1-2. Keno mukaliye konzekela kubatizika, ndaŵa yanji mufunikalini kukhumudwa? (Onani chithunzi cha pachikuto.)

 KENO mufuna kubatizika, muli na cholinga chiweme ngako. Kansi mwakonzeka kuchita vamene ivi lomba teti? Keno mwayankha kuti eye ndipo nawo akulu avomekejasoti, osati muzawaye-waye kukatishila ntchito mwayi wamene uyu kusogolo. Madaliso okuyembekezelani m’gulu ya Yehova.

² Koma kansi munthu muyakine ekuujani kuti mufunika kuyeja-yeja kupita pasogolo ngako mukaliye batizika? Olo payakine pamweka muwona kuti mufunika kuchita vamene ivi? Keno n’tetyo, osati mutaye ntima. Mungakwanishe kuluta pasogolo keno muyeja-yeja, mosasamala kanthu kuti nimwe mwana olo nkulu.

3. Kansi munthu wa ku Itiyopiya emukonsha kuti tyani Filipo, ndipo vamene ivi vuleta konsho yotyani? (Machitidwe 8:36, 38)

³ Ŵelengani Machitidwe 8:36, 38. Munthu muyakine wa ku Itiyopiya waudindo ekonsha Filipo kuti: “Chunilesha kubatizika n’chinji?” Munthu wamene uyu enzefunishisha kubatizika, koma kansi yove enze wokonzeka chendi kuti abatizike?

4. Kansi munthu wa ku Itiyopiya ewonesha tyani kuti enze wosimikijila kupitilija kuphunzila?

⁴ Munthu wa ku Itiyopiya “eluta ku Yerusalemu kuyalambila Mulungu.” (Mac. 8:27) Tetyo munthu wamene uyu vuwoneka kuti enze wotembenukila ku Chiyuda. N’vosakaikisha kuti ephunzila vinthu vinyinji vokhuza Yehova kufumila m’Malemba Opatulika Achiheberi. Koma olo n’tetyo, yove enzefunishisha kuphunzila vinyinji. Pechikumana na nduna yamene iyi panjila, kansi Filipo emufwana ochita tyani? Emufwana kuti oŵelenga mpukutu wa mneneli Yesaya. (Mac. 8:28) Chamene icho chenze chakulya chotamfunya chauzimu. Nduna yamene iyi iliye khutile  na mfundo zitontho tyala zeiphunzisiwa; koma yenzefuna kupitilija kuphunzila.

5. Kansi munthu wa ku Itiyopiya echita chinji na vechiphunzila?

⁵ Munthu wamene uyo enze na udindo ukulu pansi pa Kandake mfumukazi yaku Itiyopiya; yove “enze wololela chuma chonse.” (Mac. 8:27) Tetyo, payakine enzenkhala bize ngako kusamalila maudindo anyinji. Koma olo n’tetyo, yove epatula nthawe yolambila Yehova. Yove aliye khutile tyala na choonadi chechiphunzila; yove echita vechiphunzila. Tetyo, yove eyenda ulwendo utali kufumila ku Itiyopiya kuti akalambile Yehova pa kachisi ku Yerusalemu. Ulwendo wamene uyu witola nthawe komasoti ndalama zinyinji. Koma mwanalume wamene uyu echita vonse vangakwanishe pa nkhani ya kulambila Yehova.

6-7. Kansi chikondi cha munthu wa ku Itiyopiya chepitilija tyani kukula?

⁶ Munthu waku Itiyopiya, ephunzila kufumila kwa Filipo mfundo zanyowani za choonadi zofunika ngako kupamikijapo zokhuza Mesiya. (Mac. 8:34, 35) Munthu waudindo wamene uyu ekhuzika ntima ngako pechimvwa vokhuza vechimuchitila Yesu. Kansi yove sembe echita tyani? Yove sembe epitilija kunkhala monga wotembenukila ku Chiyuda, komasoti wolemekezeka. Koma m‘malo mwake, chikondi chake kwa Yehova na Mwana wake Yesu chekula. Elimbikisiwa kuchinja moyo wake nobatiziwa kunkhala wophunzila wa Yesu Khilisitu. Filipo pechiwona kuti munthu wamene uyo enze wokonzeka, emubatiza.

⁷ Kukonkheja chisanzo cha munthu wa ku Itiyopiya, kungakuyavyeni kuti munkhale wokonzeka kubatizika. Mwewo namwe muzakwanishe kunena na mtima wonse kuti, “Chunilesha kubatizika n’chinji?” Tiyeni tikambilane mwatingamukonkhejele pa vechichita yove: Yove epitilija kuphunzila, kukonkheja venzephunzila, komasoti epitilija kukulisha chikondi chake kwa Mulungu.

8. Kansi lemba ya Yohane 17:3, yunena kuti mufunika kuchita chinji?

⁸ Ŵelengani Yohane 17:3. Kansi mawu a Yesu amene aŵa ekuyavyani kusankha kuphunzila Baibolo? Vamene ivi ni vachendi kuli anyinji asewo. Koma kansi mawu amene aŵa otiujasoti kuti tipitilije kuphunzila? Eye. Tipitilije “kuziŵa . . . Mulungu wachendi yeka.” (Mlal. 3:11) Sewo tipitilije kuphunzila mpaka kale-kale. Tikophunzila vinyinji niyesoti patuvwendela ngako pafupi na Yehova.—Sal. 73:28.

9. Kansi tufunikila kuchita chinji pavuli pophunzila mfundo zoyambilila za choonadi?

⁹ N’pomvwika kuti kuphunzila vokhuza Yehova, kuyamba na viphunziso voyambilila va m’Baibolo. Mu kalata yake yoluta kwa  Aheberi, ntumwi Paulo etomola viphunziso voyambilila monga “mfundo zoyambilila.” Yove enzenyozalini “viphunziso voyambilila”; koma enzevilinganija na nkaka wakunyonkha mwana ntontho. (Ahe. 5:12; 6:1) Koma elimbikisasoti Akhilisitu onse kuti apitilije kuphunzila viphunziso voyambilila komasoti mfundo zikulu-zikulu za m’Mawu a Mulungu. Kansi mwewo muli na njala yofuna kuphunzila mfundo zikulu-zikulu za m’Baibolo? Kansi nimwe ofunishisha kupitilija kukula mwauzimu komasoti kuphunzila za Yehova na volinga vake?

10. Ndaŵa yanji ayakine angawone kuti kuphunzila n’kovuta?

¹⁰ Kuli anyinji a sewo, kuphunzila kunkhala kovuta. Kansi niye mwavililisoti kuli mwewo? Mukali pa sikulu, kansi mwewo mwiphunzila kuŵelenga luweme komasoti kuphunzila vinthu? Kansi muwona kuti kuphunzila nikosangalasa komasoti kopindulisha? Olo muwona kuti muliye luso yophunzila mabuku? Keno n’tetyo, mulilini mweka. Mulimonse mwavingankhalile, Yehova angakuyavyeni. Yove ni wangwilo ndipo ni Mphunzisi wasu muweme ngako.

11. Kansi Yehova owonesha tyani kuti ni “Mlangizi Nkulu”?

¹¹ Yehova olitomola yeka kuti “Mlangizi wako Nkulu.” (Yes. 30:20, 21) Yove ni Mphunzisi woleza ntima, wachifundo, komasoti womvwisha vinthu. Yehova owona viweme muli ophunzila ŵake. (Sal. 130:3) Ndipo oyembekezelalini kuti tikochita vatingaleke kwanisha. Kumbukilani kuti yove niye epanga tomfwe wanu, wamene ni mphaso iweme ngako. (Sal. 139:14) Mwachibadwa sewo taŵanthu tili na ntima wofuna kuphunzila. Nyamalenga wasu ofuna kuti tipitilije kuphunzila mpaka kale-kale—komasoti tikosangalala pochita vamene ivi. Tetyo, ni nzelu kunkhala na ntima ‘wofunishisha’ choonadi cha m’Baibolo palipano. (1 Pet. 2:2) Nkhalani na volinga vamungakwanilishe, ndipo mukoŵelenga komasoti kuphunzila Baibolo monkhazikika. (Yos. 1:8) Moyavyiwa na Yehova, muzaziŵe vamungachite kuti mukosangalala poŵelenga komasoti kuphunzila za yove.

12. Ndaŵa yanji tufunika kuphunzila vokhuza moyo wa Yesu komasoti utumiki wake?

¹² Nthawe zonse mukopatula nthawe yoganizila za moyo komasoti utumiki wa Yesu. Chofunika ngako ni kukonkheja chisanzo cha Yesu keno sewo tufuna kutumikila Yehova, makamaka muli ino nthawe yovuta yatilimo. (1 Pet. 2:21) Yesu elaŵila mosapita m’mbali kuti ophunzila ŵake azakumane na mavuto. (Lk. 14:27, 28) Koma olo n’tetyo, yove enze na chidalilo chakuti ophunzila ŵake angapitilije kunkhala okhulupilika kwa Mulungu, monga ni mwechichitila yove. (Yoh. 16:33) Phunzilani vinyinji vokhuza moyo wa Yesu, ndipo nkhalani na volinga kuti mukomukonkheja pa moyo wanu wa nsiku na nsiku.

13. Kansi mufunika kupitilija kumusenga chinji Yehova, ndipo ndaŵa yanji?

¹³ Kuziŵa tyala vinthu n’kosakwanila. Chifukwa chikulu choziŵila vinthu ni kukuyavyani kuti muphunzile vinyinji vokhuza Yehova, komasoti kuti mukulishe minkhalidwe monga chikondi, komasoti chikhulupililo. (1 Akor. 8:1-3) Pamupitilija kuphunzila, mukomusenga Yehova kuti akuyavyeni kunkhala na chikhulupililo chotang’a. (Lk. 17:5) Yove oyankha na ntima wonse mapemphelo otetyo. Chikhulupililo ngacho-ngacho chozikiwa pa kumuziŵa luweme Mulungu wasu, chizakuyavyeni kuti mupite pasogolo.—Yak. 2:26.

14. Kansi ntumwi Petulo ewonesha tyani kufunika kokonkheja vatuphunzila? (Onanisoti chithunzi.)

¹⁴ Ntumwi Petulo ewonesha kuti ophunzila ŵa Khilisitu ofunika kupitilija kuchita vakuphunzila. Yove etomola nkhani ya m’Baibolo  yunena za Nowa. Yehova euja Nowa kuti, azawononge ŵanthu aipa a m’nthawe yake na chigumula. Kuziŵa tyala kuti chigumula chikuza kwenze kosakwanila kuti Nowa na banja yake apulumuke. Onani kuti Petulo etomola nthawe ya chigumula “pamene chingalaŵa pechenzemangiwa.” (1 Pet. 3:20) N’chendi, Nowa na banja yake ekonkheja vechiphunzila kwa Mulungu pomanga chingalaŵa, chamene chenze chiboti chikulu. (Ahe. 11:7) Petulo eyelekezela vechichita Nowa na ubatizo, yove elemba kuti: “Cholingana na chingalaŵa chamene ichi chupulumushasoti mwewo lomba.” (1 Pet. 3:21) Mwa njila iyakine, tingayelekezele ntchito yamuchita pokonzekela ubatizo na ntchito yechikata Nowa na banja yake kwa vyaka vinyinji yomanga chingalaŵa. Kansi mufunika kuchita chinji kuti mukonzekele ubatizo?

15. Kansi kulapa ngako-ngako kupamikijapo chinji?

¹⁵ Chinthu choyamba chatufunika kuchita ni kulapa kufumila pansi pa ntima machimo ŵasu. (Mac. 2:37, 38) Kulapa ngako-ngako kuti tichinje na mtima wonse. Kansi mwewo mwileka minkhalidwe yasasangalala nayo Yehova monga, chiwelewele, kupepa fwaka, olo kutukila? (1 Akor. 6:9, 10; 2 Akor. 7:1; Aef. 4:29) Keno mwewo mukaliye chinja, pitilijani kuyeja-yeja kuti muchinje. Laŵilani na wamuphunzila naye Baibolo, olo sengani akulu a mumpingo mwanu kuti akuyavyeni nokulangizani. Keno nimwe mwana ndipo munkhala pa ng’anda, pitilijani kusenga makolo ŵanu kuti akuyavyeni kuleka minkhalidwe iipa yamene ingakukangisheni kubatizika.

16. Kansi ntchito ziweme zauzimu zupamikijapo chinji?

¹⁶ Chinthu chiyakine chofunika, ni kukata ntchito ziweme zauzimu. Vamene ivi vingapamikijepo kupezeka pa misonkhano ya Chikhilisitu notolamo mbali. (Ahe. 10:24, 25) Ndipo mukayamba kulalikila na gulu ya Yehova, mukoyeja-yeja kuchita vamene ivi monkhazikika. Mukokata nawo ntchito yopulumusa moyo yamene iyi muzankhale osangalala ngako. (2 Tim. 4:5) Keno mwewo nimwe mwana ndipo munkhala pa ng’anda pa makolo ŵanu, likonsheni kuti: ‘Kansi makolo ŵangu ofunika kuchita kunikumbusha kuti nilute kumisonkhano olo mu utumiki? Olo payakine nuchita vamene ivi mwakufuna kwangu?’ Keno muchita vamene ivi mwakufuna kwanu, muwonesha kuti muli na chikhulupililo, mukonda Yehova, komasoti  mutembeja Yehova Mulungu pa vonse vawakupasani. Mphaso zamupeleka kwa Yehova zili monga ni “ntchito zuwonesha kulipeleka kwa Mulungu.” (2 Pet. 3:11; Ahe. 13:15) Mphaso zasu zatupeleka mwakufuna kwasu komasoti mosachita kukakamijiwa zumukondwelesha Mulungu. (Yelekezelani na 2 Akorinto 9:7.) Tuchita vamene ivi chifukwa tusangalala kupeleka viweme vonse kwa Yehova.

17-18. Kansi ni nkhalidwe yofunika yotyani yamene ingakuyavyeni kupita pasogolo kuti mubatiziwe, ndipo ndaŵa yanji? (Miyambo 3:3–6)

¹⁷ Pamupitilija kupita pasogolo kuti mubatizike, muzakumane na mavuto. Ŵanthu ayakine azakunyozeni chifukwa cha chikhulupililo chanu; azakushusheni olo kukutamanishani. (2 Tim. 3:12) Olo kuti muchita vonse vamungakwanishe kuti muleke kuchita vinthu vamuziŵa kuti ni viipa, nthawe ziyakine mungayambesoti kuchita vamene ivo. Payakine mungalimvwe kunkhala wosaleza ntima nokalipa chifukwa chakuti cholinga chanu chikaliye kwanishika. Kansi n’chinji chingakuyavyeni kupilila? Ni nkhalidwe yanu yofunika ngako—kukonda Yehova.

¹⁸ Kukonda kwanu Yehova, ni nkhalidwe iweme ngako yamuli nayo. (Ŵelengani Miyambo 3:3-6.) Kukonda ngako Yehova kungakuyavyeni kulimbana bwino-bwino na mavuto ŵamukumana nawo pa moyo wanu. Nthawe zinyinji, Baibolo yutomola za chikondi chokhulupilika cha Yehova kwa atumiki ŵake. Chikondi chokhulupilika chamene ichi chutanthauza kuti yove azasiyelini atumiki ŵake okhulupilika, olo kuleka kuŵakonda. (Sal. 100:5) Mwewo mwipangiwa m’chifanizilo cha Mulungu. (Gen. 1:26) Kansi mungawoneshe tyani chikondi choteti?

19. Kansi mungachite tyani kuti mukomutembeja ngako Yehova pa vonse vawakuchitilani? (Agalatiya 2:20)

¹⁹ Yambani na kutembeja. (1 Ates. 5:18) Nsiku iliyonse, mukolikonsha kuti, ‘Kansi Yehova wawonesha tyani kuti onikonda?’ Pavuli pake onesheshani kuti mwamutembeja Yehova m’mapempelo ŵanu, ndipo mukotomola vinthu ngavo-ngavo vawakuchitilani. Mukowona vakuchita Mulungu vuwonesha kuti okukondani mwewo monga munthu pamweka, monga ni mwechichitila ntumwi Paulo. (Ŵelengani Agalatiya 2:20.) Likonsheni kuti, ‘Kansi nane nufuna kumuwonesha chikondi?’ Kukonda Yehova kuzakuyavyeni kupitilija kulimbana bwino-bwino na viyeso komasoti mavuto  ŵanu. Vamene ivi vizakulimbikiseni kupitilija kuchita vinthu vauzimu, komasoti kuwonesha chikondi kuli Atata ŵanu nsiku na nsiku.

20. Kansi kulipeleka kwa Yehova kupamikijapo chinji, ndipo ndaŵa yanji chosankha chamene ichi n’chofunika?

²⁰ M’kupita kwa nthawe, chikondi chanu kwa Yehova chizakulimbikiseni kupeleka pemphelo yapadela. Muzalipeleke kwa Mulungu. Mukokumbukila kuti keno mwalipeleka kwa Yehova, muli na chiyembekezo ichi chosangalasa chakuti: Muzankhale ŵake mpaka kale-kale. Mukapeleka moyo wanu kwa Yehova, mumulonjeza kuti muzapitilije kumutumikila pa nthawe iweme komasoti iipa. Lonjezo yamene iyi yuchitiwalini kaŵili. N’chendi, tikasankha kulipeleka, tunkhala kuti tachita vinthu vofunika ngako. Komalomba, ganizilani ivi: Muzapange vosankha vinyinji pa moyo wanu, viyakine mwa vamene ivo ni viweme ngako, koma paliye chosankha chapadela ngako chamungapange chamene chingapambane kupeleka moyo wanu kwa Yehova. (Sal. 50:14) Satana azayeje kufokesa chikondi chanu kwa Atata ŵanu, noyembekezela kuti muleke kunkhala okhulupilika. Koma osamulola Satana kuti apambane! (Yobu 27:5) Kukonda kwanu Yehova kuzakulimbikiseni kuti mulipeleke nonkhala pa ushamwali uweme ngako na Atata ŵanu akululu.

21. Ndaŵa yanji tinganene kuti ubatizo ni mapeto lini koma ni chiyambi?

²¹ Pavuli pakuti mwalipeleka kwa Yehova, laŵilani na akulu a mumpingo wanu za chosankha chanu chikulu chamene ichi. Komalomba nthawe zonse mukokumbukila kuti ubatizo, ni mapeto lini koma ni chiyambi. Ni chiyambi cha moyo wosasila wotumikila Yehova. Tetyo, tang’ishani chikondi chanu kwa Atata ŵanu palipano. Nkhalani na volinga kuti chikondi chanu chinkhale chotang’a nsiku na nsiku. Kuchita vamene ivi kuzakulimbikiseni kuti mubatizike. Nsiku yamene iyo izankhale yosangalasa ngako. Koma chamene ichi ni chiyambi tyala. Pemphelo yasu niyakuti chikondi chanu kwa Yehova na kuli Mwana wake chipitilije kukula mpaka kale-kale!