Ŵanthu ayakine amene eŵelenga nkhani yamene iyi mokulumija elikonshapo kale konsho yamene iyi. Koma m’mavesi amene aŵa muli analume osiyana amene enze na zina yolingana yakuti Mefiboseti ndipo tingaphunzilepo kanthu pokambilanasoti mwachidule vamene vichitika.

Mfumu Sauli yaku Isiraeli yenze na ŵana 7 analume na ŵana aŵili anakazi. Mwana woyamba wa Sauli enze Yonatani. Pavuli pake, mfumu ichizankhalasoti na mwana mwanalume zina yake Mefiboseti wamene enze mwana wa Mizipa mwanakazi ntontho wa Sauli. Chochitisha chidwi n’chakuti, Yonatani naye enzesoti na mwana mwanalume zina yake Mefiboseti. Tetyo, Mfumu Sauli enze na mwana mwanalume zina yake Mefiboseti na nzikulu wa zina imo na imo.

Nthawe iyakine Mfumu Sauli epandukila Agibeoni pakati pa Aisiraeli ndipo enzefuna kuŵapaya. Ndipo vuwoneka kuti anyinji mwa ove epaiwa. Vamene ivi vuwonekelatu luweme kuti venze vophoniyeka. Ndaŵa yanji? Ndaŵa yakuti mmasiku a Yoswa, akulu-akulu a Chiisiraeli echita pangano ya ntendele na Agibeoni.—Yos. 9:3-27.

Pangano yamene iyo yenzekata mphela ntchito mu nthawe ya Mfumu Sauli. Mosiyana na pangano yamene iyo mfumu Sauli eyeja kupaya Agibeoni. Vamene ivi vichitisha kuti ‘Sauli pamozi na a m’banja mwake ankhale na mulandu wa milopa.’ (2 Sam. 21:1) Pamapeto pake Davide echizankhala mfumu. Agibeoni amene epulumuka echizauja Davide za chinthu chikulu chophoniyeka chamene chichitika. Davide eŵakonsha mwangachitile kuti aziŵilije vochita viipa va Sauli na cholinga chakuti asegule njila kuti Yehova adalise chalo chamene icho. Mmalo mosenga ndalama, Agibeoni esenga kuti ŵana okwana 7 analume a munthu wamene ‘eŵakonzela chiwembu chakuti aŵasilijiletu’ apelekewe nopaiwa. (Num. 35:30, 31) Davide eŵapasa vechisenga ove.—2 Sam. 21:2-6.

Pa nthawe yamene iyi, Sauli na Yonatani enze emwalila kale ku nkhondo, koma mwana wa Yonatani zina yake Mefiboseti enze akali moyo. Yove enze wolemala chifukwa cha ngozi yamene ichitika penze akali mwana ndipo aliyeluteko ku nkhondo yechiniyata asikulu ŵake poniyatana na Agibeoni. Davide echita pangano yonkhala pa ushamwali na Yonatani, vamene sembe vipindulisha mbadwa za Yonatani kupamikijapo mwana wa Yonatani zina yake Mefiboseti. (1 Sam. 18:1; 20:42) Nkhani yamene iyi yunena kuti: “Mfumu [Davide] imvwila chisoni Mefiboseti mwana mwanalume wa Yonatani, mwana wa Sauli, chifukwa cha lumbilo yechichita pakati pawo pamenso pa Yehova.”—2 Sam. 21:7.

Olo n’tetyo, Davide evomekeja pempho ya Agibeoni. Yove epeleka ŵana aŵili a Sauli, pa ŵana amene awo muyakine enze Mefiboseti, komasoti ŵana 5 amene enze azizikulu a Sauli. (2 Sam. 21:8, 9) Vamene ivi vechichita Davide vesilija mulandu wa milopa m’chalo chamene icho.

Chochitika chamene ichi ni chikulu kupambana mbili yake. Lamulo ya Mulungu yenzenena momvwika luweme kuti: “Ŵana ofunikalini kupaiwa chifukwa cha machimo ŵa atata ŵawo.” (Deut. 24:16) Yehova sembe aliyevomekeje vichitikila ŵana aŵili a Sauli na azizikulu ŵake okwana 5 kuti ove aliyephoniye. Lamulo yamene iyo yenzenenasoti kuti: “Aliyense akopaiwa chifukwa cha chimo yake.” Vuwoneka kuti ŵanthu a m’banja ya Sauli okwana 7, nawo etolako mbali poyavyana na Sauli penzeyeja kuti aŵasilijiletu Agibeoni. Monga vokonkhapo vake onse okwana 7 epaiwa monga malipilo a machimo ŵawo.

Nkhani yamene iyi yuwonesha kuti munthu angalikhululukilelini chifukwa chakuti echita chinthu chiipa poganizila olo polaŵila kuti echita chinthu chamene icho chifukwa chakuti enzekonkheja tyala malangizo. Mwambi uyakine unena kuti: “Salaja njila ya kwendo yako ndipo njila zako zonse zinkhazikike.”—Miy. 4:24-27; Aef. 5:15.