1. Tikaganizila za munthu wachifundo, kansi n’chinji chuwela m’maganizo mwasu?

TIKAGANIZILA za munthu wachifundo, payakine tingaganize za munthu muweme ntima, wachikondi komasoti wopasa. Payakine tingakumbukilesoti za nkhani yechifotokoza Yesu yokhuza Msamariya wachifundo. Munthu wamene uyo enzelini Myuda, koma ‘echitila chifundo’ Myuda wamene enze eiŵiliwa noniyatiwa ngako na vigaŵenga. Msamariya wamene uyo “echita chifundo” na Myuda wamene enze ewonongewa ngako ndipo mwachikondi epanga makonzedwe akuti amusamalile. (Lk. 10:29-37) Chisanzo chamene ichi chuwonesha nkhalidwe iweme ngako ya Mulungu—yamene ni chifundo. Nsiku zonse Yehova otichitila chifundo mu njila zinyinji, ndipo ochita vamene ivi chifukwa chakuti otikonda.

2. Kansi njila iyakine yowoneshela chifundo ni yotyani?

² Palisoti njila iyakine yamene munthu yangawoneshele chifundo. Munthu wachifundo payakine angasankhe kuti osati alange munthu wamene enzefunikila kupasiwa chilango. Poganizila vamene ivi, tingawone kuti Yehova otichitila chifundo tonse. Wamasalimo enena kuti, yove “otichitilalini molingana na machimo ŵasu.” (Sal. 103:10) Koma nthawe ziyakine, Yehova olanga mwamphamvu munthu wamene wachita chimo.

3. Kansi tikambilane makonsho otyani?

³ Mu nkhani ino tikambilane makonsho atatu aŵa: Ndaŵa yanji Yehova owonesha chifundo? Kansi pali kukatijana kotyani pakati pa kupeleka chilango champhamvu kuli munthu, na kumuwonesha chifundo? Lomba n’chinji chingatiyavye kuti tikowonesha chifundo? Tiyeni tiwone mwakuyankhila mawu a Mulungu makonsho amene aŵa.

4. Ndaŵa yanji Yehova owonesha chifundo?

⁴ Yehova okonda kuchita vinthu mwachifundo. Ntumwi Paulo  elemba kuti Mulungu ni “wachifundo chikulu.” Penzelemba vamene ivi, Paulo enzefotokoza mwechiwoneshela chifundo Mulungu popeleka chiyembekezo chakuti atumiki ŵake ozozewa, amene aliye ungwilo akankhale kululu. (Aef. 2:4–7) Koma Yehova aliyewoneshe tyala chifundo kuli atumiki ŵake ozozewa. Wolemba masalimo Davide enena kuti, “Yehova owamila ntima aliyense, ndipo ntchito zake zonse ozichitila chifundo.” (Sal. 145:9) Chifukwa chakuti Yehova okonda ŵanthu, yove oŵachitila chifundo pakankhala chifukwa chomvwika chochitila vamene ivo.

5. Kansi Yesu eziŵa tyani za chifundo cha Yehova?

⁵ Kupambana aliyense, Yesu niye oziŵa luweme mwamene Yehova mwakuwoneshela chifundo. Yehova na Yesu enkhala pamozi kululu kwa vyaka vinyinji, Yesu wamene uyo penze akaliyewela pano pachalo. (Miy. 8:30, 31) Yesu enzewona mwenzewoneshela chifundo Atata ŵake maulwendo anyinji kuli atumiki ŵake. (Sal. 78:37-42) Akophunzisa, nthawe zinyinji yove enzefotokoza za nkhalidwe yamene iyi iweme ya Atata ŵake.

6. Kansi Yesu etiyavya tyani kumvwisha chifundo cha Atata ŵake?

⁶ Monga ni mwetifotokozela mu nkhani yapita, Yesu ekatishila ntchito fanizo ya mwana woloŵelela pofuna kutiyavya kumvwisha kuti Yehova okonda ngako kuwonesha chifundo. Mwana wamene uyu efuma kwawo ndipo “ewononga chuma chake chonse mwa kuloŵelela m’minkhalidwe iipa.” (Lk. 15:13) Pavuli pake elapa noleka minkhalidwe yake yamene iyo iipa, elichefya ndipo ejokela kwawo. Lomba kansi atata ŵake echita chinji? Paliyepite nthawe itali kuti mwana wamene uyo aziŵe mwenzemvwila atata ŵake amene awo. Yesu enena kuti: “[Mwana wamene uyo] akali patali, atata ŵake emuwona ndipo echita chifundo. Pamene apo emuutukila nomukumbatila ndipo emukising’a wachikondi.” Atata ŵake aliyemuchitishe nsoni mwana wawo wamene uyo. Mmalomwake, ove emukhululukila mwachifundo ndipo emulondelasoti m’banja mwawo. Mwana wamene uyo woloŵelela enze echita vinthu viipa ngako, koma chifukwa chakuti elapa, atata ŵake emukhululukila. Atata amene awo a mufanizo yamene iyi opanamila Yehova. Pofotokoza fanizo yamene iyi, Yesu ewonesha kuti Atata ŵake ni ofunishisha kukhululukila ochimwa amene alapa na ntima wonse.—Lk. 15:17-24.

7. Kansi nzelu za Yehova zukatijana tyani na chifundo chakuwonesha yove?

⁷ Yehova owonesha chifundo chifukwa cha nzelu zake ziliye malile. Yehova ni wanzelu, koma osati tyala chifukwa chakuti oziŵa vinthu vinyinji. Koma mmalomwake, Baibolo yunena kuti: “Nzelu yofumila kululu” ni “yozula na chifundo na vitwazi viweme.” (Yak. 3:17)  Molingana na kolo yachikondi, Yehova oziŵa kuti chifundo chake chuyavya ngako ŵana ŵake. (Sal. 103:13; Yes. 49:15) Pakuti Yehova owonesha chifundo ŵanthu ŵake, ove oyembekezela vinthu viweme kusogolo olo kuti aliye ungwilo. Tetyo, nzelu za Yehova zamene ziliye malile, zumuchitisha kuti akowonesha chifundo pakankhala chifukwa chomvwika chochitila vamene ivo. Koma yove oziŵasoti nthawe yasafunika kuwonesha chifundo. Pakuti ni wanzelu, yove olekelelalini vinthu viipa pofuna tyala kuwonesha chifundo.

8. Kansi nthawe ziyakine pofunika kuchita chinji na munthu wamene wachita chimo, ndipo ndaŵa yanji?

⁸ Tiyelekezele kuti ntumiki wa Mulungu mwalona wasankha kuti akochita machimo. Kansi tufunika kuchita chinji? Yehova eujila Paulo kulemba kuti: “Muleke kukatijana” naye. (1 Akor. 5:11) Ŵanthu amene achita machimo koma osalapa ochosewa mumpingo. Kuchita vamene ivi n’kofunika chifukwa kuteteza abale na alongo ŵasu okhulupilika komasoti kuwonesha kuti Yehova ni ntuŵa. Koma ayakine oganiza kuti keno munthu wachosewa mumpingo niye kuti Mulungu aliyemuchitile chifundo. Kansi vamene ivi n’vachendi? Tiyeni tiwone.

9-10. Mokatijana na lemba ya Aheberi 12:5, 6, ndaŵa yanji tinganene kuti kuchosa ŵanthu osalapa mumpingo kuwonesha chifundo cha Yehova? Pelekani chisanzo.

⁹ Tikamvwa chilengezo pamisonkhano chonena kuti munthu muyakine watuziŵa komasoti watukonda “ni wa Mbonilinisoti za Yehova,” tikumvwa chisoni ngako. Payakine tingokaikila keno kwenze koyenela chendi kuti munthu wamene uyo achosewe. Lomba kansi n’chendi kuti kuchosa munthu mumpingo n’kuwonesha chifundo? Eye n’kuwonesha chifundo. Kuleka kupeleka chilango kuli munthu wamene enzefunikila chilango chamene icho n’kusoŵa nzelu, chifundo komasoti chikondi. (Miy. 13:24) Kansi kuchosa munthu wosalapa mumpingo kungamuyavye kuti achinje? Eye. Abale na alongo amene enzechita machimo akulu-akulu enena kuti kuchosewa mumpingo niye kwiŵayavya kuziŵa kuphoniya kwawo, kulapa komasoti kuchinja nkhalidwe yawo nojokela kwa Yehova.—Ŵelengani Aheberi 12:5, 6.

¹⁰ Ganizilani chisanzo ichi: Tiyelekezele kuti chiŵeta waziŵa kuti mbelele yake iyakine yulwala. Pofuna kuyavya mbelele yamene iyo kuti ipole, yove oziŵa kuti poyamba ofunika kuichosa pakati pa ziyake. Koma olo n’tetyo, mbelele zukonda kunkhala pamozi ndipo zingasokonezeke keno munthu wazipatula. Kansi pamene apa tinganene kuti chiŵeta wamene uyo ochita nkhanza popatula yala mbelele yulwala? Yayi n’tetyolini. Yove oziŵa kuti keno angalole kuti yamene iyo mbelele ikoyenda mphela na ziyake, ingapasileko mbelele ziyake matenda ŵaili nawo. Tetyo, kupatula mbelele yamene iyo yulwala kungateteze ziyake.—Yelekezelani na Levitiko 13:3, 4.

11. (a) Kansi munthu wochosewa olingana tyani na mbelele yamene yulwala? (b) Kansi wochosewa angachite vinthu votyani ndipo angayavyiwe tyani?

¹¹ Mkhilisitu akachosewa mumpingo, tingamuyelekezele na mbelele yamene yulwala. Tinganene kuti yove olwala mwauzimu. (Yak. 5:14) Molingana na matenda opasilana, munthu wamene wawononga ushamwali wake na Yehova angalimbikise ŵanthu ayakinesoti kuti akochita viipa. Tetyo, niye chifukwa chake nthawe ziyakine pangafunike kuchosa munthu mumpingo wamene olwala mwauzimu. Chilango chamene ichi chuwonesha kuti Yehova okonda mbelele zake zokhulupilika ndipo chingakwanishe kuyavya munthu wochimwa wamene uyo kuziŵa kuphoniya kwake nolapa. Pa nthawe yamene yove ni wochosewa, angoluta kumisonkhano, kwamene angolondela malangizo omuyavya kutang’ishasoti chikhulupililo chake. Angofwanasoti mabuku akuti akoŵelenga nophunzila. Komasoti angololela pulogilamu ya JW Broadcasting^®. Akulu akawona mwakuchinjila angamupase malangizo nthawe na nthawe omuyavya kuti awamyesoti  ushamwali wake na Yehova na cholinga chakuti ajoshelewe nonkhalasoti wa Mboni za Yehova. *

12. Kansi ni njila ikulu yotyani yangawoneshele chikondi komasoti chifundo akulu kuli munthu wosalapa?

¹² Tufunika kukumbukila kuti ni ŵala tyala ŵanthu ochimwa asafuna kulapa, amene ochosewa mumpingo. Akulu oziŵa kuti nkhani yamene iyi ni ikulu ndipo oiwonalini mopepuka. Ove oziŵa kuti Yehova opeleka chilango “mu njila yoyenela.” (Yer. 30:11) Ove okonda abale ŵawo ndipo ofunalini kuchita chilichonse chamene chingawononge ushamwali wawo na Yehova. Koma olo n’tetyo, nthawe ziyakine pofuna kuwonesha chikondi komasoti chifundo, akulu angachose munthu mumpingo wamene wachita chimo.

13. Ndaŵa yanji Mkhilisitu muyakine ku Korinto enzefunika kuchosewa mumpingo?

¹³ Ganizilani mwechichitila vinthu ntumwi Paulo na munthu wamene echita chimo koma osalapa. Mkhilisitu muyakine ku Korinto etola mwanakazi wa atata ŵake. Vamene ivi venze viipa ngako! Pa nkhani yamene iyi, Yehova euja Aisiraeli kuti: “Mwanalume woyona na mwanakazi wa atata ŵake, wavula atata ŵake. Mwanalume na mwanakazi wamene uyo akopaiwa.” (Lev. 20:11) N’chendi kuti Paulo aliyepeleke chigamulo chakuti munthu wamene uyo apaiwe. Koma euja Akhilisitu a ku Korinto kuti amuchose mumpingo. Nkhalidwe iipa ya munthu wamene uyo yenzesokoneza ayakine mumpingo, mwakuti ŵanthu ayakine enzewonalinisoti kuti yamene iyi ni chimo ikulu!—1 Akor. 5:1, 2, 13.

14. Kansi Paulo ewonesha tyani chifundo kuli munthu wochosewa ku Korinto, ndipo ndaŵa yanji? (2 Akorinto 2:5–8, 11)

¹⁴ Papita nthawe, Paulo echizakumvwa kuti wala munthu wachinja ngako. Munthu wamene uyo wochimwa enze elapa kufumila pansi pa ntima. Olo kuti munthu wamene uyo enze echitisha nsoni mpingo, Paulo euja akulu kuti enzefunikalini kuchita vinthu “mwamphamvu ngako” kapena kuti moyumisha vinthu. Yove eŵalangiza kuti: “Mukhululukileni na ntima wonse na kumutonthoja.” Ndipo epeleka chifukwa chechiŵaujila mawu amene aŵa ponena kuti: “Kuyopela kuti payakine woteti angamelelewe na chisoni chake chopitilila malile.” Paulo emvwila chisoni munthu wamene uyo wamene elapa. Yove enzefunalini kuwona munthu wamene uyo ovutika ngako muntima chifukwa cha vinthu viipa venze echita mpaka kuyamba kuwona kuti angakhululukiliwelinisoti.—Ŵelengani 2 Akorinto 2:5–8, 11.

15. Kansi akulu angachite tyani kuti akowona moyenela nkhani yopeleka chilango komasoti yowonesha chifundo?

 ¹⁵ Molingana na Yehova, akulu okonda kuchitila ayakine chifundo. Ove opeleka chilango champhamvu keno pangafunikile kuchita tetyo koma owoneshasoti chifundo keno n’vokwanishika komasoti pakankhala vifukwa vomvwika vochitila vamene ivo. Koma keno akulu angamusiye munthu wamene uyo wochimwa osamupasa chilango chilichonse, chingankhalelini chifundo koma kulekelela vinthu. Koma kansi ni akulu ŵeka ofunika kuwonesha chifundo?

16. Mokatijana na lemba ya Miyambo 21:13, kansi Yehova ochita tyani kuli ŵanthu amene owoneshalini chifundo?

¹⁶ Akhilisitu onse oyeja-yeja kukonkheja chifundo cha Yehova. Ndaŵa yanji? Chifukwa chimozi n’chakuti Yehova omvwishilalini mapemphelo a ŵanthu amene ochitilalini chifundo ayawo. (Ŵelengani Miyambo 21:13.) Paliye wamene angafune kuti Yehova osati akomvwishila mapemphelo ŵake. Tetyo, tufunika kupewa kunkhala ŵanthu ayumu mitima. Mmalo mokana kumvwishila Mkhilisitu muyasu akotifotokozela mavuto ŵake, nthawe zonse tufunika kunkhala okonzeka kumvwishila “kudandaula kwa munthu wonyozeka.” Tetyo, tikoyeja-yeja kukumbukila mfundo yakuti: “Asachita chifundo azaweluziwe mosachitiliwa chifundo.” (Yak. 2:13) Keno nase tuziŵa kuti tufunikila kuwoneshewa chifundo, niyesoti pavunkhala vosavuta kuwonesha ayakine chifundo. Tufunika kuwonesha chifundo makamaka munthu akalapa nojokela mumpingo.

17. Kansi Mfumu Davide ewonesha tyani chifundo chofumila pansi pa ntima?

¹⁷ Visanzo va m’Baibolo, vingatiyavye kuti tinkhale achifundo nopewa kunkhala ŵanthu ayumu mitima. Mwachisanzo, ganizilani za Mfumu Davide. Nthawe zinyinji, yove enzechitila chifundo ayakine kufumila pansi pa ntima. Olo kuti Sauli enzefuna kumupaya Davide, yove enzechitila chifundo mfumu yamene iyi yozozewa na Mulungu, ndipo aliyeyeje kuwejela olo kuiwononga.—1 Sam. 24:9-12, 18, 19.

18-19. Kansi ni pa nthawe ziŵili zotyani paliyewoneshe chifundo Davide?

¹⁸ Koma olo n’tetyo, ni nthawe zonselini penzewonesha chifundo Davide. Mwachisanzo, Nabala wamene enze muyumu ntima pechilaŵila vinthu vamwano komasoti kukana kupasa Davide chakulya na analume onse ŵenze nawo, yove ekalipa ndipo eganiza zakuti akamupaye Nabala pamozi na analume onse a m’ng’anda yake. Koma nkazi wa Nabala Abigayeli, wamene enze muweme ntima, echita vinthu mokulumija ndipo eyavya Davide kuti osati apalamule mulandu wa milopa.—1 Sam. 25:9-22, 32-35.

¹⁹ Nthawe iyakine, mneneli Natani euja Davide za munthu muyakine wolemela wamene etola mbelele ya munthu muyakine wosauka. Pechimvwa nkhani yamene iyo, mokalipa Davide enena kuti: “Shuwa, pali Yehova Mulungu wamoyo, munthu ochita vamene ivi ofunika kufwa!” (2 Sam. 12:1–6) Davide enzeziŵa kuti Chilamulo cha Mose chunena kuti munthu akaiŵa mbelele imozi enzefunika kujoshela mbelele zokwana 4. (Eks. 22:1) Lomba mpaka kunena kuti munthu wamene uyo apaiwe? Chamene ichi chenze chilango chankhanza. Natani efotokoza fanizo yamene  iyi pofuna kuwonesha machimo akulu-akulu—ŵechichita yove Davide! Koma Yehova emuchitila chifundo chikulu Davide kusiyana na venzefuna kuchita yove Davide kuchitila munthu woiŵa mbelele wa mufanizo ya Natani!—2 Sam. 12:7-13.

20. Kansi tingaphunzile chinji kufumila pa chisanzo cha Davide?

²⁰ Tikati tiwone, Davide pechikalipa ngako eganiza kuti Nabala pamozi na analume ŵenze nawo enzefunikila kupaiwa. Ndipo pavuli pake, Davide eweluza kuti munthu wa mufanizo ya Natani enzefunikilasoti kupaiwa. Koma Davide enze munthu wachikondi. Lomba ndaŵa yanji eweluza wala munthu woiŵa mbelele mwankhanza tetyo? Ganizilani vamene venze vimuchitikila kwalombapano. Pa nthawe yamene iyo Davide enzelini na chikumbuntima chiweme. Keno munthu ochita nkhanza komasoti kungoweluza ayakine, owonesha kuti moyo wake wauzimu ulilini luweme. Yesu echenjeja ophunzila ŵake mwamphamvu kuti: “Lekani kuweluza ayanu kuti mwewo namwe osati muweluziwe, pakuti chiweluzo chamuweluza nacho ayanu, mwewo namwe muzaweluziwe nacho.” (Mt. 7:1, 2) Tetyo, tiyeni tikoyeja-yeja kupewa kunkhala ayumu mitima, ndipo tikokonkheja Mulungu wasu wamene ni “wachifundo chikulu.”

21-22. Kansi ni njila ziyakine zotyani zatingawoneshele chifundo?

²¹ Chifundo chutanthauzalini kungomvwila tyala chisoni ŵanthu ayakine. Mmalomwake, ŵanthu “achifundo ochitapo kanthu pofuna kuyavya ayakine.” Tetyo, tonse tufunika kunkhala tchelu kuti tiziŵe vakufunikila ŵanthu a m’banja mwasu, mumpingo olo mu dela yatunkhala. Kulaŵila chendi, tili na mipata inyinji yatingawoneshele chifundo kuli ayakine! Kansi pali munthu muyakine wamene ofunika kulimbikisiwa? Kansi tingamupase thandizo yofunikila, payakine kumupasako chakulya olo kumuchitila chinthu chiyakine chingamuyavye? Kansi pali Mkhilisitu wamene wajoshelewa kwalombapano wamene angafunikile kumutonthoja komasoti kumulimbikisa? Kansi tingaujeko ayakine uthenga uweme wolimbikisa? Zamene izi ni ziyakine mwa njila ziweme ngako zowoneshela chifundo kuli aliyense watakumana naye.—Yobu 29:12, 13; Aro. 10:14, 15; Yak. 1:27.

²² Keno tingankhale tchelu, tingawone kuti pali mipata inyinji yatingawoneshele chifundo kuli ayakine. Keno tuwonesha chifundo, tukondwelesha ngako Atata ŵasu ŵakululu, wamene ni Mulungu “wachifundo chikulu”!