1-2. Kansi niŵani angayavye wophunzila Baibolo kupita pasogolo mpaka kufwika pobatiziwa?

“NEWO nenzevikonda venenze phunzila pa phunzilo ya Baibolo. Newo nenzeziŵa kuti venze vachendi. Koma peniyamba kunkhala nthawe ikulu nili pamozi na abale komasoti alongo, vinichitisha kuti nichinje vinthu viyakine komasoti kuti nipite pasogolo mpaka kufwika pobatiziwa.” Elaŵila tetyo Amy, wamene onkhala ku Fiji. Ivi vichitikila Amy vutiphunzisa chinthu chiyakine chofunika ngako chakuti: Wophunzila Baibolo angapite pasogolo mpaka kufwika pobatiziwa keno olondela thandizo ya ŵanthu ayakine mumpingo.

² Wofalisa aliyense angayavye kuti mpingo ukule. (Aef. 4:16) Mpainiya muyakine oitiwa kuti Leilani, wamene onkhala ku Vanuatu, enena kuti: “Pali mawu ayakine onena kuti, ŵanthu onse pamunzi ofunika kuyavyako kulela mwana. Nuganizila kuti ni chimozi-mozi na pankhani yopanga ophunzila, onse mumpingo ofunika kuyavyako kuti munthu muyakine awele mu choonadi.” Tetyo, makolo, ŵanthu a m’banja, azishamwali, abanja ayakine komasoti maticha ku sikulu ni ofunikila poyavya mwana kuti akule. Onse ochita vamene ivi polimbikisa mwana komasoti kumuphunzisa vinthu vofunika ngako. Molingana na vamene ivi, abale na alongo mumpingo angapeleke malangizo, chilimbikiso, komasoti kupeleka chisanzo chiweme kuli ophunzila Baibolo, poŵayavya kupita pasogolo mpaka kufwika pobatiziwa.​—Miy. 15:22.

3. Kansi mwewo muphunzilapo chinji pa vechinena Ana, Dorin, na Leilani?

³ Ndaŵa yanji wofalisa wamene ochitisha phunzilo ya Baibolo ofunika kutembeja thandizo yangapeleke ofalisa ayakine kuli wophunzila Baibolo wawo? Onani vechinena mpainiya wapadela  muyakine zina yake Ana, wamene onkhala ku Moldova, yove enena kuti, “Wophunzila Baibolo ofunikila thandizo ikulu ndipo ni vovuta ngako kuli munthu omuphunzisa kuti yeka amuyavye mbali zonse zakufunikila.” Dorin, mpainiya wapadela wamene onkhalasoti ku Moldova, enena kuti, “Kanyinji-kanyinji, ofalisa ayakine olaŵila mfundo yamene yumufwika pantima wophunzila, yunkhala mfundo yakuti newo nenze nikaliye iganizilapo.” Leilani, wamene tamutomolako kale mu ndime yapita, enena kuti, “Wophunzila Baibolo akawona chikondi komasoti chisamalilo chakumuwonesha abale na alongo, vumuyavya kumvwisha kuti sewo nise ŵanthu chendi a Yehova.”​—Yoh. 13:35.

4. Kansi tikambilane chinji mu nkhani ino?

⁴ Koma, payakine mwewo mungalikonshe kuti, ‘kansi newo paneka ningamuyavye tyani wophunzila Baibolo kupita pasogolo olo kuti n’newolini numuchitisha phunzilo?’ Lomba tiyeni tikambilane vatingachite keno muyakine watiita kuti tikaŵe naye pochitisha phunzilo yake komasoti vatingachite keno wophunzila Baibolo wayamba kuwela kumisonkhano. Komasoti tiwone vangachite akulu kuti ayavye ophunzila Baibolo kuti apite pasogolo mpaka kufwika pobatiziwa.

5. Kansi udindo wanu ni wotyani keno muyakine wakusengani kuti mukaŵe naye pochitisha phunzilo ya Baibolo?

⁵ Pa phunzilo ya Baibolo, munecho wa phunzilo niye woyamba ali na udindo woyavya wophunzila kumvwisha Mawu a Mulungu. Keno munecho wa phunzilo wakusengani kuti mumupelekeje, mwewo mweka mufunika kuliwona kuti nimwe wopelekeja. Udindo wanu ni kumuyavya. (Mlal. 4:9, 10) Lomba, n’chinji ngacho-ngacho chamungachite mwewo kuti munkhale wothandiza muweme nkati mochitisha phunzilo ya Baibolo?

6. Keno mwewo mwaitiwa kuti mukaŵepo pa phunzilo ya Baibolo, kansi mungaikatishile ntchito tyani mfundo yupezeka pa Miyambo 20:18?

⁶ Mukokonzekela phunzilo ya Baibolo. Choyamba, konshani munecho wa phunzilo kuti akufotokozelenkoni viyakine vokhuza phunzilo yake. (Ŵelengani Miyambo 20:18.) Payakine mungamukonshe kuti: “Kansi uziŵako votyani vokhuza wophunzila Baibolo wako? Kansi ni mutu wanji wauphunzila naye? Lomba ufuna kuti wophunzila Baibolo wako amvwishe ngako chinji pa mutu wamene uyu? Kansi ni chinthu chotyani chanufunika kuyalaŵila olo chanisafunika kuyalaŵila nkati mochitisha phunzilo? Kansi ningayamulimbikisa tyani wophunzila Baibolo wako kupita pasogolo?” N’voziŵikilatu kuti munecho wa phunzilo angakuujenilini nkhani iliyonse yachisinsi yokhuza phunzilo yake, koma vangakuujeni vingankhale vothandiza. Mmishonale muyakine zina yake Joy, ofotokoza mfundo zamene izi kuuja ŵala omupelekeja ku phunzilo yake ya Baibolo. Yove enena kuti: “Mfundo zamene izi zuyavya wala wanipelekeja kunkhala na chifuno choyavya wophunzila komasoti kusankha vanganene nkati mophunzila.”

7. Ndaŵa yanji mwewo monga wopelekeja mufunika kuikonzekela phunzilo?

 ⁷ Keno muyakine wakusengani kuti mukankhalepo pa phunzilo, vingankhale luweme keno mungakonzekele nkhani yamukuti mukaphunzile. (Ezara 7:10) Dorin, m’bale watatomolako kale kuvuli, enena kuti: “Nukondwela ngako keno munthu wanipelekeja waikonzekela phunzilo. Akachita tetyo angafotokoze mfundo zokata ntima.” Kuyangijila pamene apo, wophunzila owona kuti monse mwaŵili mwakonzekela luweme ndipo vamene ivi vingapeleke chisanzo chiweme kuli yove. Olo mwewo mungaleke kwanisha kukonzekela nkhani yonse, yejani kupatulako kanthawe katontho tyala kuti musungeko m’mutu mfundo zikulu-zikulu za mu nkhani yamukuti mukaphunzile.

8. Kansi mwewo mungasimikijile tyani kuti pemphelo yanu pa phunzilo ya Baibolo yunkhala ya tanthauzo?

⁸ Pemphelo ni mbali yofunika ngako pochitisha phunzilo ya Baibolo, tetyo, ganizilani ngako za vinthu vamunganene keno munecho wa phunzilo wakusengani kuti muchite pemphelo. Mukachita tetyo, pemphelo yanu inkhale ya tanthauzo ngako. (Sal. 141:2) Hanae, wamene onkhala ku Japan, akalikumbukila mapemphelo ŵenzechita mulongo muyakine wamene enzepelekeja wala enzemuphunzisa Baibolo. Yove enena kuti: “Newo niwona kuti ushamwali wake na Yehova ni wotang’a ngako, ndipo nenzefuna kunkhala monga ni yove. Komasoti nelimvwa kuti nukondewa yove penzetomola zina yangu mu mapemphelo ŵake.”

9. Mokatijana na lemba ya Yakobo 1:19, kansi mwewo mungachite chinji kuti munkhale wopelekeja muweme nkati mochitisha phunzilo ya Baibolo?

⁹ Yavyani munecho wa phunzilo nkati mophunzila. Mpainiya muyakine wapadela oitiwa kuti Omamuyovbi, wamene onkhala ku Nigeria, enena kuti: “Wopelekeja muweme niwala wamene omvwishila luweme nkati mophunzila. Muyako wakupelekeja ofotokoza ndemanga ziweme, koma olaŵilapolini ngako, pomvwisha kuti munecho wa phunzilo niye ali na udindo wosogoja.” Kansi mwewo mungaziŵe tyani nthawe komasoti mwamungafotokozele malingalilo ŵanu nkati mophunzila? (Miy. 25:11) Mukomvwishila mwatchelu munecho wa phunzilo pakukambilana na wophunzila. (Ŵelengani Yakobo 1:19.) Mukachita teyo, mwewo munkhale wokonzeka kuyavya pakafunikila. Kulaŵila chendi, mwewo mufunika kuganiza luweme mukaliyelaŵila. Mwachisanzo, mwewo mufunikalini kulaŵilapo ngako, nosokoneza malingalilo a munecho wa phunzilo olo kuyamba kufotokoza nkhani iyakine yusiyana na yamuphunzila. Koma mwa kufotokoza ndemanga zachidule, chisanzo olo konsho, mwewo mungayavye kumvwikisha mfundo yamukambilana. Nthawe ziyakine, mwewo mungalimvwe kuti ni kosafunikila kuti mulaŵilepo ngako pophunzila. Koma keno mumutembeja wophunzila komasoti kuwonesha kuti mumukonda, mungamuyavye ngako kuti apite pasogolo.

10. Kansi vinthu vamwakumana navo vingamuyavye tyani wophunzila Baibolo?

¹⁰ Aujenkoni za vinthu vamwakumana navo. Keno ni kofunikila, mwewo mungamufotokozele  mwachidule wophunzila Baibolo mwemuphunzilila choonadi, mwemuchitila polimbana na vuto iyakine olo mwemuwonela kwanja ya Yehova yukuyavyani pa moyo wanu. (Sal. 78:4, 7) Vamene ivi payakine vingankhale vinthu vakufunikila kumvwa wophunzila. Ivi vingatang’ishe chikhulupililo chake olo kumulimbikisa kupitilija kupita pasogolo mpaka kufwika pobatiziwa. Ndipo vingamuwoneshe mwangachitile kuti alimbane na vuto yakukumana nayo. (1 Pet. 5:9) Gabriel, wamene onkhala ku Brazil ndipo pano patunena otumikila monga mpainiya, okumbukila chimuyavya penzephunzila Baibolo. Yove okumbukila kuti: “Penichimvwa vinthu vechikumana navo abale, niphunzila kuti Yehova owona mavuto ŵatukumana nawo. Ndipo keno ove ekwanisha kuŵapilila, newo nane ningakwanishe.”

11-12. Ndaŵa yanji tufunika kuŵalondela luweme ophunzila Baibolo amene owela pa misonkhano?

¹¹ Kuti wophunzila Baibolo apite pasogolo mpaka kufwika pobatiziwa, ofunika kupezeka pa misonkhano ya mpingo nthawe zonse komasoti kupindula nayo. (Ahe. 10:24, 25) Monga ni mwatuziŵila, wophunzisa angamuitile ku misonkhano. Yove akawela, sewo tonse tingamulimbikise kuti apitilije kuwela ku Ng’anda ya Ufumu. Kansi tingachite vamene ivi mu njila zotyani?

¹² Mulondeleni mwachikondi wophunzila. (Aro. 15:7) Wophunzila akalimvwa kuti walondelewa luweme ku misonkhano, angankhale wofunishisha ngako kupitilija kuwela ku Ng’anda ya Ufumu. Paliye kumuchitisha nkhaŵa, mupaseni moni mwachikondi wophunzila ndipo muziŵikisheni kuli ayakine. Nkholaŵilani naye, chifukwa omuphunzisa payakine angachelwe kufwika olo pakiyakine angankhale wotangwanika na vochitika viyakine mu Ng’anda ya Ufumu. Nkhalani tchelu ngako pa vinthu vakunena wophunzila ndipo muwonesheni kuti mumukonda. Kansi kumulondela kwanu mwachikondi kungankhale na vokonkhapo votyani? Onani chisanzo cha Dmitrii wamene ebatizika kwa vyaka vitontho vapita ndipo lomba otumikila monga ntumiki wothandiza. Yove akakumbukila ulwendo woyamba wechipezeka pa misonkhano enena kuti: “M’bale muyakine eniwona nili paname panja pa Ng’anda ya Ufumu mwawowa ndipo yove mowama ntima enitola noloŵa nane nkati. Anyinji ewela kuzanipasa moni. Newo nidabwa ngako. Nikondwela ngako mwakuti nenzefuna kunkhala na nsonkhano nsiku iliyonse nkati mwa sondo. Newo nichimvwa chinthu chiyakine chakuti nenze nikaliye chimvwako kulikonse.”

13. Kansi chisanzo chanu chiweme chingamuyavye tyani wophunzila Baibolo?

¹³ Nkhalani chisanzo chiweme. Chisanzo chanu chiweme chingayavye wophunzila Baibolo kusimikijila kuti wafwana choonadi. (Mat. 5:16) Vatalii, wamene otumikila monga mpainiya ku Moldova, enena kuti: “Newo niphunzila mwenzenkhalila ŵanthu ayakine mumpingo, mwenzeganizila komasoti mwenzechitila vinthu. Vamene ivi vinisimikijila kuti Mboni za Yehova zuyenda chendi na Mulungu.”

14. Kansi chisanzo chanu chingayavye tyani ayakine kupitilija kupita pasogolo?

 ¹⁴ Kuti ayenelele kubatiziwa, wophunzila ofunika kukonkheja vakuphunzila. Vamene ivi vunkhalalini vipepu nthawe zonse. Koma wophunzila akawona mwamupindulila mwewo chifukwa chokonkheja mfundo za m’Baibolo, naye angalimbikisiwe kukonkheja chisanzo chanu. (1 Akor. 11:1) Ganizilani vichitikila Hanae watatomolako kale kuvuli. Yove ofotokoza kuti: “Abale na alongo enzechita kale vinthu venenzephunzila newo kuti nikovichita. Newo niwona mwaningalimbikisile ŵanthu, kuŵakhululukila komasoti mwaningawoneshele chikondi. Ove nthawe zonse enzelaŵila viweme vokhuza ayakine. Newo nenzefuna kuŵakonkheja.”

15. Kansi lemba ya Miyambo 27:17, yutiyavya tyani kuwona chifukwa chake tufunika kuchita ushamwali na wophunzila Baibolo keno opitilija kupezeka pa misonkhano?

¹⁵ Nkhalani pa ushamwali na wophunzila. Wophunzila Baibolo akopitilija kupezeka pa misonkhano, pitilijani kumuwonesha kuti mumukonda. (Afil. 2:4) Tyani kuchita vamungakwanishe kuti mumuziŵe luweme? Mungamuuje mwamusangalalila kuwona kupita kwake pasogolo, mungamukonshe zokhuza phunzilo yake ya Baibolo, banja yake komasoti ntchito yake. Koma nkhalani osamala kuti osati mukonshe makonsho amene angamuchitishe nsoni. Makambilano amene aŵa angachitishe kuti munkhale pa ushamwali uweme. Mukankhala pa ushamwali na wophunzila, mungamuyavye kuti apite pasogolo mpaka kufwika pobatiziwa. (Ŵelengani Miyambo 27:17.) Hanae lomba otumikila monga mpainiya wonkhazikika. Pokumbukila ulwendo woyamba wechipezeka pa misonkhano yove enena kuti: “Peninkhala na azishamwali mumpingo, niyamba kuganizila misonkhano ndipo nenzepezekapo olo kuti ninkhale woŵeŵa. Newo nenzekondwela ngako na azishamwali anyowani ndipo vamene ivi vinichitisha kuti nisilije ushamwali na ŵanthu ŵala amene enzetumikilalini Yehova. Newo nenzefuna kunkhala pa ushamwali wotang’a na Yehova komasoti abale na alongo. Tetyo, nisankha kubatizika.”

16. Kansi chinthu chiyakine chamungachite ni chotyani kuti muyavye wophunzila Baibolo kunkhala wokondwela chifukwa chakuti ali mumpingo?

¹⁶ Wophunzila Baibolo akopitilija kupita pasogolo noyamba kusintha, muyavyeni kulimvwa kuti yove ni munthu wamumpingo. Mungachite vamene ivi mwa kunkhala wotandaja. (Ahe. 13:2) Denis, wamene onkhala ku Moldova, pokumbukila nthawe yenzephunzila Baibolo enena kuti: “Moweleja-weleja, newo na mwanakazi wangu tenzesengewa kuti tikotandala na abale. Ove enzetifotokozela mwechiyavyiliwa na Yehova. Vamene ivi vitilimbikisa. Nthawe yamene iyi itiyavya kusimikijila kuti tufuna kutumikila Yehova komasoti kuti tuyembekezela moyo uweme.” Pa nthawe yakuti wophunzila Baibolo wayenelela kunkhala wofalisa, mwewo namwe mungamusenge kuti akupelekejeni mu utumiki. Wofalisa muyakine waku Brasil, zina yake Diego, enena kuti: “Abale anyinji enisenga kuti nilute nawo mu utumiki. Pochita vamene ivi, niphunzila vinyinji ndipo nilimvwa kunkhala pafupi na Yehova pamozi na Yesu.”

17. Kansi akulu angaŵayavye tyani ophunzila Baibolo?

¹⁷ Mukopeza nthawe yotandala na ophunzila Baibolo. Mwewo akulu, keno mwewo muŵawonesha chikondi komasoti kuŵawonesha chidwi ophunzila, mungaŵayavye kuti apite pasogolo mpaka kufwika pobatiziwa. Kansi mwewo mungatandaleko nawo ophunzila Baibolo nthawe zonse pa misonkhano? Ove akowona kuti muŵakonda keno mwewo mukumbukila mazina ŵawo, makamaka akayamba kuyankha. Kansi mwewo mungapatule nthawe kuti muluteko na wofalisa poluta kuyachitisha phunzilo? Mwewo mungamuyavye ngako wophunzila kupambana mwamuganizila. Mpainiya muyakine zina yake Jackie, wamene onkhala ku Nigeria, enena kuti: “Ophunzila anyinji odabwisika ngako akaziŵa kuti m’bale wanipelekeja ku phunzilo ni nkulu. Wophunzila Baibolo muyakine enena kuti: ‘Abusa ŵangu angayeseli kuchita vamene ivi. Ove onyungila tyala ŵala olemela, koma pavuli pakuti alipiliwa!’” Wophunzila Baibolo wamene uyu, lomba opezeka pa misonkhano.

18. Kansi akulu angakwanilishe tyani udindo wechipasiwa monga mwevilembelewa pa lemba ya Machitidwe 20:28?

¹⁸ Phunzisani komasoti tang’ishani ŵala ochitisha maphunzilo a Baibolo. Akulu, mwewo muli na udindo ukulu ngako woyavya ofalisa kuti akokata luweme ntchito yawo yolalikila, kuyangijilapo yophunzisa ŵanthu Baibolo. (Ŵelengani Machitidwe 20:28.) Keno muyakine ochita nsoni kuchitisha phunzilo mwewo mulipo, lipelekeni kuti musogoje phunzilo. Jackie, watatomolako kale kuvuli, enena kuti: “Akulu nthawe zonse okonsha zokhuza ophunzila Baibolo ŵangu. Nikakumana na mavuto pochitisha phunzilo, ove onipasa malangizo othandiza.” Akulu angachite vinyinji kuti alimbikise ŵala ochitisha maphunzilo a Baibolo. (1 Ates. 5:11) Jackie oyangijila kuti: “Newo nukondwela ngako akulu akanilimbikisa komasoti akaniuja kuti otembeja ntchito yangu. Mawu amene aŵa onitonthoja monga ni kapu ya manzi ozizila pa nsiku yakuti kuli zuŵa ngako. Kutembeja kwawo kuyangijila chidalilo komasoti chisangalalo changu chanupeza pa ntchito yanuchita yophunzisa ŵanthu Baibolo.”​—Miy. 25:25.

19. Kansi tonse tingankhale na chisangalalo chotyani?

¹⁹ Olo kuti pali pano tuchitishalini maphunzilo a Baibolo, tingayavye mphela ayakine kupita pasogolo mpaka kuyabatiziwa. Keno mwasengewa kuti mukaŵepo pa phunzilo ya Baibolo, mukokonzekela luweme kuti mukapeleke ndemanga ziweme zamene zingayavye munecho wa phunzilo, koma mukonkhala wosamala kuti osati mukolaŵilapo ngako. Nkhalani pa ushamwali na ophunzila Baibolo amene ayamba kuwela ku Ng’anda ya Ufumu, ndiponkhalani chisanzo chiweme kuli ove. Ndipo akulu angalimbikise ophunzila Baibolo popatulako nthawe yotandala nawo komasoti angalimbikise ŵala ochitisha maphunzilo a Baibolo poŵaphunzisa komasoti kuŵatembeja. Kulaŵila chendi, tingankhale na chisangalalo chikulu tikaziŵa kuti tayavyako munthu muyakine olo patontho tyala kuti akokonda komasoti kutumikila Atata ŵasu, Yehova.