1-2. (a) Kansi ni nthawe yotyani yatukumbukila ngako ŵanthu ŵetenzekonda amene emwalila? (b) Kansi Yesu eyambisha chinji usiku pa nsiku yakuti mmawa mwake apaiwe?

PALIYE kanthu kuti papita nthawe itali tyani kufumila pechimwalila ŵanthu ŵetenzekonda, tuŵakumbukila mphela. Tukumbukila ngako za ove pa nsiku yechimwalila.

² Chaka chilichonse, tunkhala pakati pa mamiliyoni anyinji pa chalo chonse amene osonkhana pa nsiku yatukumbukila imfwa ya munthu watukonda ngako—Yesu Khilisitu. (1 Pet. 1:8) Tusonkhana kuti tikumbukile wamene epeleka moyo wake dipo kuti tipulumushiwe ku uchimo na imfwa. (Mt. 20:28) Ndipo Yesu enzefuna kuti ophunzila ŵake akokumbukila imfwa yake. Usiku wakuti apaiwe mmawa mwake, eyambisha chakulya cha nchingulo chapadela ndipo elamula kuti: “Mukochita vamene ivi ponikumbukila.”—Lk. 22:19.

3. Kansi tikambilane chinji mu nkhani ino?

³ Kagulu katontho ka ŵanthu amene opezeka pa Chikumbukilo cha imfwa ya Khilisitu ni ŵala amene ali na chiyembekezo choluta kululu. Koma mamiliyoni anyinji a ŵanthu amene ali na chiyembekezo chonkhala pano pachalo opezekasoti pa mwambo wamene uyu. Mu nkhani ino, tikambilane chifukwa chake magulu aŵili amene aŵa opezeka pa Chikumbukilo chaka chilichonse. Tikambilanesoti mapindu ŵatufwana keno tupezeka pa mwambo wamene uyu. Lomba tiyeni tikambilane vifukwa viyakine vuchitisha kuti ozozewa akopezekapo.

4. Ndaŵa yanji ozozewa akulya nkate na kumwa vinyu pa Chikumbukilo?

⁴ Chaka chilichonse, ozozewa amene opezeka pa mwambo wa Chikumbukilo akulya nkate na kumwa vinyu. Ndaŵa yanji ove akulya nkate na kumwa vinyu mu njila yoyenelela? Kuti tiyankhe konsho yamene iyi, tiyeni tikambilane vichitika pa usiku wosilijila wa moyo wa Yesu pano pachalo. Pavuli pa chakulya cha Pasika, Yesu echita chinthu chamene chichizaziŵika monga Chakulya cha Nchingulo cha Ambuya. Yove epeleka nkate na vinyu kuli atumwi ŵake okhulupilika okwana 11 ndipo eŵauja kuti alye na kumwa. Yesu eŵafotokozela za mapangano aŵili—pangano yanyowani na pangano ya Ufumu. * (Lk. 22:19, 20, 28-30) Mapangano amene aŵa esegula njila kuli atumwi komasoti kuli ŵanthu ayakine kuti akankhale mafumu komasoti ansembe kululu. (Chiv. 5:10; 14:1) Osalila ozozewa tyala, amene ali mmapangano aŵili amene aŵa, * niye ofunika kulya nkate na kumwa vinyu pa Chikumbukilo.

5. Kansi ozozewa oziŵa chinji vokhuza chiyembekezo chali nacho?

⁵ Chifukwa chiyakine chuchitisha ozozewa kufunishisha kupezekapo pa Chikumbukilo n’chakuti: Mwambo wamene uyu uŵapasa mwayi woganizila za chiyembekezo chawo. Yehova waŵapasa chiyembekezo chiweme ngako—chakuyankhala na moyo wosafwa na wosawonongeka kululu pamozi na ayawo a m’gulu ya 144.000, komasoti kuyatumikila pamozi na Yesu Khilisitu wamene epasiwa ulemelelo. Ndipo kupambana vonse, akapasiwe mwayi wa kuyankhala na Yehova Mulungu! (1 Akor. 15:51-53; 1 Yoh. 3:2) Ozozewa oziŵa kuti aitiwa kuyankhala na mwayi wapadela wamene uyu kululu. Koma kuti akalondelewe kululu, ofunika kupitilija kunkhala okhulupilika mpaka kufwa kwawo. (2 Tim. 4:7, 8) Ozozewa osangalala ngako akaganizila za chiyembekezo chawo chakuyankhala kululu. (Tit. 2:13) Lomba tyani ponena za a “mbelele ziyakine”? (Yoh. 10:16) Kansi n’vifukwa viyakine votyani vuŵachitisha kuti akopezeka pa Chikumbukilo?

6. Ndaŵa yanji a mbelele ziyakine opezekapo pa Chikumbukilo chaka chilichonse?

⁶ A mbelele ziyakine opezeka pa Chikumbukilo, osati kuyakulya vizindikilo, koma kuyalolela tyala. Mu 1938 ŵala ali na chiyembekezo chakuzankhala pano pachalo eitiwa koyamba kuti apezekepo pa Chikumbukilo. Nsanja ya Olonda ya March 1, 1938, inena kuti: “N’pofunika kuti [a mbelele ziyakine] akopezekapo pa mwambo wamene uyu nololela vamene vuchitika. . . . Yamene iyi ni nthawe yakuti nawo akosangalala.” Molingana na alwendo amene osangalala kupezeka pa ukwati, a mbelele ziyakine nawo osangalalasoti kupezekapo pa Chikumbukilo nololela tyala.

7. Ndaŵa yanji a mbelele ziyakine oyembekezela mwachidwi kumvwishila nkhani ya pa Chikumbukilo?

⁷ A mbelele ziyakine nawo oganizilasoti za chiyembekezo chawo. Ove oyembekezela mwachidwi kumvwishila nkhani ya pa Chikumbukilo, chifukwa mbali ikulu yukhuza vakuti azachite Khilisitu pamozi na olamulila ayake okwana 144.000 mu ulamulilo wa  vyaka 1.000. Mosogolelewa na Mfumu yawo Yesu Khilisitu, ŵala akuti akalamulile kululu azayavyane kuchinja chalo kunkhala paladaiso nochitisha ŵanthu omvwila kunkhala angwilo. Vunkhala vokondwelesha ngako kuli ŵanthu mamiliyoni anyinji, amene opezeka pa Chikumbukilo akoganizila za kukwanilishiwa kwa maulosi a m’Baibulo a kusogolo monga opezeka pa Yesaya 35:5, 6; 65:21-23; komasoti Chivumbulutso 21:3, 4. Keno ove olilinganija kuti ali m’chalo chanyowani pamozi na okondewa ŵawo, otang’isha chiyembekezo cha kusogolo komasoti chosankha chawo chakuti alekelini kutumikila Yehova.—Mt. 24:13; Aga. 6:9.

8. Kansi n’chifukwa chiyakine chotyani chuchitisha a mbelele ziyakine kuti akopezekapo pa Chikumbukilo?

⁸ Ganizilani chifukwa chiyakinesoti chuchitisha a mbelele ziyakine kuti akopezekapo pa Chikumbukilo. Ove ofuna kuwonesha chikondi chawo na kuyavya ozozewa. Mawu a Mulungu enenelatu kuti pazankhale mgwilizano pakati pa ozozewa na ŵala amene ali na chiyembekezo chakuzankhala pano pachalo. Motyani? Lomba tiyeni tikambilane visanzo vitontho.

9. Kansi ulosi wapa Zekariya 8:23 ufotokoza chinji vokhuza mwakumvwila a mbelele ziyakine ponena za ozozewa?

⁹ Ŵelengani Zekariya 8:23. Ulosi wamene uyu ufotokoza luweme ngako, mwakumvwila a mbelele ziyakine akaganizila za abale na alongo ŵawo amene ni ozozewa. Mawu akuti “Myuda” komasoti akuti “mwewo mweŵanthu” onena za gulu imozi ya ŵanthu yamene ni ozozewa amene —akali pano pachalo. (Aro. 2:28, 29) “Analume 10 ofumila m’vilaŵilo vonse va ŵanthu a mitundu iyakine” opanamila a mbelele ziyakine. Ove ‘okata ozozewa mwamphamvu’—nochita nawo vinthu mokhulupilika—polambila nawo pamozi pa kulambila kutuŵa. N’chifukwa chake, pa nsiku ya Chikumbukilo, a mbelele ziyakine kufumila pansi pa ntima owonesha kuti ochita vinthu mokatijana na ozozewa ponkhala nawo pamozi pa chochitika chamene ichi.

10. Kansi Yehova wachita chinji pokwanilisha ulosi upezeka pa Ezekieli 37:15-19, 24, 25?

¹⁰ Ŵelengani Ezekieli 37:15-19, 24, 25. Yehova ekwanilisha ulosi wamene uyu mwa kuchitisha kuti ozozewa na a mbelele ziyakine akokata ntchito mokatijana ngako. Ulosi wamene uyu utomola vokhuza ndodo ziŵili. Ŵala ali na chiyembekezo choluta kululu ali monga ni ndodo “ya Yuda.” (fuko yamene mwisankhiwa mafumu a Isiraeli), ndipo ŵala ali na chiyembekezo chakuzankhala pano pachalo ali monga ni ndodo “ya Efuraimu.” * Yehova ekatanija ndodo ziŵili kuti inkhale “ndodo imozi.” Vamene ivi vutanthauza kuti ove otumikila pamozi mokatijana mosogolelewa na Mfumu yawo imozi, Yesu Khilisitu. Chaka chilichonse ozozewa na a mbelele ziyakine ochitalini Chikumbukilo monga magulu aŵili osiyana, koma monga “gulu imozi” mosogolelewa na “chiŵeta mmozi.”—Yoh. 10:16.

11. Kansi “mbelele” zutomolewa pa Mateyu 25:31-36, 40 zuwonesha tyani kuti zuyavya abale a Khilisitu?

¹¹ Ŵelengani Mateyu 25:31-36, 40. “Mbelele” zechitomola Yesu mu fanizo yamene iyi zupanamila ŵala okhulupilika mu nthawe ino ya mapeto amene ali na chiyembekezo chakuzankhala pano pachalo—kapena kuti, a mbelele ziyakine. Ove oyavya abale osalila a Khilisitu mokhulupilika, makamaka poŵayavya kukwanilisha udindo ukulu walinawo—wolalikila nophunzisa ŵanthu pachalo chonse.—Mt. 24:14; 28:19, 20.

12-13. Kansi a mbelele ziyakine owonesha kuti oyavya abale a Khilisitu mu njila ziyakine zotyani?

 ¹² Chaka chilichonse kukasala masondo atontho kuti nsiku ya chikumbikilo ifwike, a mbelele ziyakine owonesha kuti oyavya abale a Khilisitu, mwa kukatako ntchito yapadela yamene yuchitika pachalo chonse yoitila ŵanthu achidwi ku Chikumbukilo. (Onani bokosi yakuti “ Kansi mukonzekela nthawe ya Chikumbukilo?”) Ove okonzasoti vonse vofunikila kuti Chikumbukilo chichitike m’mipingo yonse pachalo chonse, olo kuti mumpingo mwawo muliye aliyense wozozewa. A mbelele ziyakine osangalala ngako kuyavya abale a Khilisitu mu njila zoteti. Mbelele zamene izi zuziŵa kuti Yesu owona vonse vakuchitila abale ŵake ozozewa monga kuti ochitila yove wamene.—Mt. 25:37-40.

¹³ Mosaganizila za chiyembekezo chasu, kansi n’vifukwa viyakine votyani vamene tonse, vatupezekela pa Chikumbukilo?

14. Kansi Yehova na Yesu ewonesha tyani kuti otikonda ngako?

¹⁴Tumutembeja ngakosoti Yehova pamozi na Yesu chifukwa cha chikondi chechitiwonesha. Yehova wawonesha chikondi chake kuli sewo mu njila zinyinji. Koma njila yapadela yechitiwoneshela chikondi ni kutumija Mwana wake wokondewa kuti azatamane na kufwa chifukwa cha sewo. (Yoh. 3:16) Ndipo Yesu naye ewonesha chikondi chikulu, pololela kupeleka moyo wake chifukwa cha sewo. (Yoh. 15:13) Tingakwanishelini olo patontho kumujoshela Yehova na Yesu chikondi chechitiwonesha. Koma tingakwanishe kuwonesha kutembeja kwasu kupitila mu vinthu vatuchita pa moyo wasu wa nsiku na nsiku. (Akol. 3:15) Ndipo tupezekapo pa Chikumbukilo chifukwa chakuti tufuna kuganizila nokumbukila chikondi cha Yehova na Yesu kuli sewo komasoti kuwonesha kuti tuŵakonda.

15. Ndaŵa yanji ozozewa na a mbelele ziyakine otembeja ngako dipo?

¹⁵Tutembeja ngako mphaso ya dipo. (Mt. 20:28) Dipo ni yantengo wapatali ngako kuli ozozewa chifukwa yuŵapasa chiyembekezo chodabwisa. Chifukwa chokhulupilila nsembe ya Khilisitu, Yehova waŵayeja kuti ni olungama ndipo waŵatola monga ni ŵana ŵake. (Aro. 5:1; 8:15-17, 23) A mbelele ziyakine nawo otembeja dipo. Chifukwa chokhulupilila nsembe ya Khilisitu, ove owonewa kunkhala atuŵa pamenso pa Mulungu, okwanisha kumuchitila utumiki wopatulika ndipo ali na chiyembekezo chakuzafuma “m’chisauso chikulu.” (Chiv. 7:13-15) Njila imozi yakuwoneshela ozozewa komasoti a mbelele ziyakine kuti otembeja dipo ni kupezeka pa Chikumbukilo chaka chilichonse.

16. Kansi n’chifukwa chiyakine chotyani chatupezekela pa Chikumbukilo?

¹⁶ Chifukwa chiyakine chatupezekela pa Chikumbukilo n’chakuti tufuna kumvwila Yesu. Viliyekanthu kuti chiyembekezo chasu n’chotyani kusogolo, aliyense wa sewo ofuna kumvwila lamulo yechipeleka Yesu pa usiku wechiyambisha Chikumbukilo, lamulo yake ni yakuti: “Mukochita vamene ivi ponikumbukila.”—1 Akor. 11:23, 24.

17. Kansi Chikumbukilo chutiyavya tyani kuvwendela pafupi na Yehova?

¹⁷Tunkhala pa ushamwali uweme na Yehova. (Yak. 4:8) Monga mwataphunzilila, Chikumbukilo chutipasa mwayi woganizila za chiyembekezo chatipasa Yehova noganizila za chikondi chikulu chechitiwonesha.  (Yer. 29:11; 1 Yoh. 4:8-10) Keno tuganizila za chiyembekezo chasu chakusogolo komasoti chikondi ngacho-ngacho cha Mulungu kuli sewo, tukulisha chikondi chasu pa Yehova notang’isha ushamwali wasu na yove.—Aro. 8:38, 39.

18. Kansi kuganizila chisanzo cha Yesu kutilimbikisa kuchita chinji?

¹⁸Tulimbikisiwa kukonkheja chisanzo cha Yesu. (1 Pet. 2:21) M’masiku akuti Chikumbukilo chasala patontho kuchitika, tuika ngako maganizo pa nkhani za m’Baibolo zokhuza sondo yosilijila ya moyo wa Yesu pano pachalo, imfwa yake komasoti kuuka kwake. Pavuli pake, pa nsiku ya Chikumbukilo, nkhani yamene yulaŵiliwa yutikumbusha za chikondi chali nacho Yesu kuli sewo. (Aef. 5:2; 1 Yoh. 3:16) Keno tuŵelenga za chisanzo cha Yesu cholipeleka nochiganizila ngako, tulimbikisiwa “kupitilija kuyenda mwechiyendela yove.”—1 Yoh. 2:6.

19. Kansi tingachite tyani kuti tipitilije kunkhala pa ushamwali na Mulungu?

¹⁹Tunkhala osimikijila kupitilija kunkhala pa ushamwali na Yehova. (Yuda 20, 21) Tupitilija kunkhala pa ushamwali na Mulungu mwa kuchita vonse vatingakwanishe kuti tikomukonkheja, kutuŵisha zina yake komasoti kukondwelesha ntima wake. (Miy. 27:11; Mt. 6:9; 1 Yoh. 5:3) Chikumbukilo chutichitisha kunkhala osimikijila kufumila pansi pa ntima kuchita vinthu vukondwelesha Mulungu nsiku zonse nochita monga tumuuja kuti: ‘Newo nufuna kupitilija kunkhala m’chikondi chanu mpaka kale-kale!’

20. Kansi tili na vifukwa votyani vomvwika vopezekela pa Chikumbukilo?

²⁰ Keno tili na chiyembekezo chakuyankhala kululu mpaka kale-kale olo chakuzankhala pano pachalo, tili na vifukwa vomvwika vopezekela pa Chikumbukilo. Chaka chilichonse tikasonkhana pa nsiku yamene iyi, tukumbukila imfwa ya munthu wamene tumukonda ngakosoti, Yesu Khilisitu. Kupambana vonse, tukumbukila chinthu chikulu ngako chuwonesha chikondi—chamene ni chikondi chechitiwonesha Yehova popeleka Mwana wake kuti ankhale dipo. Chino chaka, Chikumbukilo chizachitike n’chingulo pa Chisanu pa 15  April, 2022. Tumukonda ngako Yehova pamozi na Mwana wake, tetyo pa nsiku yokumbukila imfwa ya Yesu, paliye chinthu chilichonse chingankhale chofunika ngako kuli sewo kupambana kupezeka pa Chikumbukilo.