1. Ndaŵa yanji nise osangalala ngako komasoti tumekela kunkhala Mboni za Yehova?

NISE osangalala ngako komasoti tumekela kunkhala Mboni za Yehova! Sewo nise ŵanthu a Yehova, ndipo tusimikijila kuti nise mboni zake mwa kulalikila ayakine noŵaphunzisa vokhuza yove. Tusangalala ngako tikayavya munthu wamene ali na ‘maganizo aweme amene angamuyavye kuzafwana moyo wosasila’ kunkhala wokhulupilila. (Mac. 13:48) Sewo tikumvwa monga mwenzemvwila Yesu. Yove “ekondwela ngako” ophunzila ŵake pechimufotokozela vokumana navo viweme vechikumana navo mu utumiki polalikila.—Lk. 10:1, 17, 21.

2. Kansi tingawoneshe tyani kuti ntchito yasu yolalikila ni yofunika ngako kuli sewo?

² Ntchito yolalikila ni yofunika ngako kuli sewo. Ntumwi Paulo elimbikisa Timoteyo kuti: “Nthawe zonse ukosamala na vauchita komasoti vauphunzisa.” Paulo eyangijila kuti: “Ukachita tetyo ulipulumushe weka komasoti ŵanthu okumvwila.” (1 Tim. 4:16) Tetyo, ulaliki wasu upulumusha miyoyo. Sewo tunkhala tchelu ngako chifukwa chakuti nise nzika za Ufumu wa Mulungu. Nthawe zonse tufuna kuchita vinthu vamene vingakondweleshe Yehova nowonesha kuti tukhulupilila uthenga uweme watulalikila. (Afil. 1:27) Sewo tuwonesha kuti ‘tusamala na vatuphunzisa’ mwa kukonzekela luweme pakuya mu utumiki komasoti mwa kusenga thandizo ya Yehova tikaliyeyamba kulalikila ayakine.

3. Kansi munthu aliyense onkhala na chidwi na uthenga wa Ufumu? Pelekani chisanzo.

³ Olo tingachite vonse vatingakwanishe kuti tikolalikila ayakine, ŵanthu anyinji mu dela yasu payakine angochitalini chidwi na uthenga uweme wa Ufumu. Ganizilani chisanzo cha m’bale Georg Lindal, wamene elalikila yeka mmalo osiyana-siyana ku Iceland kuyambila mu 1929 mpaka mu 1947. Yove eyaŵila mabuku masauzande anyinji, koma paliye enkhala wa Mboni za Yehova. Yove elemba kuti: “Ayakine mwa ŵanthu amene aŵa owoneka kuti oshusha uthenga wa m’Baibolo, koma anyinji a ove owoneka kuti onkhala aliye chidwi.” Amishonale amene esilija maphunzilo ŵawo ku sikulu ya Giliyadi eluta kwamene uko kuyayavya pa ntchito yamene iyi,  koma nawo elalikila kwa vyaka vinyinji osafwana ŵanthu anyinji achidwi. Pamapeto pake, pavuli pa vyaka 9, ŵanthu ayakine akwamene uko ku Iceland elipeleka kwa Yehova ndipo ebatiziwa.

4. Kansi tingamvwe tyani keno ŵanthu aliye chidwi na uthenga uweme?

⁴ Tukhumudwa ngako keno ŵanthu aliye chidwi chofuna kuphunzila Baibolo. Sewo nase payakine tingolimvwa monga ni mwenzemvwila Paulo wamene enze na ‘chisoni chikulu komasoti kuŵaŵiŵa nthawe zonse’ chifukwa chakuti Ayuda anyinji enzefunalini kukhulupilila kuti Yesu niye Mesiya. (Aro. 9:1–3) Payakine mwewo muphunzila Baibolo na munthu muyakine. Muyeja-yeja ngako kuti munkhale mphunzisi muweme ndipo mumupemphelela ngako wophunzila wanu. Koma yove okonkhejalini vinthu vakuphunzila, tetyo mufunika kulekeja kuphunzila naye. Olo payakine mukaliyephunzilako na munthu mpaka kufwika pobatiziwa. Kansi vamene ivi vutanthauza kuti vuto ni yanu komasoti kuti Yehova okondwelalini na ntchito yanu yolalikila? Mu nkhani ino, tiyankhe makonsho aŵili aŵa: (1) Kansi n’chinji chuchitisha kuti ntchito yasu yolalikila ikoyenda luweme? (2) Kansi tufunika kunkhala na chiyembekezo chotyani tikolalikila ŵanthu?

5. Ndaŵa yanji ntchito yatukatila Yehova nthawe ziyakine yuletalini vokonkhapo vetenzeyembekezela?

⁵ Ponena za munthu wamene ochita chifunilo cha Mulungu, Baibolo yunena kuti: “Vochita vake vonse vizamuyendele luweme.” (Sal. 1:3) Olo n’tetyo, vamene ivi vutanthauzalini kuti chilichonse chatuchitila Yehova chizachitike monga ni mwatufunila sewo. Moyo wa munthu ni “wozula na mavuto” chifukwa cha kusoŵa ungwilo—kuyambila moyo wasu komasoti wa ŵanthu ayakine. (Yobu 14:1) Kuyangijila pali vamene ivi, ŵala ŵanthu amene otishusha nthawe ziyakine angatileshe kuti tikolalikila momasuka. (1 Akor. 16:9; 1 Ates. 2:18) Lomba kansi n’chinji chuchitisha kuti munthu utumiki ukomuyendela luweme? Tiyeni tiwone mfundo ziyakine za m’Baibolo zamene zutiyavya kuyankha konsho yamene iyi.

6. Kansi Yehova oiwona tyani ntchito yasu yatukatila yove?

⁶ Yehova owona kuyeja-yeja na kupilila kwasu. Yehova osangalala ngako tikolalikila mwakhama chifukwa chomukonda, olo keno ŵanthu ofunalini kumvwishila. Paulo elemba kuti: “Sikuti Mulungu ni wosalungama kuti angaluŵe ntchito yanu na chikondi chemwiwonesha pa zina yake, potumikila atuŵa ndipo mupitilija kuŵatumikila.” (Ahe. 6:10) Yehova okumbukila ntchito yasu na chikondi chasu, olo tingaŵeve phunzilo ya Baibolo yamene ingabatiziwe. Tetyo, payakine mwewo namwe mungavikatishile ntchito vechilaŵila Paulo pouja Akhilisitu aku Korinto kuti: “Vonse vamuchita mu ntchito ya Ambuya vizapitelini patyala,” viliyekanthu kuti ntchito yanu yamukata mwakhama ilekekwanilisha vinthu vemwenzeyembekezela mwewo.—1 Akor. 15:58.

7. Kansi tingaphunzile chinji kufumila pa vechinena ntumwi Paulo vokhuza utumiki wake?

⁷ Ntumwi Paulo enze mmishonale muweme  ngako, ndipo enkhazikisha mipingo yanyowani m’matauni anyinji. Koma ŵanthu ayakine pechiyamba kumushusha Paulo komasoti kunena kuti enzelini mphunzisi muweme, yove aliyelaŵile vinthu vokhuza ŵanthu ŵechiyavyako kunkhala Akhilisitu kuti ni angani. Mmalomwake Paulo elemba kuti: ‘Nakata ntchito zinyinji.’ (2 Akor. 11:23) Molingana na Paulo, tufunika kukumbukila kuti chofunika ngako kwa Yehova ni kukata ntchito mwakhama komasoti kusafoka.

8. Kansi tufunika kukumbukila chinji chokhuza utumiki wasu?

⁸ Utumiki wasu ukondwelesha Yehova. Yesu etumija ophunzila okwana 70 kuti akalalikile uthenga wa Ufumu, ndipo pamapeto pa ntchito yawo yolalikila ove “ejokela ali osangalala.” Ndaŵa yanji ove enze osangalala? Ove enena kuti: “Olo viŵanda venzetigonjela petikatishila ntchito zina yanu.” Olo n’tetyo, Yesu eŵayavya kumvwisha kuti maganizo ŵawo enze ophoniyeka pechiŵauja kuti: “Osakondwela na vamene ivi, kuti mizimu yakumvwilani, koma kondwelani chifukwa mazina ŵanu alembewa kululu.” (Lk. 10:17-20) Yesu enzeziŵa kuti ni nthawe zonselini pakuti akokumana na vinthu viweme monga n’vamene ivi ophunzila ŵake pa utumiki wawo. Kulaŵila chendi, tuziŵalini kuti ni ŵanthu angani amene echizankhala okhulupilila pali ŵala amene poyamba eŵamvwishila ophunzila. Ophunzila amene awo enzefunikila kumvwisha kuti chisangalalo chenzewelalini kufumila tyala kuli ŵanthu amene enzeŵamvwishila. Chisangalalo chawo chikulu chenzewela chifukwa choziŵa kuti Yehova osangalala na khama yawo.

9. Mokatijana na lemba ya Agalatiya 6:7–9, kansi pangankhale vokonkhapo votyani keno tupilila pa utumiki wasu?

⁹ Keno tupilila pa utumiki wasu, tizafwane moyo wosasila. Tikochita vonse vatingakwanishe kuti tilalikile nophunzisa uthenga uweme, tunkhalasoti kuti ‘tukomola mu mzimu’ mwa kulola mzimu utuŵa wa Mulungu kuti ukotisogolela mwaufulu pa moyo wasu. Keno sewo ‘tufokalini’ olo ‘kuŵewa,’ Yehova olonjeza kuti azatipase moyo wosasila, olo kuti tiliyeyavyeko munthu aliyense kufwika pobatiziwa.—Ŵelengani Agalatiya 6:7–9.

10. Ndaŵa yanji ŵanthu ayakine omvwishila tikoŵalalikila koma ayakine omvwishilalini?

¹⁰ Keno ŵanthu avomele chonadi olo akane, chudalila ngako vili m’mitima mwawo. Yesu efotokoza chendi chamene ichi mu fanizo yake ya mbewu ikomolewa pa lito yosiyana-siyana, koma mbewu ikomolewa tyala pa lito iweme niye itwala vitwazi vinyinji. (Lk. 8:5–8) Yesu enena kuti lito yosiyana-siyana yupanamila ŵanthu amene mitima yawo yulondela mosiyana-siyana “mawu a Mulungu.” (Lk. 8:11-15) Molingana na munthu wamene okomola, sewo tingakulishelini kanthu kayakine m’mitima ya ŵanthu ŵatulalikila. Udindo wasu ni kupitilija kukomola mbewu ziweme za uthenga uweme. Monga ni mwechinenela ntumwi Paulo, munthu “aliyense payeka azalondele madaliso ŵake mokatijana na ntchito yake,” osati mokatijana na vokonkhapo va ntchito yake.—1 Akor. 3:8.

11. Ndaŵa yanji Yehova enkhala wosangalala na ntchito yolalikila yenzekata Nowa olo kuti ŵanthu aliyemumvwishile? (Onani chithunzi chapachikuto.)

¹¹ Kuyambila kale, atumiki a Yehova anyinji ankhala olalikila kuli ŵanthu amene ofunalini kumvwishila. Mwachisanzo, Nowa “enze mulaliki wachilungamo,” payakine kwa vyaka pafupi-fupi 40 olo 50. (2 Pet. 2:5) Mosakaikila, yove enzeyembekezela kuti ayakine akomumvwishila, koma Yehova aliyelaŵile kuti vamene ivi vichitike. Mmalomwake, Mulungu pechiuja Nowa kuti apange chingalaŵa, yove enena kuti: “Wewo uzaloŵe m’chigalaŵa mwamene umo pamozi na ŵana ŵako, nkazi wako, na azinakazi a ŵana ŵako.” (Gen. 6:18) Ndipo Yehova pechimuuja za kukula kwa chingalaŵa chenzefunikila kupanga, payakine Nowa emvwisha kuti ŵanthu  anyinji azamumvwishilelini, chifukwa chakuti mu chingalaŵa mwamene umo mungazapezekalini malo a ŵanthu onse. (Gen. 6:15) Monga ni mwatuziŵila, paliye olo mmozi wamene emumvwishila Nowa. (Gen. 7:7) Kansi Yehova ewona kuti Nowa aliyelalikile mokwanila? Yayi, aliyeganize tetyo! Yehova ekondwela naye ngako Nowa chifukwa chakuti yove echita vechimusenga Yehova kuti achite.—Gen. 6:22.

12. Kansi mneneli Yeremiya efwana tyani chisangalalo pa utumiki wake olo kuti ŵanthu enzemushusha ndipo enzefunalini kumvwishila uthenga wake?

¹² Mneneli Yeremiya naye elalikila kwa vyaka vopitilila 40 olo kuti ŵanthu aliyemumvwishile ndipo enzemushusha. Yove ekhumudwa ngako na ‘kunyoza komasoti kutonja’ kwa ŵanthu oshusha mwakuti eganiza zoleka ntchito yolalikila. (Yer. 20:8, 9) Koma Yeremiya aliyefoke! Kansi n’chinji chimuyavya kupitilija komasoti kufwana chisangalalo pa utumiki wake? Yove eganizila ngako pa mfundo ziŵili zofunika ngako. Yoyamba, uthenga wa Mulungu, wamene Yeremiya wechiuja ŵanthu, sembe wiŵapasa “chiyembekezo chiweme komasoti sogolo iweme.” (Yer. 29:11) Yachiŵili, Yehova esankha Yeremiya kuti akalaŵile mmalo Yove nopeleka uthenga Wake kuli ŵanthu. (Yer. 15:16) Sewo nase tulalikila uthenga wamene upasa chiyembekezo muli chino chalo chamene chiliye chiyembekezo, ndipo tuziŵika na zina ya Yehova monga Mboni zake. Keno sewo tuika maganizo ŵasu pa mfundo ziŵili zofunika ngako zamene izi, tingankhale osangalala viliyekanthu kuti ŵanthu omvwishila olo okana.

13. Kansi tuphunzila chinji kufumila pa fanizo yechifotokoza Yesu yamene ili pa Maliko 4:26-29?

¹³ Kukula mwauzimu kuchitika patontho-patontho. Yesu ephunzisa vamene ivi mu fanizo yake ya munthu wokomola mbewu wamene wayona. (Ŵelengani Maliko 4:26-29.) Kukula kwa mbewu zamene zakomolewa kuchitika patontho-patontho ndipo wokomola angachitelini chilichonse kuti azikulishe mokulumija. Mwewo namwe payakine mungafunikile kuyembekezela nthawe itali mukaliyeyamba kuwona wophunzila Baibolo wanu kukatishila ntchito vinthu vakuphunzila. Molingana na mulimi wamene angakakamijelini mbewu zake kukula monga ni mwakufunila yove, sewo nase tingakakamijelini ophunzila Baibolo ŵasu kupita pasogolo mwauzimu monga ni mwatufunila. Tetyo, osataya ntima olo kufoka keno munthu wamuphunzila naye Baibolo ochelwa kupita pasogolo. Molingana na mulimi, tufunika kuyembekezela moleza ntima mpaka wophunzila wasu apange yeka chosankha chotumikila Yehova.—Yak. 5:7, 8.

14. Kansi ni chisanzo chotyani chamene chuwonesha kuti pangatole nthawe itali kuti ŵanthu ayambe kutimvwishila?

¹⁴ M’madela ayakine, pangatole nthawe itali ngako kuti munthu abatizike. Ganizilani chisanzo cha alongo aŵili amene efuma vumo imo, Gladys na Ruby Allen, amene eikiwa kunkhala apainiya onkhazikika mu 1959 ku tauni iyakine mu dela ya Canada ku Quebec. * Chifukwa choyopa ŵanthu ŵenzenkhala nawo pafupi komasoti asogoleli a vipembezo, ŵanthu a kwamene uko enzefunalini kumvwishila uthenga wa Ufumu. Gladys, enena kuti: “Tenzeyenda ku ng’anda na ng’anda kwa ma awazi 8 pa nsiku kwa vyaka viŵili, ndipo paliye munthu aliyense wamene enzesegula mulyango! Ŵanthu enzekungofwika pa mulyango nosonjelela pa maketani ndipo akawona kuti ni sewo enzezalilako. Koma sewo tiliyefoke.” Patontho-patontho, ŵanthu eyamba kuchinja maganizo ndipo ayakine eyamba kumvwishila. Ndipo pano patunena mu tauni yamene iyo muli mipingo yokwanila itatu.—Yes. 60:22.

15. Kansi lemba ya 1 Akorinto 3:6, 7 yutiphunzisa chinji vokhuza ntchito yopanga ophunzila?

¹⁵ Ŵanthu anyinji ni ofunika kuti ayavye munthu kunkhala wophunzila. Aliyense mumpingo angayavye kuti munthu afwike pobatiziwa. (Ŵelengani 1 Akorinto 3:6, 7.) Mwachisanzo,  m’bale wasiya kapepala olo magazini kuli munthu wachidwi. Koma yove angakwanishelini kujokelako pa nthawe yoyenelela, tetyo yove osenga m’bale muyakine kuti ajokeleko. Wofalisa wamene uyo okwanisha kuyambisha phunzilo ya Baibolo. Pavuli pake, yove oitila abale na alongo osiyana-siyana kuti apezekepo pa phunzilo yamene iyo, ndipo aliyense olimbikisa wophunzila wamene uyo mwa njila iyakine. M’bale olo mulongo aliyense akakumana na munthu wamene ophunzila Baibolo, angamuyavye kuphunzila vinyinji vokhuza Yehova. Tetyo, munthu wamene uyo akabatizika, onse ŵala emuyavyako nawo angankhale osangalala.—Yoh. 4:35-38.

16. Olo kuti mwewo mungakwanishelini kuchita vinyinji pa utumiki wanu, ndaŵa yanji mungankhale mphela osangalala?

¹⁶ Payakine mwewo mungakwanishelini kulalikila monga ni kale chifukwa thanzi yanu ililini luweme olo chifukwa chakuti muliye mphamvu zinyinji. Olo n’tetyo, mungankhale osangalala chifukwa cha vamungakwanishe kuchita poyavyako pa ntchito ya pachalo chonse. Ganizilani vichitikila Mfumu Davide pamene yove pamozi na alumbwana ŵake pechipulumusa mabanja ŵawo na katundu wawo kuli a Amaleki. Analume okwanila 200 enze eŵeŵa ngako mwakuti sembe aliyekwanishe kuniyata nkhondo, tetyo ove esala kuti akololela katundu. Koma Davide pamozi na analume ayakine eluta kuyaniyata nkhondo ndipo epambana notola vinthu vinyinji vantengo wapatali va adani ŵawo. Pavuli pake, yove elamula kuti ŵala amene eniyata nkhondo pamozi na ŵala enze esala, onse ayaŵane vinthu saizi imozi. (1 Sam. 30:21-25) Nkhani yamene iyi yutiphunzisa kanthu kayakine kokhuza ntchito yasu yopanga ophunzila. Payakine mwewo mungakwanishelini kuchita vinyinji monga ni mwamungafunile pa ntchito yolalikila na kuphunzisa. Koma keno muchita vonse vamungakwanishe, mungankhale mphela na chisangalalo chikulu nthawe zonse munthu muyakine akaziŵa Yehova nobatiziwa.

17. Ndaŵa yanji tufunika kumutembeja Yehova?

¹⁷ Tumutembeja ngako Yehova chifukwa chakuti yove owona ntchito yasu yatumukatila mu njila yachikondi. Yove oziŵa kuti sewo tingakakamijelini ŵanthu kuti akotimvwishila olo kuyamba kumutumikila. Koma owona mwatukatila ntchito mwakhama komasoti mwatumukondela ndipo otidalisa. Kuyangijila pali vamene ivi, otiphunzisa mwatingankhalile osangalala na vonse vatingakwanishe kuchita pa ntchito yolalikila. (Yoh. 14:12) Tingankhale osimikijila kuti keno tingaleke kufoka, Mulungu ankhale wosangalala na ntchito yasu!