NKHANI YOPHUNZILA N.° 45
Pitilijani kuwoneshana chikondi chokhulupilika
“Mukowoneshana chikondi chokhulupilika na chifundo.”—ZEK. 7:9.
NYIMBO N.° 107 Mulungu niye chisanzo chikulu cha chikondi
VATIKUTI TIPHUNZILE *
1-2. Kansi ni vifukwa votyani vutichitisha kuti tikowoneshana chikondi chokhulupilika?
SEWO tili na vifukwa vomvwika vutichitisha kuti tikowonesha chikondi chokhulupilika. Kansi viyakine mwa vifukwa vamene ivi n’votyani? Onani mwayuyankhila konsho yamene iyi miyambi ya m’Baibolo: “Osasiya kuwama ntima kosasila na chendi. . . . Ukachita vamene ivi, Mulungu na ŵanthu akuwamile ntima ndipo akuwone kuti niwe wozindikila.” “Munthu owonesha kuwama ntima kosasila opindulisha moyo wake.” “Munthu osakila-sakila chilungamo na kuwama ntima kosasila azafwane moyo.”—Miy. 3:3, 4; 11:17; 21:21.
2 Miyambi yamene iyi yutomola vifukwa vitatu vuchitisha kuti tikowonesha chikondi chokhulupilika. Choyamba, kuwonesha chikondi chokhulupilika kutichitisha kunkhala a ntengo wapatali kwa Mulungu. Chachiŵili, tikowonesha chikondi chokhulupilika, vinthu vukotiyendela luweme. Mwachisanzo, tikogwilizana ngako na ayasu mpaka kale-kale. Ndipo chachitatu, tizafwane madaliso kusogolo, kupamikijapo moyo wosasila. Tetyo, tili na vifukwa vomvwika vutichitisha kumvwila malangizo a Yehova akuti: “Mukowoneshana kuwama ntima kosasila na chifundo.”—Zek. 7:9.
3. Kansi tikambilane makonsho otyani mu nkhani ino?
3 Mu nkhani ino tikambilane mayankho a makonsho 4 aŵa: Kansi tufunika kuwonesha kwa ŵani chikondi chokhulupilika? Kansi tingaphunzile chinji kufumila m’buku ya Rute pa nkhani yowonesha chikondi chokhulupilika? Lomba kansi tingachite tyani kuti tikowonesha chikondi chokhulupilika ŵano masiku? Kansi ŵanthu owonesha chikondi chokhulupilika ofwana mapindu otyani?
KANSI TUFUNIKA KUWONESHA KULI ŴANI CHIKONDI CHOKHULUPILIKA?
4. Kansi tingakonkheje tyani Mulungu pa nkhani yowonesha chikondi chokhulupilika? (Maliko 10:29, 30)
4 Monga ni mwetiphunzilila mu nkhani yapita, Yehova opitilija mphela kuwonesha chikondi chake chokhulupilika—kuli ŵanthu amene omukonda komasoti omutumikila. (Dan. 9:4) Tufuna ‘kukonkheja Mulunu monga ŵana ŵake okondewa.’ (Aef. 5:1) Tetyo, tufunishisha kuti tikokonda ngako abale na alongo wasu—mumpingo.—Ŵelengani Maliko 10:29, 30.
5-6. Kansi mawu akuti “kukhulupilika” angatanthauze chinji?
5 Mungavomekeje kuti tikamvwisha luweme tanthauzo ya chikondi chokhulupilika, niye patingachiwoneshe luweme kuli olambila ayasu. Kuti timvwishe luweme za chikondi chamene ichi, tiyeni tiwone kusiyana kwake kwa mawu akuti kukhulupilika amene ŵanthu okonda kuŵatomola moweleja-weleja. Ganizilani chisanzo ichi.
6 Masiku ŵano tukwanisha kulaŵila za munthu wamene wakata ntchito vyaka vinyinji pa kampani kuti ni wokhulupilika ku kampani yamene iyo. Koma payakine vingachitike kuti pa vyaka vonse vamene ivo aliyekumanepo na anecho a kampani yamene iyo ndipo payakinesoti okatijanalini na malamulo ŵake. Yove oikondalini kampani yamene iyo koma osangalala chifukwa ntchito yamene iyo yumupasa ndalama zakufunikila. Koma opitilija kukata ntchito yamene iyo mpaka pakuti azapumule olo kufwana ntchito iweme kuyakine.
7-8. (a) Kansi n’chinji chuchitisha kuti munthu akowonesha chikondi chokhulupilika? (b) Ndaŵa yanji tufunika kukambilana vinthu viyakine vili m’buku ya Rute?
7 Kusiyana kwamene kulipo pakati pa kukhulupilika, na chikondi chokhulupilika chamene chatomolewa mu ndime 6, ni volinga vamene vuchitisha munthu kuti akowonesha minkhalidwe yamene iyo. Mu nkhani zatuŵelenga m’Baibolo, kansi n’chinji chenzechitisha ŵanthu a Mulungu kuti akowonesha chikondi chokhulupilika? Ove enzechita tetyo, osati chifukwa chakuti niye venzefunika kuchita, koma niye venzefuna kuchita. Ganizilani chisanzo cha Davide. Yove enzefunishisha kuwonesha chikondi chokhulupilika kuli muyake wapantima Yonatani olo kuti atata ŵake a Yonatani enzefuna kumupaya Davide. Papita vyaka vinyinji Yonatani pechimwalila, Davide epitilija kuwonesha chikondi chokhulupilika kuli Mefiboseti mwana wa Yonatani.—1 Sam. 20:9, 14, 15; 2 Sam. 4:4; 8:15; 9:1, 6, 7.
8 Tingaziŵe vinyinji pa nkhani yowonesha chikondi chokhulupilika tikophunzila buku ya m’Baibolo ya Rute. Kansi tingaphunzile votyani pa nkhani yowonesha chikondi chamene ichi kuli ŵanthu otomolewa m’buku yamene iyi? Lomba tingakatishile ntchito tyani mfundo zake mumpingo mwasu? *
KANSI TINGAPHUNZILE CHINJI KUFUMILA M’BUKU YA RUTE PA NKHANI YOWONESHA CHIKONDI CHOKHULUPILIKA?
9. Ndaŵa yanji Naomi enzewona kuti Yehova okondwelalini naye?
9 M’buku ya Rute tuŵelengamo nkhani ya Naomi, na mpongozi wake Rute komasoti munthu muyakine woyopa Mulungu zina yake Boazi wamene enze wachibale wa mulume wa Naomi. Chifukwa chakuti ku Isiraeli kwenze njala, Naomi na mwanalume wake, na ŵana ŵawo aŵili analume efulukila ku Mowabu. Ali kwamene uko mwanalume wa Naomi emwalila. Ŵala ŵana ŵake aŵili elungula koma n’vomvwisha chisoni kuti nawosoti emwalila. (Rute 1:3-5; 2:1) Vamene ivi vichitika, vichitisha kuti Naomi afoke ngako. Vamene ivi vimusokoneza ngako maganizo mpaka efwika poyamba kuwona kuti Yehova okondwelalini naye. Mvwani mwechifotokozela mwenzemvwila vokhuza Mulungu: “Kwanja ya Yehova yaniukila.” “Wamphamvuzonse wachitisha moyo wangu kunkhala woŵaŵa ngako.” Yove enenasoti kuti: “Ni Yehova wanichitisha kunkhala wonyozeka, ndipo ni wamene uyo wamphamvuzonse waniponeshela soka yamene iyi.”—Rute 1:13, 20, 21.
10. Kansi Yehova echita chinji na vechilaŵila Naomi chifukwa choŵaŵiwa ntima?
10 Kansi Yehova echita chinji na vechilaŵila Naomi chifukwa choŵaŵiwa ntima? Yove aliyeleke kumukonda ntumiki wake wamene uyu. Mmalomwake emuwonesha chifundo. Yehova oziwa kuti “kukandililiwa kuchitisha munthu wanzelu kuchita vinthu vatyala-tyala.” (Mlal. 7:7) Koma olo n’tetyo, Naomi enzefunika kuyavyiwa kuti awone kuti Yehova aliyemusiye. Lomba kansi Yehova emuyavya tyani? (1 Sam. 2:8) Yove echitisha kuti Rute ayavye Naomi komasoti kumuwonesha chikondi chokhulupilika. Mofunishisha komasoti mowama ntima, Rute eŵayavya apongozi ŵake kuti ayambesoti kuwona kuti Yehova aliyeŵasiye ndipo enzeŵakonda. Kansi sewo tuphunzilapo chinji pa chisanzo cha Rute?
11. Ndaŵa yanji abale na alongo aweme ntima oyavya Akhilisitu ayawo amene okumana na mavuto?
11 Chikondi chokhulupilika chutichitisha kuti tikoyavya ŵanthu amene okumana na mavuto. Molingana na Rute wamene aliyemusiye Naomi, masiku ŵano abale na alongo aweme mitima ofunishisha kuyavya ayakine mumpingo amene okumana na mavuto. Ove okonda abale na alongo ŵawo ndipo ofuna kuchita vonse vangakwanishe kuti aŵayavye. (Miy. 12:25; 24:10) Vamene ivi n’vokatijana na vechilimbikisa Paulo pechinena kuti: “Laŵilani molimbikisa kuli ŵala antima wachisoni, yavyani ofoka, nkhalani oleza ntima kuli onse.”—1 Ates. 5:14.
Tingayavye m’bale olo mulongo wamene wakhumudwa pomumvwishila (Onani ndime 12)
12. Kansi ni njila iweme yotyani yatingayavyile m’bale olo mulongo wamene ali na nkhaŵa?
12 Nthawe ziyakine njila iweme yatingayavyile m’bale olo mulongo wamene ali na nkhaŵa, ni kumutetekela akolaŵila komasoti kumusimikijila kuti tumukonda. Mulungu owona vatuchita poyavya atumiki ŵake antengo wapatali. (Sal. 41:1) Pa Miyambo 19:17 ponena kuti: “Owamila ntima munthu wonyozeka okongolesha Yehova, ndipo azamuwejele vamene ivo vechichita.”
Rute oyumilila Naomi mpongozi wake, ndipo Olipa ojokela ku Mowabu. Rute ouja Naomi kuti: “Kwamukuti mulute mwewo nane nilute kwamene uko” (Onani ndime 13)
13. Kansi Rute enze wosiyana tyani na Olipa, lomba ndaŵa yanji vechichita viwonesha kuti enze na chikondi chokhulupilika? (Onani chithunzi chapachikuto.)
13 Tumvwishasoti vokhuza chikondi chokhulupilika, tikaganizila vichitikila Naomi pavuli pa imfwa ya mwanalume wake, na ŵana ŵake aŵili. Yove pechimvwa kuti “Yehova wakumbukila ŵanthu ŵake poŵapasa chakulya,” eganiza zojokela kwawo. (Rute 1:6) Pa nthawe yamene iyi azipongozi ŵake onse aŵili enyamuka naye pamozi. Koma ali mu njila, Naomi euja anakazi amene aŵa maulwendo atatu kuti ajokele ku Mowabu. Lomba kansi chichitika n’chinji? Tuŵelenga kuti: “Olipa epasa kisi apongozi ŵake poŵalaila. Koma Rute eŵayumilila mphela.” (Rute 1:7-14) Olipa echita vechimuuja Naomi ndipo ejokela ku Mowabu. Koma Rute echita vopambana pamene apo. Yove enze na ufulu wojokela koma chifukwa chakuti enze na chikondi chokhulupilika kuli apongozi ŵake amene awo, amene enzefunika kuyavyiwa, esankha kupitilija kunkhala nawo pamozi. (Rute 1:16, 17) Rute esankha kupitilja kunkhala na Naomi osati chifukwa chakuti niye venzefunika kuchita, koma niye venzefuna kuchita. Vechichita Rute viwonesha kuti enze na chikondi chokhulupilika. Kansi sewo tuphunzilapo chinji pa nkhani yamene iyi?
14. (a) Masiku ŵano, kansi abale na alongo a ntima wachikondi osankha kuchita chinji? (b) Mokatijana na Aheberi 13:16, kansi ni nsembe zotyani zakukondwela nazo Mulungu?
14 Tikankhala na chikondi chokhulupilika tuchita vinthu vinyinji poyavya ayakine. Masiku ŵano, abale na alongo anyinji osankha kuwonesha chikondi chokhulupilika kuli Akhilisitu ayawo olo ŵala ŵasaziŵa. Mwachisanzo, pakachitika ngozi za m’chilengedwe, mokulumija ove ofunishisha kuziŵa vangachite kuti ayavyeko. Keno munthu muyakine mumpingo wakumana na vuto chifukwa cha mavuto azachuma, ove ochitapo kanthu mokulumija kuti amuyavye kufwana vakufunikila. Molingana na Akhilisitu aku Makedoniya a m’thawe ya atumwi, ove ochita vangakwanishe kuti ayavyeko. Ove okatishila ntchito nthawe komasoti vinthu vawo ndipo ochitasoti “vupambana pamene apo,” kuti ayavye abale ŵawo amene akumana na mavuto. (2 Akor. 8:3) Yehova okondwela ngako chifukwa cha ntima wachikondi wamene uyo wakuwonesha!—Ŵelengani Aheberi 13:16.
KANSI TINGACHITE TYANI KUTI TIKOWONESHA CHIKONDI CHOKHULUPILIKA ŴANO MASIKU?
15-16. Kansi Rute ewonesha tyani kuti enzeyeja-yeja mphela kuti ayavye apongozi ŵake?
15 Sewo tingaphunzile mfundo ziweme ngako kufumila pa vechichita Rute poyavya Naomi. Tiyeni tiwone viyakine vatingaphunzilepo.
16 Mukoyeja-yeja mphela kuti muyavyeko. Rute penzefuna kuluta na apongozi ŵake ku Yuda, poyamba apongozi ŵake amene awo emulesha. Koma Rute aliyefoke. Kansi vokonkhapo vake venze votyani? Naomi “pechiwona kuti walimbikila zakuti alute naye pamo, eleka kumuuja kuti ajokele.”—Rute 1:15-18.
17. Kansi n’chinji chingatiyavye kuti tiyeje-yeje mphela kuyavya munthu muyakine?
17 Vatuphunzilapo: Pofunika kuleza ntima kuti tiyavye ŵanthu ali na nkhaŵa chifukwa cha mavuto, koma tufunika kuyeja-yeja mphela kuti tiŵayavye. Mulongo wamene ofunika kuyavyiwa poyamba angakane kuti timuyavye. * Koma olo n’tetyo, chikondi chokhulupilika chingatichitishe kuchita vatingakwanishe kuti osati timusiye. (Aga. 6:2) Tuyembekezela kuti m’kupita kwa nthawe, yove angavomele kuti timuyavye komasoti kuti timulimbikise.
18. Kansi muwona kuti n’chinji chenze chovuta ngako kwa Rute?
18 Osati mukokhumudwa. Naomi na Rute pechifwika ku Betelehenu, Naomi ekumana na ayake ŵechisiya. Yove eŵauja kuti: “Nenze na vinthu vonse penifuma kuno, koma Yehova wanijosha niliyekanthu.” (Rute 1:21) Ganizilani tyala mwechimvwila Rute pechilaŵila vamene ivi Naomi! Rute enzechita vonse vangakwanishe kuti ayavye Naomi. Yove enzelila naye, enzemutonthoja komasoti enzeyenda naye masiku anyinji. Koma olo kuti yove enzechita vonse vamene ivi, Naomi enena kuti: “Yehova wanijosha niliyekanthu.” Olo kuti Rute enzenkhala naye nthawe zonse, vamene ivi vechilaŵila Naomi viwonesha monga kuti enzetembejalini vonse venzemuchitila Rute. Vamene ivi vuwoneka kuti venze voŵaŵa ngako kuli Rute! Koma olo n’tetyo, yove epitilija mphela kumuyavya Naomi.
19. Kansi n’chinji chingatiyavye kuti tipitilije mphela kuyavya munthu wakhumudwa?
19 Vatuphunzilapo: Masiku ŵanosoti, mulongo wamene wakhumudwa angatilaŵilile vinthu vamene vingatiŵaŵe muntima—olo kuti tachita vonse vatingakwanishe kuti timuyavye. Koma vikachitika tetyo, tufunikalini kukhumudwa. Tufunika kupitilija mphela kumuyavya nosenga Yehova kuti atiyavye kufwana njila iweme yomutonthojela.—Miy. 17:17.
Kansi akulu masiku ŵano angamukonkheje tyani Boazi? (Onani ndime 20-21)
20. Kansi n’chinji chiyavya Rute kufwana mphamvu zenzefunikila kuti osati afoke?
20 Pelekani chilimbikiso keno mwawona kuti munthu muyakine ofunika kulimbikisiwa. Rute enze ewonesha chikondi chokhulupilika kuli Naomi, koma pa nthawe yamene iyo nayesoti enzefunika kulimbikisiwa. Ndipo Yehova echitisha kuti Boazi amulimbikise. Boazi euja Rute kuti: “Yehova akudalise mokwanila. Wala amene wewo wautukila m’mapapilo ŵake nofwanamo chitetezo.” Mawu amene aŵa ofwika pantima emulimbikisa ngako Rute. Poyamba yove euja Boazi kuti: “Mwanitonthoja ntima, komasoti mwalaŵila monitang’isha ntima monga nine wantchito wanu.” (Rute 2:12, 13) Mawu apanthawe yake ŵechilaŵila Boazi, emupasa mphamvu Rute zenzefunikila.
21. Mokatijana na lemba ya Yesaya 32:1, 2, kansi akulu achikondi ochita chinji?
21 Vatuphunzilapo: Ŵala ŵanthu owonesha ayakine chikondi chokhulupilika, nthawe ziyakine nawosoti ofunika kulimbikisiwa. Molingana na Boazi wamene esimikijila Rute kuti Mulungu pamozi na ŵanthu enzewona venzechita poyavya Naomi, akulu atchelu masiku ŵano, otembeja abale na alongo amene oyavya ayakine. Abale na alongo amene aŵa akotembejewa teti, ofwana mphamvu kuti apitilije mphela kuchita viweme.—Ŵelengani Yesaya 32:1, 2.
KANSI ŴANTHU OWONESHA CHIKONDI CHOKHULUPILIKA OFWANA MAPINDU OTYANI?
22-23. Kansi Naomi echinja tyani mwenzewonela vinthu, ndipo ndaŵa yanji? (Salimo 136:23, 26)
22 Boazi epeleka molowa manja chakulya kuli Rute na Naomi. (Rute 2:14-18) Kansi Naomi echita tyani pechiwona vinthu vechiŵachitila Boazi? Yove enena kuti: “Yehova wamene aliyeleke kuwonesha kuwama ntima kosasila kuli amoyo na akufwa, amudalise munthu wamene uyu.” (Rute 2:20a) Pamene apa Naomi echinja ngako mwenzewonela vinthu! Poyamba yove enena kuti: “Yehova . . . wanichitisha kunkhala wonyozeka,” koma apa eŵilikija mosangalala kuti: “Yehova . . . aliyeleke kuwonesha kuwama ntima kosasila.” Kansi n’chinji chichitisha kuti Naomi achinje mwenzewonela vinthu?
23 Naomi eyamba kuziŵa kuti Yehova aliyemusiye. Yehova ekatishila ntchito Rute kuti amuyavye pojokela ku Yuda. (Rute 1:16) Naomi eziŵasoti kuti Yehova ekatishila ntchito Boazi wamene enze mmozi wa ‘oŵawombola’ kuti amuyavye pamozi na Rute. * (Rute 2:19, 20b) Newo ‘namvwisha’ ndipo ‘lomba naziŵa kuti, Yehova aliyenisiye. Yove wankhala nane nthawe yonse yamene iyi!’ (Ŵelengani Salimo 136:23, 26.) Vuwoneka kuti Naomi etembeja ngako powona kuti Rute na Boaz aliyefoke noleka kumuyavya! N’vosachita kukonsha kuti ŵanthu onse amene aŵa esangalala ngako kuwona kuti Naomi wafwanasoti mphamvu nopitilija kutumikila Yehova.
24. Ndaŵa yanji tufunika kupitilija mphela kuwonesha chikondi chokhulupilika kuli Akhilisitu ayasu?
24 Kansi taphunzila chinji kufumila m’buku ya Rute pa nkhani yowonesha chikondi chokhulupilika? Chikondi chokhulupilika chutichitisha kuti osati titaye ntima noleka kuyavya abale na alongo ŵasu amene akhumudwa. Chutichitishasoti kuti tikochita vonse vatingakwanishe kuti tiŵayavye. Moweleja-weleja, Akulu ofunika kulimbikisa ŵanthu owonesha chikondi chokhulupilika kuli ayakine. Tikawona kuti ŵanthu amene akhumudwa afwanasoti mphamvu noyamba kutumikila Yehova, tusangalala ngako. (Mac. 20:35) Koma kansi chifukwa chikulu chutichitisha kuti tipitilije kuwonesha chikondi chokhulupilika n’chotyani? Chifukwa n’chakuti tufuna kukonkheja Yehova nomukondwelesha wamene ni “wozula na kuwama ntima kosasila,” kapena kuti, chikondi chokhulupilika.—Eks. 34:6; Sal. 33:22.
NYIMBO N.° 130 Mwaokhululukilana
^ ndime 5 Yehova ofuna kuti tikowonesha chikondi chokhulupilika kuli abale na alongo ŵasu mumpingo. Tingamvwishe vakuchita munthu wamene ali na chikondi chokhulupilika, tikaganizila mwechiwoneshela nkhalidwe yamene iyi atumiki ayakine masiku akuvuli. Mu nkhani ino, tiwone vatingaphunzile pa chisanzo cha Rute, Naomi komasoti Boazi.
^ ndime 8 Kuti mumvwishe luweme vili mu nkhani iyi, tukulimbikisani kuti muŵelenge pamweka lemba Rute chapitala 1 na 2.
^ ndime 17 Tufotokoza za alongo amene ofunika kuyavyiwa, chifukwa chakuti mu nkhani ino tukatishila ntchito chisanzo cha Naomi. Koma olo n’tetyo, mfundo zake n’zoyavyasoti kuli abale.
^ ndime 23 Kuti muziŵe vinyinji pa udindo wa Boazi monga woŵawombola, onani nkhani yakuti “Tsanzirani Chikhulupiriro Chawo—‘Anali Mkazi Wabwino Kwambiri’” mu Nsanja ya Olonda ya 1 October, 2012, pedji 20.
