Paulo elemba kuti: “Mwa chilamulo, newo nichifwa ku chilamulo, mwakuti ningachikonkhejelinisoti, kuti ninkhale wamoyo kwa Mulungu.”​—Aga. 2:19.

Vechilemba Paulo venze vokatijana na mfundo ikulu yechifotokoza yove ku mipingo ya m’chigawo cha Roma ku Galatiya. Akhilisitu ayakine akwamene uko enzekopeka na aphunzinsi achinyengo. Analume amene aŵa enzephunzisa kuti, munthu kuti akapulumuke enzefunikila kukonkheja Chilamulo cha Mose, makamaka nkhani ya mdulidwe. Koma Paulo enzeziŵa kuti Mulungu enzefunalinisoti kuti Akhilisitu akochita mdulidwe. Yove ekambilana nawo mu njila yomvwika luweme ndipo ewonesha kuti viphunziso vamene ivi venze vawenye ndipo etang’isha chikhulupililo cha abale kuti akokhulupilila nsembe ya Yesu Khilisitu.​—Aga. 2:4; 5:2.

Baibolo yunena momvwika luweme kuti, munthu akamwalila oziŵalini chilichonse, ndipo paliye chinthu chilichonse chumuchitikila. (Mlal. 9:5) Paulo pechinena kuti: “Newo nichifwa ku chilamulo,” yove enzetanthauza kuti Chilamulo cha Mose chenzevesoti mphamvu pali yove. Kulaŵila chendi, Paulo enzesimikijila kuti kukhulupilila dipo niye kwanzemuchitisha kuti ankhale “wamoyo kwa Mulungu.”

Chilamulo chichitisha kuti vinthu vichinje kuli Paulo “mwa chilamulo.” Motyani? Yove enze echingosilija kufotokoza kuti, “munthu oyesewa wolungama mwa kukhulupilila Khilisitu Yesu, osati chifukwa cha ntchito za chilamulo, sewo takhulupilila Khilisitu Yesu.” (Aga. 2:16) N’chendi kuti Chilamulo chenze chikwanilisha kale chinthu chiyakine chofunika ngako. Paulo efotokozela Agalatiya kuti: “Echiyangijilapo kuti machimo awonekele, mpaka uyo wamene ni mbewu azafwike, wamene lonjezo yenze inena za yove.” (Aga. 3:19) N’chendi, Chilamulo chenzewoneshelatu luweme kuti ŵanthu aliye ungwilo komasoti ochimwa sembe aliyekwanishesoti kuchikonkheja mwaungwilo. Ove enzefunikila nsembe yosilijila yangwilo. Chilamulo chenzeyavya ŵanthu kuziŵa kuti Yesu enze “mbewu.” Mwa kukhulupilila Yesu Khilisitu, munthu angawonewe kuti ni wolungama na Mulungu. (Aga. 3:24) Paulo ewonewa kuti ni wolungama chifukwa chakuti, mwa Chilamulo, yove emuvomela Yesu komasoti kumukhulupilila. Chifukwa cha vamene ivi, Paulo ‘echifwa ku chilamulo’ komasoti ‘enkhala wamoyo kwa Mulungu.’ Chilamulo chenzevesoti mphamvu iliyonse pali yove, koma Mulungu enze nazo.

Paulo efotokozasoti mfundo yolingana na yamene iyi mu kalata yake yoluta kuli Aroma. Yove elemba kuti: “Abale ŵangu, muŵili wa Khilisitu wikupangani kunkhala akufwa ku Chilamulo . . . Tamasuliwa ku Chilamulo, chifukwa tafwa ku chilamulo chala chamene chenzetimanga.” (Aro. 7:4, 6) Iyi lemba komasoti ya Agalatiya 2:19, yuwonesha kuti Paulo enzenenalini za kufwa monga wochimwa woweluziwa pansi pa Chilamulo. Mmalomwake, yove enzenena vokhuza kumasuliwa. Chilamulo chenzevesoti mphamvu pali yove komasoti pali ayakine molingana na yove. Ove emasuliwa chifukwa chokhulupilila nsembe ya Khilisitu.