1. Kansi Yehova ekuchitilani chinji mwewo?

KANSI mwewo mwinkhala tyani mmozi wa Mboni za Yehova? Payakine mwewo mwichimvwa “uthenga uweme”​—ulwendo woyamba kufumila kuli makolo ŵanu, kuli muyanu wakuntchito olo pa nthawe yamene mmozi wa Mboni za Yehova pechifwika kung’anda kwanu penzelalikila. (Mk. 13:10) Pavuli pake, munthu muyakine etola nthawe yake ikulu komasoti echita khama ngako kukuphunzisani Baibolo. Nkati mophunzila Baibolo, mwewo mwiyamba kukonda Yehova ndipo mwiphunzila kuti yove okukondani mwewo. Yehova ekudonselani ku choonadi, ndipo lomba, chifukwa chonkhala wophunzila wa Yesu Khilisitu, mwewo muli na chiyembekezo chakuzankhala na moyo mpaka kale-kale. (Yoh. 6:44) Mosakaikila, mwewo mumutembeja Yehova ndaŵa yakuti Yove ekatishila ntchito munthu muyakine kuti akuphunziseni choonadi komasoti kuti Yove ekulondelani mwewo monga ntumiki Wake.

2. Kansi tikambilane chinji mu nkhani ino?

² Lomba pataziŵa choonadi, tili na mwayi woyavya ŵanthu ayakine kuti akonkhane nase pa njila yaku moyo. Payakine chingankhale chosavuta kuŵalalikila ŵanthu, koma kungankhale kovuta kuti tikonshe munthu muyakine keno yove angafune kuphunzila nase Baibolo, olo kuti tiphunzile Baibolo na munthu muyakine. Kansi mwewo namwe mukumvwa tetyo? Keno n’tetyo, payakine mungafwane ayakine mwa malangizo amene ali mu nkhani ino. Tikambilane vinthu vamene vutilimbikisa kuti tikopanga ophunzila. Tikambilanesoti mwatingachitile kuti tipilile mavuto amene angatikangishe kuti tikochitisha phunzilo ya Baibolo. Choyamba, tiyeni tikambilane chifukwa chake tufunika kuŵalalikila ŵanthu komasoti kuŵaphunzisa uthenga uweme.

3. Ndaŵa yanji sewo tulalikila?

³ Yesu penze pachalo, elamula ophunzila ŵake kuti akate ntchito  yamene ili na mbali ziŵili. Choyamba, yove eŵauja kuti akolalikila uthenga uweme wa Ufumu, ndipo eŵawonesha mwangachitile vamene ivi. (Mt. 10:7; Lk. 8:1) Mwachisanzo, Yesu euja ophunzila ŵake vangachite keno ŵanthu omvwishila uthenga wa Ufumu komasoti eŵauja vangachite keno ŵanthu omvwishilalini uthenga wa Ufumu. (Lk. 9:2-5) Yove efotokozasoti kuti ophunzila ŵake azalalikile kuli ŵanthu anyinji komasoti mmalo anyinji pechinena mawu akuti ophunzila ŵake azachitile “umboni ku mitundu yonse.” (Mt. 24:14; Mac. 1:8) Viliyekanthu kuti ŵanthu omvwishila uthenga olo yayi, Yesu elamula ophunzila ŵake kuti akouja ŵanthu vokhuza Ufumu wa Mulungu komasoti vaukuti uzakwanilishe.

4. Mokatijana na lemba ya Mateyu 28:18-20, kansi tufunika kuchita chinji kuyangijila pa kulalikila vokhuza Ufumu?

⁴ Kansi mbali yachiŵili yechilamula ophunzila ŵake Yesu kuti achite yenze yakuti tyani? Yove euja ophunzila ŵake kuti akophunzisa ŵanthu kuti akomvwila vinthu vonse vechilamula yove. Ŵanthu ayakine payakine anganene kuti lamulo ya Yesu yakuti akolalikila nophunzisa yenze ya Akhilisitu oyambilila ŵeka tyala, koma kansi vamene ivi ni vachendi? Yayi, Yesu ewonesha kuti ntchito yofunika ngako yamene iyi izachitike mpaka ŵano masiku ŵasu olo kuti “mpaka nthawe ya mapeto a nthawe ino.” (Ŵelegani Mateyu 28:18-20.) Vuwoneka kuti Yesu epeleka lamulo yamene iyi pechiwonekela kuli ophunzila ŵake opitilila 500. (1 Akor. 15:6) Ndipo m’mesomphenya ŵechiwonesha Yohane, Yesu ewonesha luweme kuti ofuna kuti ophunzila ŵake onse akoyavya ayakine kuphunzila vokhuza​—Chiv. 22:17.

5. Mokatijana na lemba ya 1 Akorinto 3:6-9, kansi Paulo epeleka fanizo yotyani yuwonesha kuti pali kukatijana pakati pa kulalikila na kuphunzisa?

⁵ Ntumwi Paulo elinganija ntchito yopanga ophunzila na kulima mbewu, powonesha kuti tufunika kuchita vinyinji osati tyala kungokomola mbewu. Yove ekumbusha Akorinto kuti: “Newo nikomola, Apolo etilila . . . Mwewo nimwe munda wa Mulungu wamene ulimiwa.” (Ŵelengani 1 Akorinto 3:6-9.) Sewo nise antchito “m’munda wa Mulungu.” Tetyo tikolalikila niye kuti tukomola mbewu ndipo tikophunzisa niye kuti tutilila. (Yoh. 4:35) Koma tuziŵa kuti Mulungu niye okulisha mbewu, olo kuti, yove niye odonsa ŵanthu kuti awele kuli yove.

6. Keno sewo tuphunzisa ŵanthu, kansi tufunika kuŵayavya kuchita chinji?

⁶ Sewo tusakila ŵanthu amene ali na “maganizo aweme amene angaŵayavye kuzafwana moyo wosasila.” (Mac. 13:48) Kuti ŵanthu amene aŵa ankhale ophunzila, tufunika kuŵayavya (1) kumvwishisha, (2) kukhulupilila, komasoti (3) kukatishila ntchito vinthu vakuphunzila kufumila m’Baibolo. (Yoh. 17:3; Akol. 2:6, 7; 1 Ates. 2:13) Onse mumpingo angayavye ophunzila Baibolo poŵawonesha chikondi komasoti kuŵalondela luweme akayamba kufwika pamisonkhano. (Yoh. 13:35) Wala ochitisha phunzilo ya Baibolo angafunikesoti kutola nthawe ikulu komasoti mphamvu kuyavya wophunzila kuti achinje vinthu vakukhulupilila vamene ‘vizikika mwamphamvu’ muli yove olo miyambo iyakine. (2 Akor. 10:4, 5) Payakine pangapite miyezi inyinji kuti muyavye munthu kuchinja vinthu vamene ivi pa moyo wake kuti yove ayenelele kuyabatiziwa. Koma kuchinja vinthu vamene ivi ni kopindulisha ngako.

7. Ndaŵa yanji sewo tulalikila ayakine komasoti kuŵaphunzisa uthenga uweme?

⁷ Ndaŵa yanji sewo tuŵalalikila ŵanthu komasoti kuŵaphunzisa kuti ankhale ophunzila? Choyamba, ndaŵa yakuti sewo tukonda Yehova. Keno mwewo muchita vonse vamungakwanishe kuti mukonkheje lamulo yolalikila nopanga ophunzila, mwewo muwonesha kuti mukonda Mulungu. (1 Yoh. 5:3) Ganizilani ivi: Mwewo muŵalalikila ŵanthu ndaŵa yakuti mukonda Yehova. Kansi venze vosavuta kuli mwewo kuti mumvwile lamulo yolalikila ŵanthu? Vuwonekelatu kuti  yayi. Kansi mwewo pemwiluta kuyalalikila nsiku yoyamba, mwenzechita wowa? Mosakaikila mwewo mwenzechita wowa! Koma mwewo mwenzeziŵa kuti ntchito yamene iyi niye yakufuna Yesu kuti muichite, ndipo mwewo mwimvwila lamulo yamene iyi. Mosakaikila, m’kupita kwa nthawe, vinkhala vosavuta kuli mwewo kuti mukokata ntchito yamene iyi yolalikila. Lomba kansi mwewo mukumvwa tyani pa nkhani yochitisha phunzilo ya Baibolo? Kansi muchita wowa mukaganizila vamene ivi? Payakine mukumvwa tetyo. Tetyo, keno mwewo mungamusenge Yehova kuti akuyavyeni kusilija wowa wanu nonkhala wotang’a ntima kuti muyambe kuchitisha phunzilo ya Baibolo, Yehova akuyavyeni kukulisha ntima wofuna kupanga ophunzila.

8. Mokatijana na lemba ya Maliko 6:34, kansi ni chinjisoti chingatichitishe kuti tiphunzise ayasu?

⁸ Chachiŵili, kukonda ŵanthu kutichitisha kuti tikoŵaphunzisa choonadi. Mwachisanzo, Yesu na ophunzila ŵake enze eŵeŵa ngako ndaŵa yakuti enze ekata ntchito ikulu yolalikila. Ove enzefunikila malo ayakine kuti apumuleko, koma gulu ikulu ya ŵanthu iŵakonkhelela. Yesu eŵamvwila chifundo ŵanthu amene awo ndipo eyamba kuŵaphunzisa “vinthu vinyinji.” (Ŵelengani Maliko 6:34.) Yove enzekata ntchito mwakhama olo akankhala kuti waŵeŵa. Ndaŵa yanji? Yesu eganizila mwenzemvwila ŵanthu amene awo. Yove ewona mavuto ŵenzekumana nawo​—ewonasoti kuti enzefunikila kunkhala na chiyembekezo—​kuŵayavya. Masiku ŵano ŵanthu alisoti na mavuto ndipo ofunikila kunkhala na chiyembekezo, olo payakine angawoneke monga alikale osangalala komasoti okhutila na moyo wawo. Ove ali monga ni mbelele zamene zasoŵa ndipo ziliye chiŵeta kuti azisogolele. Ntumwi Paulo enena kuti ŵanthu oteti omuziŵalini Mulungu komasoti aliye chiyembekezo. (Aef. 2:12) Ove ali pa “njila yuloŵela ku chiwonongeko”! (Mt. 7:13) Sewo tikawona kuti niye mwaulili moyo wa ŵanthu amugawo gawo yasu, chifundo komasoti chikondi vutichitisha kuti tiŵayavye. Ndipo njila iweme yatingaŵayavyilemo ni kulipeleka kuti tiŵaphunzise Baibolo.

9. Mokatijana na lemba ya Afilipi 2:13, kansi Yehova angakuyavyeni tyani?

⁹ Payakine mwewo muchita wowa kuchitisha phunzilo ya Baibolo ndaŵa yakuti muziŵa kuti mufunikile kutola nthawe ikulu yokonzekela komasoti yochitisha phunzilo. Keno mwewo niye mwamumvwila teti, muujeni Yehova. Musengeni yove kuti akuyavyeni kunkhala na ntima wofuna kufwana munthu wamene ofuna kuphunzila Baibolo. (Ŵelengani Afilipi 2:13.) Ntumwi Yohane otisimikijila kuti Mulungu oyankha mapemphelo okatijana na chifunilo Chake. (1 Yoh. 5:14, 15) Tetyo, nkhalani osimikijila kuti Yehova akuyavyeni kunkhala na ntima wofuna kuphunzisa ŵanthu.

10-11. Kansi ni chinji chingatikangishe kuchitisha phunzilo ya Baibolo?

¹⁰ Sewo tuziŵa kuti kuphunzisa ni chinthu chofunika ngako olo kuti tukumana na mavuto amene angatikangishe kuchita vinyinji, popanga ophunzila monga ni mwetenzefunila kuchitila. Tiyeni tikambilane ayakine mwa mavuto amene aŵa komasoti mwatingaŵasilijile.

¹¹ Payakine tingakwanishelini kuchita vinyinji monga ni mwetenzefunila. Mwachisanzo, ofalisa ayakine ni achikulile ngako olo payakine ali na vuto ya thanzi. Kansi umu niye mwavilili pa moyo wanu? Keno n’tetyo, ganizilani za njila imozi yataphunzila muno nkati mwa mulili wa COVID-19. Taphunzila kuti tingakwanishe kuchitisha maphunzilo a Baibolo pokatishila ntchito foni olo vipangizo viyakine vamakono! Tetyo, mwewo mungayambishe komasoti kuchitisha phunzilo muli pang’anda panu, ivi vingankhale vosavuta kuli mwewo. Ndipo palisoti pindu iyakine. Ŵanthu ayakine ofuna kuphunzila Baibolo, koma ove opezekalini pa ng’anda pa nthawe yakunkhala  kuti olalikila abale ŵasu. Olo n’tetyo, ove payakine angankhale na mpata mmamawa ngako olo usiku ngako. Kansi mwewo mungaphunzile Baibolo na munthu muyakine nthawe monga ni yamene iyi? Yesu ephunzisa Nikodemo usiku, yamene yenze nthawe iweme kuli Nikodemo.​—Yoh. 3:1, 2.

12. Kansi ni vinthu votyani vutisimikijila kuti tingankhale aphunzisi aweme?

¹² Payakine tingaganize kuti tingakwanishelini kuchitisha phunzilo ya Baibolo. Payakine muwona kuti mukaliyeyamba kuphunzila Baibolo na munthu muyakine mufunika kuziŵa vinthu vinyinji olo kunkhala na luso ngako. Keno mwewo niye mwamumvwila tetyo, ganizilani vinthu vokwana vitatu vamene vingakuyavyeni kusimikijila kuti mungakwanishe kuphunzila na munthu muyakine. Choyamba, Yehova okuwonani kuti nimwe woyenelela kuti muphunzise ayakine. (2 Akor. 3:5) Chachiŵili, Yesu wamene ali na ‘ulamulilo wonse kululu na pano pachalo,’ elamula kuti mwewo mukophunzisa. (Mt. 28:18) Ndipo chachitatu, mwewo mungafunikile kusenga ayanu kuti akuyavyeni. Yesu enzedalila vechimuuja Atata ŵake na kumuphunzisa, ndipo mwewo namwe mungachitesoti tetyo. (Yoh. 8:28; 12:49) Kuyangijila pali vamene ivi, mwewo mungasenge wopanamila kagulu kanu ka utumiki, mpainiya woyenelela, olo wofalisa waluso kuti akuyavyeni kuyambisha komasoti kuchitisha phunzilo ya Baibolo. Njila imozi ingakuyavyeni kunkhala mphunzisi muweme ni kulutako na mmozi mwa ofalisa amene aŵa pochitisha maphunzilo ŵawo a Baibolo.

13. Ndaŵa yanji tufunika kudjaila njila zanyowani zophunzisila?

¹³ Payakine tingawone kuti ni vovuta kukatishila ntchito njila zanyowani na vida vanyowani. Njila zatuchitishila maphunzilo a Baibolo zachinja. Buku yasu ikulu yophunzilila Baibolo na ŵanthu yakuti Sangalalani na moyo kosasila!, yufuna kuti tikokonzekela komasoti kuchitisha phunzilo mu njila yosiyana na mwetenzechitila kuvuli. Tuŵelenga ndime zitontho tyala ndipo tukambilana ngako na wophunzila. Tikophunzisa, tukatishila ntchito ngako mavidiyo komasoti vida vapa vipangizo vamakono, monga JW Library^®. Keno mwewo muziŵalini mwamungakatishilile ntchito vida vamene ivi, laŵilani na munthu muyakine wamene angakuyavyeni kuphunzila mwamungavikatishile ntchito. Sewo taŵanthu tukonda kuchita vinthu vatadjaila kuchita. Kudjaila njila zanyowani zochitila vinthu ni kupepulini. Koma na thandizo ya Yehova na ya ŵanthu ayakine, mwewo muwone kuti ni kosavuta kuchinja komasoti kuti kuphunzila na ŵanthu ni kokondwelesha ngako. Monga ni mwechinenela mpainiya muyakine, njila yamene iyi yophunzilila ni “yokondwelesha kuli wophunzila komasoti kuli mphunzisi.”

14. Kansi tufunika kukumbukila chinji keno tulalikila mu gawo yamene ŵanthu anyinji otimvwishilalini, ndipo lemba ya 1 Akorinto 3:6, 7 ingatilimbikise tyani?

¹⁴ Payakine tingankhale mu dela yamene ni yovuta kuyambisha maphunzilo a Baibolo. Ŵanthu ayakine aliye nawo chidwi uthenga wasu olo oushusha. Kansi ni chinji chingatiyavye kupitilija kukhulupilila kuti ŵanthu monga ni amene aŵa angamvwishile uthenga wa m’Baibolo? Kumbukilani kuti moyo wa ŵanthu ungachinje mokulumija muli chino chalo cha mavuto, ndipo ŵala amene enzeve chidwi angamvwishe kuti ofunikila malangizo a Mulungu pa moyo wawo. (Mt. 5:3) Ŵanthu ayakine amene kale enzekana mabuku ŵasu, pavuli pake echizavomela kuphunzila Baibolo. Tuziŵasoti kuti Yehova niye Munecho wa voweja. (Mt. 9:38) Yove ofuna kuti tipitilije kukomola notilila, koma ni yove Yeka woyenelela wamene okulisha. (1 Akor. 3:6, 7) Komasoti ni volimbikisa ngako kukumbushiwa kuti, olo kuti tiliye phunzilo ya Baibolo, Yehova otidalisa chifukwa cha khama yasu, osati chifukwa cha kupaka kwa mabuku ŵatuyaŵila olo namba ya maphunzilo ŵatili nawo! *

15. Kansi Yehova akumvwa tyani keno munthu muyakine wavomela kuphunzila Baibolo komasoti kukatishila ntchito vakuphunzila?

¹⁵ Yehova osangalala keno munthu wavomela chendi cha m’Baibolo komasoti kuujako ayakine vinthu vaphunzila. (Miy. 23:15, 16) Yehova osangalala ngako keno owona kuti ŵanthu ŵake olalikila nophunzisa mwakhama masiku ŵano! Mwachisanzo, olo kuti kwenze mulili wa pachalo chonse mu chaka cha utumiki cha 2020, maphunzilo a Baibolo okwanila, 7.705.765 echitishiwa, vamene ivi viyavya ŵanthu okwanila 241.994 kulipeleka kwa Yehova nobatiziwa. Ndipo ophunzila anyowani amene aŵa, aphunzisesoti ŵanthu anyinji Baibolo kuti nawo ankhale ophunzila. (Lk. 6:40) Tufunika kunkhala osimikijila kuti tukondwelesha ntima wa Yehova keno tuphunzisa ayakine kuti ankhale ophunzila.

16. Kansi ni cholinga chiweme chotyani chatingankhaleko nacho?

¹⁶ Kuphunzisa ŵanthu Baibolo ni ntchito ikulu, koma na thandizo ya Yehova tingayavyeko pa ntchito yopanga ophunzila anyowani kuti akokonda Atata ŵasu ŵakululu. Kansi muwona tyani kunkhalako na cholinga chofuna kuyambisha olo kuchitisha phunzilo ya Baibolo, olo imozi yeka tyala? Payakine tingadabwe kuwona vingachitike keno tingakatishile ntchito mpata uliwonse ungapezeke kuti tikonshe aliyense watingakumane naye keno angafune kuphunzila nase Baibolo. Tufunikalini kukaikila kuti Yehova adalise khama yasu.

17. Kansi tingokumvwa tyani keno tingokwanishako kuchitisha phunzilo ya Baibolo?

¹⁷ Tili na mwayi ukulu wolalikila na wophunzisa ayakine choonadi! Ntchito yamene iyi, yutikondwelesha ngako. Ntumwi Paulo, wamene eyavya ŵanthu anyinji kunkhala ophunzila ku Tesalonika, efotokoza mwenzemvwila ndipo enena kuti: “Kansi chiyembekezo chasu, olo chisangalalo chasu n’chinji? Eye, mphaso yasu yoimekela pamenso pa Ambuya ŵasu Yesu, pa nthawe ya kunkhalapo kwake n’chinji? Kansi ni mwewolini? Shuwa, mwewo nimwe chendi ulemelelo wasu na chisangalalo chasu.” (1 Ates. 2:19, 20; Mac. 17:1-4) Anyinji masiku ŵano akumvwasoti teti monga ni Paulo. Mulongo muyakine, zina yake Stéphanie pamozi na mwanalume wake ayavya ŵanthu anyinji kuti abatiziwe ndipo enena kuti: “Paliye chinthu chiyakine chilichonse chokondwelesha kupambana kuyavya ŵanthu kuti alipeleke kwa Yehova.”