NKHANI YOPHUNZILA N.° 1
“Osakila-sakila Yehova azasoŵelini chilichonse chiweme”
LEMBA YA CHAKA CHA 2022:“Osakila-sakila Yehova azasoŵelini chilichonse chiweme.”—SAL. 34:10.
NYIMBO N.° 4“Yehova ni mchiŵeta wangu”
VATIKUTI TIPHUNZILE *
Davide enzewona kuti ‘enzesoŵalini chinthu chilichonse chiweme’ olo pa nthawe ya mavuto (Onani ndime 1–3.) *
1. Kansi Davide ekumana na vuto yotyani?
DAVIDE enzenkhala wothaŵa-thaŵa pa moyo wake. Sauli, wamene enze mfumu yamphamvu ya ku Isiraeli, enzefuna kupaya Davide. Nthawe iyakine Davide pechisoŵa chakulya, yove epanama mu tawuni ya Nobu, kwechisenga mitanda 5 ya nkate. (1 Sam. 21:1, 3) Pavuli pake yove na alumbwana ŵenze nawo ethaŵila ku chinkhwema kwa chimwala. (1 Sam. 22:1) Kansi vichitika tyani kuti Davide akumane na vuto yamene iyi?
2. Kansi Sauli eliika tyani pangozi? (1 Samueli 23:16, 17)
2 Sauli enzemuchitila njilu ngako Davide, chifukwa chakuti ŵanthu anyinji enzemukonda Davide komasoti enzemutamanda chifukwa cha nkhondo zechipambana. Sauli enzeziŵasoti kuti chifukwa cha kusamvwila kwake vichitisha kuti Yehova amukane kuti ankhale mfumu ya Isiraeli komasoti kuti Yehova enze esankha Davide kuti ankhale pa mpando wachifumu. (Ŵelengani 1 Samueli 23:16, 17.) Monga mfumu ya Isiraeli, Sauli enze na chigulu chankhondo chikulu na omukonkhelela anyinji, n’chifukwa chake Davide ethaŵa kuti apulumushe moyo wake. Kansi Sauli enzeganiza kuti kuniyata nkhondo kungakangishe Mulungu kuika Davide kuti ankhale mfumu? (Yes. 55:11) Baibolo yunenalini chilichonse, koma tingankhale osimikijila za chinthu chimozi: Sauli enze pangozi. Onse olimbana na Yehova akungotaya nthawe yawo!
3. Kansi Davide echimvwa tyani pechikumana na mavuto pa moyo wake?
3 Davide enze wolichefya. Yove enze akaliyesankhiwa kuti ankhale mfumu ya Isiraeli. Yehova niye enze emusankha kuti ankhale mfumu. (1 Sam. 16:1, 12, 13) Sauli eyamba kuwona Davide monga ni mdani woyofya. Koma Davide aliyeimbe mulandu Yehova pa ngozi yechikumana nayo; aliyedandaule za kuchepa kwa chakulya komasoti kunkhala ku chinkhwema kwa chimwala. Mmalomwake, vuwoneka kuti pa nthawe yenzefisama ku chinkhwema niye pechiimba nyimbo iweme yamene iyi yotamanda yamene ili na mawu a mutu wa ino nkhani yasu, amene akuti: “Osakila-sakila Yehova azasoŵelini chilichonse chiweme.”—Sal. 34:10.
4. Kansi tikambilane makonsho otyani, ndipo ndaŵa yanji makonsho amene aŵa ni ofunika?
4 Ŵano masiku anyinji mwa atumiki a Yehova okumana na vuto ya kusoŵa kwa chakulya na vinthu viyakine vofunika pa moyo. * Vamene ivi niye vachitikila anyinji mwa atumiki a Yehova makamaka nkati mwa mulili wa COVID–19. Ndipo patuvwendelelana na “chisauso chikulu” tikumane na mavuto anyinji ngako pa moyo wasu. (Mt. 24:21) Tili na vinthu vamene ivi m’maganizo ŵasu, tiyeni tiyankhe makonsho okwana 4: Kansi Davide ‘aliyesoŵe chilichonse chiweme’ mu njila yotyani? Ndaŵa yanji tufunika kuphunzila kunkhala okhutila? Ndaŵa yanji tufunika kusimikijila kuti Yehova akotisamalila? Kansi tingakonzekele tyani vinthu vakusogolo?
“NIZASOŴELINI KANTHU”
5-6. Kansi Salimo 23:1–6 yutiyavya tyani kumvwisha venzetanthauza Davide pechinena kuti atumiki a Mulungu “azasoŵelini chilichonse chiweme”?
5 Kansi Davide enzetanthauza chinji pechinena kuti atumiki a Yehova “azasoŵelini chilichonse chiweme”? Tingankhaleko na chithunzi pokambilana mawu olingana na amene aŵa opezeka mu Salimo 23. (Ŵelengani Salimo 23:1–6.) Davide eyamba salimo yamene iyi na mawu akuti: “Yehova ni nchiŵeta wangu. Nizasoŵelini kanthu.” Mu salimo yonse, Davide efotokoza vinthu vofunika ngako vamene vinkhalepo mpaka kale-kale—monga madaliso ŵenzemupasa Yehova chifukwa chakuti enze Nchiŵeta wake. Yove enena kuti Yehova enzemusogolela “mmayendedwe ŵake mwachilungamo,” nomuyavya mokhulupilika panthawe yovuta na panthawe iweme. Ndipo Davide enzeziŵa kuti kunkhala mu “nsipu wobiliŵila” wa Yehova kwenzetanthauzalini kuti akokumanalini na mavuto. Enzeziŵasoti kuti nthawe ziyakine, yove angakumane na vinthu vofokesha, vamene eviyelekezela na kuyenda mu “chidikha-dikha cha mfinzi ngako,” komasoti kuti azankhale na adani. Koma chifukwa chakuti Yehova enze Nchiŵeta wake, Davide ‘enzeyopalini kanthu.’
6 Tetyo, apa tafwana yankho ya konsho yakuti: Kansi Davide ‘aliyesoŵe chilichonse chiweme’ mu njila yotyani? Yove enze na vinthu vonse vofunika kuti ankhale pafupi na Yehova. Kuti ankhale munthu wosangalala venzedalilalini kuti ankhale na vinthu vinyinji. Davide enzenkhala wokhutila na vinthu venzemupasa Yehova. Chofunika ngako kuli yove chenze madaliso na chitetezo chofumila kwa Mulungu wake.
7. Mokatijana na Luka 21:20-24, kansi Akhilisitu oyambilila a ku Yudeya ekumana na mavuto otyani?
7 Kufumila pa mawu ŵa Davide tingakwanishe kuwona kufunika konkhala na maganizo aweme pa vinthu vakuthupi. Tingankhale osangalala na chuma chatili nacho, koma tufunikalini kuchiwona kunkhala chofunika ngako pa moyo wasu. Iyi yenze mfundo yofunika ngako yechimvwisha Akhilisitu ayakine a m’vyaka voyambilila amene enzenkhala ku Yudeya. (Ŵelengani Luka 21:20-24.) Yesu enze eŵachenjeja kale kuti izafwike nthawe pamene tawuni ya Yerusalemu “izazengulukiwe na magulu a nkhondo.” Pa nthawe yamene iyi, ove enzefunika “kuthaŵila ku malupili.” Kuthaŵa kwawo sembe kwipulumusha moyo wawo, koma sembe kwichitisha kuti vinthu vinkhale vovuta pa moyo wawo. M’vyaka vakuvuli, Nsanja ya Olonda inena kuti: “Ove esiya minda komasoti mang’anda, ndipo aliyetakule olo vinthu vawo vonse. Ponkhala na chidalilo chakuti Yehova aŵayavye komasoti aŵateteze, eika kulambila Yehova pamalo oyamba kupambana chinthu chilichonse chamene chenzewoneka kunkhala chofunika.”
8. Kansi tingaphunzilepo chinji pa vinthu vichitikila Akhilisitu oyambilila aku Yudeya?
8 Kansi tingaphunzile chinji kufumila pa vinthu vichitikila Akhilisitu oyambilila a ku Yudeya? Nsanja ya Olonda yatomolewa kwalombapano inena kuti: “Kusogolo, payakine tingazakumana na mayeselo okhuza mwatuwonela vinthu vatili navo. Kansi tuwona kuti vinthu vamene ivi n’vofunika ngako? Olo tuwona kuti chofunika ngako ni kupulumuka kwa ŵanthu onse amene ali ku mbali ya Mulungu? Mapeto akazafwika, tingazakumana na mavuto ndipo payakine tizafunikile kusiya vinthu viyakine. Tizafunikile kunkhala okonzeka kuchita chilichonse chingafunikile kuti tipulumuke, monga mwechichitila Akhilisitu oyambilila amene ethaŵa ku Yudeya.” *
9. Kansi mulimbikisiwa tyani kufumila pa malangizo ŵechipeleka Paulo kuli Akhilisitu a Chiheberi?
9 Kansi mukwanisha kuganizila mwevinkhalila vovuta kuli Akhilisitu amene ŵala pechisiya vinthu vawo vonse noyambasoti moyo wanyowani? Ove enzefunika kunkhala na chikhulupililo nodalila Yehova kuti akoŵapasa vinthu vofunika pa moyo. Koma penzesoti chinthu chiyakine chamene sembe chiŵayavya. Papita vyaka 5 Aroma akaliyezenguluka Yerusalemu, ntumwi Paulo epeleka malangizo aweme kuli Akhilisitu a Chiheberi, akuti: “Moyo wanu unkhale wosakonda ndalama, koma munkhale okhutila na vamuli navo pa nthawe yamene iyo. Pakuti Mulungu enena kuti: ‘Nikusiyenilini olo kukutayani na patontho kumo.’ Mwakuti tinkhale otang’a ntima ndipo tinene kuti: ‘Yehova niye mthandizi wangu. Ningayopelini. Munthu anganichite chinji?’” (Ahe. 13:5, 6) Kulaŵila chendi, onse amene emvwila malangizo ŵechipeleka Paulo Aroma akaliyefwika, evutika kuti adjaile kunkhala na moyo wosafuna vinthu vinyinji mmang’anda ŵawo anyowani. Ove enzesimikijila kuti Yehova akoŵapasa vinthu vofunika pa moyo wawo. Mawu a Paulo otisimikijila kuti nase tingankhale na chidalilo chakuti Yehova akotipasa vinthu vofunika pa moyo.
“TIKOKHUTILA NA VINTHU VAMENE IVI”
10. Kansi Paulo etifotokozela “chisinsi” chotyani?
10 Paulo epelekasoti malangizo olingana na amene aŵa kwa Timoteyo, ndipo okatasoti ntchito kuli sewo. Yove elemba kuti: “Tetyo, tikaŵa na chakulya, vovwala na poyona, tikokhutila na vinthu vamene ivi.” (1 Tim. 6:8) Kansi vamene ivi vutanthauza kuti tufunikalini kulya vakulya viweme, kunkhala na ng’anda iweme, olo kugula vovwala vanyowani? Ivi niyelini venzetanthauza Paulo. Yove enzetanthauza kuti tikonkhala okhutila na chinthu chilichonse chatili nacho. (Afil. 4:12) Chamene ichi niye chenze “chisinsi” cha Paulo. Chuma chasu cha ntengo wapatali ni ushamwali wasu na Mulungu, osati chinthu chilichonse chatili nacho.—Hab. 3:17, 18.
Aisiraeli ‘aliyesoŵe chinthu chilichonse’ kwa vyaka 40 vechinkhala m’chipululu. Kansi sewo tukhutila na vatili navo palipano? (Onani ndime 11.) *
11. Kansi tuphunzila chinji pa nkhani yokhutila kufumila pa vinthu vechiuja Aisiraeli Mose?
11 Vinthu vatuganizila kunkhala navo pa moyo wasu payakine vingalinganelini na vakuganizila Yehova. Ganizilani vechinena Mose pouja Aisiraeli pechisila vyaka 40 m’chipululu. Yove enena kuti: “Yehova Mulungu wanu wakudalisani pa chilichonse chayuchita kwanja yanu. Yove oziŵa za kuyenda kwanu kupita m’chipululu chikulu chamene ichi. Yehova Mulungu wanu wankhala namwe vyaka 40 vamene ivi, ndipo muliyesoŵe kanthu.” (Deut. 2:7) Pa vyaka 40 vamene ivi, Yehova enzeŵapasa mana Aisiraeli kuti akokulya. Vovwala vawo— ngavo-ngavo vechifuma navo ku Iguputo—viliyesakale. (Deut. 8:3, 4) Olo kuti ayakine enzewona kuti vinthu vamene ivi venze vosakwanila, Mose ekumbusha Aisiraeli kuti ove enze na vinthu vonse venzefunikila. Yehova angankhale wosangalala keno sewo tingaphunzile kunkhala okhutila—nowona kuti vinthu vitontho vakutipasa ni vofunika, komasoti tikowona kuti kutembeja vinthu vamene ivi, ni daliso ikulu.
TIKOKHULUPILILA KUTI YEHOVA AZATISAMALILE
12. Kansi n’chinji chuwonesha kuti Davide enzelidalilalini koma enzedalila Yehova?
12 Davide enzeziŵa kuti Yehova ni wokhulupilika ndipo osamalila ngako ŵanthu amene omukonda. Olo kuti moyo wake wenze pangozi penzelemba Salimo 34, mwachikhulupililo Davide enzewona kuti “mngelo wa Yehova” wamanga nsasa “momuzenguluka.” (Sal. 34:7) Vingachitike kuti Davide enzeyelekezela mngelo wa Yehova na nsodja wamene ali kunkhondo wamene nthawe zonse onkhala tchelu kuti awone kwamene kungachokele mdani. Olo kuti Davide enze nsodja wotang’a ntima ndipo Yehova enze emulonjeza kuti azankhale mfumu, yove aliyedalile luso yake yoponya miyala olo yokatishila ntchito chibemba kuti aliteteze ku mdani. (1 Sam. 16:13; 24:12) Davide edalila Mulungu, ndipo enzekhulupilila kuti mngelo wa Yehova opulumusha onse ‘oyopa Yehova.’ N’chendi kuti tuyembekezelalini kutetezewa modabwisa masiku ŵano. Koma tuziŵa kuti onse odalila Yehova, olo amwalile palipano azalondele moyo wosasila.
Nkati mwa chisauso chikulu, magulu ankhondo a Gogi wa ku Magogi payakine azayeje kuzatiukila m’mang’anda mwasu. Koma tingankhale osimikijila kuti Yesu pamozi na angelo ŵake azawone vakuti azachite magulu amene awo ndipo azatiteteze (Onani ndime 13)
13. Kansi Gogi waku Magogi akazatiukila, ndaŵa yanji tizawoneke monga osatetezeka, koma kansi n’chinji chikuti chizatiyavye kuti osati tinkhale na wowa? (Onani chithunzi cha pachikuto.)
13 Kwalombapano kusogolo, chidalilo chasu chakuti Yehova angatiteteze chizayesewe. Gogi waku Magogi, kapena kuti mgwilizano wa m’vyalo, azaukile ŵanthu a Mulungu, ndipo miyoyo yasu izawoneke monga ili pa ngozi. Pa nthawe yamene iyo tizafunike kusimikijila kuti Yehova akwanishe kutipulumusha. Mitundu ya ŵanthu ikotiwona monga mbelele zosatetezeka. (Eze. 38:10-12) Tizankhale monga tiliye visulo vankhondo, komasoti osaphunzisiwa nkhondo. Ŵanthu a mitundu akotiwona monga n’vosavuta kutigonjesa. Koma ove azaziŵelini kuti angelo a Yehova ni okonzeka kutiteteza—koma sewo tizaziŵe vamene ivi chifukwa cha chikhulupililo. Koma kansi n’chendi kuti ŵanthu a mitundu azawonelini vamene ivi? Eye azawonelini, chifukwa ove aliye menso auzimu. Ove azadabwe ngako kuwona magulu ŵa angelo oniyata nkhondo kuti atipulumushe!—Chiv. 19:11, 14, 15.
TIKOKONZEKELA VAKUSOGOLO LOMBA TETI
14. Kansi tingachite tyani palipano pokonzekela vakusogolo?
14 Kansi tingachite tyani kuti lomba teti tikokonzekela vakusogolo? Chinthu choyamba, tufunika kunkhala na maganizo aweme pa nkhani ya chuma, poziŵa kuti nsiku iyakine tizasiye vinthu vonse vatili navo. Tufunika kunkhala okhutila ndipo tikonkhala osangalala ngako chifukwa chonkhala pa ushamwali wotang’a na Yehova. Tikamuziŵa luweme Mulungu wasu niye patingazankhala osimikija ngako kuti azatiteteze akazatiukila Gogi waku Magogi.
15. Kansi ni vinthu votyani vichitikila Davide penze mulumbwana vamene vimuphunzisa kuti Yehova akomuyavya nthawe zonse?
15 Ganizilanisoti vinthu viyavya Davide komasoti vamene vingatiyavye kukonzekela mayeselo ŵatingakumane nawo. Davide enena kuti: “Laulani ndipo muwone kuti Yehova ni muweme; wodala ni munthu wamphamvu wamene outukila kuli yove.” (Sal. 34:8) Mawu amene aŵa ofotokoza chifukwa chake Davide enzeziŵa kuti enzefunika kudalila Yehova. Davide enzedalila Yehova nthawe zonse, ndipo Mulungu wake aliyemusiye olo patontho. Penze mulumbwana, Davide pechikumana na Goliyati wamene enze Mfilisiti woziŵa kuniyata nkhondo, emuuja kuti: “Lelo Yehova akupeleke mmanja mwangu.” (1 Sam. 17:46) Pavuli pake, Davide echiyatumikila mfumu Sauli, wamene eyeja-yeja maulwendo anyinji kuti amupaye. Koma “Yehova enze naye” Davide. (1 Sam. 18:12) Chifukwa chakuti Davide enze eyavyiwapo kale na Yehova kuvuli, enzeziŵa kuti Yehova amuyavye pa mavuto ŵake.
16. Kansi ‘tingalaule’ ubwino wa Yehova mu njila zotyani?
16 Tikodalila ngako malangizo a Yehova palipano, tinkhale osimikijila ngako kuti azatiyavye kusogolo. Tufunika kunkhala na chikhulupililo nonkhala okonzeka kudalila Yehova kuti tikwanishe kusenga holide kuli abwana ŵasu, kuti tikapezeke pa nsonkhano wadela olo wachigawo, olo kuŵasenga kuti atichefyeleko nthawe yokata ntchito na cholinga chakuti tikokwanisha kupezeka pamisonkhano yampingo, nonkhala na nthawe ikulu yoluta mu utumiki. Tiyelekezele kuti abwana ŵasu akana vataŵasenga ndipo atichosa ntchito. Kansi tili na chikhulupililo chakuti Yehova atisiyelini komasoti kuti nthawe zonse akotipasa vinthu vatufunikila? (Ahe. 13:5) Anyinji amene ali mu utumiki wa nthawe zonse angatifotokozele vinthu viŵachitikila vamene vuwonesha mwechiŵayavyila Yehova pa nthawe yenzefunikila ngako thandizo. Yehova ni wokhulupilika.
17. Kansi lemba ya chaka cha 2022 ni yotyani, ndipo ndaŵa yanji ni yoyenelela?
17 Pakuti Yehova ali ku mbali yasu, tiliye chifukwa chilichonse choyopela vinthu vikuti vizachitike kusogolo. Mulungu wasu azatisiyelini olo patontho, malinga keno tuika Ufumu wake pa malo oyamba pa moyo wasu. Pofuna kutikumbusha kufunika kokonzekela palipano mavuto ŵatingazakumana nawo kusogolo, nodalila Yehova kuti azatisiyelini olo patontho, Bungwe Yutonga yasankha lemba ya Salimo 34:10 kunkhala lemba ya chaka cha 2022, yamene yunena kuti: “Osakila-sakila Yehova azasoŵelini chilichonse chiweme.”
NYIMBO N.° 35 ‘Mukosimikijila kuti vinthu vofunikila ngako ni vini’
^ ndime 5 Lemba ya chaka cha 2022 yafumila pa Salimo 34:10 yamene yunena kuti: “Koma osakila-sakila Yehova azasoŵelini chilichonse chiweme.” Anyinji mwa atumiki a Yehova okhulupilika ofwana ndalama zitontho olo kunkhala na vinthu vitontho. Ndaŵa yanji tinganene kuti ove “azasoŵelini chilichonse chiweme?” Kansi kumvwisha tanthauzo ya vesi yamene iyi kungatiyavye tyani kuti tikonzekele mavuto akuza kusogolo?
^ ndime 4 Onani “Mafunso Ochokera Kwa Owerenga” mu Nsanja ya Olonda ya 15 September, 2014.
^ ndime 54 MAWU OFOTOKOZA VITHUNZI: Olo pa nthawe yenzefisama m’chinkhwema kuthaŵa Mfumu Sauli, Davide enzetembeja vinthu venzemupasa Yehova.
^ ndime 56 MAWU OFOTOKOZA VITHUNZI: Pavuli pakuti Aisiraeli afuma mu Iguputo, Yehova eŵapasa mana kuti akokulya ndipo echitisha kuti vovwala vawo osati visakale.