1-2. Kansi a Mboni za Yehova anyinji okumana na mavuto otyani?

NTUMWI Paulo elimbikisa Timoteyo pamozi na Akhilisitu ayakine kuchita vonse vangakwanishe potumikila Mulungu. (2 Tim. 4:5) Tetyo, tukonkheja malangizo a Paulo ndipo tuchita vonse vatingakwanishe potumikila Yehova. Koma nthawe ziyakine vamene ivi ni vovuta. Kuli abale ŵasu anyinji pamozi na alongo, ofunika kutang’a ntima kuti akate ntchito yolalikila. (2 Tim. 4:2) Mwachisanzo, ganizilani za abale ŵasu amene onkhala mu vyalo vamene mbali iyakine olo ntchito yasu yonse ni yoleshewa. Ove olalikila olo kuti oziŵa kuti angaikiwe mu djeli!

² Ŵanthu a Yehova okumana na mavuto anyinji amene angaŵafokeshe. Mwachisanzo, anyinji ofunika kukata ntchito kwa ma awazi anyinji kuti afwane tyala vofunika va banja yawo. Ove ofuna kuchita vinyinji mu utumiki, koma onkhala na mphamvu zitontho kumapeto kwa sondo. Ayakine angakwanishelini kuchita vinyinji chifukwa cha matenda asapola olo ukalamba; olo chifukwa chakuti okwanishalini kufuma pang’anda. Ayakine nthawe zonse oliwona kuti ni osafunika kwa Yehova. Mulongo muyakine wamene onkhala ku Middle East zina yake Mary, * enena kuti: “Nufunika kuchita khama ngako kuti nilimbane na maganizo ŵangu aipa amene onichitisha kunkhala wofoka. Pavuli pake nuliwona kuti nine watyala-tyala chifukwa vunitolela nthawe na mphamvu kuti nisiye utumiki wangu.”

3. Kansi tikambilane chinji mu nkhani ino?

³ Keno vinthu vili tyani pa moyo wasu, Yehova angatipase mphamvu kuti tikwanishe kupilila mavuto ŵasu nopitilija kumutumikila mulimonse mwatingakwanishile. Tikaliyekambilana mwangatiyavyile Yehova, tiyeni tiwone mwechiyavyila Paulo na Timoteyo kuti akwanilishe utumiki wawo olo kuti enzekumana na mavuto.

4. Kansi Paulo ekumana na mavuto otyani?

⁴ Paulo ekumana na mavuto anyinji. Yove enzefunikila ngako thandizo ya Yehova pechiniyatiwa na adani ŵake, kumuika mu djeli komasoti mpaka kuyeja-yeja kuti amupaye. (2 Akor. 11:23-25) Paulo enzeve nsoni zofotokoza kuti nthawe ziyakine yove enzefunika kulimbikila kuti alimbane na maganizo ofokesha. (Aro. 7:18, 19, 24) Komasoti yove epilila “munga mmuŵili” mwa ntundu uyakine, wamene enzefunishisha kuti Mulungu amuchosele.​—2 Akor. 12:7, 8.

5. Kansi Paulo ekwanisha kuchita chinji olo kuti enzekumana na mavuto?

⁵ Yehova emupasa mphamvu Paulo kuti apitilije utumiki wake, olo kuti enzekumana na mavuto anyinji. Ganizilani vechichita Paulo. Mwachisanzo, pa nthawe yenze pa djeli yosafuma pang’anda​—ku Roma, yove—​eteteza mwakhama uthenga uweme pamenso pa asogoleli Achiyuda ndipo payakine eutetezasoti pamenso pa akulu-akulu a boma. (Mac. 28:17; Afil. 4:21,22) Yove elalikilasoti kuli anyinji a pang’anda Yolondela Mfumu, komasoti kwa onse amene enzewela kuzamuwona. (Mac. 28:30, 31; Afil. 1:13) Pa nthawe imo na imo yamene iyo Paulo elemba makalata oujiliwa, Mulungu ekatishila ntchito Paulo kuti alembe makalata amene eyavya Akhilisitu achendi masiku akuvuli ndipo oyavyasoti mpaka masiku ŵano. Chisanzo cha Paulo chitang’isha mpingo ku Roma, vamene vichitisha abale ŵake kuwonesha “kutang’a ntima koyangijilika polaŵila mawu a Mulungu mosachita wowa.” (Afil. 1:14) Olo kuti nthawe ziyakine Paulo enzekwanishalini kuchita vinyinji, yove ekatishila ntchito luweme nthawe yake, ndipo vamene ivi viyavya “kupitisha pasogolo uthenga uweme m’malo moukangisha.”—Afil. 1:12.

6. Mokatijana na lemba ya 2 Akorinto 12:9, 10, kansi ni chinji chiyavya Paulo kuti akwanilishe utumiki wake?

⁶ Paulo emvwisha kuti vonse venzechita yove potumikila Yehova enzevichita na mphamvu za Mulungu, osati zake yayi. Yove enena kuti mphamvu za Mulungu zenze ‘zokwanila yove penze wofoka.’ (Ŵelengani 2 Akorinto 12:9, 10.) Kupitila mu mzimu Wake utuŵa, Yehova emupasa mphamvu Paulo kuti akwanilishe utumiki wake—olo kuti enzetamanishiwa, kuikiwa mu djeli, komasoti mavuto ayakine ŵenzekumana nawo.

7. Kansi ni mavuto otyani ŵenzefunikila kupilila Timoteyo kuti akwanilishe utumiki wake?

⁷ Timoteyo, muyake wachilumbwana wa  Paulo, nayesoti enzefunika kukhulupilila pa mphamvu za Mulungu kuti akwanilishe utumiki wake. Timoteyo enzepelekeja Paulo pa maulwendo atali-atali aumishonale. Komasoti, Paulo emutumijasoti pa maulwendo ayakine kuti akanyungile mipingo komasoti kuilimbikisa. (1 Akor. 4:17) Timoteyo payakine enzeliwona kuti ni wosakwanila. Payakine niye chifukwa chake Paulo emuuja kuti: “Osalola kuti munthu aliyense akudelele powona kuti niwe ntontho.” (1 Tim. 4:12) Komasoti, pa nthawe yamene iyi, Timoteyo enze na munga wake-wake mmuŵili—“kulwala-lwala kwake.” (1 Tim. 5:23) Koma Timoteyo enzeziŵa kuti mzimu utuŵa wamphamvu wa Mulungu ungamupase mphamvu zenzefunikila kuti akwanishe kulalikila uthenga uweme komasoti kutumikila abale ŵake.—2 Tim. 1:7.

8. Kansi Yehova oŵatang’isha tyani ŵanthu ŵake masiku ŵano?

⁸ Masiku ŵano, Yehova opasa ŵanthu ŵake “mphamvu zupambana zachibadwa” kuti apitilije kumutumikila mokhulupilika. (2 Akor. 4:7) Tiyeni tikambilane vinthu vokwanila 4 vatipasa Yehova kuti atitang’ishe komasoti kutiyavya kupitilija kunkhala okhulupilika kuli yove, vamene ni: pemphelo, Baibolo, mgwilizano wasu Wachikhilisitu komasoti utumiki wasu.

9. Kansi pemphelo ingatiyavye tyani?

⁹ Kutang’ishiwa na pemphelo. Mokatijana na lemba ya Aefeso 6:18, Paulo otilimbikisa kupemphela kwa Mulungu “pa chochitika chilichonse.” Mulungu ayankhe mapemphelo ŵasu potiyavya. Jonnie wamene onkhala kut Bolivia, eyavyiwa pechikumana na mayeselo mokonkhejana-konkhejana. Mwanakazi wake pamozi na makolo ŵake onse elwala pa nthawe imo na imo. Venze vovuta ngako kuli Jonnie kuti achite vonse venzefunikila kuti asamalile onse atatu. Amayi ŵake emwalila, ndipo petola nthawe itali kuti mwanakazi wake na Atata ŵake apole matenda ŵawo. Ponena za nthawe yovuta yamene iyi, Jonnie enena kuti, “Newo penenzenkhala na nkhaŵa ngako, nthawe zonse nenzeyavyika nikopemphela kwa Yehova ndipo nenzemufotokozela mwenenzemvwila.” Yehova emupasa mphamvu Jonnie zenzefunikila kuti apilile. M’bale muyakine waku Bolivia wamene ni nkulu zina yake Ronald, echimvwa kuti amayi ŵake ali na matenda a kansa. Papita mwezi umozi ove emwalila. Kansi ni chinji chimuyavya yove pa nthawe yamene iyi yovuta? Yove enena kuti: “Kupemphela kwa Yehova kunichitisha kuti nikomuuja vonse vili kuntima kwangu. Newo nuziŵa kuti yove onimvwishila luweme ngako kupambana munthu aliyense, komasoti kupambana mwanumvwila newo.” Nthawe ziyakine, tingolimvwa kuti tingakwanishelini kupilila mavuto ŵasu ndipo payakine tingoziŵalini vatingapemphelele. Koma Yehova otisenga kuti tikopemphela kuli yove olo vingankhale vovuta kumufotokozela mwatumvwila​—Aro. 8:26, 27.

10. Monga ni mwavililembelewe pa lemba ya Aheberi 4:12, ndaŵa yanji kuŵelenga Baibolo noganizila ngako vinthu vataŵelenga ni kofunika ngako?

¹⁰ Kutang’ishiwa kupitila m’Baibolo. Paulo eŵelenga Malemba kuti afwane mphamvu na chitonthozo, ndipo sewo nase tufunika kuchita chimozi-mozi. (Aro. 15:4) Tikoŵelenga Mawu a Mulungu komasoti kuŵaganizila ngako, Yehova angakatishile ntchito mzimu wake kuti utiyavye kumvwisha luweme mwakutiyavyila Malemba pa moyo wasu. (Ŵelengani Aheberi 4:12.) Ronald, wamene tamutomolako kale, enena kuti: “Newo nutembeja kuti nichita vilivonse vaningakwanishe kuti ninkhale na pulogilamu yoŵelenga Baibolo nchingulo mulimonse. Nuganizila ngako za minkhalidwe ya Yehova komasoti mwechisamalilila ŵanthu ŵake. Vamene ivi vuniyavya kufwanasoti mphamvu.”

11. Kansi Baibolo imutang’isha tyani mulongo wamene enzevutika maganizo?

 ¹¹ Tingakulishe maganizo aweme pa vochita vasu poŵelenga Mawu a Mulungu. Onani mweiyavyila Baibolo mwanakazi wamasiye wamene enze na chisoni. Nkulu muyakine emuuja kuti yove angaphunzile vinthu vinyinji mwa kuŵelenga buku ya Yobu. Yove pechiyamba kuŵelenga, poyamba emuzuzula Yobu chifukwa cha maganizo ŵake ophoniyeka. M’maganizo mwake, yove emuchenjeja Yobu kuti: “Yobu! Osangoganizila tyala za mavuto ŵako!” Koma pavuli pake yove eziŵa kuti maganizo ŵake enze olingana na maganizo a Yobu. Vamene ivi vimuyavya kusintha mwenzewonela vinthu komasoti vimutang’isha kuti apilile ululu wa imfwa ya alume ŵake.

12. Kansi Yehova otitang’isha tyani kupitila muli ayasu ŵatulambila nawo pamozi?

¹² Kutang’ishiwa kupitila mu mgwilizano Wachikhilisitu. Njila iyakine yakutang’ishila Akhilisitu Yehova ni kupitila muli ayasu ŵatulambila nawo pamozi. Paulo elemba kuti enzefunishisha ‘kutang’ishana’ na abale ŵake komasoti alongo auzimu. (Aro. 1:11, 12) Mary, wamene tamutomolako kale poyamba, okondwela ngako kunkhala na abale ŵake komasoti alongo. Yove enena kuti: “Yehova ekatishila ntchito abale na alongo amene enzeziŵakolini olo patontho za mavuto ŵangu. Ove elaŵila chinthu chiyakine chamene chinilimbikisa ngako komasoti enitumijila kapepala kamene kenze na mawu olimbikisa, ndipo vonse vamene ivo venze ngavo-ngavo venenzefunikila newo. Ndipo akulu nthawe zonse onichitisha kulimvwa kuti nine wofunika ngako mumpigo.”

13. Kansi tingatang’ishane tyani muyake na muyake pa misonkhano yampingo?

¹³ Amozi mwa malo aweme ngako otang’ishilana muyake na muyake ni kumisonkhano yampingo. Mukaluta kumisonkhano mungalimbikise ayakine poŵauja kuti muŵakonda ngako komasoti kuti muwatembeja pa vinthu vonse vakuchita. Mwachisanzo, nsonkhano uyakine ukaliyeyamba, nkulu muyakine zina yake Peter, euja mulongo muyakine wamene mwanalume wake ni Mbonilini kuti: “Mwewo mungaziŵekolini mwamutilimbikisila chifukwa chokuwonani mwewo pano. Nthawe zonse mwewo munkhala na ŵana ŵanu okonzeka okwana 6 amene onkhala okonzekela luweme ndemanga.” M’menso mwake mwizula misozi yotembeja ndipo pavuli pake eyankha kuti: “Kulaŵila chendi, newo nenzefunikila chendi kumvwa mawu amene aŵa lelo.”

14. Kansi ntchito yolalikila yutiyavya tyani?

¹⁴ Kutang’ishiwa kupitila mu utumiki. Tikolalikila kuli ŵanthu ayakine, tukumvwa luweme, viliye kanthu kuti ŵanthu amvwe olo yayi. (Miy. 11:25) Mulongo muyakine zina yake Stacy, ewona kuti kulalikila kulimbikisa ngako. Wachibale wake pechichosewa, yove ekhumudwa ngako ndipo enzelikonsha kuti: ‘Kansi sembe nichita vinthu viyakine kuti niyavye wachibale wangu?’ Vamene ivi vinkhala vovuta ngako kuli Stacy kuti aleke kuganizila za vuto yamene iyi. Kansi ni chinji chimuyavya kupilila vuto yamene iyi? Utumiki! Pechiyamba ntchito yolalikila, yove eyamba kuganizila ngako za ŵanthu a m’gawo yake amene enzefunikila thandizo yake. Yove enena kuti: “Pa nthawe yamene iyi, Yehova enipasa wophunzila Baibolo wamene mokulumija eyamba kuvikatishila ntchito vinthu venzephunzila. Vamene ivi venilimbikisa ngako. Chinthu chikulu ngako chiniyavya ni ntchito yolalikila.”

15. Kansi mwewo mwaphunzilapo chinji pa pa mawu ŵechifotokoza Mary?

¹⁵ Chifukwa cha mwavilili vinthu, ayakine angaganize kuti angakwanishelini kuchita vinyinji mu utumiki. Keno mwewo namwe mukumvwa tetyo, kumbukilani kuti Yehova okondwela ngako keno muchita vonse vamungakwanishe. Ganizilanisoti chisanzo cha Mary. Yove pechifulukila ku dela ya chilaŵilo chiyakine,  enzelimvwa kuti ni wosafunika. Yove enena kuti: “Kwa kanthawe, nenzekungokwanisha tyala kupeleka ndemanga zachidule olo kuŵelenga vesi ya m’Baibolo olo kungoyaŵila kapepala mu utumiki.” Vamene ivi vimuchitisha kulimvwa kuti ni watyala-tyala poyelekezela na ayakine amene ochiziŵa luweme chilaŵilo chamene icho. Olo n’tetyo, yove echinja maganizo ŵake. Yove eyamba kumvwisha kuti Yehova angamukatishile ntchito olo kuti enze na maluso atontho. Yove enena kuti, “Vayunena Baibolo ni vosavuta ndipo vukwanisha kusintha miyoyo ya ŵanthu.”

16. Kansi ni chinji chingayavye ŵala amene okwanishalini kufuma pang’anda koma ofuna kuchita vinyinji?

¹⁶ Yehova oziŵa kuti ayakine a sewo tufuna kulalikila koma tingakwanishelini kufuma pang’anda. Tetyo, yove angatiyavye kuti tilalikile kuli ŵala owela kuzatiwona, olo kuli madokota komasoti manesi. Keno tingayelekezele ntchito yasu yatuchita palipano na vetenzechita kuvuli, tingakhumudwe. Koma keno tingamvwishe mwakutiyavyila Yehova palipano, tinkhale na mphamvu zatufunikila kuti tipilile mayeselo aliwonse na chisangalalo.

17. Mokatijana na lemba ya Mlaliki 11:6, ndaŵa yanji tufunika kupitilija kuchita utumiki wasu olo kuti tuwonalini vokonkhapo vake?

¹⁷ Tuziŵalini kuti ni mbewu yotyani ya choonadi yatukomola yamene ingazike miju noyamba kukula. (Ŵelengani Mlaliki 11:6.) Mwachisanzo, mulongo muyakine wa vyaka 80 zina yake Barbara, olalikila nthawe zonse pafoni komasoti polemba makalata. Imozi mwa makalata ŵake, yove eikamo Nsanja ya Olonda ya 1 March 2014, yamene yenze na mutu wakuti “Kodi Ndi Zinthu Ziti Zimene Mulungu Wakuchitirani?” Mosaziŵa, yove etumija kalata yamene iyo kuli banja iyakine yamene yenzeileka kutumikila Yehova. Ove eŵelenga magazini yamene iyo moweleja-weleja. Mwanalume echimvwa monga Yehova enzelaŵila naye mwasitiliti. Banja yamene iyi iyambasoti kuluta kumisonkhano ndipo pamapeto pake enkhalasoti a Mboni otang’a—pavuli pa vyaka vopitilila 27. Barbara elimbikisiwa ngako ndipo etang’ishiwa kuwona vokonkhapo viweme va kalata yamene iyo yechilemba!

18. Kansi tufunika kuchita chinji kuti Mulungu atitang’ishe?

¹⁸ Yehova otipasa vinthu vinyinji kuti atitang’ishe—monga pemphelo, Baibolo, abale ŵasu na alongo, komasoti ntchito yolalikila. Tikokatishila ntchito vinthu vamene ivi, tumuwonesha kuti tukhulupilila kuti yove angatiyavye komasoti kuti ofunishisha kuchita tetyo. Niye chifukwa chake, tufunika kudalila Atata ŵasu ŵakululu nthawe zonse, wamene okondwela kuwonesha “mphamvu zake kuli ŵanthu amene ntima wawo wonse uli pali yove.”—2 Mbiri 16:9.