1. Kansi ŵanthu anyinji mu nthawe ya atumwi eujiwa kuti achite chinji?

GULU ikulu ya analume na anakazi yenze iluta ku Yerusalemu. Ove enze ofumila mu vyalo vosiyana-siyana ndipo enzelaŵila vilaŵilo vosiyana-siyana. Chinthu chiyakine chodabwisa, chichitika pa nsiku yamene iyo. Mwazizizi Ayuda ayakine eyamba kulaŵila vilaŵilo venzelaŵila analume na anakazi ofumila mu vyalo vosiyana-siyana! Vamene ivi vidabwisa ngako gulu ya ŵanthu, koma venzelaŵila Ayuda amene awo na vechinena ntumwi Petulo kuli ŵanthu onse viŵafwika ngako pa ntima. Gulu ya ŵanthu yamene iyo iphunzila kuti angapulumushiwe powonesha chikhulupililo muli Yesu Khilisitu. Uthenga wamene uyo wiŵakhuza ŵanthu amene awo. Ŵanthu amene awo ekhuziwa ngako mpaka efwika pokonsha kuti: “Tichite chinji pamene apa?” Petulo enena kuti: “Aliyense wa mwewo abatiziwe.”​—Mac. 2:37, 38.

2. Kansi tikambilane chinji mu nkhani ino? (Onani chithunzi chapachikuto.)

² Vamene vichitika pavuli pake venze vodabwisa. Ŵanthu pafupi-fupi 3.000 ebatiziwa nsiku yamene iyo, nonkhala ophunzila a Khilisitu. Chamene ichi chenze chiyambi cha ntchito ikulu yopanga ophunzila yechilamula ophunzila ŵake Yesu kuti aikate. Ophunzila ŵake akalikata mphela ntchito yamene iyi mpaka pano. Masiku ŵano, kuti munthu ankhale woyenelela kubatiziwa tikungolaŵilalini naye tyala kwa ma awazi atontho yayi. Pangapite miyezi olo chaka olosoti kupitilila apo kuti wophunzila akwanilishe cholinga chamene icho. Pofunika khama kuti muyavye munthu kunkhala wophunzila wa Khilisitu, monga ni mwamuziŵila keno mwewo muphunzila Baibolo na munthu muyakine. Mu nkhani ino, tikambilane vamungachite kuti muyavye wophunzila Baibolo wanu kuti ankhale wophunzila wa Yesu wobatiziwa.

3. Monga ni mwayuwoneshela lemba ya Mateyu 28:19, 20, kansi wophunzila ofunika kuchita chinji kuti apite pasogolo mpaka kufwika pobatiziwa?

³ Akaliyebatiziwa, wophunzila Baibolo ofunika kuvikatishila ntchito vayuphunzisa Baibolo. (Ŵelengani Mateyu 28:19, 20.) Keno wophunzila Baibolo okatishila ntchito vinthu vakuphunzila, yove onkhala monga ni “munthu wochenjela” wa mu fanizo ya Yesu, wamene enosha ngako pa mwala wotang’a kuti amange ng’anda yake. (Mt. 7:24, 25; Lk. 6:47, 48) Kansi tingamuyavye tyani wophunzila Baibolo kukatishila ntchito vinthu vakuphunzila? Tiyeni tikambilane vinthu vokwanila vitatu vatingachite.

4. Kansi tingamuyavye tyani wophunzila Baibolo kuti achite khama mpaka kuyabatiziwa? (Onanisoti bokosi yakuti, “ Yavyani wophunzila Baibolo wanu kunkhala na volinga komasoti kuvikwanilisha.”)

⁴ Yavyani ophunzila Baibolo ŵanu kunkhala na volinga. Ndaŵa yanji mufunika kuchita vamene ivi? Ganizilani chisanzo ichi: Kuti mwewo mufune kuyendesha motoka nsenga utali ngako, mungasankhe kupanamako m’malo ayakine aweme ngako nkati mwa ulwendo. Ivi vingakuchitisheni kuti osati mutaye ntima chifukwa choganizila kutalimpha kwa nsenga kuti mukafwike kwamukuya. Molingana na vamene ivi, vingankhale luweme kuti wophunzila Baibolo akonkhala na volinga vakuti angavikwanilishe mokulumija, vamene ivi vingamuyavye kuwona kuti n’vokwanishika kuli yove kukwanilisha cholinga chake chobatizika. Katishilani ntchito kabokosi kakuti “Cholinga” m’buku yakuti Sangalalani na moyo kosasila! yamene ni buku yoyavyila wophunzila wanu kunkhala na volinga. Pamapeto pa mutu uliwonse mukokambilana mwavingamuyavyile volinga wophunzila Baibolo wanu kukatishila ntchito vaphunzila. Keno pali cholinga chiyakine chosiyanako chamufuna kuti wophunzila Baibolo wanu achikwanilishe, mungachilembe pa malo akuti “Viyakine.” Mukokatishila ntchito kaŵili-kaŵili mbali yamene iyi ya phunzilo kuti muwelejesoti kukambilana na  wophunzila wanu volinga vangakwanilishe mokulumija komasoti vala vingafune nthawe ikulu.

5. Mokatijana na mwavililembelewe pa Maliko 10:17-22, kansi Yesu emuuja kuti achite chinji munthu wachuma, ndipo ndaŵa yanji?

⁵ Yavyani wophunzila Baibolo wanu kuchinja vinthu pa moyo wake. (Ŵelengani Maliko 10:17-22.) Yesu enzeziŵa kuti chingankhale chinthu chovuta kuli munthu wachuma kugulisa vinthu vake vonse. (Mk. 10:23) Olo n’tetyo, Yesu euja munthu wamene uyo kuti achinje chinthu chikulu chamene ichi pa moyo wake. Ndaŵa yanji? Ndaŵa yakuti Yesu enze emukonda. Nthawe ziyakine, tingaleke kulimbikisa wophunzila Baibolo kukatishila ntchito vinthu vakuphunzila ndaŵa tuwona kuti aliyekonzeke kuti achinje vinthu vakufunikila. Pangatole nthawe itali kuti ŵanthu achinje moyo wawo novwala umunthu wanyowani. (Akol. 3:9, 10) Koma keno mwewo mungakulumije kumuyavya wophunzila kuti achinje vinthu pa moyo wake, ivi vingachitishe kuti yove naye achinjesoti mokulumija. Pokambilana naye vamene ivi, mwewo muwonesha kuti mumudela nkhaŵa.—Sal. 141:5; Miy. 27:17.

6. Ndaŵa yanji tufunika kukonsha wophunzila wasu vakuganiza yove pa nkhani yatukambilana?

⁶ N’kofunika kukonsha wophunzila Baibolo wanu vakuganiza yove pa nkhani yamukambilana. Vamene ivi vingawoneshe vakumvwisha komasoti vakukhulupilila wophunzila wanu. Keno mwewo mungochita vamene ivi kaŵili-kaŵili, vingankhale vosavuta kukambilana vinthu vamene vingankhale vovuta kuti yove avivomekeje. Buku yakuti Sangalalani na moyo kosasila! ili na mokonsho anyinji ngako ofuna kuziŵa vakuganiza wophunzila. Mwachisanzo, mutu 04 ukonsha kuti: “Kansi muganiza kuti Yehova akumvwa tyani mukokatishila ntchito zina yake?” Mutu 09 ukonsha kuti: “Kansi mwewo mungakonde kupempelela vinthu votyani?” Poyamba, vingankhale vovuta kuti wophunzila wanu ayankhe makonsho amene aŵa. Mwewo mungamuyavye pomuphunzisa kuti akoganizila ngako pa malemba komasoti pa vithunzi vili m’buku yamene iyi.

7. Kansi tingakatishile tyani ntchito luweme vochitika vapa moyo wa ŵanthu ayakine kuti tiyavye wophunzila Baibolo?

⁷ Wophunzila wanu akamvwisha vakufunika kuchita, katishilani ntchito vochitika vapa moyo wa ŵanthu ayakine kuti mumulimbikise kuchita vamene ivo. Mwachisanzo, keno wophunzila wanu opezekalini pamisonkhano monkhazikika, mungamuwoneshe vidiyo yakuti Yehova enisamalila yamene ili pa mbali yakuti “Phunzilani vinyinji” m’mutu 14. M’mitu inyinji ya buku yakuti Sangalalani na moyo kosasila!, mwewo mufwane vochitika vinyinji vapa moyo wa ŵanthu ayakine pa mbali yakuti “Vati tiphunzile” olo pa mbali yakuti “Phunzilani vinyinji.” * Nkhalani osamala kuti osati mukolinganija wophunzila wanu na munthu muyakine, ponena kuti, “Keno chite angakwanishe kuchita vamene ivi, mwewo namwe mungakwanishe.” Lekani kuti wophunzila wanu aganizile yeka vamene ivi. Njila iweme, ni kukambilana mfundo zikulu-zikulu zayavya munthu wa muvidiyo kukatishila ntchito vayuphunzisa Baibolo. Payakine mungatomole lemba yofunika ngako olo chinthu chiyakine chothandiza chechichita munthu wa muvidiyo. Keno n’vokwanishika, fotokozani mwamene Yehova mwechiyavyila munthu wamene uyo.

8. Kansi tingamuyavye tyani wophunzila wasu kukonda Yehova?

⁸ Yavyani wophunzila wanu kukonda Yehova. Mungachite tyani vamene ivi? Mukofwana mipata kuti muyavye wophunzila wanu kuphunzila vinyinji vokhuza minkhalidwe ya Yehova. Muyavyeni wophunzila wanu kumvwisha kuti Yehova ni Mulungu wachisangalalo komasoti kuti nthawe zonse ali ku mbali ya ŵala amene omukonda. (1 Tim. 1:11; Ahe. 11:6) Muwonesheni wophunzila wanu kuti apindule akokatishila ntchito vakuphunzila,  ndipo mufotokozeleni kuti mapindu amene awo owonesha kuti Yehova omukonda. (Yes. 48:17, 18) Wophunzila wanu akakulisha ngako chikondi chake pa Yehova, ankhale wofunishisha ngako kuchinja vala vakufunikila.​—1 Yoh. 5:3.

9. Mokatijana na lemba ya Maliko 10:29, 30, kansi ni chinji chingayavye munthu kusiya vinthu viyakine kuti ankhale wophunzia wobatizika?

⁹ Kuti apite pasogolo mpaka kufwika pobatiziwa, wophunzila Baibolo ofunika kuchita khama. Molingana na munthu wachuma wamene tamutomolako kale, ophunzila ayakine angafunikile kusiya vinthu vakuthupi. Keno ntchito yakukata yukatijanalini na mfundo za m’Baibolo, ove mpaka angafunikile kufwana ntchito iyakine. Anyinji payakine angafunike kuleka kunkhala pa ushamwali na ŵanthu asakonda Yehova. Ayakine payakine angakaniwe na enekwawo amene okondalini a Mboni za Yehova. Yesu enena kuti vingankhale vovuta kuli ŵanthu ayakine kuti asiye vinthu viyakine. Koma yove elonjeza kuti ŵala omukonkheja azakhumudwisiwelini. Yehova azaŵadalise ngako poŵapasa banja yauzimu yachikondi pakati pa ŵanthu ŵake. (Ŵelengani Maliko 10:29, 30.) Kansi mwewo mungamuyavye tyani wophunzila Baibolo wanu kupindula na mphaso iweme yamene iyi?

10. Kansi mwewo mwaphunzilapo chinji pa mawu ŵechinena Manuel?

¹⁰ Nkhalani pa ushamwali na wophunzila wanu. N’kofunika ngako kumuwonesha wophunzila wanu kuti mumudela nkhaŵa. Ndaŵa yanji? Onani vechifotokoza Manuel, wamene onkhala ku Mexico. Pokumbukila penze akali wophunzila Baibolo, yove enena kuti: “Tikaliyeyamba kuphunzila, mphunzisi wangu enzenikonsha kuti aziŵe keno nili tyani. Yove eniyavya kunkhala womasuka komasoti kunilola kuti nimuuje za nkhani iliyonse. Newo nenzekumvwa kuti yove enzenidela nkaŵa chendi.”

11. Kansi ophunzila ŵasu angapindule tyani chifukwa chotolako nthawe ali pamozi na sewo?

¹¹ Mukopatulako nthaŵe yonkhala pamozi na ophunzila ŵanu, monga ni mwenzechitila Yesu kupatulako nthawe yonkhala pamozi na ophunzila ŵake. (Yoh. 3:22) Keno wophunzila Baibolo wanu ochinja vinthu pa moyo wake,  mungamuitile ku ng’anda kwanu kuti azamwe tiyi olo kuzakulya chakulya payakine kulolelako imozi mwa mapulogilamu ŵasu a pamwezi a JW Broadcasting. Wophunzila wanu angatembeje ngakosoti makamaka keno mwamuita pa nthawe yakuti azishamwali ŵake na enekwake ochita chikondwelelo cha chipembezo chawenye ndipo yove angolimvwa kuti ali yeka. Kazibwe, wamene onkhala ku Uganda enena kuti: “Newo nuganiza kuti niphunzila vinthu vinyinji vokhuza Yehova, osati tyala pa nthawe yophunzila, koma chifukwasoti chotandala na mphunzisi wangu. Newo niwona kuti Yehova oŵadela nkhaŵa ngako ŵanthu ŵake ndipo ove ni osangalala. Vamene ivi niye venenzefuna pa moyo wangu.”

12. Ndaŵa yanji tufunika kulutako na ofalisa osiyana-siyana ku phunzilo ya Baibolo?

¹² Mukoitilako ofalisa osiyana-siyana ku phunzilo yanu ya Baibolo. Nthawe ziyakine tingawone kuti n’kosavuta kuluta seka olo kuluta na wofalisa yumo na yumo. Olo kuti ni kosavuta kuchita tetyo, wophunzila Baibolo wasu angapindule keno nthawe zinyinji, tuluta na ofalisa osiyana-siyana. Dmitrii wamene onkhala ku Moldova, enena kuti: “Wofalisa aliyense wamene owela pamozi na oniphunzisa Baibolo ofotokoza vinthu mu njila iyakine. Vamene ivi viniyavya kuwona njila ziyakine zokatishila ntchito vinthu venenzephunzila. Komasoti newo nenzechitalini wowa ngako penipezeka pamisonkhano ulwendo woyamba, ndaŵa yakuti nenze niziŵako kale vinyinji vokhuza abale na alongo.”

13. Ndaŵa yanji tufunika kuyavya wophunzila wasu kuti akopezeka pamisonkhano?

¹³ Yavyani wophunzila wanu kuti akopezeka pamisonkhano ya mpingo. Ndaŵa yanji? Ndaŵa yakuti Yehova olamula ŵala omulambila kuti akosonkhana pamozi; yamene iyi ni mbali ya kulambila kwasu. (Ahe. 10:24, 25) Kuyangijila pali vamene ivi, abale ŵasu komasoti alongo mumpingo onkhala monga banja imozi. Tikankhala pamisonkhano pamozi na ove, tunkhala monga tikulya chakulya chiweme ngako tonse pamozi. Keno mwewo muyavya wophunzila Baibolo wanu kuti akopezeka pamisonkhano, munkhala kuti mumuyavya kuchita chinthu chofunika ngako kuti yove abatiziwe. Koma vingankhale vovuta kuti yove ayambe kupezeka pamisonkhano. Kansi buku yakuti Sangalalani na moyo kosasila! ingamuyavye tyani wophunzila wanu kupilila mavuto aliwonse ŵangakumane nawo?

14. Kansi tingamulimbikise tyani wophunzila wasu kuti akopezeka pamisonkhano?

¹⁴ Katishilani ntchito mutu 10 wa buku yakuti Sangalalani na moyo kosasila! kuti muyavye wophunzila wanu komasoti kumulimbikisa. Buku yamene iyi peyenze ikaliye fumyiwa, ofalisa ayakine esengewa kuti akatishile ntchito mutu wamene uyu pophunzila na ophunzila ŵawo. Ove enena kuti wikata ntchito luweme ngako ndipo wiyavya ophunzila ŵawo kuti ayambe kufwika pamisonkhano. Kulaŵila chendi, osalindila kuti mpaka mufwike mutu 10 kuti muyambe kuitila wophunzila Baibolo wanu kumisokhano yasu. Muitileni mokulumija keno n’vokwanishika ndipo pitilijani kuchita tetyo pafupi-pafupi. Ophunzila Baibolo anyinji okumana na mavuto osiyana-siyana. Tetyo, mukonkhala tchelu ngako pali wophunzila wanu nowona ngati pali mbali iyakine yamungamuyavye. Osafoka yayi olo pangapite nthawe kuti yove ayambe kupezeka pamisonkhano. Nkhalani woleza ntima, koma pitilijani kumuitila kumisonkhano.

15. Kansi wophunzila wasu payakine angankhale na wowa wotyani?

¹⁵ Kansi mwewo mukumbukila wowa wemwenzeko nawo pemwinkhala wa Mboni za Yehova? Payakine mwewo mwenzelimvwa kuti mungakwanishelini kulalikila ku ng’anda na ng’anda. Olo payakine mwewo mwenzeyopa kuti banja yanu olo azishamwali wanu angokushushani. Keno n’tetyo, mwewo mungamvwishe mwakumvwila wophunzila Baibolo wanu. Yesu enena kuti ŵanthu ayakine angankhale nawo wowa woteti. Tetyo, yove elangiza  ophunzila ŵake kuti osati alole kuti wowa uŵakangishe kutumikila Yehova. (Mt. 10:16, 17, 27, 28) Kansi Yesu eŵayavya tyani ophunzila ŵake kuti asilije wowa? Lomba kansi mwewo mungakonkheje tyani chisanzo chake?

16. Kansi tingamuphunzise tyani wophunzila wasu kuti akoujako ayakine vinthu vakuphunzila?

¹⁶ Phunzisani wophunzila wanu patontho-patontho kuti akoujako ayakine za vinthu vakukhulupilila. Ophunzila a Yesu payakine enkhalako na wowa yove pechiŵatumija kuti akalalikile. Koma Yesu eŵayavya poŵauja kwangalalikile komasoti uthenga wakuti akalikile. (Mt. 10:5-7) Kansi mwewo mungamukonkheje tyani Yesu? Mukomuyavya wophunzila wanu kuti awone kwangalalikile. Mwachisanzo, mukonsheni keno yove oziŵako munthu muyakine wamene angapindule chifukwa chophunzila mfundo iyakine ya m’Baibolo. Pavuli pake muyavyeni kukonzekela vangayanena, pomuwonesha njila yosavuta youjilako ayakine mfundo yamene iyo. Keno pangafunikile, mungakatishile ntchito mbali yothandiza yakuti “Ŵanthu ayakine onena kuti” komasoti yakuti “Ŵanthu ayakine payakine angakonshe kuti,” yupezaka m’buku yakuti Sangalalani na moyo kosasila! Pochita vamene ivi, ikilani nzelu pa kuphunzisa wophunzila wanu kuti akokatishila ntchito Baibolo kuti apeleke mayankho osavuta komasoti akowamila ntima ŵanthu.

17. Kansi tingaikatishile tyani ntchito lemba ya Mateyu 10:19, 20, 29-31 kuti tiyavye wophunzila wasu kuti akodalila Yehova?

¹⁷ Yavyani wophunzila wanu kuti akodalila Yehova. Yesu esimikijila ophunzila ŵake kuti Yehova aŵayavye chifukwa chakuti Yove enzeŵakonda. (Ŵelengani Mateyu 10:19, 20, 29-31.) Mukumbusheni wophunzila wanu kuti Yehova amuyavyesoti naye. Mungamuyavye kuti akodalila Yehova popemphela naye pamozi vokhuza volinga vake. Franciszek, wamene onkhala ku Poland, enena kuti: “Mphunzisi wangu nthawe zonse enzefotokoza volinga vangu m’mapemphelo ŵake. Newo peniwona mwechiyankhila Yehova mapemphelo a mphunzisi wangu, mokulumija niyamba kupemphela. Newo nichimvwa kuti Yehova eniyavya penisenga holide ku ntchito kuti nikapezeke pamisonkhano yampingo komasoti pa nsonkhano wachigawo.”

18. Kansi Yehova akumvwa tyani akawona ntchito yakuchita aphunzisi Achikhilisitu?

¹⁸ Yehova oŵadela nkhaŵa ngakosoti ophunzila Baibolo ŵasu. Yove otembeja ngako khama yakuchita aphunzisi Achikhilisitu kuti ayavye ŵanthu kunkhala naye paushamwali, ndipo yove oŵakonda chifukwa cha vamene ivi. (Yes. 52:7) Keno palilomba mwewo muchitishalini phunzilo ya Baibolo, mungayavye mphela ophunzila Baibolo kupita pasogolo mpaka kufwika pobatiziwa, popelekeja ofalisa ayakine ku maphunzilo ŵawo.