1. Ndaŵa yanji Yehova otilinganijalini na ŵanthu ayakine?

YEHOVA okonda vinthu vosiyana-siyana ndipo oyembekezelalini kuti vonse vikonkhala volingana. Tuziŵa vamene ivi chifukwa chakuti yove epanga mitundu yosiyana-siyana ya vomela, vinyama kupamikijapo ŵanthu. Munthu aliyense ni wosiyana na muyake. Tetyo, Yehova okulinganijanilini na ŵanthu ayakine. Yove ofufuza mwaulili ntima wanu. (1 Sam. 16:7) Yove oziŵa vamungakwanishe kuchita luweme, vamungaleke kwanisha komasoti mwemulelelewa. Ndipo yove osengalini kuti muchite vinyinji kupitilila vamungakwanishe. Tufunika kukonkheja Yehova poliwona mwakutiwonela yove. Tikochita tetyo tinkhale munthu “woganiza luweme,” wosaliwona kuti nise ofunika ngako olo kuliwona kuti nise osafunika.​—Aro. 12:3.

2. Ndaŵa yanji n’kuwemelini kulilinganija na ŵanthu ayakine?

² Tingapindule ngako kufumila pa chisanzo chiweme cha m’bale olo mulongo wamene ochita luweme pa ntchito yolalikila. (Ahe. 13:7) Tingaphunzile kufumila kuli yove mwatingachinjile njila zolalikilila. (Afil. 3:17) Koma pali kusiyana pakati pa kukonkheja chisanzo chiweme cha munthu muyakine, na kulilinganija na yove. Keno sewo tulilinganija na ŵanthu ayakine, tingayambe kuchita njilu, kufoka komasoti kuliwona kuti nise atyala-tyala. Monga ni mwetiphunzilila mu nkhani yapita, kupikishana na ayakine mumpingo, kungawononge ushamwali wasu na Yehova. Niye chifukwa chake Yehova otiuja mwachikondi kuti: “Aliyense payeka ayese ntchito yake, kuti awone kuti ni yotyani. Akachita tetyo azankhale na chifukwa chosangalalila na ntchito yake, osati molilinganija na munthu muyakine.”​—Aga. 6:4.

3. Kansi ni vinthu votyani vamwakwanisha kuchita potumikila Yehova vamene vukukondweleshani mwewo?

³ Yehova ofuna kuti mwewo munkhale osangalala na vamuchita  pomutumikila. Mwachisanzo, keno mwibatizika, muwamila kuti musangalala ngako kuti mwikwanilisha cholinga chamene icho! Mwewo mwisankha kuchita vamene ivi mwa kufuna kwanu mweka. Mwewo mwichita vamene ivi chifukwa cha chikondi chanu pa Yehova. Ganizilani vonse vamwachita kufumila pa nthawe yamene iyo. Mwachisanzo, kansi palipano mukonda ngako kuŵelenga komasoti kuphunzila Baibolo? Kansi mapemphelo ŵanu ayamba kunkhala ofumila pansi pa ntima kupambana kale? (Sal. 141:2) Kansi palipano muyamba kukambilana mosavuta na ŵanthu komasoti kukatishila ntchito mwaluso vinthu vatukatishila ntchito pophunzisa mu utumiki? Komasoti keno muli pa banja, kansi Yehova wakuyavyani kunkhala mwanalume, mwanakazi komasoti kolo iweme? Muwamila kuti musangalala ngako komasoti kunkhala wokhutila chifukwa cha vinthu vamwakwanisha kuchita.

4. Kansi mu nkhani ino tikambilane chinji?

⁴ Tingakwanishe kuyavya ayakine kuti akosangalala na vinthu vakukwanisha kuchita potumikila Yehova. Tingaŵayavyesoti kuti akopewa kulilinganija na ayakine. Mu nkhani ino, tiwone vangachite makolo kuti ayavye ŵana ŵawo, vangachite ŵanthu olungulana kuti akoyavyana komasoti mwamene akulu na ŵanthu ayakine mumpingo mwangayavyile abale ŵawo na alongo. Posilijila, tikambilane mfundo za m’Baibolo zamene zingatiyavye kunkhala na volinga vamene tingavikwanilishe mokatijana na luso yasu komasoti mwavilili vinthu pa moyo wasu.

5. Mokatijana na lemba ya Aefeso 6:4, kansi makolo ofunika kupewa chinji?

⁵ Makolo ofunika kunkhala osamala ngako kuti osati akolinganija mwana na mwana muyakine olo kuyembekezela kuti mwana achite vinyinji kupitilila vangakwanishe kuchita. Keno makolo angochita vamene ivi, angafokeshe mwana. (Ŵelengani Aefeso 6:4.) Mulongo muyakine zina yake Sachiko * enena kuti: “Maticha ŵangu enzeyembekezela kuti newo nikochita luweme ngako kupambana ayangu onse mukalasi. Kuyangijila pali vamene ivi, amama enzefuna kuti newo nikochita luweme ngako ku sikulu na cholinga chakuti nikoŵalalikila luweme maticha ŵangu komasoti atata amene ni Mbonilini. Komasoti amama enzefunasoti kuti nikokwanisha kupambana pamayeso, vamene nenzeviwona kuti n’vosakwanishika. Lomba papita vyaka vinyinji kufumila penisilija sikulu, nthawe ziyakine nulimvwa mphela kuti Yehova okondwelalini na vanuchita pomutumikila.”

6. Kansi makolo angaphunzile chinji kufumila pa Salimo 131:1, 2?

 ⁶ Makolo angafwane phunzilo iyakine iweme pa Salimo 131:1, 2. (Ŵelengani.) Mfumu Davide enena kuti yove ‘aliyesakile-sakile vinthu vapalulu ngako’ olo vinthu vamene sembe aliyevikwanishe. Chifukwa chakuti enze wolichefya, ‘wokhutila komasoti wantendele.’ Kansi makolo angaphunzilepo chinji pa mawu a Davide? Makolo angankhale olichefya, osati peka-peka keno opewa kuganizila ngako vokhuza ove ŵeka, koma akopewasoti kuyembekezela kuti ŵana ŵawo achite vinyinji ngako. Makolo angalimbikise ŵana ŵawo keno oziŵa vangakwanishe kuchita na vangaleke kwanisha noŵayavya kunkhala na volinga vamene angavikwanilishe. Mulongo muyakine zina yake Marina enena kuti: “Amama enzenilinganijalini nenekwangu olo na ŵana ayakine. Ove eniphunzisa kuti aliyense ali na luso yosiya na muyake komasoti kuti tonse nise ofunika ngako kwa Yehova. Nuŵatembeja chifukwa vamene ivi viniyavya kuti osati nikolilinganija na ayakine.”

7-8. Kansi mwanalume angawoneshe tyani ulemu kuli mwanakazi wake?

⁷ Mwanalume wa Chikhilisitu ofunika kulemekeza mwanakazi wake. (1 Pet. 3:7) Kulemekeza munthu kupamikijapo kumuganizila komasoti kumupasa ulemu. Mwachisanzo, mwanalume angawoneshe kuti olemekeza mwanakazi wake akowona kuti ni wofunika ngako. Yove oujalini mwanakazi wake kuti achite vinthu vangaleke kwanisha ndipo omulinganijalini na anakazi ayakine. Kansi mwanakazi angamvwe tyani keno mwanalume wake angachite tetyo? Mulongo muyakine zina yake Rosa wamene mwanalume wake ni Mbonilini, nthawe zinyinji okonda kumulinganija na anakazi ayakine. Mawu onyoza ŵakulaŵila mwanalume wake ochitisha Rosa kuti osati akokumvwa luweme komasoti kuti akokaikila keno pali ŵanthu ayakine omukonda. Yove enena kuti, “newo nufunika kukumbushiwa nthawe zonse kuti Yehova oniwona kuti nine wofunika.” Mosiyana na vamene ivi, mwanalume wa Chikhilisitu olemekeza mwanakazi wake. Yove oziŵa kuti vamene ivi vingayavye kuti ankhale okatijana na mwanakazi wake komasoti kuti ankhale pa ushamwali uweme na Yehova. *

⁸ Mwanalume wamene olemekeza mwanakazi wake olaŵila viweme vokhuza yove kuli ŵanthu ayakine, omusimikijila kuti omukonda komasoti omutembeja. (Miy. 31:28) Umu niye mwechiyavyiliwa Katerina, wamene timutomolako kale mu nkhani yapita, na mwanalume wake kuti osati akoliwona kuti ni watyala-tyala. Katerina akali mwana, amayi ŵake enzemunyoza ndipo enzekonda kumulinganija na asimbi ayakine, kupamikijapo azishamwali ŵake. Tetyo, yove eyamba kulilinganija na ŵanthu ayakine ndipo epitilija kuchita vamene ivi​—olo pavuli pakuti wankhala wa Mboni za Yehova! Koma mwanalume wake emuyavya kuti aleke kuchita vamene ivi komasoti kuti akoliwona moyenela. Yove enena kuti: “Mwanalume wangu onikonda, onitembeja pa vinthu vinthu vanuchita, komasoti onipemphelela. Onikumbushasoti minkhalidwe iweme yalinayo Yehova ndipo oniyavya nikayamba kunkhala na maganizo aipa.”

9-10. Kansi akulu achikondi emuyavya tyani mulongo muyakine wamene enzeliwona kuti ni wosafunika akalilinganija na ayakine?

⁹ Kansi akulu angaŵayavye tyani ŵala amene okonda kulilinganija na ayakine? Ganizilani vichitikila mulongo muyakine zina yake Hanuni, wamene enzetembejewalini akali mwana. Yove enena kuti: “Newo nenze wa nsoni ndipo nenzewona kuti ŵana ayakine ochita luweme vinthu kupambana newo.” Ndipo niyamba kulilinganija na ayakine kufumila pa nthawe yenenze mwana.” Olo pavuli pakuti waphunzila choonadi, Hanuni enzelilinganija mphela na ayakine. Chifukwa cha vamene ivi, yove elinzewona monga ni wosafunika mumpingo. Koma palipano, Hanuni osangalala  kuchita upainiya. Kansi n’chinji chimuyavya kuti achinje maganizo ŵake?

¹⁰ Hanuni enena kuti akulu achikondi niye emuyavya. Ove ewonesha kuti omudalila ndipo enzemutembeja chifukwa cha kukhulupilika kwake. Yove elemba kuti: “Nthawe ziyakine akulu enzenisenga kuti nilimbikise alongo ayakine amene enzefunika kulimbikisiwa. Vamene ivi viniyavya kuti nikoliwona kunkhala wofunika. Newo nukumbukila nthawe iyakine pechinitembeja akulu chifukwa cholimbikisa alongo ayakine achisimbi. Pavuli pake ove eniŵelengela 1 Atesalonika 1:2, 3. Vamene ivi vinilimbikisa ngako! Nutembeja ngako achiŵeta aweme amene aŵa, chifukwa lomba nuwona kuti nine wofunika ngako m’gulu ya Yehova.”

11. Mokatijana na vayufotokoza lemba ya Yesaya 57:15, kansi tingayavye tyani ŵanthu ‘opanikijika na a ntima wolichefya’?

¹¹ Ŵelengani Yesaya 57:15. Yehova oŵakonda ngako ŵanthu ‘opanikijika na a ntima wolichefya.’ Sewo tonse, osati akulu ŵeka, tingakwanishe kulimbikisa abale na alongo okondewa amene aŵa. Njila imozi yatingaŵalimbikisile ni kuwonesha kuti tuŵaganizila. Yehova ofuna kuti tikoŵawonesha kuti yove oŵakonda komasoti kuti ni mbelele zake zantengo wapatali. (Miy. 19:17) Tingalimbikisesoti abale na alongo amene aŵa tikochita vinthu molichefya. Tufunikalini kuchitisha ayakine kuti akoganizila ngako za sewo, vamene vingachitishe kuti ayambe kunkhala na ntima wa njilu. Mmalomwake tufunika kukatishila ntchito maluso ŵatili nawo komasoti vinthu vatuziŵa polimbikisa abale ŵasu.​—1 Pet. 4:10, 11.

12. Ndaŵa yanji ŵanthu wamba enzekonda kuwela kuli Yesu? (Onani chithunzi cha pachikuto.)

¹² Kuganizila mwenzechitila vinthu Yesu na ophunzila ŵake kungatiyavye kuziŵa mwatingachitile vinthu na ŵanthu ayakine. Yove enze munthu nkulu kupambana onse amene enkhalako. Olo n’tetyo, yove enze “wofasa komasoti wolichefya.” (Mt. 11:28-30) Yove enzeliwoneshelalini kuti ni wanzelu ngako kapena oziŵa vinthu vinyinji. Enzekatishila ntchito mawu komasoti visanzo vosavuta kumvwa, vamene venzefwika pantima ŵanthu olichefya. (Lk. 10:21) Mosiyana na asogoleli avipembezo amene enze omeka, Yesu enzechitishalini ŵanthu ayakine kuti akoliwona monga ni osafunika kwa Mulungu. (Yoh. 6:37) Mmalomwake, yove enzelemekeza ŵanthu wamba.

13. Kansi mwenzechitila vinthu Yesu na ophunzila ŵake viwonesha tyani kuti enze muweme ntima komasoti wachikondi?

¹³ Mwenzechitila vinthu Yesu na ophunzila ŵake, venzewonesha kuti ni muweme ntima komasoti wachikondi. Yove enzeziŵa kuti ophunzila ŵake enze na maluso osiyana komasoti kuti vinthu pa moyo wawo venze vosiyana. Tetyo, sembe viliyekwanishike kuti ankhale na maudindo olingana komasoti kuti akochita vinthu volingana pa ntchito yolalikila. Koma Yesu enzeŵatembeja ophunzila ŵake chifukwa aliyense enzechita vinthu na ntima wake wonse. Yesu ewonesha kuti enzeŵamvwisha ophunzila ŵake pechifotokoza fanizo ya matalente. Mu fanizo yamene iyi bwana epasa ntchito wantchito aliyense “mokatijana na luso yake.” Mmozi wa wantchito aŵili akhama, efwana pindu ikulu kupambana muyakine. Koma bwana wamene uyo eŵatembeja onse na mawu olingana akuti: “Wachita luweme ngako, wewo wantchito muweme komasoti wokhulupilika!”​—Mt. 25:14-23.

14. Kansi sewo tingamukonkheje tyani Yesu tikochita vinthu na ŵanthu ayakine?

¹⁴ Yesu nthawe zonse ochita nase vinthu mowama ntima komasoti mwachikondi. Yove oziŵa kuti tonse tili na maluso komasoti kuti vinthu ni vosiyana pa moyo. Ndipo osangalala na vatuyeja--yeja kuchita potumikila Mulungu. Tingachite bwino kutolela chisanzo cha Yesu pochita vinthu na ayakine. Tufunikalini kuchitisha Mkhilisitu muyasu kuti akoliwona monga ni wosafunika olo kumuchitisha nsoni chifukwa chakuti angakwanishelini kuchita vinyinji mwakuchitila ayakine. Mmalomwake, tufunika kufwana mipata yakuti tikotembeja abale ŵasu komasoti alongo chifukwa  choyeja-yeja kuchita vonse vangakwanishe potumikila Yehova.

15-16. Kansi mulongo muyakine epindula tyani chifukwa chonkhala na volinga vangakwanilishe?

¹⁵ Kunkhala na volinga potumikila Yehova kungatiyavye kunkhala na moyo wokhutila komasoti watanthauzo. Chisinsi chayona pa kunkhala na volinga vatingakwanilishe mokatijana na luso komasoti mwavilili vinthu pa moyo wasu osati mwavilili vinthu pa moyo wa ŵanthu ayakine. Vamene ivi vingatiyavye kuti osati tizakhumudwe olo kufoka. (Lk. 14:28) Ganizilani vichitikila mulongo muyakine wamene ni mpainiya zina yake Midori.

¹⁶ Midori akali mwana, atata ŵake amene ni Mbonilini, enzemuchitisha nsoni pomulinganija na enekwake komasoti ayake a m’kalasi. Yove enena kuti, “nenzeliwona kunkhala watyala-tyala.” Olo n’tetyo, yove pechikula eleka kulikaikila. Enenasoti kuti: “Nenzeŵelenga Baibolo nsiku zonse na cholinga chakuti ninkhale na ntendele mwamuntima komasoti nikowona kuti Yehova onikonda.” Kuyangijila pali vamene ivi, yove enkhala na volinga vangakwanilishe ndipo enzesenga kwa Mulungu kuti amuyavye kukwanilisha volinga vamene ivo. Vamene ivi vimuyavya Midori kuti akosangalala na vinthu venzekwanisha kuchita potumikila Yehova.

17. Kansi n’chinji chingatiyavye kuchinja maganizo ŵasu, ndipo vokonkhapo vake vingankhale votyani?

¹⁷ Popita nthawe itali kuti tichinje maganizo komasoti mwatuliwonela. Niye chifukwa chake Yehova otiuja kuti: “Mwewo mwiphunzisiwa kuti munkhale anyowani mu mphamvu yoyendesha maganizo ŵanu.” (Aef. 4:23, 24) Kulaŵila chendi, kuti tichite vamene ivi tufunika kupemphela, kuphunzila Mawu a Mulungu komasoti kusinkha-sinkha. Nthawe zonse mukochita vamene ivi ndipo mukosenga Yehova kuti akupaseni mphamvu. Mzimu wake utuŵa ukuyavyeni kuchosa maganizo aliwonse olilinganija na ayakine. Yove akuyavyeni  kuti muziŵe keno mwayamba kunkhala na ntima wa njilu olo womeka ndipo akuyavyeni kuti muchinje mokulumija.

18. Kansi mawu amene ali pa 2 Mbiri 6:29, 30 angatilimbikise tyani?

¹⁸ Ŵelengani 2 Mbiri 6:29, 30. Yehova oziŵa mwatumvwila muntima. Yove oziŵasoti mavuto ŵatulimbana nawo monga vinthu viipa va ichi chalo vamene vingatisokoneze komasoti vinthu vatuphoniyesha chifukwa chakuti niselini angwilo. Yove akawona vatuchita poyeja-yeja kulimbana na mavuto amene aŵa, oyamba kutikonda ngako.

19. Kansi Yehova ekatishila ntchito chisanzo chotyani potiyavya kuziŵa kuti otikonda ngako?

¹⁹ Pofuna kutiyavya kumvwisha kuti otikonda ngako, Yehova okatishila ntchito chisanzo cha chikondi cha pakati pa mayi na mwana wake. (Yes. 49:15) Ganizilani chisanzo cha mayi muyakine wazina yakuti Rachel. Yove elemba kuti: “Mwana wangu Stephanie evyalika masiku akaliye kwana. Newo penimuwona ulwendo woyamba, enzewoneka ntontho ngako komasoti womvwisha chisoni. Koma dokota nkulu enzenilola kuti nikomukata nsiku zonse m’mwezi woyambilila penzenkhala m’mashini omuyavya kuti ankhale mphela na moyo. Nthawe yamene iyo iyavya kuti newo na mwana wangu tikokondana ngako. Yove lomba ali na vyaka 6 koma owoneka mphela ntontho polinganija na ayake ŵechivyalika nawo nsiku imozi. Koma newo numukonda ngako chifukwa chakuti yove walimbana na mavuto akulu kuti ankhale mphela na moyo, ndipo nukondwela ngako nikomuwona.” Tunkhala okondwela kuziŵa kuti Yehova otikonda ngako akatiwona kuti tuyeja-yeja kulimbana na mavuto na cholinga chakuti tikomutumikila na ntima onse!

20. Monga ntumiki wa Yehova wolipeleka, kansi muli na chifukwa chotyani chosangalalila?

²⁰ Monga ntumiki wa Yehova, ziŵani kuti yove okuwonani kuti nimwe wamtengo wapatali komasoti wapadela m’banja yake. Sikuti Yehova ekudoselani kuli yove chifukwa chakuti ewona kuti nimwe wofunika ngako kupambana ŵanthu ayakine. Koma yove ekudonsani mwewo chifukwa ewona ntima wanu kuti nimwe munthu wofasa komasoti wofunishisha kuphunzila kufumila kuli yove nochinja. (Sal. 25:9) Mwewo mungankhale wosimikijila kuti yove onkhala wosangalala keno muchita vonse vamungakwanishe kuti mumutumikila. Kupilila komasoti kukhulupilika kwanu, ni umboni wakuti muli “na ntima wachilungamo komasoti uweme.” (Lk. 8:15) Tetyo pitilijani kutumikila Yehova na ntima wanu wonse. Mukachita tetyo muzankhale na chifukwa ‘chosangalalila na ntchito [yanu].’