1. Ndaŵa yanji atumiki a Yehova nthawe ziyakine olimvwa kuti ali ŵeka?

ANYINJI a sewo tulimvwa kuti tili seka nthawe ziyakine. Kuli ayakine maganizo amene aŵa opitilijalini kwa nthawe itali. Ayakine angalimvwe kuti ali ŵeka kwa nthawe itali. Payakine tingalimvwe kuti tili seka olo kuti tilizengulukiwe na ŵanthu anyinji. Vunkhala vovuta kuli ayakine kuti afwane azishamwali mumpingo wanyowani. Ayakine enze m’banja yamene yenzechitila pamozi vinthu vinyinji, koma pavuli pake ove olimvwa kuti ali ŵeka ngako akafulukila kutali na banja yawo. Ndipo ayakine ayewa ngako kutandala na munthu wenzekonda wamene emwalila. Komasoti Akhilisitu ayakine, makamaka ŵala amene aphunzila choonadi kwalombapano, olimvwa kuti ali ŵeka keno okaniwa na achibale komasoti azishamwali ŵenzenawo kale amene ni Mbonilini.

2. Kansi tikambilane makonsho otyani?

² Yehova oziŵa ndipo omvwisha chinthu chilichonse chokhuza sewo. Keno tulimvwa kuti tili seka, yove oziŵa vamene ivi ndipo ofuna kutiyavya kuti tipilile maganizo amene aŵa. Kansi Yehova otiyavya tyani? Kansi tingachite tyani kuti tiliyavye seka? Ndipo kansi tingayavye tyani ayakine mumpingo mwasu amene olimvwa kuti ali ŵeka? Tiyeni tikambilane mayankho a makonsho amene aŵa.

3. Kansi Yehova ewonesha tyani kuti enzemudela nkhaŵa Eliya?

³ Yehova ofunishisha kuti atumiki ŵake onse ankhale na moyo wosangalala. Yove ali pafupi na aliyense wa sewo, ndipo yove omvwisha keno tulimvwa kunkhala achisoni komasoti osakondwela. (Sal. 145:18, 19) Ganizilani mwamene Yehova mwenzedela nkhaŵa maganizo a mneneli Eliya komasoti mwechimuyavyila. Munthu wokhulupilika wamene uyu enkhalako pa nthawe yovuta mu mbili ya Isiraeli. Ŵanthu a mphamvu mu Isiraeli amene enzekondalini Yehova, enzetamanisha ŵala amene enzemutumikila  ndipo ove enzefunishisha ngako kupaya Eliya. (1 Maf. 19:1, 2) Kuyangijila pali vamene ivi, Eliya enzeganiza kuti ni yove yeka mneneli wasala wamene enzetumikila Yehova, ndipo vamene ivi payakine vimufokesha ngakosoti. (1 Maf. 19:10) Mulungu echitapo kanthu nthawe yamene iyo kuti amuyavye Eliya. Yehova etumija mngelo wake kuti akamusimikijile mneneli Wake kuti yove enzelini yeka​—penze pakali Aisiraeli ayakine anyinji oyopa Mulungu!​—1 Maf. 19:5, 18.

4. Kansi lemba ya Maliko 10:29, 30 yuwonesha tyani kuti Yehova osamalila ŵala amene aleka kuyavyiwa na abanja komasoti azishamwali ŵawo?

⁴ Yehova oziŵa kuti keno sewo tasankha kumutumikila, anyinji a sewo tifunikila kusiya vinthu vinyinji. Chimozi mwa vinthu vetisiya payakine chingankhale kuleka kuyavyiwa na abanja komasoti azishamwali amene otumikilalini Yehova. Payakine pachifukwa chakuti enze na nkhaŵa, ntumwi Petulo ekonsha Yesu kuti: “Sewo tasiya vinthu vonse na kukukonkhani, lomba tizafwane chinji?” (Mt. 19:27) Yesu mwachifundo eŵasimikijila ophunzila ŵake kuti mpingo uzankhale monga banja yawo. (Ŵelengani Maliko 10:29, 30.) Ndipo Yehova, wamene ni mutu wa banja yasu yauzimu, olonjeza kuti azayavye ŵala amene ofuna kumutumikila. (Sal. 9:10) Onani viyakine mwa vinthu voyavya ngako vamungachite mwewo kuti mulondele thandizo ya Yehova keno mulimbana na maganizo olimvwa kuti muli mweka.

5. Ndaŵa yanji n’kuweme kuganizila mwakutiyavyila Yehova?

⁵ Ganizilani mwakukuyavyilani Yehova. (Sal. 55:22) Vamene ivi vikuyavyeni kuwona kuti mulilini mweka. Mulongo muyakine wamene ni mbeta zina yake Carol, * komasoti wamene abanja ŵake alilini m’choonadi, enena kuti: “Nikaloleshesha kuvuli na kuganizila mwenzeniyavyila Yehova olo pa mavuto, kulaŵila chendi vuniyavya kulimvwa kuti nililini neka. Ndipo ivi vunisimikijila kuti Yehova azankhale kumbali yangu kusogolo.”

6. Kansi lemba ya 1 Petulo 5:9, 10 ingaŵalimbikise tyani ŵala amene olimbana na maganizo olimvwa kuti ali ŵeka?

⁶ Ganizilani mwamene Yehova mwakuyavyila abale na alongo amene olimvwa kuti ali ŵeka. (Ŵelengani 1 Petulo 5:9, 10.) M’bale Hiroshi  wamene kwa vyaka vinyinji wankhala Mboni yove yeka m’banja mwawo, enena kuti: “Mumpingo, ni vosavuta kuwona kuti aliyense ali na mavuto. Kuziŵa kuti tonse tuchita vonse vatingakwanishe potumikila Yehova, kungalimbikise ayakine a sewo amene olimvwa kuti ali ŵeka m’choonadi.”

7. Kansi pemphelo yukuyavyani tyani mwewo?

⁷ Mukopemphela nthawe zonse, mukoŵelenga Baibolo komasoti mukopezeka pamisonkhano. Mufunika kumuuja Yehova mwamumvwila mosapita mmbali. (1 Pet. 5:7) Massiel, enena kuti: “Chinthu chimozi mwa vinthu vofunika ngako chamene chiniyavya kuti nipilile vuto yolimvwa kuti nili neka ni kupemphela kwa Yehova, yove enze Tata ngaye-ngaye kuli newo, ndipo newo nenzepemphela kuli yove nsiku zonse, maulwendo anyinji pa nsiku, nomuuja yove mwenenzemvwila.” Mulongo wachisimbi wamene uyu pechisankha kutumikila Yehova, enzelimvwa kuti ali yeka chifukwa chakuti abale ŵake enzetumikilalini Yehova.

8. Kansi kuŵelenga Mawu a Mulungu komasoti kuŵasinkhasinkha kukuyavyani tyani mwewo?

⁸ Mukoŵelenga Mawu a Mulungu nthawe zonse, komasoti mukoganizila nkhani zamene zusimikijila kuti Yehova okukondani mwewo. Mulongo muyakine zina yake Bianca wamene ofunika kupilila vuto yonenelewa vinthu viipa na abale ŵake, enena kuti: “Kuŵelenga komasoti kusinkhasinkha vokhuza nkhani za m’Baibolo na mbili za moyo wa atumiki a Yehova amene epilila mavuto monga ni amene aŵa, kulaŵila chendi kuniyavya.” Akhilisitu ayakine oloŵeza malemba otonthoja ngako monga, Salimo 27:10 na Yesaya 41:10. Ayakine omvwishila vinthu votetekela va nkhani yakuŵelenga keno okonzekela misonkhano olo keno oŵelenga Baibolo. Ove onena kuti vamene ivi vuŵayavya kuti osati akolimvwa kuti ali ŵeka.

9. Kansi kupezeka pamisonkhano kukuyavyani tyani mwewo?

⁹ Chitani vonse vamungakwanishe kuti mukopezeka pamisonkhano nthawe zonse. Pulogilamu yamene iyi ikulimbikiseni mwewo, komasoti mungakwanishe kuziŵana na abale ŵanu na alongo. (Ahe. 10:24, 25) Massiel, wamene tamutomolako kale, enena kuti: “Olo kuti newo nenze na wowa ngako, nisimikijila kuti nikopezeka pamisonkhano yonse ya mpingo komasoti kupelekako ndemanga. Vamene ivi viniyavya kulimvwa kuti nine mbali ya mpingo.”

10. Ndaŵa yanji ni kofunika kupanga ushamwali na abale komasoti alongo mumpingo?

¹⁰ Pangani ushamwali na Akhilisitu okhulupilika. Fwanani azishamwali mumpingo amene mungaphunzilepo kanthu kuli ove. Ove angankhale achikulile olo achilumbwana kupambana mwewo olo payakine angankhale na chinkhalidwe chosiyana na chanu. Baibolo yutikumbusha kuti ‘nzelu yupezezeka muli okalamba.’ (Yobu  12:12) Achikulile nawo angaphunzile vinyinji kufumila kuli achilumbwana mumpingo. Davide enze wachilumbwana ntontho ngako poyelekezela na Yonatani. (1 Sam. 18:1) Davide na Yonatani enzeyavyana muyake na muyake kuti akotumikila Yehova olo kuti penze mavuto anyinji. (1 Sam. 23:16-18) Mulongo muyakine zina yake Irina wamene ni yove yeka wa Mboni m’banja mwawo, enena kuti: “Abale ŵasu komasoti alongo kulaŵila chendi angankhale monga ni makolo ŵasu olo achibale ŵasu. Yehova angaŵakatishile ntchito kuti atiyavye pa vosoŵa vasu.”

11. Kansi tufunika kuchita chinji kuti tipange azishamwali apantima?

¹¹ Kupanga azishamwali anyowani kungankhale kovuta, makamaka keno mwewo nimwe wa nsoni. Mulongo muyakine wa nsoni wamene ephunzila choonadi olo kuti enzeshushiwa, zina yake Ratna, enena kuti: “Newo nenzefunika kuzindikila kuti nenzefunikila thandizo ya abale ŵangu komasoti alongo mumpingo.” Vamene ivi vingankhale vovuta kuujako munthu muyakine mwamumvwila, koma kukambilana momasuka kwamene uku niye maziko a ushamwali wapantima. Azishamwali ŵanu ofuna kukulimbikisani mwewo komasoti kukuyavyani, olo n’tetyo, ove ofunikila kuti muŵaziŵishe mwangachitile vamene ivi.

12. Kansi ntchito yolalikila ingakuyavyeni tyani kuti mupange azishamwali aweme?

¹² Imozi mwa njila ziweme zofwanila azishamwali ni kulalikila na Akhilisitu ayakine. Carol, wamene tamutomolako kale, enena kuti: “Newo nafwana azishamwali aweme chifukwa chotandala na alongo mu utumiki komasoti kuchita vinthu viyakine potumikila Yehova. Yehova waniyavya kwa vyaka vinyinji kupitila muli azishamwali amene aŵa.” Vamene ivi ni vopindulisha nthawe zonse tikochita ushamwali na Akhilisitu okhulupilika. Yehova okatishila ntchito azishamwali amene aŵa kuti akutang’isheni mwewo mukankhala wokhumudwa, mwachisanzo, keno mulimvwa kuti muli mweka.​—Miy. 17:17.

13. Kansi onse mumpingo ali na udindo wotyani?

¹³ Onse mumpingo ali na udindo woyavya mpingo kunkhala malo a ntendele komasoti kuwonesha chikondi kuli onse, kuti aliyense osati akolimvwa kuti ali yeka. (Yoh. 13:35) Vatuchita komasoti vatulaŵila vingalimbikise ngako ayakine! Mulongo muyakine enena kuti: “Newo peniphunzila choonadi, mpingo wichizankhala banja yangu. Newo sembe niliyenkhale mmozi wa Mboni za Yehova paliye thandizo ya abale na alongo.” Kansi mungachite tyani kuti muyavye ŵala amene abanja ŵawo okhulupililalini choonadi kulimvwa kuti abale na alongo mumpingo oŵakonda?

14. Kansi mwewo mungachite tyani kuti mupange ushamwali na ŵala ayamba kwalombapano?

¹⁴ Yejani kunkhala pa ushamwali na ŵala ayamba kwalombapano. Sewo tingayambe kuŵalondela mwachikondi ŵala ayamba kwalombapano kuwela mumpingo. (Aro. 15:7) Olo n’tetyo, tufunika kuchita vinyinji osati kungoŵapasa tyala moni mwachikondi. Sewo tufuna kupanga azishamwali kukali nthawe. Tetyo, nkhalani aweme ntima ndipo woneshani kuti mudela nkhaŵa ŵala ayamba kwalombapano. Paliye kuŵakonsha makonsho angaŵachitishe nsoni, yejani kumvwisha kuti ni mavuto otyani ŵakukumana nawo ove. Vamene ivi vingankhale vovuta kuti ayakine akuujeni mwakumvwila, tetyo osaŵakakamija kuti alaŵile. Mmalomwake, akonsheni makonsho mwachikondi ndipo mvwishilani moleza ntima mayankho ŵawo. Mwachisanzo, mungaŵakonshe mwechiziŵila choonadi.

15. Kansi Akhilisitu otang’a angayavye tyani ayakine mumpingo?

¹⁵ Chikhulupililo cha aliyense mumpingo chutang’ishiwa keno tuwonesha kuti tudelana  nkhaŵa muyake na muyake. Vamene ivi vingachitike makamaka keno akulu komasoti ayakine ŵala amene ali na chikhulupililo chotang’a ochita vamene ivi. Melissa, wamene elelewa m’choonadi na amayi ŵake enena kuti: “Nuŵatembeja ngako abale amene enkhala monga makolo kuli newo, amene enkhala nane nthawe itali komasoti amene enzeniganizila kwa vyaka vinyinji.” M’bale muyakine wachilumbwana zina yake Mauricio, enkhala wokhumudwa komasoti kulimvwa kuti ali yeka pamene munthu enzemuphunzisa Baibolo pechisiya choonadi. Mauricio enena kuti: “Akulu ewonesha kuti enzenidela nkhaŵa ndipo vamene ivi viniyavya ngako soti. Ove enzelaŵila nane nthawe zonse. Enzekata nane pamozi ntchito yolalikila, enzeniujako mfundo zantengo wapatali zafwana pa phunzilo yawo ya Baibolo yapaŵeka komasoti mpaka enzesoŵela nane pamozi.” Onse aŵili Melissa na Mauricio etumikilako Yehova mu utumiki wa nthawe zonse.

16-17. Kansi tingachitesoti chinji kuti tiyavye ayakine?

¹⁶ Kupeleka thandizo mu njila yoyenenelela. (Aga. 6:10) Leo, wamene otumikila monga mmishonale ku chalo chamene chili kutali na banja yake, enena kuti: “Nthawe ziyakine, ukafuna kuchita vinthu viweme chisinsi chake ni kuchita tyala vinthu vuwonesha kuti niwe muweme ntima pa nthawe yoyenelela. Nukumbukila nsiku iyakine penichita ngozi na motoka, penifwika kung’anda nenze na nkhaŵa ngako. Koma pavuli pake banja iyakine iniitila kung’anda kwawo kuti tikalyeko kachakulya kayakine. Newo nukumbukilalini vinthu vetichilya pa nthawe yamene iyo, koma nukwanisha kukumbukila tyala kuti ove enzenimvwishila mowama ntima, ndipo pamapeto pake, nichimvwa luweme ngako!”

¹⁷ Tonse tukondwela na vochitika vauzimu, monga misonkhano yadela komasoti yachigawo, chifukwa chakuti tunkhala na nthawe ikulu yotandala na ŵanthu ayakine pokambilana vokhuza nsonkhano wamene uyo. Olo n’tetyo, Carol, wamene tamutomolako kale, enena kuti: “Newo nulimvwa ngako kuti nili neka pamisonkhano yadela komasoti yachigawo.” Ndaŵa yanji? Yove opitilija kuti, “olo kuti newo nilizengulukiwe na mahandiledi olo masauzande anyinji ŵa abale na alongo, nthawe zinyinji onse onkhala aŵili-aŵili pamozi na mabanja ŵawo. Newo nikawona tetyo, nulimvwa kuti nili neka.” Ayakine vuŵavuta ngako kupezeka pansonkhano wachigawo olo wadela ulwendo woyamba pavuli pakuti muyawo wa mu ukwati wamwalila.  Kansi mwewo pali aliyense wamuziŵako wamene okumana na mavuto monga ni amene aŵa? Tyani kuzapatulako nthawe yakuti muzamuiteko ulwendo uyakine kuti azasangalaleko pa vochitika vauzimu pamozi na banja yanu?

18. Kansi tingaikatishile tyani ntchito lemba ya 2 Akorinto 6:11-13 tikotandaja alwendo?

¹⁸ Mukopatulako nthawe yonkhalako nawo pamozi. Mukoyeja kupatulako nthawe ikulu yonkhalako pamozi na abale komasoti alongo osiyana-siyana, makamaka ŵala amene olimvwa kuti ali ŵeka. Sewo tufuna “kusegula mitima [yasu],” makamaka kuli ŵanthu olimvwa tetyo. (Ŵelengani 2 Akorinto 6:11-13.) Melissa, watatomolako kale, okumbukila kuti: “Nthawe zonse tenzenkhala okondwela ngako abale na alongo akatiita kuti tilute kumang’anda kwawo kuti tikatandaleko nawo, pamozi na mabanja ŵawo olo kuyanyunga pamozi.” Kansi pali aliyense mumpingo mwanu wamungafune kumuitila ku ng’anda kwanu kuti muzatandale naye?

19. Kansi ni pa nthawe yotyani pamene kutandala na Akhilisitu ayasu kungankhale koyavya ngako?

¹⁹ Payakine pangankhale vochitika viyakine vamene Akhilisitu ayasu angasangalale ngako keno tingankhale nawo pamozi nthawe ikulu. Vingankhale vovuta kuli ayakine kunkhala pamozi na achibale ŵawo amene ni Mbonilini za Yehova pa nthawe yakuchita vikondwelelo vawo visakatijana na Malemba. Ayakine angonkhala achisoni ngako masiku ayakine, monga pokumbukila nsiku yechimwalila wokondewa wawo. Keno sewo tupatulako nthawe tili pamozi na abale komasoti alongo amene okumana na mavuto oteti, tuŵawonesha kuti ‘tuŵakonda chendi mwachilungamo.’​—Afil. 2:20.

20. Kansi mawu a Yesu amene ali pa lemba ya Mateyu 12:48-50 angatiyavye tyani keno tulimvwa kuti tili seka?

²⁰ Pali vifukwa vinyinji vamene vingachitishe Mkhilisitu kulimvwa kuti ali yeka. Tetyo, mufunikalini kuluŵa kuti Yehova oŵaziŵa luweme maganizo oteti. Yove nthawe zonse okatishila ntchito abale ŵasu na alongo kuti atipase vatufunikila. (Ŵelengani Mateyu 12:48-50.) Tetyo, tumuwonesha Yehova kuti tumutembeja chifukwa cha mpingo tikochita vonse vatingakwanishe kuti tiyavye abale ŵasu komasoti alongo. Viliyekanthu na mwatumvwila nthawe ziyakine, sewo tililini seka yayi ndaŵa yakuti Yehova ali nase nthawe zonse!