. 6:33; Alo. 12:11) Yove enena  kuti: “Newo nenze nipasiwa mwayi wophunzila mahala kwa vyaka 4 kuyunivesiti. Koma nenzefuna kuchita vinyinji potumikila Yehova. Tetyo, mmalo movomela mwayi wamene uyo newo nesankha kukata ntchito iyakine yamene inganiyavye pochita upainiya. Chamene ichi, chenze chosankha chiweme ngako pavosankha vonse venichitapo kale pamoyo wangu. Pali pano, nutumikila monga mpainiya wonkhazikika ndipo chifukwa chakuti nili na mndandanda iweme yochitila vinthu, nankhala na mwayi woyavya ntchito zapa beteli nili ku ng’anda komasoti wochitako vinthu viyakine vapadela.”

17. Kansi ni madaliso ayakine otyani amene ŵatufwana tikapitilija kumvwila malangizo a Yehova? (Yesaya 48:17, 18)

¹⁷ Nthawe ziyakine, sewo tulondela malangizo amene otiteteza kuukuka wokonda chuma komasoti amene otiyavya kupewa kuchita vinthu viyakine vamene vingachitishe kuti tifwaye malamulo a Mulungu. Sewo tudalisiwa olo pali pano chifukwa chokonkheja malangizo ŵakupeleka Yehova. Tunkhala na chikumbuntima chituŵa ndipo tupewa kukumana na mavuto anyinji. (1 Tim. 6:9, 10) Monga vokonkhapo vake, sewo tukwanisha kutumikila Yehova na ntima wonse, ndipo paliye chinthu chamene chingatiyavye kunkhala na ntendele komasoti kunkhala osangalala kupambana kuchita vamene ivi.—Ŵelengani Yesaya 48:17, 18.

18. Ndaŵa yanji mwewo nimwe osimikija ntima kupitilija kumvwila malangizo a Yehova?

¹⁸ Mosakaikila, Yehova apitilije kukatishila ntchito ŵanthu amene omupanamila kuti akotipasa malangizo pa nthawe ya chisauso chikulu komasoti nkati mwa Ulamulilo wavyaka wani sauzande wa Khilisitu. (Sal. 45:16) Kansi sewo tizapitilije kumvwila malangizo amene awo olo panthawe yamene kuchita vamene ivo kungachitishe kuti tiluze vinthu viyakine vatukonda? Sewo tizavutike lini kuchita vamene ivo keno tumvwila malangizo ŵakutipasa Yehova palipano. Tetyo, tiyeni nthawe zonse tikomvwila malangizo ŵakutipasa Yehova, kupamikijapo ŵakutipasa kupitila muli ŵanthu ŵawasankha kuti akotisogolela. (Yes. 32:1, 2; Ahe. 13:17) Ndipo tikachita tetyo, tizankhale na vifukwa viweme ngako vokhulupilila malangizo a Yehova amene ŵakutipasa potiyavya kupewa vinthu voyofya notisogolela panjila yakumoyo—wamene ni moyo wosasila mu chalo chanyowani.