1. Mokatijana na Aheberi 12:1, kansi tufunikila kuchita chinji kuti tipambane pa mpikishano watili nawo?

 BAIBOLO yuyelekezela moyo wasu monga Akhilisitu na mpikishano woutuka. Ŵanthu amene angasilije mpikishano woutuka wamene uyu azalondele moyo wosasila. (2 Tim. 4:7, 8) Tufunikila kuyeja-yeja kupitilija kuutuka chifukwa nzela wosilijila uli pafupi ngako kupambana kale yonse. Ntumwi Paulo wamene esilija luweme mpikishano wake wakuyalondela moyo, etomola vinthu viyakine vamene vingatiyavye kuti tipambane. Yove etilangiza kuti “tivule cholema chilichonse komasoti . . . tiutuke mopilila pa mpikishano wamene uyu watiikila.”—Ŵelengani Aheberi 12:1.

2. Kansi ‘kuvula cholema chilichonse’ kutanthauza chinji?

² Kansi Paulo pechilemba kuti tufunikila “kuvula cholema chilichonse”, enzetanthauza kuti paliye ntolo wamene Nkhilisitu wangafunikile kunyamula? Yayi, mfundo yake yenzelini yamene iyo. Yove enzetanthauza kuti sewo tufunikilalini kunyamula cholema chilichonse chamene n’chosafunikila kunyamula. Volema vantundu wamene uyo vingotikangisha kuutuka luweme komasoti vingatiŵeŵeshe. Kuti tipitilije kuutuka, sewo tufunikila kuziŵa keno pali cholema chilichonse chamene chatilinyamule nochitaya mokulumija. Koma olo n’tetyo, pa nthawe imo na imo yamene iyo sewo tufunalini kutaya ntolo wamene watufunikila kunyamula. Kuleka kuchita tetyo, tingankhalelini oyenelela kuutuka pa mpikishano wamene uyu. (2 Tim. 2:5) Kansi tufunikila kunyamula ntolo wotyani?

3. (a) Mokatijana na Agalatiya 6:5, kansi sewo tufunikila kunyamula chinji? (b) Kansi tikambilane chinji mu nkhani ino, ndipo ndaŵa yanji?

 ³ Ŵelengani Agalatiya 6:5. Paulo etomola chinthu chiyakine chamene chatufunikila kunyamula. Yove elemba kuti “aliyense ofunikila kutakula ntolo wake.” Apa lomba Paulo efotokoza udindo watili nawo pamenso pa Mulungu wamene watufunikila kulitakulila seka. Mu nkhani ino tiwone vinthu vamene vili m’gulu ya ‘ntolo wasu’ komasoti mwatingautakulile. Ndipo tiwonesoti volema vosafunikila vamene tufunikalini kuvinyamula noziŵa mwatingavitaile. Kutakula ntolo wasu notaya ntolo wolema wamene watisafunikila kuutakula, kuzatiyavye kuutuka luweme pa mpikishano wakuyalondela moyo.

4. Ndaŵa yanji n’chinthulini chovuta ngako kukwanilisha lonjezo yetichita yotumikila Yehova mpaka kale-kale? (Onanisoti chithunzi.)

⁴ Lonjezo yasu yakulipeleka. Pa nthawe yetilipeleka kwa Yehova, tilumbila kuti tikomulambila nochita chifunilo chake. Sewo tufunikila kukwanilisha lonjezo yamene iyi. Kuchita vinthu mokatijana na kulipeleka kwasu ni udindo ukulu, koma kuchita vamene ivi n’chinthulini  chovuta ngako kuli sewo. Ndipo kulaŵila chendi, Yehova etilenga kuti tikochita chifunilo chake. (Chiv. 4:11) Yove etilenga na ntima wofuna kumuziŵa nomutumikila, ndipo etipanga mu chifanizilo chake. Chifukwa cha vamene ivi, sewo tukwanisha kunkhala naye pa ushamwali nosangalala pochita chifunilo chake. (Sal. 40:8) Ndipo keno tuchita chifunilo cha Mulungu nokonkheja Mwana wake ‘tizasisimuliwe.’—Mt. 11:28-30.

5. Kansi n’chinji chingakuyavyeni kukwanilisha lonjezo yanu ya kulipeleka? (1 Yohane 5:3)

⁵ Kansi mwewo mungaunyamule tyani ntolo wamene uyu? Onani vinthu viŵili vamene vingakuyavyeni. Choyamba, pitilijani kukulisha chikondi chanu pa Yehova. Mungachite vamene ivi poganizila viweme vonse vawakuchitilani komasoti madaliso awakusungilani. Mukayamba kumukonda ngako Mulungu niyesoti pavisavuta ngako kumumvwila. (Ŵelengani 1 Yohane 5:3.) Chachiŵili, mukokonkheja Yesu. Yove ekwanisha kuchita chifunilo cha Mulungu chifukwa enzepemphela kwa Yehova kuti amuyavye, ndipo epitilija kuika maganizo ŵake pa mphaso. (Ahe. 5:7; 12:2) Molingana na Yesu, mukopemphela kwa Yehova kuti akupaseni mphamvu nopitilija kuika maganizo ŵanu onse pa chiyembekezo cha moyo wosasila. Mukayamba kumukonda ngako Mulungu nokonkheja Mwana wake, mwewo muzakwanilishe lonjezo yanu ya kulipeleka.

6. Ndaŵa yanji tufunikila kukwanilisha udindo wasu wa m’banja? (Onanisoti chithunzi.)

⁶ Maudindo a m’banja. Pa mpikishano wasu wa kuyalondela moyo, tufunikila kukonda ngako Yehova na Yesu kupambana achibale ŵasu. (Mt. 10:37) Koma vamene ivi vutanthauzalini kuti tikonyalanyaza maudindo ŵasu a m’banja. Mosiyana na vamene ivi, kuti tinkhale ovomelejeka kwa Mulungu na Khilisitu, sewo tufunikila kukwanilisha maudindo ŵasu a m’banja. (1 Tim. 5:4, 8) Tikachita tetyo, tizankhale osangalala ngako. Ndipo kulaŵila chendi, Yehova epanga mabanja kuti akoyenda luweme keno mwanalume na mwanakazi wake ochitilana vinthu mwachikondi na mwaulemu, makolo akophunzisa ŵana ŵawo, komasoti keno ŵana omvwila makolo ŵawo.—Aef. 5:33; 6:1, 4.

7. Kansi mungachite tyani kuti mukokwanilisha udindo wanu m’banja?

⁷ Kansi mwewo mungaunyamule tyani ntolo wamene uyu? Mosasamala kanthu za udindo wamuli nawo m’banja, mukodalila malangizo a m’Baibolo mmalo modalila nzelu za ŵanthu, chinkhalidwe, kapena vakunena akaswili kuti niye vamufunikila kuchita. (Miy. 24:3, 4) Mukokatishila ntchito luweme mabuku ofotokoza Baibolo. Mabuku amene aŵa ofotokoza njila zoyavya zokhuza mwatingakatishilile ntchito mfundo za m’Baibolo. Mwachisanzo, pachigawo chakuti “Mfundo zothandiza mabanja” pali nkhani zukatijana na mavuto amene mabanja, makolo, komasoti achilumbwana ŵakukumana nawo masiku ŵano. b Nkhalani osimikija ntima kukonkheja vayunena Baibolo, olo kuti ayakine m’banja mwanu oikonkhejalini. Mukachita tetyo, banja yanu izapindule ndipo muzasangalale na madaliso a Yehova.—1 Pet. 3:1, 2.

8. Kansi vosankha vasu vutikhuza tyani?

⁸ Udindo wamene watili nawo pa vosankha vatupanga. Yehova etipasa ufulu wosankha ndipo yove ofuna kuti tikosangalala na mapindu amene owela chifukwa chosankha luweme. Koma yove otitetezalini soti ku vokonkhapo va vosankha vasu viipa. (Aga. 6:7, 8) Pa chifukwa chamene ichi, sewo tili na udindo wokumana  na vuto iliyonse yamene ingawele chifukwa chakuti tasankha, talaŵila, olo tachita chinthu chiyakine chiipa. Mokatijana na vinthu vamene vatachita, chikumbuntima chasu chingatiimbe mulandu. Koma olo n’tetyo, kuziŵa kuti sewo tili na udindo pa vosankha vamene vatusankha, kungatichitishe kuulula machimo ŵasu, kuleka kuchita vinthu viipa, komasoti kupewa kuwelejela vinthu vetiphoniyesha. Kuchita vamene ivi kungatiyavye kupitilija mphela kuutuka pa mpikishano wakuyalondela moyo.

9. Kansi n’chinji chingakuyavyeni kulimbana na kusankha vinthu mophoniyeka? (Onanisoti chithunzi.)

⁹ Kansi mwewo mungaunyamule tyani ntolo wamene uyu? Keno mwewo mwipanga vosankha viipa, kansi mungachite tyani? Ziŵani kuti mungakwanishelini kuchinja vakale. Osawononga nthawe na mphamvu zanu poyeja kulilungamisha mweka, olo kuyeja kuimba mulandu ŵanthu ayakine chifukwa cha vophoniya vanu. Mmalo mwake vomelejani vophoniya vanu, ndipo yeja-yejani kupitilija kuchita viweme mokatijana na mwavilili vinthu pamoyo wanu palipano. Keno muliimba mulandu chifukwa cha vophoniya vemwichita, pemphelani kwa Yehova molichefya, vomelejani vophoniya vanu, ndipo musengeni kuti akukhululukileni. (Sal. 25:11; 51:3, 4) Mukopepesa ŵanthu amene ŵemwikhumudwisa, ndipo keno pangafunikile sengani thandizo kuli akulu. (Yak. 5:14, 15) Phunzilamponi kanthu pa vophoniya vanu, ndipo yeja-yejani kupewa kuti osati muzawelejelesoti. Mukachita tetyo, ziŵani kuti Yehova azakuchitileni chifundo ndipo azakuyavyeni.—Sal. 103:8-13.

10. Ndaŵa yanji kuyembekezela vinthu vosakwanishika ni ntolo wolema? (Agalatiya 6:4)

¹⁰ Kuyembekezela vinthu vosakwanishika. Sewo tingaliŵeŵeshe seka keno tuliyelekezela na ŵanthu ayakine. (Ŵelengani Agalatiya 6:4.) Keno nthawe zonse tulilinganija na ayakine, tingankhale ŵanthu anjilu komasoti ampikishano. (Aga. 5:26) Tikoyeja-yeja kuchita vinthu vakuchita ŵanthu ayakine olo panthawe yamene sewo tingakwanishelini kuchita vamene ivo, tingaliwononge seka. Ganizilanisoti ivi: Baibolo yutiuja kuti kuyembekezela chinthu chiyakine kungankhale kofokesha. Tetyo, kungankhale kofokesha ngako kuyembekezela chinthu chiyakine chamene payakine n’vosakwanishika kunkhala nacho! (Miy. 13:12) Kuchita vamene ivi kungatiŵeŵeshe ngako, notikangisha kuutuka luweme pa mpikishano wakuyalondela moyo.—Miy. 24:10.

11. Kansi n’chinji chingakuyavyeni kupewa kuyembekezela vinthu vosakwanishika?

¹¹ Kansi mwewo mungaunyamule tyani ntolo wamene uyu? Osati mokoliyembekezela kuchita vinyinji kupambana vakufuna Yehova. Yove oyembekezela lini kuti mukomupasa vinthu vamuliye. (2 Akor. 8:12) Ziŵani kuti Yehova olinganijalini vamuchita mwewo na vakuchita ŵanthu ayakine. (Mt. 25:20-23) Yove otembeja utumiki wamuchita na ntima wonse, kukhulupilika kwanu, komasoti kupilila kwanu. Molichefya mukovomeleja kuti nsinkhu wanu thanzi yanu komasoti mwavilili vinthu pamoyo wanu palipano, vingakukangisheni kuchita vonse vamungakwanishe. Molingana na Barizilai, nkhalani okonzeka kukana ntchito ziyakine zamene mungazikwanishelini kukata chifukwa cha thanzi kapena nsinkhu wanu. (2 Sam. 19:35, 36) Molingana na Mose, mukolola kuti ayanu akuyavyeni nopeleka ntchito ziyakine kuli ayakine keno pangafunikile kuchita vamene ivo. (Eks. 18:21, 22) Kulichefya kwamene uko kuzakuyavyeni kupewa kuyembekezela vinthu vosakwanishika vamene vingakukangisheni kuutuka luweme pa mpikishano wakuyalondela moyo.

12. Kansi tili na udindo pa vosankha viipa vakupanga ayakine? Fotokozani.

¹² Kuliimba mulandu chifukwa cha vosankha  viipa vakupanga ŵanthu ayakine. Sewo tingakwanishelini kupangila ayakine vosankha kapena kuŵateteza nthawe zonse ku vokonkhapo viipa va vosankha vawo. Mwachisanzo, mwana mwanalume olo mwanakazi angasankhe kuleka kutumikila Yehova. Chosankha monga ni chamene ichi chingalete chisoni chikulu kuli makolo. Koma olo n’tetyo, makolo amene oliimba mulandu chifukwa cha vosankha viipa va mwana wawo, onkhala na ntolo woŵeŵesha. Yehova oyembekezelalini kuti makolo akotakula ntolo monga ni wamene uyu.—Aro. 14:12.

13. Kansi kolo ingalimbane tyani na chosankha chiipa cha mwana wawo?

¹³ Kansi mwewo mungaunyamule tyani ntolo wamene uyu? Kumbukilani kuti Yehova etipasa ufulu wosankha. Ndipo yove olola kuti munthu aliyense akolisankhila yeka vochita. Vamene ivi vupamikijapo kusankha kumutumikila kapena yayi. Yehova oziŵa kuti mwewo nimwelini kolo yangwilo, yove ofuna tyala kuti mukochita vonse vamungakwanishe. Vosankha vakupanga mwana wanu ni udindo wake osati wanu. (Miy. 20:11) Koma olo n’tetyo, payakine mwewo mungadandaule mphela chifukwa cha vinthu vemwiphoniyesha monga kolo. Keno n’tetyo, muujeni Yehova mwamumvwila ndipo musengeni kuti akukhululukileni. Yove oziŵa kuti mwewo mungakwanishelini kujokela m’masiku akuvuli nochinja vinthu vamene vichitika. Pa nthawe imo na imo yamene iyo, yove oyembekezelalini kuti mwewo muteteze mwana wanu ku vokonkhapo viipa va vinthu vechisankha. Mukokumbukila kuti keno mwana wanu angachite vonse vangakwanishe kuti ajokele kwa Yehova, yove azamulondelesoti na ntima wonse.—Lk. 15:18-20.

14. Ndaŵa yanji kuliimba mulandu ngako ni ntolo woŵeŵesha wamene watufunikila kutaya?

¹⁴ Kuliimba mulandu nthawe zonse. Keno tachimwa, n’vomvwika kuliimba mulandu. Koma olo n’tetyo, kuliimba mulandu ngako ni ntolo woŵeŵesha wamene tufunikalini kuutakula. Koma ni ntolo watufunikila kutaya. Kansi tingaziŵe tyani kuti tuliimba mulandu ngako? Tikaulula machimo ŵasu nolapa komasoti kuchita vonse vatingakwanishe popewa kuŵachitasoti, tingankhale na chidalilo chakuti Yehova  watikhululukila. (Mac. 3:19) Pavuli pochita vamene ivi, yove ofunalini kuti tikopitilija kuliimba mphela mulandu. Yove oziŵa kuti kuliimba mulandu mosalekeja, kungatiwononge. (Sal. 31:10) Keno tingolimvwila chisoni mopitilila malile, tingaleke kuutuka pa mpikishano wakuyalondela moyo.—2 Akor. 2:7.

15. Kansi n’chinji chingakuyavyeni kulimbana na vuto ya kuliimba mulandu ngako? (1 Yohane 3:19, 20) (Onanisoti chithunzi.)

¹⁵ Kansi mwewo mungaunyamule tyani ntolo wamene uyu? Keno mwewo muvutika na kuliimba mulandu ngako, mukoganizila ngako za Mulungu wamene “okhululukila chendi.” (Sal. 130:4) Yove akakhululukila ŵanthu amene alapa mofumila pansi pa ntima, oŵalonjeza kuti: “Nizakumbukilelini soti machimo ŵawo.” (Yer. 31:34) Vamene ivi vutanthauza kuti Yehova azaganizilelisoti za machimo ŵanu. Tetyo, mukawona vokonkhapo viipa va machimo ŵanu osati mukowona kuti ni umboni wakuti Yehova aliye kukhululukileni. Komasoti osati mukolikalipila mweka chifukwa chakuti payakine mwiluza maudindo ayakine mumpingo. Yehova onkhalilalini kuganizila za vophoniya vanu, ndipo namwe mufunikila lini kuviganizila.—Ŵelengani 1 Yohane 3:19, 20.

16. Monga outuka, kansi tufunikila kuzindikila chinji?

¹⁶ Patuutuka pa mpikishano wakuyalondela moyo, tufunikila “kuutuka mwanjila yakuti tikalondele [mphaso] yamene iyo.” (1 Akor. 9:24) Tingachite vamene ivi keno tuziŵa kusiyana kwamene kulipo pakati pa ntolo watufunikila kunyamula, na ntolo woŵeŵesha watufunikila kutaya. Munkhani ino takambilana visanzo vitontho tyala, va vinthu vatufunikila kunyamula na vinthu vatufunikila kutaya. Koma palisoti vinthu viyakine vamene vatufunikila kuchita. Yesu enena kuti “mitima yanu osati ilemewe na kulya ngako, kumwa ngako, na nkhaŵa za moyo.” (Lk. 21:34) Malemba monga ni amene aŵa komasoti ayakine, angakuyavyeni kuziŵa vinthu vamene vamufunikila kuchinja pamuutuka pa mpikishano wakuyalondela moyo.

17. Ndaŵa yanji tingankhale na chidalilo kuti tizapambane pa mpikishano wakuyalondela moyo?

¹⁷ Tingankhale osimikija ntima kuti tizapambane pa mpikishano wakuyalondela moyo, chifukwa Yehova azatipase mphamvu zamene zatufunikila. (Yes. 40:29-31) Tetyo, osati muchelwe! Konkhejani ntumwi Paulo wamene echita vonse vagakwanishe kuti alondele mphaso yamene yechimuikila pasogolo pake. (Afil. 3:13, 14) Paliye munthu aliyense wamene angakuutukileni pa mpikishano wa kuyalondela moyo wamene uyu, koma na thandizo ya Yehova mwewo mungapambane. Yehova angakuyavyeni mwewo kunyamula ntolo wamufunikila kunyamula notaya ntolo wosafunikila. (Sal. 68:19) Yehova akankhala kumbali yanu, mwewo mungakwanishe kuutuka mopilila pa mpikishano wakuyalondela moyo nopambana!