1. Kansi cholinga cha Yehova n’chotyani masiku ŵano?

 MASIKU ŵano, cholinga cha Mulungu n’chakuti uthenga uweme wa Ufumu ulalikiliwe pachalo chonse. (Mk. 13:10; 1 Tim. 2:3, 4) Ntchito yamene iyi ni ya Yehova, ndipo ni yofunika ngako mwakuti yove esankha Mwana wake wokondewa kuti akoisogolela. Tingankhale osimikijila kuti chifukwa chakuti Yesu otisogolela, ntchito yolalikila ikoyenda luweme monga ni mwakufunila Yehova mapeto akaliyefwika.—Mt. 24:14.

2. Kansi tikambilane chinji mu nkhani ino?

² Mu nkhani ino, tiwone mwamene Yesu mwakukatishilila ntchito “kapolo wokhulupilika na wanzelu” popeleka chakulya chauzimu, noyayva ophunzila ŵake kuti akokata ntchito yolalikila yamene ni yofunika ngako kupambana kale yonse. (Mt. 24:45) Tiwonesoti vangachite aliyense wa sewo kuti akoyavya Yesu na kapolo wokhulupilika.

3. Kansi Yesu epasiwa udindo wotyani?

³ Yesu niye osogolela ntchito yolalikila. Kansi tingasimikijile tyani vamene ivi? Wasala patontho kuti alute kululu, Yesu ewonana na ayakine mwa ophunzila ŵake okhulupilika pa lupili ya Galileya. Yove eŵauja kuti: “Ulamulilo wonse wapelekewa kuli newo kululu na pano pachalo.” Onani chinthu chiyakine chofunika ngako chechiŵauja: “Tetyo, nkhoyani mukaphunzise ŵanthu a mitundu yonse kuti ankhale ophunzila ŵangu.” (Mt. 28:18, 19) Yesu epasiwasoti udindo wosogolela ntchito yolalikila.

4. Ndaŵa yanji tukaikilalini kuti Yesu opitilija kusogolela ntchito yolalikila?

⁴ Yesu enena kuti ntchito yolalikila na kupanga ophunzila izachitike  ku “mitundu yonse” komasoti kuti azankhale na ophunzila ŵake “masiku onse mpaka mu nyengo ya mapeto a nthawe ino.” (Mt. 28:20) Mawu amene aŵa owonesha luweme kuti Yesu opitilija kusogolela ntchito yolalikila mpaka muli ŵano masiku.

5. Kansi tuyavyako tyani kukwanilisha ulosi wa pa Salimo 110:3?

⁵ Yesu enzedelalini nkhaŵa kuti pazankhale ŵanthu atontho okata ntchito yolalikila mu nthawe ya mapeto a ichi chalo. Yove enzeziŵa kuti mawu a ulosi a wamasalimo azakwanilishiwe, amene onena kuti: “Ŵanthu ŵako azalipeleke mofunishisha pa nsiku yaukuti uzasogolele masodja ŵako kunkhondo.” (Sal. 110:3) Keno mwewo mukatako ntchito yalalikila, niyekuti muyavya Yesu na kapolo wokhulupilika noyayvako pokwanilisha ulosi wamene uyu. Ntchito yamene iyi yupita pasogolo, koma paliko mavuto ayakine.

6. Kansi ni vuto imozi yotyani yakukumana nayo ŵala olalikila za Ufumu masiku ŵano?

⁶ Vuto imozi yakukumana nayo ŵanthu olalikila za Ufumu, ni kushushiwa. Ampatuko, asogoleli avipembezo na andale ankhala olaŵila vinthu vinyinji vawenye vokhuza ntchito yasu. Achibale ŵasu, ŵanthu ŵatuziŵana nawo komasoti ayasu ŵatukata nawo ntchito, akasemphewa na wenye wamene uyu payakine angatikakamije kuti tileke kutumikila Yehova olo kusiya kulalikila. M’vyalo viyakine, adani ŵasu oyofya abale na alongo ŵasu, kuŵaukila, kuŵamanga ndipo mpaka kuŵavalila mudjeli. Koma tudabwalini ŵanthu akotichitila vinthu vamene ivi. Yesu enenelatu kuti: “Mitundu yonse izakuzondeni chifukwa cha zina yangu.” (Mt. 24:9) Mfundo ni yakuti keno tuzondewa ni umboni wakuti Yehova okondwela nase. (Mt. 5:11, 12) Mdyelekezi niye othandizila pa kushusha kwamene uku. Koma Yesu ali na mphamvu ngako kupambana Satana! Na thandizo ya Yesu, ŵanthu a mitundu yonse olalikiliwa uthenga uweme. Tiyeni tiwone umboni wake.

7. Kansi ni umboni wotyani wamuwona usimikijila kuti lemba ya Chivumbulutso 14:6, 7 yukwanilishiwa?

⁷ Vuto iyakine yatukumana nayo tikolalikila, ni yakuti ŵanthu anyinji olaŵila vilaŵilo vosiya-siyana. M’mensompheya ŵechiwoneshewa Yohane, Yesu enenelatu kuti mu nthawe yasu uthenga uweme uzalalikiliwe mphela olo kuti pali mavuto anyinji. (Ŵelengani Chivumbulutso 14:6, 7.) Motyani? Tuyeja-yeja kuuja ŵanthu anyinji uthenga wa Ufumu mulimonse mwatingakwanishile. Masiku ŵano, ŵanthu pachalo chonse angakwanishe kuŵelenga mabuku ofotokoza Baibolo pa webisaiti yasu ya jw.org m’vilaŵilo vopitilila 1.000! Bungwe Yutonga ivomeleja kuti timasulile buku yakuti Sangalalani na moyo kosasila! m’vilaŵilo vopitilila 700—kuti tikoikatishila ntchito pophunzila Baibolo na ŵanthu! Malangizo a m’Baibolo opelekewasoti kupitila m’mavidiyo a ŵanthu asamvwa komasoti m’mabuku a ŵanthu asalola. Tuwonelatu kuti maulosi a m’Baibolo okwanilishiwa. Ŵanthu “ofumila m’vilaŵilo vonse a mitundu iyakine” ophunzila kulaŵila “chilaŵilo chituŵa” chamene ni choonadi cha m’Baibolo. (Zek. 8:23; Zef. 3:9) Vonse vamene ivi vukwanishika chifukwa chakuti Yesu Khilisitu niye osogolela ntchito yamene iyi.

8. Kansi ntchito yasu yolalikila yankhala na vokonkhapo votyani pofwika pano?

⁸ Masiku ŵano, ŵanthu opitilila 8.000.000 m’vyalo 240 opanga mbali ya gulu ya Yehova, ndipo chaka chilichonse ŵanthu masauzande anyinji obatiziwa! Olo n’tetyo, chinthu chofunika ngako kupambana kukula kwa chiŵelengelo chamene ichi, m’chakuti ŵanthu amene aŵa achinja minkhalidwe yawo ndipo avwala “umunthu wanyowani.” (Akol. 3:8-10) Ayakine eleka minkhalidwe iipa monga chiwelewele, chiwawa, sankho komasoti  kukonda chalo. Ulosi wamene wilembewa pa Yesaya 2:4 ukwanilishiwa, wamene unena kuti ‘azaphunzilelinisoti nkhondo.’ Chifukwa chakuti tuyeja-yeja mwakhama kuti tivwale umunthu wanyowani, tuyavya ŵanthu ayakine kuti awele m’gulu ya Mulungu ndipo tuwonesha kuti tukonkheja chisanzo cha Yesu Khilisitu wamene ni nsogoleli wasu. (Yoh. 13:35; 1 Pet. 2:12) Vamene ivi vuchitikalini veka yayi. Koma Yesu niye otiyavya.

9. Mokatijana na Mateyu 24:45-47, kansi Yesu enena kuti n’chinji chikuti chizachitike nkati mwa nthawe ya mapeto?

⁹ Ŵelengani Mateyu 24:45-47. Yesu enenelatu kuti mkati mwa nthawe ya mapeto, yove azasankhe “kapolo wokhulupilika na wanzelu” kuti akopeleka chakulya chauzimu. Tetyo, tingayembekezele kuti kapolo wamene uyu akokata ntchito mwakhama mu nthawe yasu. Ndipo niye vuchitika chendi. Yesu wankhala okatishila ntchito kagulu katontho ka analume ozozewa kuti kakopeleka “chakulya chauzimu pa nthawe yoyenela” kuli ŵanthu a Mulungu komasoti kuli ŵanthu ayakine achidwi. Analume amene aŵa oliwonalini kuti ni olamulila chikhulupililo cha ŵanthu ayakine. (2 Akor. 1:24) Mmalomwake, ove oziŵa kuti Yesu Khilisitu niye “nsogoleli na wolamulila” wa ŵanthu ŵake.—Yes. 55:4.

10. Pa mabuku ŵatuwona pa vithunzi, kansi ni buku yotyani ikuyavyani mwewo kuti muyambe kutumikila Yehova?

¹⁰ Kuyambila mu 1919, kapolo wokhulupilika wankhala okonza mabuku osiyana-siyana, amene ayavya ŵanthu achidwi kuphunzila choonadi cha m’Mawu a Mulungu. Mu 1921, kapolo wamene uyu efumya buku yakuti “Zeze wa Mulungu” pofuna kuyavya ŵanthu achidwi kuphunzila mfundo zoyambilila za m’Baibolo. M’kupita kwa nthawe, pankhala pokonzewasoti mabuku ayakine. Kansi ni buku yotyani ikuyavyani  mwewo kuti muziŵe Atata ŵasu ŵakululu komasoti kuŵakonda? Kansi ni “Mulungu Akhale Woona,” Coonadi Cimene Cimatsogolera ku Moyo Wamuyaya, Mungathe Kukhala ndi Moyo Kosatha m’Paradaiso pa Dziko Lapansi, Chidziŵitso Chotsogolera ku Moyo Wosatha, Kodi Baibulo Limaphunzitsa Chiyani Kwenikweni?, Vayuphunzisa Baibolo, olo yakuti Sangalalani na moyo kosasila!, yamene ni buku yasu yanyowani? Mabuku onse amene aŵa ekonzewa kuti akotiyavya kupanga ophunzila. Ndipo pechifumyiwa tiwona kuti ni ngawo-ngawo ŵetenzefunikila.

11. Ndaŵa yanji tonse tufunikila chakulya chauzimu?

¹¹ Ni ŵanthulini tyala achidwi amene angoyamba kwalombapano kuphunzila choonadi, amene ofunika kuziŵa ngako Yehova na Mawu ŵake, Baibolo. Tonse tufunikila mfundo zamene izi. Ntumwi Paulo elemba kuti: “Chakulya chotamfunya ni cha ŵanthu otang’a mwauzimu.” Paulo enenasoti kuti kukatishila ntchito vatuphunzila m’Baibolo kungatiyayve “kusiyanisha chiweme na chiipa.” (Ahe. 5:14) Vingankhale vovuta masiku ŵano kukonkheja mfundo za Yehova chifukwa chakuti ŵanthu anyinji ali na minkhalidwe iipa. Koma Yesu owoneshesha kuti tuphunzila vinthu vofunika kuti chikhulupililo chasu chipitilije kunkhala chotang’a. Tulondela malangizo amene aŵa kufumila m’Mawu a Mulungu oujiliwa, Baibolo. Kapolo wokhulupilika okonza komasoti kuyaŵa chakulya chamene ichi mosogolelewa na Yesu.

12. Molingana na Yesu, kansi tuwonesha tyani kuti tulemekeza zina ya Mulungu?

¹² Molingana na Yesu, tupeleka ulemelelo wofunikila pa zina ya Mulungu. (Yoh. 17:6, 26) Mwachisanzo, mu 1931 tiyamba kuziŵika na zina yofumila m’Baibolo, yakuti Mboni za Yehova. Pochita vamene ivi, tiwonesha kuti zina ya Mulungu ni yofunika ngako kuli sewo komasoti kuti tenzefuna kuziŵika na zina ya Atata ŵasu ŵakululu. (Yes. 43:10-12)  Ndipo kufumila mu October chaka chamene icho, zina ya Mulungu yankhala yupezeka pachikuto cha magazini iliyonse monga ni yamene ino. Kuyangijila pali vamene ivi, Baibulo la Dziko Latsopano la Malemba Opatulika iwejelesha zina ya Mulungu m’malo ŵake ofunikila. Vamene ivi n’vosiyana ngako na vachita matchetchi ayakine amene onena kuti ni a Chikhilisitu, pochosamo zina ya Yehova m’Mabaibolo ŵawo.

13. Kansi n’chinji chukusimikijilani kuti Yesu okatishila ntchito “kapolo wokhulupilika na wanzelu” masiku ŵano? (Yoh. 6:68)

¹³ Kupitila muli “kapolo wokhulupilika na wanzelu,” Yesu enkhazikisha gulu yapadela pachalo chonse kuti apitishe pasogolo kulambila kutuŵa. Kansi mwewo mukumvwa tyani mukaganizila za gulu yamene iyi? Payakine mukumvwa monga ni mwechimvwila ntumwi Petulo, wamene euja Yesu kuti: “Tingalutesoti kwa ŵani? Mwewo niye muli na mawu a moyo wosasila.” (Yoh. 6:68) Kuti tiliyeiziŵe gulu ya Yehova, kansi aliyense wa sewo pano patunena sembe ali kuni? Kupitila mu gulu yamene iyi, Khilisitu owoneshesha kuti tili na vinthu vonse vatufunikila kuti tipitilije kunkhala okhulupilika kwa Mulungu. Yove otiphunzisasoti kuti tikoikata luweme ntchito yasu yolalikila. Kuyangijila pali vamene ivi, yove otiyavya kuvwala “umunthu wanyowani” kuti tikokondwelesha Yehova.—Aef. 4:24.

14. Kansi mwewo mwapindula tyani chifukwa chonkhala mu gulu ya Yehova nkati mwa mulili wa COVID-19?

¹⁴ Yesu opeleka malangizo anzelu pa nthawe yovuta. Mapindu a malangizo amene aŵa ankhala owonekela luweme pewiyamba mulili wa COVID-19. Olo kuti ŵanthu anyinji muli ichi chalo enzeziŵalini vangachite, Yesu enzewoneshesha kuti tulondela malangizo omvwika  luweme kuti tipitilije kunkhala otetezeka. Tilimbikisiwa kuti tiyambe kuvwala máscara tikankhala pagulu, noyeja-yeja kunkhala patali na patali. Akulu elimbikisiwa kuti apitilije kulaŵila na aliyense mumpingo mwawo pafupi-pafupi, nowona keno pali vakufunikila kuti apitilije kunkhala otetezeka, athanzi, nopitilija kunkhala pa ushamwali na Yehova. (Yes. 32:1, 2) Tenzelimbikisiwa komasoti kulondela malangizo oyangijilika kupitila m’malipoti a Bungwe Yutonga.

15. Kansi ni malangizo otyani epelekewa okhuza mwatingachitile misonkhano na kulalikila, ndipo vokonkhapo vake vinkhala votyani?

¹⁵ Nkati mwa mulili, tilondelasoti malangizo omvwika luweme okhuza mwatingachitile misonkhano yampingo komasoti mwatingakatile ntchito yasu yolalikila. Mokulumija tiyamba kuchita misonkhano yampingo, yadela na yachigawo pokatishila ntchito videoconference. Ndipo tiyambasoti kulalikila pokatishila ntchito foni komasoti kulemba makalata. Yehova edalisa khama yasu. Maofesi anyinji a nthambi epeleka chiŵelengelo chikulu cha kuyangijilika kwa ofalisa. Ndipo kulaŵila chendi, anyinji enkhala na vokonkhapo volimbikisa nkati mwa mulili.—Onani bokosi yakuti, “ Yehova odalisa ntchito yasu yolalikila.”

16. Kansi tingankhale osimikijila za chinji?

¹⁶ Ayakine, payakine enzewona kuti gulu yamene iyi yuchita vinthu monyanyila ngako nkati mwa mulili. Koma moweleja-weleja, venzewonekelatu kuti malangizo ŵetenzelondela enze oyavya. (Mt. 11:19) Ndipo tikaganizila mwakusogolelela ŵanthu ŵake Yesu mwachikondi, tunkhala osimikijila kuti viliyekanthu na vinthu vatingakumane navo kusogolo, Yehova na Mwana wake wokondewa apitilije kunkhala nase.—Ŵelengani Aheberi 13:5, 6.

17. Kansi mukumvwa tyani chifukwa chokata ntchito mosogolelewa na Yesu?

¹⁷ Kukata ntchito mosogolelewa na Yesu, ni daliso ikulu ngako! Tili m’gulu yamene ŵanthu ŵake ni okatijana olo kuti osiyana chinkhalidwe, ntundu komasoti chilaŵilo. Tulondela malangizo anyinji kufumila m’Mawu a Mulungu komasoti tuphunzisiwa mwatingakatile ntchito yolalikila. Aliyense wa sewo ophunzisiwa mwangavwalile umunthu wanyowani komasoti tuphunzila kukondana muyake na muyake. Tili na vifukwa vinyinji vomekela nsogoleli wasu Yesu!