1. Ndaŵa yanji ŵanthu anyinji osokonezeka?

MASIKU ŵano kuli vipembezo vinyinji vamene vunena kuti ni va Chikhilisitu komasoti kuti vulambila Mulungu m’njila yumukondwelesha. N’chifukwa chake ŵanthu anyinji osokonezeka! Ove olikonsha kuti: “Kansi chilipo chimozi chipembezo chachendi, olo payakine vipembezo vonse vukondwelesha Mulungu?” Lomba tyani ponena za sewo? Monga a Mboni za Yehova, kansi sewo tusimikijila kuti tuphunzisa vachendi komasoti kuti njila yatukatishila ntchito polambila Yehova ni njila imozi tyala yamene yumukondwelesha? Kansi n’vokwanishika chendi kuziŵa vinthu vamene ivi na chisimikijilo chonse? Tiyeni tikambilane maumboni ŵake.

2. Mokatijana na lemba ya 1 Atesalonika 1:5, ndaŵa yanji Paulo enzekaikilalini za chonadi?

² Ntumwi Paulo enzekaikilalini za chonadi. (Ŵelengani 1 Atesalonika 1:5.) Yove enzekungokhulupililalini tyala chonadi chamene ichi chifukwa chakuti chenzemuchitisha kunkhala wokondwela. Ntumwi Paulo enze wakhama pophunzila Mawu a Mulungu. Yove enzekhulupilila kuti “Malemba onse ewujiliwa na Mulungu.” (2 Tim. 3:16) Kansi yove enzephunzila chinji? M’Malemba, Paulo efwanamo umboni wosimikijilika wakuti Yesu enze Mesiya wolonjezewa—umboni wamene asogoleli avipembezo Achiyuda esankha kuunyalanyaza. Ove enzenena kuti enzephunzisa ŵanthu chendi chokhuza Mulungu, koma enzechita vinthu vakuzonda Mulungu. (Tit. 1:16) Mosiyana na ŵanthu amene aŵa, Paulo enzechitalinisalula kuti ni mbali yotyani ya m’Mawu a Mulungu yangakhulupilile. Yove enze wokonzeka kuphunzisa nokatishila ntchito ‘malangizo onse a Mulungu.’—Mac. 20:27.

3. Kansi tufunika kufwana mayankho a makonsho onse kuti tisimikijile kuti tili na chonadi? (Onani bokosi yakuti, “ Ntchito za Yehova na maganizo ŵake—‘ni vinyinji ngako kuvifotokoza.’”)

 ³ Ŵanthu ayakine oganiza kuti chipembezo chachendi chufunika kukwanisha kuyankha makonsho onse, olo ŵala makonsho amene mayankho ŵake ofwaniwalini m’Baibolo. Kansi vamene ivi n’vokwanishika? Ganizilani chisanzo cha Paulo. Yove eujasoti Akhilisitu ayake kuti ‘asimikijile vinthu vonse,’ komasoti evomekeja kuti penze vinthu vinyinji venzelekamvwisha yove. (1 Ates. 5:21) Yove elemba kuti, “pakuti tuziŵa mopeleŵela,” ndipo eyangijila kuti, “pa nthawe ino tulolalini luweme chifukwa tukatishila ntchito gilasi yamene yuwoneshalini luweme.” (1 Akor. 13:9, 12) Paulo enzemvwishalini vonse; ndipo olo sewo nase tumvwishalini vonse. Koma Paulo enzemvwisha mfundo zachendi zoyambilila zokhuza Yehova. Yove enzeziŵako vokwanila vakuti vimusimikijile kuti vinthu venzekhulupilila venze vachendi!

4. Kansi tingatang’ishe tyani chikhulupililo chasu chakuti tili na chonadi, ndipo kansi tikambilane votyani vokhuza Akhilisitu achendi?

⁴ Njila imozi yamene ingatang’ishe chikhulupililo chasu pa vinthu vatukhulupilila vakuti tili na chonadi, ni kulinganija njila yolambilila yechinkhazikisha Yesu na mwakuchitila a Mboni za Yehova ŵano masiku. Mu nkhani ino, tiwone kuti Akhilisitu achendi (1) okana kulambila mafano, (2) olemekeza zina ya Yehova, (3) okonda chonadi, komasoti (4) okondana muyake na muyake kufumila pansi pa ntima.

5. Kansi tuphunzila chinji kufumila kuli Yesu pa nkhani yolambila Mulungu mu njila yoyenelela, ndipo kansi tingavikatishile ntchito tyani vechiphunzisa yove?

⁵ Chifukwa chakuti Yesu enzekonda ngako Yehova, yove enzelambila tyala Yehova yeka, pa nthawe yenze kululu komasoti penze pano  pa chalo. (Lk. 4:8) Yove enzephunzisa ophunzila ŵake kuti nawo akolambila tyala Yehova yeka. Yove Yesu olosoti ophunzila ŵake okhulupilika aliyekatishileko ntchito vizindikilo polambila. Mulungu tingakwanishelini kumuwona, tetyo paliye munthu wamene angapange chinthu chulingana na Mulungu! (Yes. 46:5) Lomba tyani pa nkhani yopanga vithunzi va ŵanthu amene ayakine oŵaita kuti atuŵa nopemphela kuli ove? Mu Lamulo yachiŵili pa Malamulo 10, Yehova enena kuti: “Osalipangila fano olo chifanizilo cha chinthu chilichonse chakululu, olo cha pachalo, . . . Osaviŵelamila.” (Eks. 20:4, 5) Ŵala ŵanthu amene ofuna kukondwelesha Mulungu omvwisha kuti yove ofunalini kuti sewo tikolambila mafano.

6. Kansi ni chisanzo chotyani cha kulambila chakukonkheja a Mboni za Yehova ŵano masiku?

⁶ Ŵanthu ophunzila za mbili onena kuti m’thawe ya atumwi, Akhilisitu enzelambila tyala Mulungu yeka. Mwachisanzo, buku iyakine yufotokoza za mbili, yunena kuti Akhilisitu amene aŵa “sembe enyansiwa” na maganizo okatishila ntchito mafano mmalo olambilila. Masiku ŵano, a Mboni za Yehova okonkheja chisanzo cha Akhilisitu oyambilila. Sewo tupemphelalini kuli vizindikilo va “atuŵa” olo kuli angelo; ndipo sewo tupemphelalini olo kuli Yesu. Komasoti tupelekalini ulemu ku mbendela olosoti kuchita chinthu chilichonse chamene chingawoneshe kuti tulambila chalo chasu. Paliye kanthu na vangayeje aliyense kutikakamija kuti tichite, sewo nise osimikijila kumvwila mawu ŵa Yesu akuti: “Yehova Mulungu wako niye waufunikila kulambila.”—Mt. 4:10.

7. Kansi a Mboni za Yehova osiyana tyani ngako na vipembezo vonse viyakine?

⁷ Masiku ŵano ŵanthu anyinji okonda ngako kumvwishila alaliki otchuka. Ove ochita chidwi ngako na alaliki amene aŵa mwakuti osala patontho kuti ayambe kulambila ove. Ŵanthu anyinji oluta ku matchetchi ŵawo, ogula mabuku ŵawo, ndipo opeleka ndalama zinyinji kuli asogoleli a matchetchi amene awo olo kuli magulu amene oŵayavya. Ŵanthu ayakine okhulupilila chilichonse chakunena alaliki amene awo. Ove okondwela ngako kuwona alaliki amene awo monga ni mwangakondwelele kuwona Yesu! Koma ŵanthu amene olambila Mulungu mu njila yoyenelela okonkhejalini ŵanthu. Olo kuti tulemekeza ŵala osogolela, sewo tukumbukila mawu omvwika luweme ŵechiphunzisa Yesu akuti: “Monse nimwe abale.” (Mt. 23:8-10) Sewo tulambilalini ŵanthu, olo ankhale asogoleli a vipembezo olo olamulila a ndale. Ndipo tuyavyalini vipembezo vawo olo kuyavya kukwanilisha volinga va ndale. Komasoti, tutolamolini mbali mu ndale ndipo tupewa kunkhala ku mbali ya chalo. Tetyo pa vonse vamene ivi, sewo nise osiyana ngako na vipembezo viyakine vamene vunena kuti ni va Chikhilisitu.—Yoh. 18:36.

8. Kansi tuziŵa tyani kuti Yehova ofuna kuti zina yake ilemekezewe komasoti kuti iziŵike kuli ŵanthu anyinji?

⁸ Nthawe iyakine, Yesu epemphela kuti: “Atata, lemekezani zina yanu.” Yeka Yehova eyankha pemphelo yamene iyo na mawu olilima ofumila kululu, kulonjeza kuti azalemekeze zina yake. (Yoh. 12:28) Pa nthawe yonse ya utumiki wake, Yesu enzelemekeza zina ya Atata ŵake. (Yoh. 17:26) Tetyo, Akhilisitu achendi owona kuti ni mwayi ukulu kukatishila ntchito zina ya Mulungu na kuiziŵikisha kuli ayakine.

9. Kansi Akhilisitu a m’nthawe ya atumwi ewonesha tyani kuti enzelemekeza zina ya Mulungu?

⁹ M’vyaka voyambilila va m’ma 100 C.E., papita kanthawe katontho pavuli pakuti mpingo Wachikhilisitu wankhazikishiwa, Yehova ‘echeukila ŵanthu a mitundu iyakine kwa nthawe yoyamba, kuti muli ove atolemo ŵanthu oziŵika na zina yake.’ (Mac. 15:14) Akhilisitu a  m’nthawe ya atumwi enzemekela kukatishila ntchito zina ya Mulungu ndipo enzeiziŵikisha kuli ŵanthu ayakine. Ove enzekatishila ntchito ngako zina ya Mulungu mu utumiki komasoti penzelemba mabuku a m’Baibolo. * Pochita vamene ivi ove enzewonesha kuti enze tyala ŵanthu amozi amene enzeziŵikisha zina ya Mulungu.—Mac. 2:14, 21.

10. Kansi tuziŵa tyani kuti ni a Mboni za Yehova tyala amene oziŵikisha zina ya Yehova?

¹⁰ Kansi a Mboni za Yehova ni ŵanthu chendi a Yehova? Tiyeni tiwone maumboni ŵake. Masiku ŵano asogoleli anyinji a vipembezo ochita vilivonse vangakwanishe kuti zina ya Mulungu osati iziŵike. Ove achosamo m’ma Baibolo ŵawo zina ya Mulungu ndipo mpaka nthawe ziyakine olesha kukatishila ntchito zina yamene iyi m’matchetchi mwawo. * N’vowonekelatu kuti ni a Mboni za Yehova tyala amene opeleka ulemu na ulemelelo ku zina ya Mulungu. Sewo tuchitisha kuti zina ya Mulungu iziŵike ngako kupambana gulu iyakine iliyonse ya chipembezo! Tikochita tetyo, niye kuti tuchita vonse vatingakwanishe pochita vinthu mokatijana na zina yasu, yakuti Mboni za Yehova. (Yes. 43:10-12) Tafalisa ma Baibolo opitilila 240 miliyoni a Baibulo la Dziko Latsopano la Malemba Opatulika, yamene mupezeka zina ya Yehova mmalo amene ichosewamo na omasulila Baibolo ayakine. Ndipo tufalisa mabuku  m’vilaŵilo vopitilila 1.000 amene mfundo zake zufumila m’Baibolo komasoti amene okatishila ntchito zina ya Yehova!

11. Kansi Akhilisitu oyambilila ewonesha tyani kuti enzekonda chonadi?

¹¹ Yesu enzekonda chonadi, kutanthauza kuti enzekonda chendi chonena za Mulungu na volinga Vake. Yesu enzekonkheja mfundo zamene izi za chonadi ndipo eziŵikisha mfundo zamene izi kuli ŵanthu ayakine. (Yoh. 18:37) Ophunzila ngawo-ngawo a Yesu nawo enzekonda ngako chonadi. (Yoh. 4:23, 24) Komasoti ntumwi Petulo enena kuti Chikhilisitu ni “njila ya chonadi.” (2 Pet. 2:2) Chifukwa chokonda ngako chonadi, Akhilisitu oyambilila ekana malingalilo a vipembezo, miyambo, vinkhalidwe, komasoti malingalilo a ŵanthu amene enze osakatijana na chonadi. (Akol. 2:8) Molingana na vamene ivi masiku ŵano, Akhilisitu achendi oyeja-yeja mwamphamvu “kuyenda m’chonadi,” ove ochita vamene ivi mwa kukhulupilila na ntima wawo wonse pa Mawu a Yehova komasoti pa vochita vawo vonse pa moyo wawo.—3 Yoh. 3, 4.

12. Kansi n’chinji chuchitika keno abale a m’Bungwe Yutonga aphunzila kuti tufunikila kuchinja pa mwatumvwila olo pa mwatuchitila chinthu chiyakine, ndipo ndaŵa yanji ove ochita vamene ivi?

¹² A Mboni za Yehova onenalini kuti ove nthawe zonse omvwisha luweme chinthu chilichonse m’Baibolo. Nthawe ziyakine, ove ophoniyesha pa mwakufotokozela mfundo ya m’Baibolo olo pa mwakuyendeshela mpingo. Ivi vufunikalini kutidabwisa. Baibolo yunena momvwika luweme kuti ŵanthu ŵake omvwisha luweme chendi cha m’Baibolo mu kupita kwa nthawe. (Akol. 1:9, 10) Yehova oulula chonadi patontho-patontho, ndipo sewo tufunika tyala kunkhala okonzeka kuyembekezela moleza ntima mpaka pa nthawe yakuti tizachimvwishe luweme chonadi. (Miy. 4:18) Keno abale a m’Bungwe Yutonga aphunzila kuti tufunikila kuchinja pa mwatumvwila olo pa mwatuchitila chinthu chiyakine, ove ochelwalini kuchinja. Matchetchi anyinji ŵano masiku, ochinja viphunziso vawo chifukwa chakuti ofuna kukondwelesha ŵanthu a mutchetchi mwawo olo kufuna kuti ankhale otchuka pachalo. Koma sewo a Mboni za Yehova tuchinja chifukwa chakuti tufuna kunkhala pa ushamwali na Mulungu komasoti tufuna kumulambila mu njila yenzemulambililamo Yesu. (Yak. 4:4) Sewo tuchinja chifukwa chakuti taimvwisha luweme Baibolo osati chifukwa chakuti maganizo a ŵanthu achinja pachalo yayi. Sewo tuchikonda chendi cha m’Baibolo!—1 Ates. 2:3, 4.

13. Kansi nkhalidwe yofunika ngako yechiwonesha Akhilisitu oyambilila ni yotyani, ndipo kansi nkhalidwe yamene iyi yuwonekela tyani pakati pa a Mboni za Yehova masiku ŵano?

¹³ Akhilisitu oyambilila enzeziŵika na minkhalidwe inyinji iweme, koma nkhalidwe ikulu ngako yenzeziŵika nayo yenze chikondi. Yesu enena kuti: “Mukochita tetyo, onse azaziŵe kuti nimwe ophunzila ŵangu—ngati mukondana.” (Yoh. 13:34, 35) Masiku ŵano, a Mboni za Yehova pachalo chonse osangalala na chikondi ngacho-ngacho komasoti mgwilizano. Sewo nise osiyana ngako na vipembezo viyakine vonse chifukwa tili monga ni banja imozi olo kuti tufumila m’vyalo komasoti m’vinkhalidwe vosiyana. Sewo tuwona umboni wa chikondi ngacho-ngacho pamisonkhano ya mpingo, ya dela komasoti yachigawo. Vamene ivi vutisimikijilasoti ngako kuti sewo tulambila Yehova mu njila yumukondwelesha.

14. Mokatijana na lemba ya Akolose 3:12-14, kansi ni njila iyakine yotyani yatingawoneshele chikondi chikulu kuli ayasu?

 ¹⁴ Malemba otilangiza kuti “tufunika kukondana muyake na muyake.” (1 Pet. 4:8) Njila imozi yatingawoneshele chikondi chamene ichi ni kukhululukilana muyake na muyake komasoti kutaya kutali vakutiphoniyela ayasu chifukwa cha kusoŵa ungwilo. Komasoti sewo tusakila-sakila mipata yakuti tiwoneshele kunkhala opasa komasoti ntima wotandaja kuli onse mumpingo, olosoti kuli ŵala amene otikhumudwisha. (Ŵelengani Akolose 3:12-14.) Keno sewo tuwonesha chikondi monga ni chamene ichi, niyekuti tuwonesha kuti nise Akhilisitu.

15. Kansi ni njila ziyakine zotyani zatukonkhejela Akhilisitu oyambilila polambila?

¹⁵ Tukonkheja njila yenzekatishila ntchito Akhilisitu oyambilila polambila, mu njila ziyakinesoti. Mwachisanzo, tulinganija vinthu monga ni mwenzechitila ove—tili na opanamila madela, akulu komasoti atumiki othandiza—monga ni mwenzele ove. (Afil. 1:1; Tit. 1:5) Ndipo sewo tulemekeza malamulo a Yehova pa nkhani za kuyonana komasoti mabanja, vakunena Mulungu pa nkhani ya kukatishila ntchito milopa, ndipo tuteteza mpingo kuli ŵala amene ofunalini kukonkheja malamulo a Mulungu.—Mac. 15:28, 29; 1 Akor. 5:11-13; 6:9, 10; Ahe. 13:4.

16. Kansi tuphunzilapo chinji pa mawu opezeka pa lemba ya Aefeso 4:4–6?

¹⁶ Yesu enena kuti anyinji azanene kuti ni ophunzila ŵake, koma ni onselini akuti azankhale achendi. (Mt. 7:21-23) Malemba enenelatusoti kuti m’masiku osilijila, anyinji azankhale tyala “owoneka monga ni olipeleka kwa Mulungu.” (2 Tim. 3:1, 5) Komalomba, Baibolo yutiuja momvwika luweme kuti pali “chikhulupililo chimo” chakuvomekeja Mulungu.—Ŵelengani Aefeso 4:4–6.

17. Kansi niŵani okonkheja Yesu masiku ŵano nokhulupilila vinthu vimozi?

¹⁷ Kansi niŵani okhulupilila vinthu vimozi vachendi masiku ŵano? Takambilana maumboni. Sewo takambilana chisanzo cha kulambila chechiphunzisa Yesu komasoti mwenzechitila Akhilisitu oyambilila. Yankho ni imozi tyala yakuti—ni a Mboni za Yehova. Ni mwayi ukulu ngako kunkhala mmozi wa ŵanthu a Yehova na kuziŵa chendi cha m’Baibolo chonena za Yehova komasoti cholinga chake! Tetyo tufuna kuchita vonse vatingakwanishe kuti tichikatishishe mwamphamvu chonadi.