NKHANI YOPHUNZILA N.° 20
NYIMBO N.° 67 “Lalikila mawu”
Pitilijani kukata ntchito yolalikila chifukwa cha chikondi!
“Poyamba, uthenga uweme ufunikila ulalikiliwe kuli ŵanthu amitundu yonse.”—MKO. 13:10.
CHOLINGA CHANKHANI
Chikondi chutiyavya kuti tikokata ntchito yolalikila mwakhama komasoti na ntima wonse.
1. Kansi tephunzila chinji pa nsonkhano wapachaka wa 2023?
PA NSONKHANO wapachaka wa 2023, sewo telondela malangizo omvwika luweme a okhuza vinthu viyakine vetenzekhulupilila, komasoti telondela vilengezo viyakine vochitisha chidwi vokhuza utumiki wasu. Mwachisanzo, tephunzila kuti ŵanthu ayakine azankhale na mwayi wotumikila Yehova pamozi na ŵanthu ŵake olo pavuli pakuti Babulo nkulu wawonongewa. Tephunzilasoti kuti kuyambila mwezi wa Novemba 2023, ofalisa akofunikalini soti kupeleka malipoti onena za vinthu vonse vachita muutumiki. Kansi kuchinja kwamene uku kutanthauza kuti utumiki wasu niwosafunika ngako palipano kupambana poyamba? Kutali-tali!
2. Ndaŵa yanji utumiki wasu unkhala wofunika ngako nsiku iliyonse ikasila? (Maliko 13:10)
2 Nsiku iliyonse ikasila, ntchito yolalikila yunkhala yofunika ngako kupambana kale yonse. Ndaŵa yanji? Chifukwa chakuti nthawe yakuti tikate ntchito yolalikila yusila. Ganizilani ulosi wa Yesu wokhuza ntchito yolalikila m’masiku ŵano osilijila. (Ŵelengani Maliko 13:10.) M’buku ya Mateyo, Yesu enena kuti uthenga uweme ufunika ulalikiliwe poyamba pachalo chonse kwamene kuli ŵanthu “mapeto” akaliyefwika. (Mat. 24:14) Mawu amene aŵa onena za kuwonongewa kwa chalo chiipa cha Satana. Yehova eika “nsiku na awa” kuti azachite vinthu vamene ivi kwalombapano. (Mat. 24:36; 25:13; Mach. 1:7) Nsiku iliyonse ikasila, sewo tuvwendela pafupi ngako na nsiku yamene iyo. (Alo. 13:11) Sewo tipitilije kulalikila mpaka mapeto azafwike.
3. Kansi n’chinji chutilimbikisa kuti tikolalikila?
3 Pali konsho iyakine yofunika ngako yamene aliyense wa sewo ofunika kuiganizila, konsho yake niyakuti: Ndaŵa yanji tulalikila uthenga uweme? Yankho yachidule niyakuti chikondi niye chamene chutichitisha kuti tikolalikila. Vinthu vatuchita pokata ntchito yolalikila vuwonesha chikondi chasu—vuwonesha kuti tukonda uthenga uweme, tukonda ŵanthu, ndipo kupambana vonse vuwonesha kuti tukonda ngako Yehova komasoti zina yake. Tiyeni tikambilane luweme za vinthu vamene ivi chilichonse pacheka-pacheka.
TULALIKILA CHIFUKWA CHAKUTI TUKONDA UTHENGA UWEME
4. Kansi sewo tuchita chinji tikalondela uthenga uweme?
4 Ganizilani mwamumvwila muntima mwanu pakachitika chinthu chiyakine chiweme ngako—vingachitike kuti wachibale wanu evyala mwana olo munthu muyakine ekuyavyani kufwana ntchito yemwenzefunikila. N’vosakaikisha kuti mwewo mungankhale wofunishisha kuujako achibale komasoti azishamwali ŵanu za uthenga uweme wamene uyo. Kansi vinthu volingana na vamene ivi vekuchitikilani pa nthawe yemwichimvwa uthenga uweme ngako kupambana uthenga uliwonse—wamene ni uthenga uweme wonena za Ufumu wa Mulungu?
5. Kansi mwechimvwa tyani panthawe yoyamba yemwichimvwa za chonadi cha m’Mawu a Mulungu? (Onanisoti chithunzi.)
5 Ganizilani mwemumvwila panthawe yemwichimvwa za chonadi cha m’Mawu a Mulungu pa nthawe yoyamba. Panthawe yamene iyo mwewo mweziŵa kuti Atata ŵanu akululu okukondani, mweziŵasoti kuti ove ofuna kuti munkhale m’banja ya atumiki ŵake, mweziŵa kuti yove olonjeza kuti azasilije mavuto onse, kuti okondewa ŵanu amene emwalila azankhalesoti na moyo m’chalo chanyowani—komasoti vinthu viyakine vinyinji. (Mko. 10:29, 30; Yoh. 5:28, 29; Alo. 8:38, 39; Chiv. 21:3, 4) Vinthu vemwiphunzila vekukhuzani ngako muntima mwanu. (Luk. 24:32) Mwewo mweyamba kukonda vinthu vemwenzephunzila ndipo mwenzefuna kuujako ayanu za vinthu vamene ivo!—Yelekezelani na Yeremiya 20:9.
Panthawe yetichimvwa za chonadi cha m’Baibolo, sewo tesangalala ngako ndipo tenzefuna kuujako aliyense za vinthu vamene ivo! (Onani ndime 5.)
6. Kansi muphunzila chinji pa vechitikila Ernest pamozi na Rose?
6 Ganizilani za chochitika chiyakine. Mkwasu muyakine zina yake Ernest b enze na vyaka 10 atata ŵake pechimwalila. Ernest enena kuti: “Pa nthawe yamene iyo, newo nenzelikonsha kuti: ‘Kansi atata aluta kululu? Kapena moyo wawo wasilila pamene apa?’ Newo nenzekumbwila ayangu amene atata ŵawo enze akali moyo.” Ernest enzeluta kumanda nthawe zonse kuyagwada pamanda ŵa atata ŵake nopemphela kwa Mulungu kuti: “Pulizi Mulungu, niyavyeni kuti niziŵe kuli atata ŵangu.” Papita vyaka 17 kufumila pechimwalila atata ŵake, Ernest esengewa kuti akophunzila Baibolo, ndipo yove evomela. Yove edabwa ngako pechiziŵa kuti ŵanthu akufwa oziŵalini chithu chilichonse molingana na munthu wamene ali ntulo, komasoti kuti Baibolo yulonjeza kuti ŵanthu akufwa azauke. (Mlal. 9:5, 10; Mach. 24:15) Panthawe yamene iyi, yove efwana mayankho amakonsho amene ŵenzesakila kwa vyaka vinyinji! Ernest echita chidwi ngako na chonadi cha m’Baibolo chamene chenzephunzila. Mwanakazi wake Rose, eyamba kupezekapo paphunzilo, ndipo eyamba kukonda uthenga wa Ufumu. Pofwika mu 1978 ove ebatizika. Ove enze ofunishisha kuujako achibale ŵawo azishamwali komasoti ŵanthu ayakine za vinthu vantengo wapatali venzephunzila. Monga vokonkhapo vake, Ernest pamozi na Rose eyavya ŵanthu opitilila 70 kuti apite pasogolo nobatizika.
7. Kansi n’chinji chuchitika kukonda choonadi kukazika miju m’mitima yasu? (Luka 6:45)
7 N’vowonekelatu kuti chonadi cha m’Baibolo chikazika miju m’mitima yasu, tingakwanishelini kunkhala chelele. (Ŵelengani Luka 6:45.) Sewo tuyamba kulimvwa monga ni ophunzila a Yesu munthawe ya Akhilisitu oyambilila amene enena kuti: “Sewo tingalekelini kulaŵila za vinthu vamene vetiwona komasoti kuvimvwa.” (Mach. 4:20) Sewo tuchikonda ngako choonadi, ndipo tufuna kuujako ŵanthu anyinji mwatingakwanishile.
TULALIKILA CHIFUKWA CHAKUTI TUKONDA ŴANTHU
8. Ndaŵa yanji tufuna kuujako ŵanthu ayakine za Uthenga uweme? (Onani bokosi yakuti “ Kondani ŵanthu—Nopanga ophunzila.”) (Onanisoti chinthunzi.)
8 Molingana na Yehova pamozi na Mwana wake, sewo tukonda ŵanthu. (Miy. 8:31; Yoh. 3:16) Sewo tuŵamvwila chifundo ngako ŵanthu amene “Mulungu omuziŵa lini” komasoti amene “aliye chiyembekezo.” (Aife. 2:12) Chifukwa cha mavuto ŵakukumana nawo ove olimvwa monga ali muchisime chonoka—koma sewo tili na nthambo yamene ingaŵafumye kunja: Nthambo yamene iyi ni uthenga uweme wonena za Ufumu wa Mulungu. Chikondi chatili nacho kuli ŵanthu amene aŵa, chutichitisha kuchita vonse vatingakwanishe kuti tiŵauje uthenga uweme. Uthenga wapadela wamene uyo ungazuje mitima yawo na chiyembekezo, kuŵayavya kunkhala na moyo watanthauzo palipano, komasoti kuŵapasa chiyembekezo chiweme ngako chakusogolo kuti azafwane “moyo ngawo-ngawo”—wamene ni moyo wosasila—m’chalo chanyowani cha Mulungu.—1 Tim. 6:19.
Chikondi komasoti chifundo chatili nacho kuli ŵanthu, vutiyavya kuchita vonse vatingakwanishe kuti tiŵauje uthenga uweme (Onani ndime 8.)
9. Kansi tuŵachenjeja chinji ŵanthu ponena za vinthu vakusogolo, ndipo ndaŵa yanji? (Ezekieli 33:7, 8)
9 Komasoti kukonda ŵanthu kutichitisha kuti tikoŵachenjeja kuti mapeto achino chalo chiipa avwendela. (Ŵelengani Ezekieli 33:7, 8.) Sewo tumvwila chifundo ŵanthu onse, kupamikijapo achibale ŵasu amene otumikilalini Yehova. Ŵanthu anyinji angolinkhalila ndipo oziŵalini vinthu vamene vikuti vichitike kusogolo—kusogolo kuzachitike “chisauso chikulu chamene chikaliye chachitikapo kufumila pechiyamba chalo mpaka lelo, ndipo chizachitikelini soti.” (Mat. 24:21) Sewo tufuna kuti ove aziŵe vinthu vamene vikuti vizachitike panthawe ya chiweluzo—chipembezo chawenye chizawonongewe, ndipo ŵanthu onse aipa azawonongewe pa nkhondo ya Aramagedo. (Chiv. 16:14, 16; 17:16, 17; 19:11, 19, 20) Pemphelo yasu niyakuti ŵanthu anyinji amvwishile uthenga watuŵauja noyamba kutumikila Yehova pamozi na sewo palipano. Lomba tyani ponena za ŵanthu amene okana kutimvwishila palipano kupamikijapo achibale ŵasu?
10. Ndaŵa yanji n’kofunika kupitilija kuŵachenjeja ŵanthu ponena za vinthu vikuti vichitike kusogolo kwalombapano?
10 Molingana na mweifotokozela nkhani yapita, vuwoneka kuti Yehova azapulumushe ŵanthu amene akuti azachinje mitima yawo pavuli powona kuwonongeka kwa Babulo nkulu. Keno n’tetyo, sewo tufunikila kupitilija kuŵaziŵisha za vinthu vamene ivi palipano. Ganizilani ivi: Vinthu vatuŵauja lomba teti vingezeŵayavya kukumbukila chinthu chiyakine kusogolo. (Yelekezelani na Ezekieli 33:33.) Payakine ove azakumbukile vinthu vatuŵachenjeja palipano noyamba kutumikila Yehova pamozi na sewo nthawe ikaliyesila. Molingana na wopanamila djeli waku Filipi wamene echinja ntima wake pavuli pa “chivomelezi chikulu chamene chechitika,” payakine ŵanthu ayakine azachinje mitima yawo akazawona chiweluzo chikulu chakuti akalondele Babulo nkulu.—Mach. 16:25-34.
TULALIKILA CHIFUKWA CHAKUTI TUKONDA YEHOVA KOMASOTI ZINA YAKE
11. Kansi tumupasa tyani Yehova ulemu, ulemelelo, komasoti mphamvu zasu? (Chivumbuluso 4:11) (Onanisoti chithunzi.)
11 Chifukwa chikulu ngako chamene chutichitisha kuti tikolalikila uthenga uweme, n’chakuti tukonda Yehova komasoti zina yake ituŵa. Sewo tuwona utumiki wasu monga ni njila yotamandila Mulungu wasu watukonda. (Ŵelengani Chivumbuluso 4:11.) Sewo tukatijana na volengewa vonse vakululu vamene vunena kuti: Mwewo Yehova Mulungu wasu muwamila kulondela ulemelelo, ulemu na mphamvu. Sewo tupeleka ulemelelo na ulemu kwa Mulungu tikouja ŵanthu ayakine maumboni osimikijilika amene owonesha kuti yove “elenga vinthu vonse” komasoti kuti moyo watili nawo niyove wamene etipasa. Sewo tumupasa Yehova mphamvu zasu—tikokatishila ntchito nthawe, mphamvu, komasoti vinthu vasu popitisha pasogolo ntchito yolalikila mwatingakwanishile. (Mat. 6:33; Luk. 13:24; Akol. 3:23) Mwachidule, tinganene kuti sewo tukonda kulaŵila za Mulungu chifukwa chakuti tumukonda. Komasoti sewo tulimvwa kunkhala okakamijika kuujako ŵanthu ayakine vokhuza zina yake komasoti umunthu wake. Ndaŵa yanji?
Sewo tupasa Yehova mphamvu zasu keno tukatishila ntchito nthawe, mphamvu, komasoti vinthu vasu popitisha pasogolo ntchito yolalikila mokatijana na mwavilili vinthu pa moyo wasu (Onani ndime 11.)
12. Kansi tuituŵisha tyani zina ya Yehova tikankhala muutumiki?
12 Kukonda kwasu Yehova kutilimbikisa kutuŵisha zina yake. (Mat. 6:9) Vamene ivi vutanthauza kuti sewo tufuna kuyavya ŵanthu ayakine kuziŵa kuti vinthu viipa vakulaŵila Satana vokhuza Yehova ni vawenye. (Gen. 3:1–5; Yobu 2:4; Yoh. 8:44) Tikokata ntchito yolalikila, tunkhala ofunishisha ngako kuuja ŵanthu onse amene angamvwishile uthenga wasu zokhuza umunthu wa Yehova komasoti kuti yove ni wotyani. Sewo tufuna kuti munthu aliyense aziŵe kuti nkhalidwe ikulu ngako ya Mulungu ni chikondi, kuti ulamulilo wake ni uweme komasoti wachilungamo na kuti Ufumu wake, uzasilije mavuto onse a ŵanthu ndipo uzayavye mabanja onse a ŵanthu kuti akonkhala mwantendele komasoti mosangalala. (Sal. 37:10, 11, 29; 1 Yoh. 4:8) Keno tuteteza mbili ya Yehova tikankhala muutumiki tutuŵisha zina yake. Sewo tunkhalasoti na moyo wokhutila chifukwa chakuti tuchita vinthu mokatijana na zina yasu monga Mboni za Yehova. Ndaŵa yanji tunena tetyo?
13. Ndaŵa yanji nimwayi ukulu kuitiŵa kuti Mboni za Yehova? (Yesaya 43:10-12)
13 Yehova watisankha kuti tinkhale “Mboni” zake. (Ŵelengani Yesaya 43:10-12.) Vyaka vinyinji kuvuli kalata yofumila ku Bungwe yutonga, inena kuti: “Mwayi ukulu ngako wamene wali nawo munthu aliyense wa sewo, ni woitiwa kuti Mboni za Yehova.” c Ndaŵa yanji vili tetyo? Ganizilani fanizo iyi. Tiyelekezele kuti ŵanthu akuyopejelani mulandu wamuliyechite. Tetyo mwewo musakila munthu kuti apelekele umboni wakuti vinthu vechikuyopejelani n’vawenye, komasoti kuti mwewo nimwe munthu muweme ndipo mungachitelini vinthu vamene ivo. Kansi mwewo mungasankhe munthu wotyani? Mosakaikila, mungasankhe munthu wamuziŵa luweme komasoti wamudalila wamene ali na mbili iweme kuti ŵanthu amukhulupilile. Pechitisankha kuti tinkhale Mboni zake, Yehova ewonesha kuti otiziŵa luweme komasoti okhulupilila kuti sewo tingakwanishe kupeleka umboni wakuti yove ni Mulungu wachendi ndipo alipo yeka. Sewo tuwona kuti ni mwayi ukulu ngako kunkhala Mboni za Mulungu, ndipo tukatishila ntchito mpata uliwonse poyavya ŵanthu kuti aziŵe zina yake, noŵayavya kuziŵa kuti vinthu vonse viipa vakulaŵila ŵanthu vokhuza Mulungu nivawenye. Pochita vamene ivi, sewo tunkhala tuchita vinthu vokatijana na zina yasu yakuti: Mboni za Yehova!—Sal. 83:18; Alo. 10:13-15.
SEWO TIPITILIJE KULALIKILA MPAKA PAMAPETO
14. Kansi ni vinthu votyani vokondwelesha vamene vikuti vichitike kusogolo kwalombapano?
14 Sewo tuyembekezela mwachidwi kuti tizawone vinthu vamene vikuti vichitike kusogolo kwalombapano! Yehova akadalisa, sewo tufuna kuti ŵanthu anyinji ayambe kutumikila Yehova pamozi na sewo chisauso chikulu chikaliye yamba. Komasoti nise osangalala kuti—olo panthawe yachisauso chikulu—yamene izankhale nthawe yovuta ngako m’mbili yonse ya ŵanthu, anyinji azankhale na mwayi wofuma kumbali ya Satana noyamba kutamanda Yehova pamozi na sewo!—Mach. 13:48.
15–16. Kansi sewo tipitilije kuchita chinji, ndipo tizaleke nthawe yanji?
15 Koma pakali pano tili na ntchito yofunika ngako yakuti tiikate, ntchito yamene tizaikatelini soti—sewo tili na mwayi wolalikila uthenga uweme wonena za Ufumu wa Mulungu pachalo chonse. Panthawe imo na imo yamene iyi, sewo tufunika kupitilija kuŵachenjeja ŵanthu za vinthu vamene vikuti vichitike kusogolo kwalombapano. Ŵanthu ofunika kuziŵa kuti nthawe yakuti chino chalo chiipa chiwonongewe yuvwendela mokulumija ngako. Tetyo nthawe yachiweluzo ikezefwika, ŵanthu azaziŵe kuti uthenga ŵetenzelalikila wenze wofumila chendi kwa Yehova Mulungu.—Eze. 38:23.
16 Lomba kansi sewo nise osimikijila kuchita chinji? Chifukwa chakuti chikondi chutikakamija,— chikondi chatili nacho pa uthenga uweme, pa ŵanthu, ndipo kupambana vonse chifukwa chakuti tukonda Yehova Mulungu pamozi na zina yake—sewo tipitilije kulalikila mofunishisha, mwachangu, komasoti mwakhama, mpakila Yehova azanene kuti “tasilija!”
NYIMBO N.° 54 “Njila ni iyi”
a Nsonkhano wapachaka wechitika pa 7 Okutoba 2023, pa Holo ya Mboni za Yehova yochitila nsonkhano ku Newburgh mu tauni ya New York, U.S.A. Nsonkhano wonse wamene uyu, wiwoneshewa pa pulogilamu yasu ya JW Broadcasting®—Mbali yoyamba iwoneshewa mwezi wa Novemba 2023, ndipo mbali yachiŵili iwoneshewa mwezi wa Djanuwale 2024.
b Onani mbali yakuti “Baibulo Limasintha Anthu—Ndinapeza Mayankho Ogwira Mtima a Mafunso Anga,” mu Nsanja ya Olonda ya 1 Febuluwale 2015.
c Onani Buku la Pachaka la Mboni za Yehova la 2007, pedji 3.
