Munkhani yamene iyo, tiphunzila kuti pali nkhani imozi yamene yukhuza volengewa vonse vanzelu: kutuŵishiwa kwa zina ikulu ya Yehova. Nkhani yakuti ulamulilo wa Yehova ni uweme kapena yayi, niyokatijana na kutuŵishiwa kwa zina ya Yehova. Molingana na vamene ivi, keno munthu angapitilije mphela kunkhala wokhulupilika kwa Yehova kapena yayi, vukatijana soti na nkhani yofunika yamene iyi ya kutiŵishiwa kwa zina ya Yehova.

Ndaŵa yanji palipano tusimikijila kuti nkhani ikulu ngako ni yonena za zina ya Yehova na kutuŵishiwa kwake? Tiyeni tikambilane vifukwa vitatu.

Choyamba, Satana eukila zina ya Yehova, kapena kuti mbili yake mmunda wa Edeni. Konsho yamene Satana yechikonsha Hava, iwonesha kuti Yehova aliye ntima wopasa komasoti kuti malangizo ŵechipeleka kuli Adamu na Hava enzelini achilungamo. Pavuli pake, Satana enena vinthu vosiyana na vechinena Yehova. Yove enena kuti Mulungu niwawenye. Tetyo, yove enkhala “Mdyelekezi” kutanthauza kuti “maleŵaniya.” (Yoh. 8:44) Chifukwa chakuti Hava ekhulupilila wenye wamene uyu, yove aliye mvwile Mulungu, ndipo epandukila ulamulilo wake. (Gen. 3:1–6) Mpaka lelo, Satana wankhala onyoza zina ya Mulungu mwa kufalisa vinthu va wenye vokhuza zina ya Yehova. Ŵanthu amene okhulupilila wenye wamene uyu, angakwanishelini kumvwila Yehova. Tetyo, kuli ŵanthu a Mulungu, kunyozesha zina ituŵa ya Yehova, n’kusoŵa chilungamo kuipa ngako. Kuchita vamene ivi, niye maziko akulu a masauso anyinji amene ali pano pachalo.

Chachiŵili, pofuna kupindulisha chilengedwe chonse, Yehova azatuŵishe zina yake, nochosa tonjo yonse pa zina yamene iyo. Chamene ichi n’chinthu chofunika ngako kuli Yehova. Yove enena kuti: “Nizatuŵishe zina yangu ikulu.” (Eze. 36:23) Ndipo Yesu emvwikisha luweme chinthu chamene chufunika kunkhala pamalo oyamba pa mapemphelo onse a atumiki okhulupilika a Yehova, pamene pechinena kuti: “Zina yanu ituŵishiwe.” (Mt. 6:9) Baibolo moweleja-weleja yusimikijila ngako kufunika kolemekeza zina ya Yehova. Onani visanzo vitontho tyala: “Mupaseni Yehova ulemelelo wa zina yake.” (1 Mbiri 16:29; Sal. 96:8) “Imbani nyimbo zotamanda zina yake.” (Sal. 66:2) “Nizalemekeze zina yanu mpaka kale-kale.” (Sal. 86:12) Nthawe iyakine yamene Yehova yechilaŵila kufumila kululu ichitikila pakachisi ku Yerusalemu, pamene Yesu pechinena kuti: “Atata, lemekezani zina yanu.” Poyankha, yove enena kuti: “Nailemekeza ndipo nizailemekezesoti.”—Yoh. 12:28. a

Chachitatu, cholinga cha Yehova chipitilije mphela mpaka kale-kale kunkhala chokatijana na zina yake kapena kuti mbili yake. Ganizilani ivi: Kansi n’chiji chikuti chizachitike pavuli pa chiyeso chosilijila chamene chikuti chizachitike pavuli pa Ulamulilo wa Vyaka 1.000 wa Khilisitu? Kansi volengewa vauzimu vizapitilije mphela kunkhala voyaŵikana pa nkhani ikulu ya kutuŵishiwa kwa zina  ya Yehova? Kuti tiyankhe konsho yamene yi tiyeni tikumbukile mbali ziŵili zamene n’zokatijana—kukhulupilika kwa ŵanthu komasoti ulamulilo wa chilengedwe chonse. Kansi ŵanthu amene ankhala okhulupilika azapitilije mphela kulimbana na vuto ya kupitilija kunkhala okhulupilika? Yayi. Ove azankhale ŵanthu angwilo, ndipo azankhale kuti ayesewa kale mokwanila. Ove azankhale kuti alondela kale moyo wosasila. Pazafunikilelinisoti kusimikijila kuti ulamulilo wa Yehova ni uweme ngako. Panthawe yamene iyo, ŵanthu onse kululu na pachalo azankhale okatijana ndipo azavomeleje ulamulilo wa Yehova. Lomba tyani ponena za zina ya Yehova?

Panthawe yamene iyo aliyense azaziŵe choonadi chonena za Yehova na zina yake, ndipo zina yamene iyi izatuŵishiwe ngako. Koma olo n‘tetyo, zina ya Yehova izapitilije mphela kunkhala yofunika ngako kuli atumiki ŵake onse. Ndaŵa yanji? Chifukwa ove azawone Yehova opitilija kuchita vinthu vodabwisa. Ganizilani ivi: Chifukwa chakuti Yesu molichefya azapeleke ulamulilo wonse kuli Yehova, Mulungu azankhale “vinthu vonse kuli aliyense.” (1 Akor. 15:28) Pavuli pake, ŵanthu pachalo azasangalale na “ufulu waulemelelo wa ŵana a Mulungu.” (Aro. 8:21) Ndipo Yehova azakwanilishe cholinga chake chonkhala na banja imozi yokatija, yopangiwa na ŵana ŵake akululu na apachalo.—Aef. 1:10.

Kansi vamene ivi vizakhuze tyani banja ya Yehova ya kululu na yapachalo? N’pomvwika kuti tizankhale ofunishisha—na ntima wonse—kupitilija kutamada zina iweme ya Yehova. Wamasalimo Davide eujiliwa kulemba kuti: “Adalisike Yehova Mulungu . . . Idalisike zina yake ya ulemelelo mpaka kale-kale.” (Sal. 72:18, 19) Mpaka kale-kale, sewo tizapitilije kufwana vifukwa vanyowani komasoti vosangalasa vochitila vamene ivi.

Ndipo zina ya Yehova yupanamila chilichonse chokhuza yove. Tetyo, maka-maka zina yake yutikumbusha za chikondi chake. (1 Yoh. 4:8) Sewo tizankhale tukumbukila nthawe zonse chikondi chechitiwonesha Yehova pechitilenga komasoti pechipeleka Dipo. Ndipo tikokumbukila nthawe zonse kuti ulamulilo wake niwolungama kumasoti wachikondi. Koma tizapitilije kuwona mwamene Yehova mwakukondela vinthu vechilenga. Mpaka kale-kale, sewo tizankhale ofunishisha kumuvwendelela yove monga Atata ŵasu, komasoti kuimba nyimbo zotamanda zina yake yaulemelelo.—Sal. 73:28.