Kulaŵila chendi Yehova ofuna kuti ŵanthu aŵili olungulana akonkhala osangalala komasoti kunkhala pa ushamwali wotang’a na wonkhalisha. (Mt. 19:4-6) Keno mwewo mufuna kulungula olo kulunguliwa, kansi mungamufwane tyani munthu muweme wolungulana naye? Chifukwa chakuti Yehova ni Nyamalenga wasu, yove oziŵa chatufunikila kuchita kuti tinkhale na chibwenzi komasoti banja yosangalala. Tetyo, keno mwewo mungakatishile ntchito mfundo zakupeleka yove, vinthu vingakuyendeleni luweme. Onani ziyakine mwa mfundo zamene izi.

Yoyamba, tufunika kumvwishisha mfundo iyi yokhuza sewo taŵanthu: “Ntima ni wonyenga ngako kupambana chinthu chiyakine chilichonse ndipo ungakwanishe kuchita chilichonse chiipa.” (Yer. 17:9) Ŵanthu aŵili amene ofuna kulungulana, akakumana noyamba chibwenzi ove angayambe kukondana ngako muyake na muyake. Vamene ivi vikachitika vunkhala vovuta kuti apange vosankha mwanzelu. Keno ŵanthu asankha kuti alungulane chifukwa tyala cha mwakumvwila muntima mwawo, vinthu vuŵayendelalini luweme. (Miy. 28:26) Niye chifukwa chake ni chinthulini chanzelu kuti ŵanthu aŵili akoujana vakuntima kwawo kumayambilio kwa chibwenzi olo kulonjezana vinthu akaliyeziŵana bwino-bwino.

Lemba ya Miyambo 22:3 yunena kuti: “Wochenjela niwala akuti akawona chiipa ofisama, koma ŵanthu asaziŵa vinthu akungokuya tyala ndipo olangiwa.” Kansi ni ngozi yotyani ingankhalepo keno tingokatishila ntchito malo otandalila apa intaneti kuti tifwane munthu wolungulana naye? N’vomvwisha chisoni kuti ŵanthu ayakine echizaphunzila manzi ali munkosi kuti ŵanthu ŵasaziŵa ŵenzetandala nawo pa intaneti, enzefuna tyala kusoŵelesha maganizo ŵawo. Komasoti ŵanthu ayakine aliye chilungamo olifisa na cholinga chakuti akoiŵila ŵanthu ndalama mwachinyengo. Nthawe ziyakine, ŵanthu achinyengo amene aŵa onena kuti ni a Mboni.

Onani ngozi iyakine ingankhalepo. Ŵanthu ayakine okatishila ntchito malo otandalila a pa intaneti pokatishila ntchito mapulogilamu apakompyuta ŵakunena kuti oyavya munthu kuziŵa munthu woyenelela wolungulana naye. Olo n’tetyo, paliye maumboni owonesha kuti njila zamene izi zukata ntchito chendi. Kungankhale kusoŵa nzelu kudalila pulogilamu ya pakomyuta yopangiwa na ŵanthu pochita chosankha pa nkhani ikulu ngako monga kusankha munthu muweme wolungulana naye. Koma kansi mapulogilamu apakompyuta angankhale odalilika monga ni mfundo za m’Baibolo?​—Miy. 1:7; 3:5-7.

Mfundo yatufwana pa Miyambo 14:15 yunena kuti: “Munthu asaziŵa vinthu okhulupilila mawu aliwonse, koma wochenjela oganizila za mwakuyendela.” Mukaliyesankha keno munthu muyakine azankhale woyenelela  kulungulana naye olo yayi, mufunika kumuziŵa luweme munthu wamene uyo. Koma kukumana pa intaneti kungachitishe kuti kunkhale kovuta kuchita vamene ivi. Olo kuti mungotumijilana mafoto komasoti kutola nthawe ikulu mulembelana ma mesedji, kansi mwewo munganene kuti mumuziŵa luweme munthu wamene uyo? Ŵanthu ayakine amene enzeganiza kuti afwana munthu muweme wolungulana naye, ekhumudwa pechiwonana na munthu wamene uyo pamenso na pamenso.

Wamasalimo enena kuti: “Niliyenkhale pansi pamozi na ŵanthu achinyengo. Ndipo niliyekatijane na ŵanthu ofisa umunthu wawo.” (Sal. 26:4) Ŵanthu anyinji owona kuti ni vutolini kutala wenye pa mafoto ŵawo ŵakuika pa intaneti poliwonesha kunkhala aweme. Ove payakine angafise minkhalidwe yawo iipa, olo payakine minkhalidwe yawo iipa ingawonekelelini keno ove otumijila ayawo mamesedji pokatishila ntchito intaneti. N’vofunika ngako kuganizila mayankho a makonsho aŵa: Pakuti ŵanthu ayakine onena kuti ni a Mboni za Yehova, kansi yove ni m’Khilisitu obatizika? Kansi ni otang’a mwauzimu? Kansi ali pa ushmwali uweme na Yehova? Kansi olemekezewa mumpingo wake? Olo kansi yove payakine angankhale chisanzo chiipa komasoti munthu wosafunika ‘kukatijana naye’? (1 Akor. 15:33; 2 Tim. 2:20, 21) Kansi yove ni womasuka kuti angalungule olo kulunguliwa mokatijana na mfundo za m’Baibolo? Mwewo mufunika kuziŵa mayankho a makonsho amene aŵa. Koma paliye kulaŵila na a Mboni amene omuziŵa luweme munthu wamene uyo vingankhale vovuta kuŵafwana mayankho a makonsho amene aŵa. (Miy. 15:22) Ndipo, kulaŵila chendi, ntumiki wokhulupilika wa Yehova angayejelini olo patontho ‘kumangiwa m’goli’ na wosakhulupilila.​—2 Akor. 6:14; 1 Akor. 7:39.

Chifukwa chakuti nikoyofya kusakila munthu wolungulana naye kupitila pa malo otandalila a pa intaneti, zilipo njila ziweme zosakilila komasoti kuziŵa munthu wolungulana naye. Kansi ni kuni kwamungamufwane munthu wamene angazankhala mwanalume olo mwanakazi muweme? Misonkhano ya pagulu ikankhala kuti ni yosaleshewa, a Mboni za Yehova angaziŵane pamenso na pamenso pa misonkhano ya mpingo, yadela, yachigawo komasoti pa vochitika viyakine.

Vikankhala kuti vingakwanishikelini kuchita misonkhano yamene iyi ya pagulu, monga nkati mwa mulili wa COVID-19, tukatishila ntchito vipangizo vamakono kuti tichite misonkhano yasu ya mpingo, pa nthawe yamene iyi ni mpata wakuti tiziŵane na a Mboni ayakine amene akaliyelungula olo kulunguliwa. Mwewo mungaŵamvwe akolaŵila nkhani zawo pa misonkhano komasoti kufotokoza zachikhulupililo chawo akopeleka ndemanga. (1 Tim. 6:11, 12) Komasoti payakine mungalaŵijane pamweka pavuli pa misonkhano pa mbali yotandalila ya chipangizo chamukatishila ntchito pochita misonkhano. Kupitila mu misonkhano yatuchita komasoti vochitika viyakine pokatishila ntchito vipangizo vamakono pagulu ya a Mboni, mwewo mungakwanishe kumuwona munthu wamwakopeka naye mwakuchitila vinthu na ŵanthu ayakine, ndipo vamene ivi vingakuyavyeni kuziŵa minkhalidwe yake munthu wamene uyo. (1 Pet. 3:4) Mu kupita kwa nthawe, mukayamba kumuziŵa luweme munthu wamene uyo, mungawone keno muli na volinga volingana komasoti keno mwewo mwaŵili nimwe oyenelelana.

Keno ŵanthu amene ni mbeta okatishila ntchito mfundo za m’Baibolo kuti ziŵayavye posakila munthu wakuti azalungulane naye, paliye kukaikila kuti ove angazankhala na banja yosangalala. Monga ni mwayunenela lemba ya Miyambo kuti: “Kansi munthu wafwana mwanakazi [olo mwanalume] muweme? Niye kuti wafwana chinthu chiweme, ndipo Yehova okondwela naye.”​—Miy. 18:22.