1. Ndaŵa yanji Yesu esenga Yehova kuti alolele ophunzila ŵake?

PA USIKU wosilijila monga munthu pano pachalo, Yesu enzeganizila mavuto ŵakuti azakumane nawo ophunzila ŵake. Chikondi chenzekumvwa Yesu pali azishamwali ŵake chimuchitisha kusenga Atata ŵake kuti: “Muŵalolele kuyopela muipa wamene uyo.” (Yoh. 17:14, 15) Yesu enzeziŵa kuti pasala kanthawe katontho kuti ajokele kululu, komasoti kuti Satana Mdyelekezi apitilije mphela kuchita nkhondo na aliyense wamene ofuna kutumikila Yehova. Tetyo, ŵanthu a Yehova enzefunikila chitetezo.

2. Kansi ni chinji chutisimikijila kuti Yehova ayankhe mapemphelo ŵasu?

² Yehova eyankha pemphelo ya Yesu chifukwa chakuti Yove okonda Mwana wake. Tikachita vonse vatingakwanishe kuti tikondweleshe Yehova, yove naye atikonde, ndipo akomvwishila mapemphelo ŵasu osenga thandizo komasoti chitetezo. Yehova ni Atata achikondi. N’chifukwa chake opitilija kusamalila ŵana ŵake. Kuti aleke kuchita tetyo, anganyozeshe zina yake nowononga mbili yake.

3. Ndaŵa yanji masiku ŵano tufunikila chitetezo cha Yehova?

³ Masiku ŵano, sewo tufunikila ngako chitetezo cha Yehova kupambana kale. Satana epitikishiwa kululu, ndipo eselukila pachalo “na ukali ukulu.” (Chiv. 12:12) Yove wakwanisha kukopa ŵanthu ayakine amene otitamanisha kuganiza kuti “ochita utumiki wopatulika kwa Mulungu.” (Yoh. 16:2) Ŵanthu ayakine amene okhulupililalini Mulungu otitamanisha ndaŵa yakuti nise osiyana na ŵanthu a aku chalo. Viliyekanthu kuti otitamanisha pa vifukwa votyani, tufunikalini kuchita wowa. Ndaŵa yanji? Ndaŵa yakuti Mawu a Mulungu onena kuti: “Ambuye ni wokhulupilika ndipo azakutang’isheni komasoti kukutetezani kuli woipishisha wamene uyo.” (2 Ates. 3:3) Kansi Yehova otiteteza tyani? Tiyeni tikambilane njila ziŵili.

4. Mokatijana na lemba ya Aefeso 6:13-17, kansi Yehova etipasa chinji kuti atiteteze?

⁴ Yehova etipasa chisulo cha nkhondo chamene chingatiteteze ku ukuka wa Satana. (Ŵelengani Aefeso 6:13-17.) Chisulo chamene ichi chauzimu ni champhamvu komasoti chothandiza! Koma keno tufuna kuliteteza tufunika kuvwala mbali iliyonse ya—chisulo chamene ichi. Kansi mbali iliyonse yupanamila chinji? Tiyeni tikambilane bwino-bwino.

5. Kansi bande wa choonadi ni chinji, ndipo ndaŵa yanji tufunika kumuvwala?

⁵ Bande wa choonadi opanamila chendi chamene chupezeka m’Mawu a Mulungu, Baibolo. Ndaŵa yanji tufunikila kuvwala bande wamene uyu? Ndaŵa yakuti Satana ni “tata wake wa wenye.” (Yoh. 8:44) Yove wankhala okatishila ntchito wenye kwa vyaka masauzande anyinji ndipo wankhala “oluŵilisha chalo chonse kwamene kuli ŵanthu”! (Chiv. 12:9) Koma chendi chamene chili m’Baibolo chutiyavya kuti osati tisemphewe na yove. Kansi tingavwale tyani bande wa choonadi wamene uyu? Tingavwale bande wamene uyu keno, tuphunzila chendi chokhuza Yehova, keno tumulambila “mosogolelewa na mzimu na choonadi” komasoti keno tuchita vinthu mwachilungamo pa chinthu chilichonse.—Yoh. 4:24; Aef. 4:25; Ahe. 13:18.

6. Kansi cholichingilijila panganga chachilungamo ni chinji, ndipo ndaŵa yanji tufunika kuchivwala?

⁶ Cholichingilijila panganga chachilungamo chupanamila mfundo zolungama za Yehova. Ndaŵa yanji tufunika kuchikatishila ntchito? Kale, cholichingilijila chenzeteteza ntima wa nsodja kuti osati ubowolewe. Molingana na vamene ivi, cholichingilijila panganga chachilungamo chuteteza ntima wasu wophiphilisila, olo kuti, mwatilili nkati, ku vinthu viipa va ichi chalo. (Miy. 4:23) Yehova ofuna kuti tikomukonda komasoti kumutumikila na ntima wonse. (Mt. 22:36, 37) Niye chifukwa chake, Satana oyeja-yeja kuyaŵa ntima wasu kuti tikokonda vinthu va m’chalo vamene ni​—vinthu vakuzonda Yehova. (Yak. 4:4; 1 Yoh. 2:15, 16) Ndipo kuyeja-yeja kwake kukaleka kukata ntchito, yove eyeja kutikakamija kuchita vinthu visakatijana na mfundo za Yehova.

7. Kansi tingavwale tyani cholichingilijila panganga chachilungamo?

⁷ Sewo tingavwale cholichingilijila panganga chachilungamo keno tuvomela mfundo za Yehova pa nkhani ya chiweme na chiipa, komasoti kukonkheja mfundo zamene izo. (Sal. 97:10) Ayakine owona kuti mfundo za Yehova zuŵachosela ufulu wawo. Koma tikasiya kukatishila ntchito mfundo za m’Baibolo pa moyo wasu, tingankhale monga ni nsodja wamene wavula cholichingilijila chake nkati moniyata nkhondo poganiza kuti ni cholema ngako. Kuchita vamene ivi kungankhale kupusa ngako! Munthu wamene okonda Yehova, owona kuti malamulo “oŵeŵeshalini,” ndipo oŵawona monga chinthu chupulumusha moyo.​—1 Yoh. 5:3.

8. Kansi kuŵavwale nsapato zokonzekela uthenga uweme wantendele kutanthauza chinji?

⁸ Paulo etilimbikisasoti kuti mendo ŵanu muŵeŵavwalike nsapato zokonzekela uthenga uweme wantendele. M’mawu ayakine tinganene kuti, nthawe zonse tufunika kunkhala okonzeka kulalikila uthenga uweme wa Ufumu. Tikoujako ayakine uthenga wa m’Baibolo, chikhulupililo chasu chunkhala chotang’a ngako. Ni vokondwelesha ngako kuwona ŵanthu a Yehova pachalo chonse mwakukatishila ntchito mpata uliwonse kuti alengeze uthenga uweme​—ku ntchito, ku sikulu, ku malo ochitila malonda, kulalikila ku ng’anda na ng’anda, pogula vinthu, ponyungila makolo amene ni osakhulupilila, potandala na ŵanthu asaziŵika, komasoti keno okwanishalini kufuma pang’anda kwakanthawe. Tikachita wowa noleka kulalikila, tingankhale monga ni nsodja wamene  wavula nsapato nkati moniyata nkhondo; akachita vamene ivi, mendo ŵake angawonongeke mosavuta. Vokonkhapo vake, vunkhala vovuta kuliteteza akawukiliwa, komasoti angakwanishelini kukonkheja malamulo ŵa nkulu wawo wankhondo.

9. Ndaŵa yanji tufunika kunyamula chishango chikulu chachikhulupililo?

⁹ Chishango chikulu cha chikhulupililo chupanamila chikhulupililo chasu mwa Yehova. Sewo tusimikijila kuti Yehova azakwanilishe malonjezo ŵake onse. Chikhulupililo chamene ichi chutiyavya “kuzimyilako mikondo yonse yuyaka mulilo ya Satana.” Ndaŵa yanji tufunika kunyamula chishango chikulu chamene ichi? Ndaŵa yakuti chutiteteza kuti osati tikopeke na viphunziso va ŵanthu ampatuko komasoti kuti osati tiyofyewe na ŵanthu oshusha vinthu vatukhulupilia. Paliye chikhulupililo, tingaŵeve mphamvu zakuti tipitilije kunkhala otang’a ayakine akoyeja-yeja kutinyengelela kuti tifwaye mfundo za Yehova. Mwa njila iyakine tinganene kuti, nthawe iliyonse yatuyeja-yeja kuteteza chikhulupililo chasu ku ntchito, ku sikulu, tunkhala kuti tunyamula chishango chikulu. (1 Pet. 3:15) Nthawe iliyonse yatukana ntchito ya malipilo anyinji, yamene ingasokoneze kulambila kwasu, tunkhala monga tunyamula chishango chikulu. (Ahe. 13:5, 6) Komasoti nthawe iliyonse yatutumikila Yehova olo kuti  tushushiwa, tunkhala kuti tutetezewa na chishango chasu chachikhulupililo.​—1 Ates. 2:2.

10. Kansi chisote chotang’a chachipulumuso ni chinji, ndipo ndaŵa yanji tufunika kuchivwala?

¹⁰ Chisote chotang’a chachipulumuso ni chiyembekezo chakutipasa Yehova​—chiyembekezo chakuti azatipulumushe ku imfwa ndipo azapeleke malipilo kuli onse amene ochita chifunilo chake. (1 Ates. 5:8; 1 Tim. 4:10; Tit. 1:1, 2) Molingana na chisote chamene chenzeteteza mutu wa nsodja, chisote chotang’a chachipulumuso chuteteza maganizo ŵasu. Kansi chutiteteza mwanjila yotyani? Chiyembekezo chutiyavya kuti tikoganizila ngako malonjezo a Mulungu komasoti chutiyavya kuti mavuto tikoŵawona moyenelela. Kansi tingavwale tyani chisote chamene ichi? Tuchita vamene ivi poganiza mwakuganizila Yehova. Mwachisanzo, tudalilalini chuma chamene chudalilikalini, koma tudalila Mulungu.—Sal. 26:2; 104:34; 1 Tim. 6:17.

11. Kansi chibemba cha mzimu ni chinji, ndipo ndaŵa yanji tufunika kuchikatishila ntchito?

¹¹ Chibemba cha mzimu ni Mawu a Mulungu, Baibolo. Chibemba chamene ichi chili na mphamvu yotenda mphamvu iliyonse ya wenye komasoti kumasula ŵanthu ku viphunziso vawenye na viyoloŵezi viipa. (2 Akor. 10:4, 5; 2 Tim. 3:16, 17; Ahe. 4:12) Tuphunzila kukatishila ntchito luweme chibemba chamene ichi kupitila mu phunzilo ya paweka komasoti mwa kuphunzisiwa na gulu ya Mulungu. (2 Tim. 2:15) Kuyangijila pa chisulo cha nkhondo chakutipasa Yehova, kansi ni chinthu chiyakine chotyani champhamvu chamene chutiteteza chakutipasasoti?

12. Kansi tufunikilasoti chinji, ndipo ndaŵa yanji?

¹² Nsodja wanzelu oziŵa kuti angapambanelini gulu ikulu yeka. Yove ofunika thandizo ya masodja ayakine. Molingana na vamene ivi, sewo tingakwanishelini kumupambana Satana pamozi na omukonkhelela keno tulimbana naye seka; tufunikila thandizo ya abale ŵasu komasoti alongo. Niye chifukwa chake Yehova etipasa “gulu ya abale” ya pachalo chonse, amene ni okonzeka kutiyavya nthawe iliyonse.​—1 Pet. 2:17.

13. Mokatijana na lemba ya Aheberi 10:24, 25, kansi ni mapindu otyani owela chifukwa chopezeka pa misonkhano yasu?

¹³ Njila imozi yatingalondelele thandizo yatufunikila ni kupezeka pa misonkhano. (Ŵelengani Aheberi 10:24, 25.) Sewo tonse tingankhale ofoka​—nthawe ziyakine. Vamene ivi vikachitika, misonkhano ingatipase mphamvu. Ndemanga zofumila pansi pa ntima zakupeleka abale ŵasu komasoti alongo zutilimbikisa. Nkhani zawo zofumila m’Baibolo komasoti visanzo vawo vutilimbikisa kupitilija kutumikila Yehova. Ndipo tuwamijiwa ngako kutandala nawo misonkhano ikaliyeyamba olo pavuli pa misonkhano. (1 Ates. 5:14) Kuyangijila pali vamene ivi, misonkhano yutipasa mwayi wosangalala chifukwa choyavya ayakine. (Mac. 20:35; Aro. 1:11, 12) Misonkhano ingatiyavyesoti mu njila ziyakine. Yove yutiyavya kuti tikolalikila komasoti kuphunzisa luweme. Mwachisanzo, ku misonkhano niye kwatuphunzila mwatingakatishile ntchito luweme vinthu Vatukatishila ntchito Pophunzisa. Tetyo, ikonzekeleni luweme misonkhano. Misonkhano ikochitika mukonkhala tchelu ngako. Pavuli pa misonkhano, mukovikatishila ntchito vamwaphunzila. Mukachita tetyo, mwewo munkhale “nsodja muweme wa Khilisitu Yesu.”​—2 Tim. 2:3.

14. Kansi ni thandizo iyakine yotyani yatili nayo?

¹⁴ Sewo tuyavyiwasoti na angelo mamiliyoni anyinji amphamvu. Ganizilani vangachite mngelo mmozi tyala! (Yes. 37:36) Lomba ganizilani vaingakwanishe kuchita gulu ya angelo. Paliye munthu aliyense olo chiŵanda chamene chingakwanishe kulingana na gulu  yamphamvu yamene iyi ya Yehova. Yehova ni wamphamvuzonse. Tetyo, yove akankhala nase, nthawe zonse tikonkhala otang’a kupambana adani ŵasu, olo ankhale anyinji tyani. (Ower. 6:16) Tingasimikijile kuti vamene ivi ni vachendi! Mukokumbukila vamene ivi mukayofyewa na mawu a muyanu waku ntchito, waku sikulu, kapena vanganene olo kuchita wa banja wanu. Kumbukilani kuti mwewo mulilini mweka pa nkhondo yamene iyi. Yehova ali pasogolo panu nokusogolelani mwewo.

15. Mokatijana na lemba ya Yesaya 54:15, 17, ndaŵa yanji paliye aliyense wamene angakwanishe kulesha ŵanthu a Yehova kuti aleke kulalikila?

¹⁵ Ichi chalo chamene chutongewa na Satana chili na vifukwa vinyinji votizondelako. Sewo tuloŵelelalini mu nkhani za ndale olo kuniyata nkhondo. Sewo tulengeza zina ya Yehova, tulalikila kuti ni Ufumu wake weka wamene ungalete ntendele kuli ŵanthu komasoti tukonkheja mfundo zake zolungama. Sewo tuŵaululila ŵanthu kuti wotonga wa chino chalo ni wawenye ngako komasoti ni wopaya ŵanthu. (Yoh. 8:44) Ndipo sewo tulengeza kuti kwalombapano, chalo cha Satana chizawonongewe. Koma Satana pamozi na omukonkhelela angakwanishelini kutivala pakamwa. Mmalomwake, tipitilije mphela kutamanda Yehova, mwa njila iliyonse yatingakwanishe! Olo kuti Satana ni wamphamvu ngako, wakangiwa kulesha uthenga uweme wa Ufumu kuti uleke kuŵafwika ŵanthu pachalo chonse. Ndipo vonse vamene ivi vukwanishika tyala chifukwa chakuti Yehova otiteteza.​—Ŵelengani Yesaya 54:15, 17.

16. Kansi Yehova azaŵapulumushe tyani ŵanthu ŵake nkati mwa chisauso chikulu?

¹⁶ Kansi ni chinji chikuti chichitike kwalombapano? Nkati mwa chisauso chikulu, Yehova azatipulumushe kupitila mu njila ziŵili zodabwisa. Yoyamba, yove azapulumushe atumiki ŵake okhulupilika pa nthawe yakuti azachitishe mafumu a pachalo kuti awononge Babulo Nkulu, wamene ni vipembezo vawenye. (Chiv. 17:16-18; 18:2, 4) Yachiŵili, yove azapulumushesoti ŵanthu ŵake akazawononga vinthu vikuti vizasale va ichi chalo cha Satana pa Aramagedo.​—Chiv. 7:9, 10; 16:14, 16.

17. Ndaŵa yanji tufunika kupitilija kunkhala pafupi na Yehova?

¹⁷ Tikapitilija kunkhala pafupi na Yehova, Satana angachitelini chilichonse chamene chingatiwononge mpaka kale-kale. Kulaŵila chendi, yove niye akuti azawonongewe mpaka kale-kale. (Aro. 16:20) Tetyo, vwalani visulo vonse va nkhondo—ndipo osavivula! Osayeja mweka kuniyata nkhondo yolimbana na Satana na chalo chake. Yavyani abale ŵanu komasoti alongo. Ndipo konkhejani malangizo a Yehova. Mukachita vamene ivi, mungankhale osimikijila kuti Atata ŵanu ŵakululu achikondi azakutang’isheni komasoti kukutetezani mwewo.​—Yes. 41:10.