NKHANI YOPHUNZILA N.° 10
Ndaŵa yanji mufunika kubatizika?
“Aliyense wa mwewo abatizike.”—MAC. 2:38.
NYIMBO N.° 34 Kuyenda na ntima wosayaŵanika
VATIKUTI TIPHUNZILE a
1-2. Kansi n’chinji chuchitika kanyinji-kanyinji keno ŵanthu obatiziwa, ndipo mufunika kuganizila chinji?
KANSI mwewo muwona gulu ya ŵanthu yukuya ku ubatizo? Mukhuziwa ntima pamukumvwa mawu ŵawo pakuyankha makonsho aŵili akaliye batiziwa. Muwona achibale komasoti azishamwali ŵawo oŵamekela chifukwa cha vamene ivi. Abatiziwa akafuma mmanzi mukumvwa kuniyata mmanja komasoti kuwona chisangalalo chuwonekela pa vyinso vaŵo. Pa avaledji, sondo iliyonse ŵanthu opeleka moyo wawo kwa Yehova ndipo obatizika nonkhala Mboni zake.
2 Lomba tyani kuli mwewo? Keno muganiza zobatiziwa, niye kuti munkhale osangalala ngako m’chalo chino chiipa monga mmozi mwa ŵanthu amene “osakila-sakila Yehova.” (Sal. 14:1, 2) Nkhani ino ilembelewa mwewo viliye kanthu keno nimwe mwana olo nkulu. Koma sewo amene tibatiziwa kale tufunika kutang’isha chosankha chasu chotumikila Yehova kosasila. Tetyo, tiyeni tikambilane vitatu mwa vifukwa vinyinji vutichitisha kutumikila Yehova.
MWEWO MUKONDA CHOONADI NA CHILUNGAMO
Satana wankhala onyoza zina iweme ya Yehova kwa vyaka masauzande anyinji ndipo akalipitilija kuchita vamene ivo (Onani ndime 3-4.)
3. Ndaŵa yanji atumiki a Yehova okonda choonadi komasoti chilungamo? (Salimo 119:128, 163)
3 Yehova elamula ŵanthu ŵake kuti ‘akokonda choonadi.’ (Zek. 8:19) Yesu elimbikisa ophunzila ŵake kuti akokonkheja chilungamo. (Mt. 5:6) Vamene ivi vutanthauza kuti tufunika kunkhala ofufunishisha kuchita vinthu viweme na vituŵa pamenso pa Yehova. Kansi mwewo mukonda choonadi komasoti chilungamo? Sewo tukhulupilila kuti muchita tetyo. Mwewo muzondana na wenye komasoti vinthu vonse viipa. (Ŵelengani Salimo 119:128, 163.) Wenye uwonesha minkhalidwe ya Satana, wotonga wa chino chalo. (Yoh. 8:44; 12:31) Chimozi mwa volinga va Satana ni kunyoza zina ituŵa ya Yehova Mulungu. Yove wankhala ofalisa wenye wonena za Mulungu wasu kufumila pechipanduka m’munda wa Edeni. Yove eyeja kuchitisha ŵanthu kuganiza kuti Yehova ni Wotonga wolikonda komasoti aliye chilungamo ndipo otana ŵanthu vinthu viweme. (Gen. 3:1, 4, 5) Wenye wa Satana wonena za Yehova upitilija kuifya maganizo na mitima ya ŵanthu. Keno ŵanthu asankha kuti osati ‘akokonda choonadi’ Satana angaŵasogolele ku minkhalidwe iipa ya ntundu uliwonse.—Aro. 1:25-31.
4. Kansi Yehova wawonesha tyani kuti ni “Mulungu wa choonadi”? (Onanisoti chithunzi.)
4 Yehova ni “Mulungu wa choonadi” ndipo chifukwa cha ntima wopasa ophunzisa choonadi ŵanthu amene omukonda. (Sal. 31:5) Mwakuchita vamene ivi, oŵayavya kuti osati akosemphewa na wenye wa Satana. Yehova ophunzisasoti atumiki ŵake kuti ankhale achilungamo. Vamene ivi vuŵayavya kuti akolemekezewa ngako komasoti akonkhala na ntendele wa muntima. (Miy. 13:5, 6) Kansi yove ekuchitilani vamene ivi pamwenzephunzila Baibolo? Mwewo mwaphunzila kuti njila za Yehova ni ziweme kuli ŵanthu wonse komasoti kuli mwewo pamweka. (Sal. 77:13) Tetyo, mwewo mufuna kuchita vakunena Mulungu kuti ni viweme. (Mt. 6:33) Mwewo mufuna kuteteza choonadi noyavya kushusha wenye wonena za Mulungu wasu, Yehova. Kansi mungachite tyani vamene ivi?
5. Kansi mwewo mungateteze tyani choonadi komasoti chilungamo?
5 Mwewo mungasankhe moyo wamene unenewa kuti: “Nukana wenye wa Satana koma nuteteza choonadi. Nufuna kuti Yehova ankhale Wolamulila wangu ndipo nufuna kuchita vakunena yove kuti niye viweme.” Kansi mungachite tyani vamene ivi? Mungachite vamene ivi, pofwika kwa Yehova m’pemphelo nolipeleka kuli yove komasoti kuwonesha patuŵa kulipeleka kwamene uko mwa kubatiziwa. Kukonda choonadi komasoti vinthu viweme niye chinthu chikulu chingachitishe kuti mubatiziwe.
MWEWO MUKONDA YESU KHILISITU
6. Kansi lemba ya Salimo 45:4 yukupasani vifukwa votyani vamukondela Yesu Khilisitu?
6 Ndaŵa yanji mwewo mukonda Yesu Khilisitu? Onani vifukwa viyakine vomvwika vupezeka pa Salimo 45:4. (Ŵelengani.) Yesu olimbikisa choonadi, kulichefya, na chilungamo. Keno mwewo mukonda choonadi na chilungamo n’vomvwika kuti mukondasoti Yesu Khilisitu. Ganizilani mwamene Yesu mwechitetezela choonadi na chilungamo. (Yoh. 18:37) Lomba kansi Yesu elimbikisa tyani kulichefya?
7. Kansi n’chinji chukukondweleshani pa kulichefya kwa Yesu?
7 Yesu olimbikisa nkhalidwe yolichefya kupitila mu chisanzo chake. Mwachisanzo, yove opeleka ulemelelo wonse kwa Atata ŵake osati kuli yove yeka. (Mk. 10:17, 18; Yoh. 5:19) Kansi mukumvwa tyani mukawona kulichefya koteti? Kansi vukuchitishani lini kukonda Mwana wa Mulungu nomukonkheja? Kulaŵila chendi niye vatuchita. Ndaŵa yanji Yesu ni wolichefya? Ndaŵa yakuti okonda nokonkheja Atata ŵake amene ni olichefya. (Sal. 18:35; Ahe. 1:3) Kansi mukopekalini na Yesu wamene okonkheja luweme minkhalidwe ya Yehova?
8. Ndaŵa yanji tukonda Yesu monga Mfumu yasu?
8 Sewo tukonda Yesu monga Mfumu yasu chifukwa ni Wotonga muweme ngako. Yehova munecho ephunzisa Mwana wake nomusankha kuti akotonga. (Yes. 50:4, 5) Ganizilanisoti chikondi chawawonesha Yesu chololela kuvutikila ayakine. (Yoh. 13:1) Monga Mfumu yanu Yesu, muwamila kumukonda chendi. Yove enena kuti ŵanthu amene omukonda chendi—amene oŵaita kuti azishamwali ŵake—owonesha chikondi chawo pomvwila malamulo ŵake. (Yoh. 14:15; 15:14, 15) Ni mwayi ukulu ngako kunkhala shamwali wa Mwana wa Yehova!
9. Kansi ubatizo wa Akhilisitu ulingana tyani na wa Khilisitu?
9 Imozi mwa malamulo a Yesu ni akuti ophunzila ŵake akobatiziwa. (Mt. 28:19, 20) Yove epeleka chisanzo. Munjila ziyakine ubatizo wake ni wosiyana na ophunzila ŵake. (Onani bokosi yakuti “ Ubatizo wa Yesu komasoti ubatizo wa ophunzila a Khilisitu—kusiyana kwake.”) Koma munjila ziyakine niwolingana. Pobatiziwa, Yesu elipeleka kuti achite chifunilo cha Atata ŵake. (Ahe. 10:7) Molingana na vamene ivi, ophunzila a Khilisitu obatizika monga chizindikilo chowonesha patuŵa kuti alipeleka kwa Yehova Mulungu. Palipano moyo wawo unkhala wofunishisha kuchita chifunilo chake osati chawo. Tetyo, ove okonkheja chisanzo cha Ambuye ŵawo.
10. Ndaŵa yanji kukonda Yesu kufunika kukulimbikisani kubatiziwa?
10 Mwewo muvomekeja kuti Yesu ni Mwana wovyalika yeka wa Yehova komasoti Mfumu yosankhiwa na Mulungu kuti ikotitonga. Muwona kuti Yesu ni chisanzo chiweme ngako cha Atata ŵake. Mwewo mwaphunzila kuti yove elyesha anjala, etonthoja ofoka, olosoti kupojeka olwala. (Mt. 14:14-21) Mwawona mwakusogolela mpingo masiku ŵano. (Mt. 23:10) Ndipo muziŵa kuti kusogolo azachite vinyinji monga Mfumu ya Ufumu wa Mulungu. Kansi mwewo mungawoneshe tyani kuti mumukonda? Mwa kukonkheja chisanzo chake. (Yoh. 14:21) Mwewo mungayambe kuchita vamene ivi mwa kulipeleka kwa Yehova nobatiziwa.
MWEWO MUKONDA YEHOVA MULUNGU
11. Kansi ni chifukwa chofunika ngako chotyani chamufunikila kubatizika, ndipo ndaŵa yanji vili tetyo?
11 Kansi ni chifukwa chofunika ngako chotyani chamufunikila kubatizika? Yesu efotokoza lamulo ikulu ngako pa malamulo a Mulungu ponena kuti: “Ukokonda Yehova Mulungu wako na ntima wako wonse, moyo wako wonse, maganizo ŵako wonse, na mphamvu zako zonse.” (Mk. 12:30) Kansi mwewo niye mwamumukondela Mulungu?
Yehova niye chimake cha vinthu vonse viweme vamusangalala navo palipano komasoti vati muzasangalale navo kusogolo. (Onani ndime 12-13.)
12. Ndaŵa yanji mwewo mukonda Yehova? (Onanisoti chithunzi.)
12 Pali vifukwa vinyinji vatukondela Yehova. Mwachisanzo mwewo mumvwisha kuti yove ni “nyenje ya moyo” komasoti kuti yove opeleka “mphaso iliyonse iweme.” (Sal. 36:9; Yak. 1:17) Vinthu vonse viweme vamusangalala navo vuwela kufumila kwa Mulungu wasu wamene ni wopasa komasoti wachikondi.
13. Kansi n’chinji chuchitisha dipo kunkhala mphaso ya ntengo wapatali?
13 Dipo ni mphaso iweme ngako yechitipasa Yehova. Ndaŵa yanji tunena tetyo? Ganizilani za ushamwali wamene ulipo pakati pa Yehova na Mwana wake. Yesu enena kuti: ‘Atata onikonda’ ndipo ‘Newo nuŵakonda Atata.’ (Yoh. 10:17; 14:31) Ushamwali wawo winkhala wotang’a ngako penze pamozi kwa vyaka mabiliyoni anyinji. (Miy. 8:22, 23, 30) Lomba ganizilani mwevimuŵaŵila Mulungu polola Mwana wake kutamana komasoti kufwa. Yehova okonda ŵanthu—kupamikijapo mwewo—mwakuti elola kupeleka Mwana wake wokondewa monga nsembe kuti mwewo na ŵanthu ayakine, munkhale na moyo wosasila. (Yoh. 3:16; Aga. 2:20) Chamene ichi niye chifukwa chikulu chatukondela Mulungu.
14. Kansi n’cholinga chiweme chotyani pa moyo chamufunikila kusankha?
14 Chikondi chanu pa Yehova chekula pemwiphunzila vinyinji vokhuza yove. Kulaŵila chendi mwewo mufuna kuvwendela kuli yove kuyambila palipano komasoti mpaka kale-kale. Ndipo mwewo mungakwanishe. Yove okulimbikisani mowama ntima kuti mukondweleshe ntima wake. (Miy. 23:15, 16) Mungakwanishe kuchita vamene ivi osati tyala mu volaŵila koma kupitilasoti mu vochita. Mwamuchitila vinthu pa moyo wanu vizawoneshe kuti mukonda chendi Yehova. (1 Yoh. 5:3) Chamene ichi ni cholinga chiweme chamufunikila kusankha pa moyo.
15. Kansi mungawoneshe tyani kuti mukonda Yehova?
15 Kansi mungawoneshe tyani kuti mukonda Yehova? Choyamba, mungapeleke pemphelo yapadela yolipeleka kwa Yehova Mulungu wachendi. (Sal. 40:8) Pavuli pake, mungawoneshe patuŵa kulipeleka kwanu mwa kubatiziwa. Monga mwatafotokozela kumayambililo kwa nkhani ino, yamene iyi yunkhala nthawe yokondwelesha ngako komasoti vinthu vuchinja ngako. Muyamba moyo wanyowani, osati wolikondwelesha mweka, koma kukondwelesha Yehova. (Aro. 14:8; 1 Pet. 4:1, 2) Chamene ichi chingawoneke monga ni chosankha chikulu, koma ni chikulu chendi. Koma kuchita vamene ivi kusegula njila ya moyo uweme ngako. Mwanjila yotyani?
16. Monga mwayuwoneshela Salimo 41:12, kansi Yehova azaŵadalise tyani ŵanthu amene opeleka moyo wawo pomutumikila?
16 Yehova ni Mulungu wamene ali ngako na ntima wopasa. Viliye kanthu kuti mumupase chinji, yove nthawe zonse azakuwejeleni vinyinji ngako. (Mk. 10:29, 30) Yove azakudaliseni pokupasani moyo wosangalasa, watanthauzo olo muli chino chiipa chamene lombapano chisile. Ndipo chamene ichi ni chiyambi tyala. Ulwendo wemwiyamba pa ubatizo wanu ufunikalini kusila. Mwewo mungakwanishe kupitilija kutumikila Tata wanu wokondewa mpaka kale-kale. Chikondi pakati pa mwewo na Atata ŵanu, chizapitilije kukula ndipo muzankhale na moyo masiku onse mpaka kale-kale.—Ŵelengani Salimo 41:12.
17. Kansi mungamupase chinji Yehova chaliye?
17 Keno mwalipeleka nobatiziwa, munkhala na mwayi wopeleka chinthu cha ntengo wapatali kwa Atata ŵanu. Yove wakupasani vinthu vonse viweme komasoti nthawe yemwisangalala nayo. Pomutembeja, mungamupase Munecho wakululu na pachalo chinthu chiyakine chamene aliye—chamene ni ntima wofuna kumutumikila. (Yobu 1:8; 41:11; Miy. 27:11) Kansi mungakatishile ntchito tyani luweme nthawe yanu? Mosakaikila chikondi chanu pa Yehova niye chifukwa chiweme ngako chamufunikila kubatizika.
KANSI NIMWE OKONZEKA KUBATIZIKA?
18. Kansi ni makonsho otyani ŵamungakonshe?
18 Lomba, kansi mungayankhe kuti tyani konsho yakuti, Kansi muzabatiziwe? Paliye angakuyankhileni konsho yamene iyi. Koma chingakuyavyeni ni kulikonsha kuti,’ Kansi nuyembekezela chinji?’ (Mac. 8:36) Kumbukilani vifukwa vitatu vatakambilana. Choyamba, mwewo mukonda choonadi na chilungamo. Likonsheni kuti, ‘Kansi nufuna kuzawona nsiku yamene aliyense azalaŵile vachendi nochita viweme?’ Chachiŵili, mwewo mukonda Yesu Khilisitu. Likonsheni kuti, ‘Kansi nufuna kuti Mwana wa Mulungu ankhale Mfumu yangu, ndipo nufuna kukonkheja chisanzo chake?’ Chachitatu, kupambana vonse mwewo mukonda ngako Yehova. Likonsheni kuti, ‘Kansi nufuna kukondwelesha ntima wa Yehova nomutumikila monga Mulungu wangu?’ Keno mayankho ŵanu pamakonsho amene aŵa ni akuti eye, mulekelanji kubatizika? Muyembekezela chinji?—Mac. 16:33.
19. Ndaŵa yanji mufunikalini kuwaya-waya kubatizika? Pelekani chisanzo. (Yohane 4:34)
19 Keno muwaya-waya kubatiziwa ganizilani chisanzo chechikatishila ntchito Yesu. (Ŵelengani Yohane 4:34.) Onani kuti Yesu eyelekezela kuchita chifunilo cha Atata ŵake na chakulya. Ndaŵa yanji? Chakulya ni chiweme kuli sewo. Yesu enzeziŵa kuti chinthu chilichonse chakutisenga Yehova kuti tichite ni chiweme kuli sewo. Yehova ofunalini kuti tichite chinthu chingatiletele mavuto. Kansi chifunilo cha Yehova n’chakuti mwewo mubatiziwe? Eye. (Mac. 2:38) Tetyo, mungankhale na chidalilo chakuti kumvwila lamulo yakuti mubatiziwe kukupindulisheni. Keno mwewo mungawaye-wayelini kusangalala na chakulya chiweme ngako, ndaŵa yanji muwaya-waya kubatizika?
20. Kansi tizakambilane chinji mu nkhani ikuza?
20 Kansi muyembekezela chinji? Anyinji angayankhe kuti, “Nine wosakonzeka.” Mfundo ni yakuti kusankha kulipeleka kwa Yehova nobatiziwa ni chinthu chofunika ngako chamungachite. Tetyo, mufunika kuganizila mosamala za chosankha chanu chamene ichi ndipo vamene ivi vufunikila nthawe na khama kuti muyenelele. Koma keno mufuna kuchita chendi vamene ivi, kansi mungachite tyani kuti mukonzekele? Mu nkhani ikuza tizakambilane yankho ya konsho yamene iyi.
NYIMBO N.° 28 Tinkhale pa ushamwali na Yehova
a Ubatizo ni chinthu chofunika ngako kuli wophunzila Baibolo aliyense. Kansi n’chinji chingalimbikise wophunzila kuchita vamene ivi? Ni chikondi. Koma kansi tufunika kukonda chinji na kukonda ŵani? Mu nkhani ino, tifwane mayankho a makonsho amene aŵa ndipo tikambilane za moyo watingayembekezele kunkhala nawo monga Akhilisitu obatizika.
