1. Kansi atumiki a Mulungu enzetang’ishiwa tyani m’masiku akuvuli?

 KANYINJI-KANYINJI, Mawu a Mulungu ofotokoza za ŵanthu okhulupilika monga ŵanthu amphamvu. Koma ayakine mwa ŵanthu amene awo, ni nthawe zonse lini penzelimvwa kuti ni amphamvu. Mwachisanzo, nthawe ziyakine Mfumu Davide enzelimvwa kuti ni ‘wotang’a monga ni lupili’, koma nthawe ziyakine yove ‘esokonezeka.’ (Sal. 30:7) Olo kuti Samisoni enze na mphamvu zodabwisa moyavyiwa na mzimu wa Mulungu, yove enzeziŵa kuti paliye kuyavyiwa na Mulungu, “angafoke nonkhala monga ni ŵanthu onse.” (Ower. 14:5, 6; 16:17) Analume okhulupilika amene aŵa enze na mphamvu chifukwa chakuti Mulungu enzeŵayavya.

2. Ndaŵa yanji ntumwi Paulo enena kuti enzewofoka komasoti wamphamvu? (2 Akorinto 12:9, 10)

² Naye ntumwi Paulo enzeziŵa kuti enzefunikila mphamvu zofumila kwa Mulungu. (Ŵelengani 2 Akorinto 12:9, 10.) Molingana na anyinji a sewo, Paulo naye enzelimbana na matenda. (Aga. 4:13, 14) Nthawe ziyakine, yove enzevutika kuchita vinthu viweme. (Aro. 7:18, 19) Nthawe ziyakine enzenkhala na nkhaŵa komasoti wokaikila-kaikila. (2 Akor. 1:8, 9) Koma olo n’tetyo, Paulo akankhala wofoka, enzefwana mphamvu. Motyani? Yehova enzemupasa mphamvu zenzefunikila. Yove enzemutang’isha Paulo.

3. Kansi munkhani ino tiyankhe makonsho otyani?

³ Yehova olonjeza kuti nase azatitang’ishe. (1 Pet. 5:10) Koma sewo tingayembekezele lini kulondela mphamvu zamene izo paliye kuchitapo kanthu. Mwachisanzo, injini ingachitishe kuti motoka iyende. Koma olo n’tetyo, wonyendesha ofunikila kuleving’a kuti akwanishe kuluta kwakufuna. Molingana na vamene  ivi, Yehova niwokonzeka kutipasa mphamvu zatufunikila, koma sewo tufunikila kuchitapo kanthu kuti tipindule nazo. Kansi Yehova etipasa chinji kuti tinkhale otang’a? Ndipo tufunikila kuchita chinji kuti tilondele mphamvu zamene izo? Tifwane mayankho amakonsho amene aŵa pokambilana mwamene Yehova mwechitang’ishila ŵanthu atatu otomolewa m’Baibolo—mneneli Yona, Mariya amayi ŵake a Yesu, komasoti ntumwi Paulo. Tiwonesoti mwamene Yehova mwakupitilijila kutang’isha atumiki ŵake masiku ŵano molingana na mwenzechitila kuvuli.

4. Kansi tingalondele tyani mphamvu zofumila kwa Yehova?

⁴ Njila imozi yatingafwanile mphamvu zofumila kwa Yehova ni kumuvwendela mpemphelo. Poyankha mapemphelo ŵasu Yehova angatipase “mphamvu yopambana yachibadwa.” (2 Akor. 4:7) Tingatang’ishiwe soti tikoŵelenga Mawu ŵake noŵaganizila. (Sal. 86:11) Uthenga wakutiuja Yehova wamene uli m’Baibolo ‘ni wamphamvu.’ (Ahe. 4:12) Mukopemphela kwa Yehova noŵelenga Mawu ŵake, muzafwane mphamvu zamufunikila kuti mukwanishe kupilila, kupitilija kunkhala osangalala, komasoti kukwanisha kuchita utumiki wovuta. Onani mwamene Yehova mwechitang’ishila mneneli Yona.

5. Ndaŵa yanji mneneli Yona enzefunikila kutang’ishiwa?

⁵ Mneneli Yona enzefunikila kutang’ishiwa. Yove enze ethaŵa utumiki wovuta wamene wechimupasa Yehova. Monga vokonkhapo vake, yove enze esala patontho kuluza moyo wake, komasoti enze eika moyo wa ayake ŵenze nawo m’boti pangozi. Pechiponyewa mmanzi, yove enkhala mmalo amene enze akaliyenkhalapo kufumila kale yonse—mmala mwa chinsomba chikulu. Kansi muganiza kuti Yona echimvwa tyani? Kansi yove enzeyembekezela kufwila mwamene umo? Olo payakine yove enzeganiza kuti Yehova wamukana? N’vowonekelatu kuti Yona enze na nkhaŵa ngako.

6. Mokatijana na Yona 2:1, 2, 7, n’chinji chimutang’isha Yona penze mmala mwachinsomba?

⁶ Kansi Yona echita tyani kuti afwane mphamvu mmalo ayeka-yeka monga ni amene awo? Chinthu chimozi, n’chakuti yove epemphela. (Ŵelengani Yona 2:1, 2, 7.) Olo kuti yove enze aliyemvwile Yehova, Yona enze na chidalilo kuti Yehova ayankhe pemphelo yake yowonesha kulichefwa komasoti kulapa. Yona eganizila soti vokhuza Malemba. Ndaŵa yanji tinganene tetyo? Pemphelo yake yamene ilembewa m’chapitala 2 cha Yona, yukata mawu komasoti mavesi anyinji amene ali m’buku ya Masalimo. (Mwachisanzo, yelekezelani na Yona 2:2, 5 na Salimo 69:1; 86:7.) N’vowonekelatu kuti Yona enzeŵaziŵa luweme Malemba amene aŵa. Ndipo mwakuganizila vokhuza malemba amene aŵa panthawe yake yovuta, yove enkhala na chidalilo chakuti Yehova angamuyavye. Pavuli pake, Yona ejoshelewa ku ntunthu, ndipo yove enzewokonzeka kulondela utumiki uyakine noukwanilisha.—Yon. 2:10–3:4.

7–8. Kansi m’bale muyakine waku Taiwan efwana tyani mphamvu penzekumana na mavuto?

⁷ Chisanzo cha Yona chingatiyavye keno tukumana na viyeso vosiyana-siyana. Mwachisanzo, m’bale muyakine waku Taiwan zina yake Zhiming, b olwala matenda akulu. Kuyangijila pamene apo, yove oshushiwa na achibale ŵake chifukwa cha chikhulupililo chake mwa Yehova. Yove ofwana mphamvu zofumila kwa Yehova mwa kupemphela komasoti kuphunzila payeka. Yove enena kuti: “Nthawe ziyakine mavuto akayambika nunkhala na nkhaŵa ikulu mwakuti nukwanishalini kunkhazika ntima pansi kuti nichite phunzilo ya paneka.” Koma yove aliyetaye ntima. Yove enenasoti kuti: “Choyamba, nupemphela kwa Yehova. Pavuli pake, nuika ma ediseti mmatu nomvwishila nyimbo zasu za Ufumu. Ndipo  nthawe ziyakine, nuimba chapansi-pansi mpaka ntima wangu unkhale mmalo. Pavuli pake nuyamba kuphunzila.”

⁸ Kuphunzila payeka kwamutang’isha Zhiming mwanjila zenzeleka yembekezela. Mwachisanzo, penzepola upaleshoni yake ikulu, adokota ŵake enena kuti chifukwa cha kuchepa kwa maselo asweta amilopa, yove enzefunikila kuikiwa milopa. Akaliyechitiwa upaleshoni, Zhiming eŵelenga vokhuza mulongo muyakine wamene enze echitiwa upaleshoni yolingana na yenzeyembekezela yove. Maselo asweta amilopa yake enze atontho ngako kupambana mwenzele ŵake; koma olo n’tetyo, yove aliyevomele kuikiwa milopa ndipo ekwanisha kupola. Nkhani yamene iyo imuyavya Zhiming kuti apitilije kunkhala mphela wokhulupilika.

9. Mukafoka chifukwa cha vuto yamukumana nayo, kansi mungachite tyani? (Onanisoti vithunzi.)

⁹ Mukakumana na mavuto, kansi mwewo munkhala na nkhaŵa ikulu nokanga kupempela luweme? Kapena mulimvwa kunkhala ofoka ngako mwakuti mungakwanishelini kuphunzila pamweka? Mukokumbukila kuti Yehova oziŵa luweme vamene vamukumana navo pa moyo wanu. Tetyo, olo mungapeleke pemphelo yachidule, mungankhale osimikijila kuti yove azakupaseni ngavo-ngavo vamufunikila. (Aef. 3:20) Keno vuto yamene yamukumana nayo mwakuthupi olo mwammaganizo yuchitisha kuti mukovutika kuŵelenga kapena kuphunzila, mwewo mungachite luweme kumvwishila ma audiyo ochitatepa a Baibolo olo avofalisa vofotokoza Baibolo. Vingankhalesoti voyavya kumvwishilako nyimbo olo kulolela vidiyo iyakine yapa jw.org. Mwakupemphela kwa Yehova nosakila yankho mu vofalisa vauzimu vamene vakutipasa, mwewo muzankhale monga mumusenga kuti akutang’isheni.

10. Kansi abale na alongo ŵasu Achikhilisitu angatitang’ishe tyani?

¹⁰ Yehova angakatishile ntchito abale na alongo ŵasu kuti atitang’ishe. Ove “angatiyavye na kutitang’isha” patukumana na mavuto olo patuvutika kuchita utumiki uyakine. (Akol. 4:10, 11) Sewo tufunikila chendi azishamwali maka-maka “pakawoneka mavuto.” (Miy. 17:17) Tikafoka abale na alongo ŵasu angatipase vinthu vatufunikila, mwauzimu, komasoti mwammaganizo.  Ganizilani mwamene Mariya mwechilondelela thandizo kufumila kuli ayake.

11. Ndaŵa yanji Mariya enzefunikila kutang’ishiwa?

¹¹ Mariya enzefunikila kutang’ishiwa. Ganizilani mwechimvwila wowa pechilondela utumiki wovuta kuli mngelo Gabirieli. Yove enzelini pabanja; koma olo n’tetyo, yove enzeyembekela kunkhala na vumo. Mariya enze akaliyelelapo mwana aliyense, koma yove enzefunikila kulela mwana wamene enzeyembekezela kunkhala Mesiya. Lomba pakuti ove enze akaliyeyonanapo, kansi Mariya sembe eifotokoza tyani nkhani yamene iyi kuli chibwenzi chake Yosefe?—Lk. 1:26-33.

12. Mokatijana na Luka 1:39-45, kansi Mariya efwana tyani mphamvu zenzefunikila?

¹² Kansi Mariya elondela tyani mphamvu nzenzefunikila kuti akwanilishe utumiki wake wovuta komasoti wachilwendo monga ni wamene uyu? Yove esakila thandizo kuli ayakine. Mwachisanzo, yove esenga Gabirieli kuti amufotokozele vinyinji vokhuza utumiki wamene uyo. (Lk. 1:34) Pakaliye pita nthawe ikulu, yove epanga ulwendo woluta “kudela ya malupili” ya Yuda kuyawona mkwake Elizabeti. Ulwendo wamene uyo wenze uweme ngako. Elizabeti emutang’isha ngako Mariya ndipo moujiliwa na Yehova yove elaŵila ulosi wokhuza mwana wa Mariya wamane enze akali mmala. (Ŵelengani Luka 1:39-45.) Mariya enena kuti Yehova “wachita zamphamvu na kwanja yake.” (Lk. 1:46-51) Yehova emutang’isha Mariya kupitila muli Gabirieli komasoti Elizabeti.

13. Kansi mulongo muyakine waku Bolivia edalisiwa tyani chifukwa choyavya okhulupilila ayake?

¹³ Molingana na Mariya mwewo namwe mungatang’ishiwe na Akhilisitu ayanu. Mulongo muyakine waku Bolivia zina yake Dasuri, enzefunikila kulimbikisiwa mwanjila yamene iyi. Atata ŵake pechiŵafwana na matenda amene angapolelini, Dasuri elipeleka kuti akoŵasamalila. (1 Tim. 5:4) Kuchita vamene ivi kwenzelini kupepu nthawe zonse. Yove enena kuti, “Nthawe zinyinji newo nenzewona kuti ningakwanishelini kupilila.” Kansi yove esenga thandizo? Poyamba yove aliyechite vamene ivo. Yove efotokoza kuti: “Newo nenzefunalini kutamanisha abale. Nenzewona kuti ‘Yehova niye wamene akuti azanipase thandizo yanufunikila.’ Koma pavuli pake, niziŵa kuti kulipatula kwenzechitisha kuti nikoyeja kulimbana na mavuto ŵangu paneka.” (Miy. 18:1) Dasuri esankha kulembelako azishamwali ŵake yakine atontho kuti aŵafotokozele za vuto yake. Yove enena kuti: “Ningakwanishelini kufotokoza mwechinitang’ishila Akhilisitu ayangu okondewa amene awo. Ove eniletela chakulya kuchipatala ndipo eŵelenga nane mavesi olimbikisa am’Baibolo. N’volimbikisa ngako kuziŵa kuti sewo tililini seka. Sewo tili m’banja ikulu ya Yehova—banja yamene niyokonzeka kutiyavya, kulila nase pamozi, komasoti kutiyavya kulimbana na mavuto ŵasu.”

14. Ndaŵa yanji tufunikila kulondela thandizo yofumila kuli akulu?

¹⁴ Njila iyakine yakutitang’ishila Yehova, ni kupitila muli akulu. Ove ni mphaso yakukatishila ntchito Mulungu pofuna kutilimbikisa. (Yes. 32:1, 2) Tetyo, mukankhala na nkhaŵa mukoŵafotokozela akulu mwamumvwila. Mukolondela mosangalala thandizo yangakupaseni. Yehova angakupaseni mphamvu kupitila muli ove.

15. Kansi n’chiyembekezo chotyani chali nacho Akhilisitu onse?

¹⁵ Chiyembekezo chasu chozikiwa m’Baibolo chingatipase mphamvu. (Aro. 4:3, 18-20) Monga Akhilisitu, sewo tili na chiyembekezo chantengo wapatali cha moyo wosasila—mosasamala kanthu keno tizankhale m’paladaiso pano pachalo kapena mu Ufumu wa kululu. Chiyembekezo chasu chutitang’isha kuti tikwanishe kupilila mavuto, kulalikila uthenga uweme komasoti kuchita mautumiki osiyana-siyana  mumpingo. (1 Ates. 1:3) Chiyembekezo chimo na chimo chamene ichi niye chitang’isha ntumwi Paulo.

16. Ndaŵa yanji ntumwi Paulo enzefunikila kutang’ishiwa?

¹⁶ Paulo enzefunikila kutang’ishiwa. M’kalata yake yoluta kuli Akorinto yove eliyelekezela na chiya choumbiwa na lito. Yove ‘enzesokonezeka maganizo,’ ‘kusila nzelu,’ ‘kutamanishiwa,’ komasoti ‘kuwishiliwa pansi.’ Moyo wake wenze chendi pangozi. (2 Akor. 4:8-10) Paulo elemba mawu amene aŵa paulwendo wake wachitatu waumishonale. Vingachitike kuti pathawe yamene iyo yove enzeziŵalini kanthu, koma mavuto ŵake enze akaliyesila. Yove enzeyembekezela kukumana na magulu achiwawa, kumangiwa, kufwaika kwa bote, komasoti kuikiwa mudjeli.

17. Mokatijana na 2 Akorinto 4:16-18, kansi n’chinji chiyavya Paulo kuti akwanishe kupilila mavuto?

¹⁷ Paulo efwana mphamvu kuti akwanishe kupilila mwakuika maganizo ŵake pa chiyembekezo. (Ŵelengani 2 Akorinto 4:16-18.) Yove euja Akhilisitu aku Korinto kuti olo kuti muŵili wake wakunja “usile”, yove azalolelini kuti vamene ivo vimufokeshe. Paulo enzeika maganizo ŵake pa vinthu vakusogolo. Chiyembekezo chake cha moyo wosasila kululu “chenzekulila-kulila”, mwakuti enzewokonzeka kulimbana na chisauso chilichonse changakumane nacho. Paulo enzeganizila vokhuza chiyembekezo chamene icho, ndipo monga vokonkhapo vake, yove enzelimvwa kuti ‘onkhala wanyowani nsiku na nsiku.’

18. Kansi chiyembekezo chimutang’isha tyani Tihomir pamozi na banja yake?

¹⁸ Tihomir, m’bale waku Bulgaria, etang’ishiwa na chiyembekezo chake chakusogolo. Penze pakaliye pita vyaka vinyinji kufumila pechimwalila nsaza wake Zdravko pangozi. Kwa nthawe itali, Tihomir enzelimbana na chisoni chake chikulu ngako. Kuti akwanishe kupilila, yove pamozi na banja yake ankhala oganizila vokhuza chiukililo. Yove efotokoza kuti: “Mwachisanzo, sewo tukambilana malo ŵati tizakumane na Zdravko, chakulya chati tizamukonzele, ŵanthu ŵati tizaite paphwando yove akazauka, komasoti vinthu vati tizamufotozele vokhuza masiku osilijila.” Tihomir enena kuti kuganizila  vokhuza chiyembekezo chawo kuyavya banja yake kuti ikwanishe kupilila nopitilija kuyembekezela nthawe yamene Yehova yakuti azaushe mkwake.

19. Kansi n’chinji chamungachite kuti mutang’ishe chiyembekezo chanu? (Onanisoti chithunzi.)

¹⁹ Kansi mwewo mungatang’ishe tyani chiyembekezo chanu? Mwachisanzo, keno chiyembekezo chanu n’chakuzankhala na moyo pano pachalo, mukoŵelenga vayunena Baibolo vokhuza Paladaiso noviganizila. (Yes. 25:8; 32:16-18) Mukoganizila mwaukuti uzankhalile moyo m’Chalo chanyowani. Yelekezelani kuti muli m’Paladaiso. Kansi niŵani ŵamuwona? Kansi mukumvwa mawu aŵani? Kansi mukumvwa tyani? Kuti mukulishe luso yanu yoganizila, mukowona vithunzi va m’mabuku ŵasu vuwonesha Paladaiso kapena kulolela mavidiyo anyimbo monga akuti Dziko Latsopano Lomwe Likubwera, Dziko Latsopano Lili Pafupi, kapena yakuti Ganizilani nthawe yamene iyo. Keno sewo tingapitilije kuganizila ngako vokhuza chiyembekezo chasu chokhuza chalo chanyowani, mavuto ŵasu azankhale “akanthawe komasoti opepuka.” (2 Akor. 4:17) Yehova, azakuyavyeni kunkhala otang’a kupitila muli chiyembekezo chawakupasani.

20. Olo panthawe yatafoka, kansi tingafwane tyani mphamvu?

²⁰ Olo panthawe yatulimvwa kuti nise ofoka, ‘na thandizo ya Mulungu tizafwane mphamvu.’ (Sal. 108:13) Yehova wakupasani kale vamufunikila kuti munkhale amphamvu. Tetyo, mukafunikila thandizo kuti mukwanilishe utumiki uyakine, kuti mupilile mavuto, kapena kuti mupitilije kunkhala osangalala, mukovwendela kwa Yehova kupitila m’pemphelo yofumila pansi pa ntima nosakila malangizo ŵake mwa kuphunzila pamweka. Mukolola kuti abale na alongo ŵanu Achikhilisitu akulimbikiseni. Pitilijani kuganizila ngako za chiyembekezo chanu chakusogolo. Mwewo ‘muzalondele mphamvu zikulu chifukwa cha mphamvu zake [Mulungu] zaulemelelo, kuti mukwanishe kupilila vinthu vonse na kunkhala oleza ntima komasoti osangalala.’—Akol. 1:11.