Abale ayakine okatishila ntchito vipangizo vamakono kuti akokwanisha kulaŵila na abanja komasoti na abale ayawo. Kulaŵila chendi, Nkhilisitu wotang’a ofunika kukumbukila langizo yakuti: “Wochenjela wamene wawona chiipa ofisama. Koma ŵanthu asaziŵa vinthu amene akungokuya tyala olangiwa.”​—Miy. 27:12.

Tuziŵa kuti Yehova ofuna kutiteteza. Niye chifukwa chake, tukatijanalini na ŵala ochitisha mpatuko, ochosewa, olo ŵala amene oleta viphunziso vawenye. (Aro. 16:17; 1 Akor. 5:11; 2 Yoh. 10, 11) Ayakine amene osonkhana pamozi na mpingo payakine angokonkhejalini malamulo a Yehova. (2 Tim. 2:20, 21) Ndipo vingankhale vovuta kusankha azishamwali aweme keno tungolaŵila nawo tyala kupitila pa vipangizo vamakono votumijila mamesedji.

Ni chinthu chofunika ngako kunkhala osamala keno ŵanthu amene ali pa gulu ya vipangizo votumijila mamesedji ni anyinji. Akhilisitu ayakine eloŵa mu magulu oteti, ndipo vokonkhapo vake vinkhala viipa. Pa gulu ya ŵanthu mahandiledi olo masauzande anyinji, vingankhale vovuta kumuziŵa luweme munthu aliyense komasoti moyo wake wauzimu. Kansi muganiza kuti munthu wamene ochita mbali mu gulu yoteti onkhala wosamala? Lemba ya Salimo 26:4 yunena kuti: “Niliyenkhale pansi pamozi na ŵanthu achinyengo. Ndipo niliyekatijane na ŵanthu ofisa umunthu wawo.” Lemba yamene iyi yuwonesha kuti chingankhale chinthu chanzelu ngako kulembelana mesedji na ŵanthu ŵatuziŵana nawo menso na menso.

Olo kagulu ka mesedji kankhale katontho, Nkhilisitu ofunika kulikonsha kuti: Kansi ŵanthu amene ali mu gulu yamene iyi olaŵila vinthu votyani? Kansi nuwononga nthawe itali tyani na vinthu vamene ivi? Mamesedji amene aŵa angonena za vinthu vinyinji, koma mwewo mufunikalini kulikakamija kuti mutolepo mbali pa mesedji iliyonse. Paulo echenjeja Timoteyo zokhuza ŵanthu amene akuti azankhale “awenye komasoti oloŵelela nkhani za ayakine.” (1 Tim. 5:13) Masiku ŵano, vamene ivi vingachitike kupitila pa vipangizo vamakono.

Paliye Nkhilisitu aliyense wotang’a wamene anganene vinthu viipa vokhuza m’bale muyakine olo kuulula nkhani zake zachisinsi. (Sal. 15:3; Miy. 20:19) Yove opewa nkhani zokhumudwisa komasoti ziliye umboni. (Aef. 4:25) Kulaŵila chendi, webisaiti yasu ya jw.org komasoti mapulogilamu ŵasu a mwezi uliwonse a JW Broadcasting^® mupezeka mauthenga aweme ngako okhuza Baibolo komasoti malipoti anyinji odalilika.

Akhilisitu ayakine okatishila ntchito njila zotumijila mamesedji kuti agulise, kugula, kuitila malonda olo pofuna kuyaŵilako ntchito ayakine. Nkhani zamene izi ni zokatijana na malonda ndipo zukatijanalini na kulambila kwasu Yehova. Nkhilisitu wamene ofuna kunkhala na moyo “wosakonda ndalama” angayejelini olo patontho kulyela masuku pamutu abale kuti apeze pindu.​—Ahe. 13:5.

Kansi ingankhale vuto kukatishila ntchito njila zotumijila mamesedji kuti tisenge ndalamala zakufunikila abale amene akhuziwa na masoka achilengedwe? Sewo tuŵakonda ngako abale ŵasu ndipo tufuna kuŵayavya akafunikila thandizo. (Yak. 2:15, 16) Koma kuyeja kuchita vamene ivi kupitila pa gulu ikulu yotumijila mamesedji, kungasokoneze makonzedwe aweme opangiwa na ofesi ya nthambi olo mpingo. (1 Tim. 5:3, 4, 9, 10, 16) Ndipo kulaŵila chendi, tufunalini kuwonesha ngati tisankhiwa kuti tiyavye abale amene aŵa.

Sewo tufuna kuchita vinthu vamene vupeleka ulemelelo kwa Yehova. (1 Akor. 10:31) Niye chifukwa chake, tikaliyesankha kuti tikatishile ntchito njila zotumijila mamesedji olo chipangizo chilichonse chamakono, tufunika kuganizila ngozi ingankhalepo nonkhala tchelu.