1. Kansi tufunika kuuwona tyani mwayi wopemphela kwa Yehova?

 TIPASIWA mwayi wantengo wapatali ngako wolaŵila na Nyamalenga wasu m’pemphelo—wamene elenga kululu na chalo. Ganizilani: Tingakwanishe kumuuja Yehova va muntima mwasu nthawe iliyonse komasoti m’chilaŵilo chilichonse paliye kusenga chilolezo. Tingakwanishe kupemphela kuli yove keno tili m’chipatala olo mu djeli nokhulupilila kuti Tata wasu wachikondi wamene uyu atimvwishile. Tuuwonalini mopepuka mwayi wamene uyu.

2. Kansi Mfumu Davide ewonesha tyani kuti enzetembeja mwayi wa pemphelo?

² Mfumu Davide enzetembeja mwayi wa pemphelo. Yove eimbila Yehova kuti: “Pemphelo yangu inkhale yokonzewa luweme monga vofukiza vonunkhila pamenso panu.” (Sal. 141:1, 2) Mu nthawe ya Davide, vofukiza vopatulika venzekatishila ntchito ansembe pa kulambila kwachendi, venzekonzewa mosamala ngako. (Eks. 30:34, 35) Pofotokoza za vofukiza, Davide enzetanthauza kuti enzeganizila luweme venzefuna kulaŵila m’pemphelo kuli Atata ŵake akululu. Vamene ivi niye vatufunasoti sewo kuti mapemphelo ŵasu akonkhala okondwelesha kwa Yehova.

3. Kansi tufunika kunkhala na maganizo otyani tikopemphela kwa Yehova ndipo ndaŵa yanji?

³ Keno tupemphela kwa Yehova, tufunika kuchita vinthu mwaulemu ngako. Ganizilani mensomphenya ochitisha chidwi ŵechiwoneshewa Yesaya, Ezekieli, Danieli, na Yohane. Olo kuti mensomphenya amene awo enze osiyana, penze chinthu chiyakine cholingana. Onse amene aŵa owonesha kuti Yehova  ni Mfumu yolemekezeka. Yesaya “ewona Yehova alinkhale pampando wachifumu wolemekezeka wamene wenze pamalo apalulu.” (Yes. 6:1-3) Ezekieli ewona Yehova alinkhale pagaleta yake yakululu “ndipo pamalo omuzenguluka penze pongweleŵela . . . monga ni uta waleza.” (Eze. 1:26-28) Danieli ewona “Wamasiku Anyinji” alivwale vovwala vituŵa ndipo ku mpando Wake wachifumu kwenzeyaka mulilo. (Dan. 7:9, 10) Ndipo Yohane ewona Yehova alinkhale pa mpando wake wachifumu ulizengulukiwe na utawaleza uwoneka monga ni mwala wa yamalodi. (Chiv. 4:2-4) Tikoganizila ulemelelo ukulu wali nawo Yehova, tukumbushiwa za mwayi wantengo wapatali wolaŵila naye m’pemphelo. Komasoti kufunika kochita vamene ivo mwaulemu. Koma kansi tufunika kupemphela tyani?

4. Kansi tuphunzila chinji pa mawu oyamba a m’pemphelo ya chisanzo ili pa Mateyu 6:9, 10?

⁴ Ŵelengani Mateyu 6:9, 10. Pa Ulaliki wake wapa Lupili, Yesu ephunzisa ophunzila ŵake mwangapemphelele m’njila yamene ingakondweleshe Mulungu. Pechinena kuti “koma mwewo mukopemphela teti,” choyamba Yesu efotokoza nkhani zofunika zamene zukatijana na cholinga cha Yehova. Efotokoza za kutuŵishiwa kwa zina yake; kuwela kwa Ufumu wamene ukuti uzawononge onse ŵala oshusha Mulungu komasoti madaliso akusogolo okhuza ŵanthu na ichi chalo. Keno tufotokoza nkhani zamene izi m’mapemphelo ŵasu tuwonesha kuti tuwona chifunilo cha Mulungu kunkhala chofunika.

5. Kansi n’vofunika kuti tikofotokoza nkhani zokhuza sewo m’mapemphelo ŵasu?

⁵ Mu mbali yokonkhapo ya pemphelo yamene iyi, Yesu ewonesha kuti n’vofunikasoti kuti tikopemphelela nkhani zokhuza sewo. Tingasenge Yehova kuti atipase chakulya cha nsiku yamene iyo, atikhululukile machimo ŵasu, atiteteze ku mayeselo komasoti atipulumushe kuli Mdyelekezi. (Mt. 6:11-13) Keno tumusenga vinthu vamene ivi, tuwonesha kuti tumudalila komasoti kuti tufunishisha kunkhala naye pa ushamwali.

6. Kansi tufunika kungopemphelela tyala vinthu vufotokozewa m’pemphelo yachisanzo? Fotokozani.

⁶ Yesu enzeyembekezelalini kuti ophunzila ŵake, akofotokoza ndendende mawu ali  mu pemphelo ya chisanzo. M’mapemphelo ŵake ayakine, Yesu efotokoza nkhani zamene zenze zofunika ngako kuli yove pa nthawe yamene iyo. (Mt. 26:39, 42; Yoh. 17:1-26) Molingana na vamene ivi, nase tingapemphelele nkhani zamene zutidesa nkhaŵa. Tikafuna kusankha vochita pa nkhani iyakine tingasenge Yehova kuti atipase nzelu komasoti kuti atiyavye kumvwisha vinthu. (Sal. 119:33, 34) Tikayamba utumiki uyakine wovuta tingamusenge kuti atiyavye kunkhala ozindikila. (Miy. 2:6) Makolo angapemphelele ŵana ŵawo ndipo ŵana angapemphelele makolo ŵawo komasoti tonse tufunika kupemphelela ŵanthu ŵatuphunzila nawo Baibolo na ŵanthu ŵatulalikila. Koma olo n’tetyo, mapemphelo ŵasu ofunikalini kunkhala osenga tyala vinthu.

7. Ndaŵa yanji tufunika kutamanda Yehova m’mapemphelo ŵasu?

⁷ Tikokumbukila kutamanda Yehova m’mapemphelo ŵasu. Paliye muyakine watufunikila kutamanda kupambana Mulungu wasu. Yove ni ‘muweme ndipo ni wokonzeka kukhululuka.’ Komasoti ni “wachifundo na wachisomo asakalipa kamangu na wozula na kuwama ntima kosasila na choonadi.” (Sal. 86:5, 15) Poganizila mwalili komasoti vakuchita tili na vifukwa vomvwika vutichitisha kumutamanda.

8. Kansi ni vinthu viyakine votyani vamene vingatichitishe kumutembeja Yehova? (Salimo 104:12-15, 24)

⁸ Kuyangijila pa kumutamanda m’mapemphelo ŵasu, tufunikasoti kumutembeja Yehova chifukwa cha vinthu viweme vakutipasa komasoti chifukwa chonkhala na ayasu anyinji aweme. Atata ŵasu achikondi otipasa vamene ivi na vinthu viyakine vinyinji chifukwa ofuna kuti tikosangalala. (Ŵelengani Salimo 104:12-15, 24.) Kupambana vonse, tumutembeja Yehova chifukwa chotipasa chakulya chauzimu chinyinji komasoti chiyembekezo chokondwelesha chakusogolo.

9. Kansi n’chinji chingatiyavye kuti tikokumbukila kutembeja Yehova? (1 Atesalonika 5:17, 18)

⁹ Vingankhale vosavuta kuluŵa kutembeja Yehova pa vinthu vonse vakutichitila. Lomba kansi n’chinji chingatiyavye? Tingalembe vinthu vosiyana-siyana vatamusenga nowona nthawe na nthawe mwawatiyankhila  mapemphelo ŵasu amene awo. Pavuli pake tikopemphela nomutembeja chifukwa chotiyavya. (Ŵelengani 1 Atesalonika 5:17, 18.) Ganizilani ivi: Tusangalala komasoti kumvwa kuti tukondewa, ŵanthu ayakine akatitembeja pa vatachita. Molingana na vamene ivi keno tukumbukila kutembeja Yehova chifukwa choyankha mapemphelo ŵasu naye osangalalasoti. (Akol. 3:15) Koma kansi n’chifukwa chiyakine chotyani chikulu chamene chutichitisha kutembeja Mulungu wasu?

10. Mokatijana na 1 Petulo 2:21, ndaŵa yanji tufunika kumutembeja Yesu chifukwa chowela pano pachalo?

¹⁰ Ŵelengani 1 Petulo 2:21. Tufunika kumutembeja Yehova chifukwa chotumija Mwana wake kuti azatiphunzise. Kuphunzila za Yesu kutiyavya kuziŵa vinyinji vokhuza Yehova komasoti vatingachite kuti tikomukondwelesha. Keno tingokhulupilila nsembe ya Khilisitu tingankhale pa ushamwali uweme ngako na Yehova Mulungu komasoti kunkhala naye pa ntendele.—Aro. 5:1.

11. Kansi Yesu ali na udindo wotyani pa mapemphelo ŵatupeleka kwa Yehova?

¹¹ Tumutembeja Yehova chifukwa tingakwanishe kupemphela kuli yove kupitila mwa Mwana wake. Yove okatishila ntchito Yesu poyankha mapemphelo ŵasu. Yove omvwishila komasoti kuyankha tikasenga kupitila mu zina ya Yesu. Yesu efotokoza kuti: “Chilichonse chamukuti muzasenge mu zina yangu newo nizachichite kuti Atata alemekezewe mwa Mwana wake.”—Yoh. 14:13, 14.

12. Kansi n’chifukwa chiyakine chotyani chutichitisha kumutembeja Yehova chifukwa chotipasa Mwana wake?

¹² Yehova otikhululukila machimo ŵasu chifukwa cha nsembe ya Yesu. Malemba ofotokoza kuti ‘nkulu wa ansembe wamene [wankhala] pansi kululu ku kwanja ngayo ya mpando wachifumu wa wolemekezeka.” (Ahe. 8:1) Yove ni “mthandizi wamene ali na Atata.” (1 Yoh. 2:1) Tumutembeja Yehova chifukwa chotipasa Nkulu wa Ansembe wamene omvwisha vofoka vasu ndipo “otilaŵilila mopapatila” kwa Mulungu. (Aro. 8:34; Ahe. 4:15) Pakuti niselini angwilo, sembe tukwanishalini kulaŵila na Yehova m’pemphelo paliye nsembe ya Yesu. Kulaŵila chendi tingakwanishelini kumutembeja mokwanila chifukwa chotipasa mphaso ya ntengo wapatali yamene ni Mwana wake wokondewa.

13. Pa usiku wake wosilijila, kansi Yesu ewonesha tyani kuti enzekonda ophunzila ŵake?

¹³ Pa usiku wake wosilijila, Yesu epemphelela ophunzila ŵake kwa nthawe itali kusenga Atata ŵake kuti ‘aŵalolele kuyopela Mdyelekezi.’ (Yoh. 17:15) Pamene apa Yesu ewonesha chikondi chikulu. Yove enzeyembekezela kukumana na mayeselo akulu koma olo n’tetyo enzedela nkhaŵa za ophunzila ŵake.

14. Kansi tingawoneshe tyani kuti tukonda abale na alongo ŵasu?

¹⁴ Pokonkheja Yesu, nase tuganizilalini tyala vofuna vasu veka. M’malo mwake nthawe zonse tupemphelela abale na alongo ŵasu. Tikochita vamene ivi tunkhala kuti tumvwila lamulo ya Yesu yakuti tikokondana ndipo tumuwonesha Yehova kuti tukonda ngako Akhilisitu ayasu. (Yoh. 13:34) Kupemphelela abale na alongo ŵasu n’koyavya ngako. Mawu a Mulungu otiuja kuti “pemphelo yopapatila ya munthu wolungama yukata ntchito mwamphamvu ngako.”—Yak. 5:16.

15. Ndaŵa yanji tufunika kupemphelela Akhilisitu ayasu?

¹⁵ Tufunika kupemphelela Akhilisitu ayasu chifukwa nawo okumana na mavuto anyinji.  Tingasenge Yehova kuti aŵayavye kupilila ngozi za m’chilengedwe, nkhondo, kutamanishiwa olosoti mavuto ayakine. Tingapemphelelesoti abale na alongo amene okata ntchito mwakhama poyavya ŵala amene akumana na mavuto. Payakine muziŵako ŵanthu ayakine okumana na mavuto monga ni amene aŵa. Tyani osatomolako mazina ŵawo keno mupemphela pamweka? Tuwonesha kuti tuŵakonda keno tusenga Yehova kuti aŵayavye kupilila.

16. Ndaŵa yanji tufunika kupemphelela ŵala otisogolela?

¹⁶ Abale amene osogolela mpingo otembeja ngako keno tuŵapemphelela ndipo mapemphelo amene aŵa oŵayavya. Niye mwevenzelesoti na ntumwi Paulo. Yove elemba kuti: “[Mokopemphelelasoti] newo. Chitani vamene ivi kuti nikasegula pakamwa pangu kuti nilaŵile nikokwanisha kulaŵila mwaufulu kuti niziŵishe ayakine chisinsi chopatulika cha uthenga uweme.” (Aef. 6:19) Masikuŵanosoti, pali abale anyinji amene okata ntchito mwakhama potisogolela. Tuwonesha kuti tuŵakonda keno tusenga Yehova kuti akoŵayavya pa ntchito yawo.

17-18. Kansi ni pa nthawe zotyani patingasengewe kupeleka pemphelo m’malo mwa ŵanthu ayakine, lomba kansi tufunika kukumbukila chinji?

¹⁷ Nthawe ziyakine tingasengewe kuti tipemphele m’malo mwa ŵanthu ayakine. Mwachisanzo, mulongo wamene ochitisha phunzilo ya Baibolo angasenge mulongo muyakine wamene wamupelekeja ku phunzilo kuti apemphele. Payakine mulongo muyakine wamene uyo, angankhale kuti omuziŵalini bwino-bwino wophunzila Baibolo. Tetyo, angakonde kupeleka pemphelo yosilijila. Vamene ivi vingayavye kuti aziŵe vangafotokoze vokhuza wophunzila wamene uyo m’pemphelo.

¹⁸ M’bale angaujiwe kuti apemphele pamisonkhano ya mpingo olo pansokhano wokonzekela utumiki. Abale amene apasiwa mwayi wamene uyu ofunika kukumbukila cholinga cha misonkhano yamene iyo. Pemphelo ni njilalini yopelekela malangizo olo vilengezo. Pamisonkhano ya mpingo inyinji popelekewa 5 minesi ya nyimbo na pemphelo. Tetyo, m’bale wamene opemphela ofunikalini kulaŵila  “mawu anyinji,” makamaka m’pemphelo ya kumayambililo kwa misonkhano.—Mt. 6:7.

19. Kansi n’chinji chingatiyavye kukonzekela nsiku ya chiweluzo ya Yehova?

¹⁹ Payuvwendelela nsiku ya chiweluzo ya Yehova, tikowona pemphelo kunkhala yofunika ngako pamoyo wasu. Pa nkhani yamene iyi, Yesu enena kuti: “Tetyo nkhalani menso ndipo mukopemphela mopapatila nthawe zonse kuti muzakwanishe kuthaŵa vinthu vonse vamene ivi vamene vuyembekezelewa kuchitika.” (Lk. 21:36) Tetyo, kupemphela nthawe zonse kungatiyavye kupitilija kunkhala menso mwauzimu kuti nsiku ya Yehova osati izatipeze mozizimusha tikaliyekonzekela.

20. Kansi tingachite tyani kuti mapemphelo ŵasu akonkhala monga vofukiza vonunkhila luweme?

²⁰ Kansi takambilana chinji? Tuwona kuti pemphelo ni ya ntengo wapatali. Nkhani zofunika ngako m’mapemphelo ŵasu zufunika kunkhala zokatijana na cholinga cha Yehova. Tumutembejasoti Mulungu chifukwa cha Mwana wake na Ufumu wake. Komasoti tupemphelela Akhilisitu ayasu. Tingakwanishesoti kupemphelelasoti vinthu vatufunikila pa moyo komasoti kuti Mulungu atiyavye kunkhala na chikhulupililo chotang’a. Keno tuganizila mosamala vatufuna kufotokoza m’mapemphelo ŵasu tuwonesha kuti tutembeja ngako mwayi wa ntengo wapatali wa pemphelo. Tikochita vamene ivi, mapemphelo ŵasu ankhale monga ni vofukiza vonunkhila luweme kwa Yehova vamene ‘vumukondwelesha.’—Miy. 15:8.