1. Kansi Yesu epeleka chisanzo chotyani kuli ophunzila ŵake, ndipo ove echita tyani? (Onani chithunzi chapachikuto.)

YESU epitilija kunkhala na maganizo oyenelela pa utumiki wake wonse pano pa chalo ndipo yove ofuna kuti ophunzila ŵake nawo apitilije kunkhala na maganizo aweme pa utumiki wamene uyu. (Yoh. 4:35, 36) Yesu penze na ophunzila ŵake, ove enze akhama pa ntchito yolalikila. (Lk. 10:1, 5-11, 17) Chifukwa cha kumangiwa komasoti kupaiwa kwa Yesu, ophunzila ŵake enze eleka kwakanthawe kunkhala na chifuno chofuna kulalikila. (Yoh. 16:32) Pechiushiwa, Yesu eŵalimbikisa kuika maganizo ŵawo pa kulalikila. Ndipo yove pechiluta kululu, ove eyambasoti kulalikila mwakhama mwakuti adani ŵawo eyamba kudandaula kuti: “Onani! Mwazuja Yerusalemu yonse na chiphunziso chanu chamene ichi.”​—Mac. 5:28.

2. Kansi Yehova edalisa tyani ntchito yolalikila?

² Yesu esogolela Akhilisitu oyambilila penzelalikila, ndipo Yehova eŵayavya. Tetyo, ŵanthu anyinji evomela uthenga wawo. Mwachisanzo, pa Pentekosite wa mu 33 C.E., ŵanthu pafupi-fupi 3.000 ebatiziwa. (Mac. 2:41) Ndipo chiŵelengelo cha ophunzila chipitilija kukula ngako. (Mac. 6:7) Olo venze tetyo, Yesu elosela kuti ŵanthu anyinji azalondele uthenga uweme mu masiku osilijila.​—Yoh. 14:12; Mac. 1:8.

3-4. Ndaŵa yanji ayakine angawone kuti ntchito yolalikila ni yovuta, ndipo tikambilane chinji mu nkhani ino?

³ Tonse tuyeja-yeja kunkhala na maganizo aweme pa nkhani yokhuza utumiki. Mu vyalo viyakine ni vosavuta kuchita vamene ivi. Ndaŵa yanji? Ndaŵa yakuti anyinji onkhala na chidwi chofuna kuphunzila Baibolo mpaka ayakine mwa ŵanthu amene awo oyembekezela mpaka mmozi wa Mboni za Yehova afwike! Koma  m’mbali ziyakine za pachalo, ofalisa owona kuti ntchito yolalikila ni yovuta ngako; ŵanthu opezekalini m’mang’anda mwawo kaŵili-kaŵili, komasoti ŵala opezeka pa ng’anda angawoneshe patontho chidwi chawo chofuna kuphunzila Baibolo.

⁴ Keno mwewo munkhala ku dela kwamene ntchito yolalikila ni yovuta, malangizo ali mu nkhani ino mosakaikila akuyavyeni. Tikambilane vachita ŵanthu ayakine kuti alalikile ŵanthu anyinji pa utumiki wawo. Komasoti tiwone chifukwa chake tingafunike kunkhala na maganizo aweme, olo keno ŵanthu akumvwa uthenga wasu olo yayi.

5. Kansi a Mboni za Yehova anyinji okumana na mavuto otyani?

⁵ A Mboni za Yehova anyinji owona kuti ni kovuta ngako kulalikila ŵanthu m’mang’anda mwawo. Ofalisa ayakine onkhala ku madela kwamene kuli mang’anda a m’mululu komasoti amene ali na chitetezo champhamvu olo ali na mipanda yovaliwa. Mang’anda amene aŵa a m’mululu olo m’minzi mungankhale amalonda amene ololalini kuloŵa ŵanthu paliye chilolezo cha munthu wa pang’anda pamene apo. M’madela ayakine, a Mboni za Yehova angayende mosavuta ku ng’anda na ng’anda koma ofwana tyala ŵanthu atontho pa ng’anda. Palisoti ofalisa ayakine amene olalikila ku malo kwamene kuli ŵanthu atontho. Ofalisa angayende ulwendo utali kuti akawonane na munthu yumo tyala—koma yove payakine osamufwanapo pa ng’anda! Keno tukumana na mavuto monga ni amene aŵa tufunikalini kufoka. Kansi tingachite chinji kuti tipilile vochitika vamene ivi nolalikila ŵanthu anyinji?

6. Kansi ŵanthu olalikila olingana tyani na ŵanthu opaya nsomba?

⁶ Yesu elinganija ntchito yolalikila na munthu okata ntchito yopaya nsomba. (Mk. 1:17) Ayakine amene okata ntchito yopaya nsomba angakate ntchito kwa nsiku yonse osakashako olo nsomba imozi. Koma ove ofokalini; ove ochinja njila yopaila nsomba. Ove ochinja nthawe, malo olo njila yokashila. Molingana na vamene ivi sewo nase tingachinje njila zolalikilila pa utumiki wasu. Lomba tiyeni tikambilane vinthu viyakine vatingayeje-yeje kuchita.

7. Kansi ni chinji chingachitike keno tulalikila pa nthawe zosiyana-siyana?

⁷ Yejani kuŵafwikila ŵanthu pa nthawe yosiyana. Tingalaŵile na ŵanthu anyinji keno tulalikila pa nthawe yakupezeka pa ng’anda. Ni chendi, ŵanthu onse yufwika nthawe yakuti ojokela pa ng’anda! Abale na alongo anyinji olalikila nzuŵa olo nchingulo chifukwa niye pakufwana ŵanthu anyinji. Kuyangijila pamene apo, anecho a pang’anda angankhale omasuka komasoti okonzeka kumvwishila pa nthawe yamene iyi. Payakine mungachite luweme kukatishila ntchito malangizo a nkulu muyakine oitikwa kuti David. Yove enena kuti pavuli polalikila kwa kanthawe mu gawo iyakine, yove pamozi na muyake ojokelasoti kuli ŵala amene aliyeŵafwane pa ulwendo woyamba. Yove enena kuti, “Newo nudabwa na kupaka kwa ŵanthu amene opezeka m’mang’anda tikajokelakosoti.” *

8. Kansi tingaikatishile tyani ntchito lemba ya Mlaliki 11:6 pa utumiki wasu?

⁸ Tufunika kupitilija kuyeja-yeja kufwana ŵanthu m’mang’anda mwawo. Vamene ivi niye vatuphunzilapo pa lemba yamene pafumila mutu wa nkhani yasu. (Ŵelengani Mlaliki 11:6.) David, watatomolako kale, aliyefoke. Pang’anda iyakine, yove enzemufwanapolini munecho wa ng’anda, koma pavuli pakuti wayeja-yeja maulwendo anyinji, nsiku iyakine echizamufwanapo. Munthu wamene uyo enze na chidwi chofuna kukambilana vinthu va m’Baibolo ndipo enena kuti: “Nankhala kuno pafupi-fupi vyaka 8 ndipo  nikaliyekumanapo wa Mboni za Yehova pang’anda pangu.” David enena kuti: “Naziŵa kuti tikafwana ŵanthu m’mang’anda mwawo, ove ofunishisha kumvwishila uthenga watulalikila.”

9. Kansi a Mboni za Yehova ayakine achita tyani kuti alaŵile na ŵanthu amene ni ovuta kuŵafwana m’mang’anda mwawo?

⁹ Yejani malo osiyana-siyana. Pofuna kufwana ŵanthu amene ni ovuta kuŵafwana m’mang’anda mwawo, ofalisa ayakine achinja malo ŵakulalikila. Mwachisanzo, ulaliki wa munsewu komasoti wa tumashelufu yankhala njila iweme yopezela ŵanthu amene onkhala m’mang’anda akulu-akulu amene n’kosaloleka kuchitilako ulaliki wa ng’anda na ng’anda. Vamene ivi vuchitisha a Mboni kuti alaŵile na ŵanthu menso na menso, amene mwa njila iyakine sembe n’vosakwanishika. Komasoti, ofalisa anyinji awona kuti ŵanthu anyinji ofuna kulaŵila olo kulondela mabuku pa malo opezeka ŵanthu anyinji, ku maketi komasoti ku malo akulu-akulu ochitilako malonda. Floiran, wopanamila dela waku Bolivia, enena kuti: “Tuluta ku maketi komasoti ku malo ochitilako malonda pakati pa 1 koloko olo 3 koloko nzuŵa pa nthawe yamene ogulisa onkhalalini otangwanika ngako. Nthawe zinyinji tunkhala na makambilano aweme mpaka tuyambisha maphunzilo a Baibolo.”

10. Kansi ni njila zotyani zamungakatishile ntchito kuti mufwane ŵanthu?

¹⁰ Yejani njila zosiyana-siyana. Yelekezelani kuti mwewo mwayejapo maulwendo anyinji kuti mulaŵile na munthu muyakine menso na menso. Ndipo mwamuyendela maulwendo anyinji, koma mumupezapolini pang’anda. Kansi pali njila iyakine yamungachite kuti mulaŵijane na munthu wamene uyo? Katarína, enena kuti: “Newo nulemba makalata kulembela ŵala ŵanikaliyefwanako  pang’anda pawo, nofotokoza vinthu vaningaŵauje menso na menso.” Kansi tuphunzilapo chinji pa mawu amene aŵa? Yejani kufwana munthu aliyense mu gawo yanu mu njila zosiyana-siyana pamuchita utumiki wanu.

11. Ndaŵa yanji ŵanthu ayakine aliye nawo chidwi uthenga wasu?

¹¹ Ŵanthu ayakine aliye nawo chidwi uthenga wasu. Ove oganizilakolini kuti ofunikila kuziŵa vinthu vokhuza Mulungu olo Baibolo. Ove okhulupililalini mwa Mulungu ndaŵa yakuti owona mavuto anyinji pachalo. Ove aliye nayo chidwi Baibolo ndaŵa yakuti owona kuti asogoleli avipembezo amene onena kuti oikonkheja Baibolo ochita vinthu vinyinji viipa. Ayakine oganiza vokhuza ntchito, banja komasoti mavuto ŵawo ndipo nthawe zonse ove oganizilakolini kuti Baibolo ingaŵayavye. Kansi tingapitilije tyani kunkhala osangalala olo kuti ŵala ŵatulalikila oganizilakolini kuti uthenga wasu ni wofunika?

12. Kansi kukatishila ntchito mawu ali pa Afilipi 2:4, kungatiyavye tyani mu utumiki?

¹² Oneshani kuti mudela nkhaŵa ayakine. Ŵanthu anyinji amene poyamba enzeve chidwi, emvwishila uthenga wasu pechiwona kuti tuŵadela nkhaŵa. (Ŵelengani Afilipi 2:4.) Mwachisanzo, David, watatomolako kale, enena kuti: “Keno munthu muyakine wanena kuti niliye chidwi, tuyamba taika ku mbali Baibolo olo chofalisa, nonena kuti: ‘Nufuna niziŵe kuti ndaŵa yanji wewo ukumvwa teti.’” Ŵanthu akawona tetyo angaziŵe kuti tuŵadela nkhaŵa. Ove angaluŵe vatunena, koma tukaikilalini kuti nthawe iyakine azakumbukile mwetikhuziliwa. Olo kuti munthu muyakine angatilolelini kuti timuuje uthenga uweme, tingawoneshe mwatuwonekela pamenso pasu kuti tumukonda.

13. Kansi tingachite chinji kuti uthenga wasu unkhale wochitisha chidwi ngako kuli munecho wa ng’anda aliyense?

¹³ Tuwonesha chidwi kuli ŵanthu keno tuchinja ulaliki wasu kuti unkhale wokata ntima ku munecho wa ng’anda. Mwachisanzo, kansi tuwona chizindikilo chamene chuwonesha kuti pang’anda pali ŵana? Makolo payakine angankhale na chidwi na malangizo a m’Baibolo okhuza mwangalelele ŵana ŵawo olo malangizo ŵake othandiza okhuza mwangankhalile na moyo wosangalala m’banja. Kansi tuwona kuti mu miliyango yawo munkhala mokhoma na maloko anyinji? Tingasankhe kukambilana nawo nkhani zokhuza chiwawa komasoti wowa wali nawo ŵanthu anyinji chifukwa cha vamene ivi. Munecho wa ng’anda angakondwele ngako kuziŵa kuti vamene ivi vizasile. Nthawe iliyonse yamwafwana ŵanthu amene ali na chidwi chofuna kumvwishila uthenga, yeja-yejani kuŵayavya kuti amvwishishe mwangayavyiliwe na mfundo za m’Baibolo. Katarína, watatomolako  kale, enena kuti, “Newo nukumbukila mwamene choonadi mwechisinthila moyo wangu kuti unkhale uweme.” Monga vokonkhapo vake, Katarína ovikhulupilila vakulaŵila, komasoti ŵanthu ŵakulaŵila nawo owona vamene ivi.

14. Mokatijana na lemba ya Miyambo 27:17, kansi ŵanthu apelekejana mu utumiki angayavyane tyani muyake na muyake?

¹⁴ Pindulani na thandizo ya ayakine. Mu vyaka 100 voyambilila, Paulo ephunzisako Timoteyo njila zenzekatishila ntchito yove polalikila komasoti pophunzisa, ndipo yove elimbikisa Timoteyo kukatishika ntchito njila zamene izo kuti ayavyeko ayakine. (1 Akor. 4:17) Molingana na timoteyo, sewo nase tingapidule na ŵanthu oziŵa vinyinji a mumpingo mwasu. (Ŵelengani Miyambo 27:17.) Onani chisanzo cha m’bale muyakine oitiwa kuti Shawn. Kwakanthawe yove enkhala mpainiya ku dela yamene ŵanthu anyinji enzesangalala na chipembezo chawo. Kansi yove epitilija tyani kunkhala wosangalala? Yove enena kuti: “Nthawe zonse vikakwanishika, nenzekata ntchito yolalikila pamozi na muyangu. Sewo tenzekatishila ntchito mpata wofuma pang’anda iyakine kuti tilute pang’anda iyakine kuti tiyavyane muyake na muyake kuyangijila luso yasu pophunzisa. Mwachisanzo, tenzekambilana vinthu vanena munecho wa ng’anda komasoti mwatamuyankhila.”

15. Ndaŵa yanji pemphelo ni yofunika ngako pa utumiki wasu?

¹⁵ Pemphelani kwa Yehova kuti akuyavyeni. Sengani Yehova kuti akuyavyeni nthawe iliyonse kuti mulalikile. Tufunikila mzimu utuŵa kuti utiyavye pa chinthu chilichonse chatuchita. (Sal. 127:1; Lk. 11:13) Keno musenga Yehova kuti akuyavyeni kupitila mu pemphelo, muujeni mosapita mmbali. Mwachisanzo, musengeni kuti akusogoleleni kuli aliyense wamene angankhale na maganizo aweme wamene angakonde kumvwishila. Pavuli pake mukochita vinthu mokatijana na pemphelo yanu mwa kulalikila kuli ŵanthu onse ŵamungakumane nawo.

16. Ndaŵa yanji phunzilo yapaweka ingatiyavye pochita utumiki wasu?

¹⁶ Nkhalani na nthawe yochita phunzilo yapamweka. Mawu a Mulungu onena kuti: ‘Ziŵani chifunilo cha Mulungu, chiweme, chovomelejeka na changwilo.’ (Aro. 12:2) Tikophunzila niye patumuziŵa luweme ngako Mulungu, komasoti tikolaŵila ngako na ŵanthu za yove, niye patuwona kuti tukhulupilila ngako vala vatulaŵila. Katarína, wala watatomolako kale, enena kuti: “Pepapita kanthawe katontho, nichizaziŵa kuti nufunika kutang’isha chikhulupililo changu pa nkhani ya viphunziso voyambilila va m’Baibolo. Lomba penichizaphunzila mosamala ngako nichizafwana umboni wakuti kuli Nyamalenga, kuti Baibolo ni Mawu a Mulungu, komasoti kuti Mulungu ali na gulu yake yamene yumupanamila masiku ŵano.” Katarína enenasoti kuti kuphunzila payeka kwitang’isha chikhulupililo chake ndipo kwiyangijila chisangalalo chake mu utumiki.

17. Ndaŵa yanji Yesu epitilija kunkhala na maganizo aweme pa utumiki wake?

¹⁷ Yesu epitilija kunkhala na maganizo aweme ndipo epitilija kulalikila olo kuti ŵanthu ayakine enzefunalini kumvwa uthenga wake. Ndaŵa yanji? Yove enzeziŵa kuti ŵanthu enzefunikila kuziŵa choonadi komasoti enzefuna kulalikila namba ikulu ya ŵanthu amene enze na mwayi wovomela uthenga wa Ufumu. Yove enzeziŵasoti kuti ayakine ŵala amene poyamba enzefunalini kumvwa uthenga azayambe kumvwishila. Tiyeni tiganizile vichitika m’banja mwake. Nkati mwa utumiki wonse wa Yesu wa vyaka vitatu na hafu, paliye mkwake wamene enkhalapo wophunzila wake. (Yoh. 7:5) Komalomba, pavuli pakuti yove waushiwa, ove echizankhala Akhilisitu.—Mac. 1:14.

18. Ndaŵa yanji tupitilija kulalikila?

¹⁸ Tuziŵalini kuti niŵani angazankhala atumiki  a Yehova. Ŵanthu ayakine otola nthawe itali kusiyana na ayakine kuti aphunzile choonadi. Olo ŵala amene payakine ofunalini kutimvwishila oyamba kuwona nkhalidwe yasu iweme komasoti maganizo ŵasu aweme, ndipo posilijila pake angayambe ‘kutamanda Mulungu.’​—1 Pet. 2:12.

19. Kansi lemba ya 1 Akorinto 3:6, 7, yutiphunzisa chinji pa nkhani ya utumiki wasu?

¹⁹ Olo kuti tulalikila nophunzisa tufunika kukumbukila kuti Mulungu niye ochitisha kuti ntchito yasu ikotiyendela luweme. (Ŵelengani 1 Akorinto 3:6, 7.) Getahun, m’bale wamene otumikila ku Ethiopia, enena kuti: “Kwa vyaka vopitilila 20 nenzeneka wa Mboni za Yehova mu dela yamene yenzelalikiliwalini kaŵili-kaŵili. Komalomba kuli ofalisa okwanila 14, ndipo 13 ebatiziwa, kupamikijapo nkazi wangu na ŵana ŵasu atatu. Tili na avaledji ya ŵanthu 32 ofwika pamisonkhano.” Getahun ni wokondwela chifukwa chopitilija kulalikila pa nthawe yenzeyembekezela moleza ntima kuti Yehova ayavye ŵanthu kuti ayambe kumulambila!​—Yoh. 6:44.

20. Kansi tili monga ni gulu yupulumusha ŵanthu mu njila yotyani?

²⁰ Yehova owona moyo wa munthu aliyense kunkhala wa ntengo wapatali. Yove watipasa mwayi wokata ntchito pamozi na Mwana wake powunganika ŵanthu ofumila m’mitundu yosiyana-siyana mapeto a ichi chalo akaliye fwika. (Hag. 2:7) Ntchito yasu yolalikila ingalinganijiwe na ntchito yopulumusha ŵanthu. Ndipo tili monga ni gulu ya ŵanthu yamene yatumijiwa kuti ikapulumushe ŵanthu amene adilikiliwa na mgodi. Olo kuti ni atontho okata ntchito m’migodi amene angafwaniwe amoyo, ntchito yonse yachita ŵala ŵanthu aŵapulumusha ni yofunika ngako. Vulinganasoti na ntchito yatuchita pa utumiki wasu. Tuziŵalini kuti ni ŵanthu angani akuti azapulumushiwe mu dongosolo ya Satana. Koma Yehova angakatishile ntchito aliyense wa sewo kuti aŵayavye. Andreas, wamene onkhala ku Bolivia, enena kuti, “Nuziŵa kuti munthu aliyense wamene waphunzila chendi cha m’Baibolo nobatizika niye kuti ŵanthu anyinji ekata ntchito mokatijana kuti amuyavye.” Tetyo tiyeni tipitilije kunkhala na maganizo aweme amene aŵa pochita utumiki wasu. Tikachita tetyo, Yehova atidalise, ndipo utumiki wasu unkhale chimake ngacho-ngacho cha chisangalalo.