NKHANI YOPHUNZILA N.° 39
NYIMBO N.° 125 “Odala ni ŵanthu achifundo!”
Fwanani chisangalalo chikulu ponkhala munthu wopasa
“Kupasa kutichitisha kunkhala osangalala ngako kupambana kulondela.”—MACH. 20:35.
CHOLINGA CHANKHANI
Munkhani ino, tiphunzile njila zosiyana-siyana zatingankhalile opasa, komasoti tiwone chifukwa chake kupasa kutichitisha kunkhala osangalala.
1-2. Kansi tupindula tyani chifukwa chakuti Mulungu etilenga kuti tikosangalala ngako tikapeleka mphaso kupambana tikalondela?
YEHOVA pechilenga ŵanthu, eŵapanga mwanjila yakuti akosangalala ngako akapeleka mphaso kupambana mwakusangalalila akalondela ni ove. (Mach. 20:35) Kansi vamene ivi vutanthauza kuti tusangalala lini tikalondela mphaso? Yayi. Sewo tikumvwa bwino munthu akatipasa mphaso, koma tusangalala ngako tikapeleka nisewo mphaso yamene iyo. N’vowonekelatu kuti Yehova etipanga mwanjila yamene iyi kuti tikopindula. Ndaŵa yanji?
2 Chifukwa chakuti Yehova etilenga mwanjila yamene iyi, sewo tingakwanishe kuyangijila chisangalalo chasu. Tingankhale osangalala ngako tikaziŵa vatingachite kuti tiyavye ayakine. Kansi vinthu vamene ivi ni umbonilini wowonesha kuti Mulungu epanga ŵanthu mwanjila yodabwisa ngako?—Sal. 139:14.
3. Ndaŵa yanji Yehova ni “Mulungu wosangalala”?
3 Malemba otisimikijila kuti munthu wopasa onkhala wosangalala, n’chifukwa chake tudabwalini kuti Baibolo yunena kuti Yehova ni “Mulungu wosangalala.” (1 Tim. 1:11) Yove niye Wopeleka mphaso nkulu, komasoti eyamba. Mokatijana na vechilaŵila mtumwi Paulo, Sewo “tili na moyo, tuyenda, komasoti tilipo” chifukwa cha yove. (Mach. 17:28) Kulaŵila chendi “mphaso iliyonse iweme komasoti yangwilo, yufumila kwa Yehova.”—Yako. 1:17.
4. Kansi n’chinji chingatiyavye kunkhala osangalala ngako?
4 Nivowonekelatu kuti aliyense wasewo ofuna kufwana chisangalalo chikulu chamene chuwela chifukwa chopasa. Sewo tingakwanishe kuchita vamene ivi keno tukonkheja Yehova pankhani yopasa. (Aife. 5:1) Nkhani ino, itiyavye kuwona vatingachite keno ŵanthu otitembejalini tikaŵayavya. Kukambilana vamene ivi kutiyavye kuti tipitilije kupeleka mphaso kuli ayakine vamene vingachitishe kuti tikosangalala ngako.
MUKOKONKHEJA NTIMA WOPASA WA YEHOVA
5. Kansi nivinthu votyani vatufunikila vakutipasa Yehova?
5 Kansi ninjila ziyakine zotyani zakuwoneshela Yehova kuti niwopasa? Tiyeni tikambilane visanzo viyakine. Yehova otipasa vinthu vatufunikila pamoyo wasu. Nthawe ziyakine, tunkhala tiliye vinthu vinyinji pamoyo wasu, koma chifukwa cha Yehova, anyinji asewo tili na vinthu vatufunikila pamoyo. Mwachisanzo, Mulungu owoneshesha kuti tili na vakulya, vovwala, komasoti poyona. (Sal. 4:8; Mat. 6:31-33; 1 Tim. 6:6-8) Kansi Yehova otipasa vinthu vatufunikila pamoyo wasu chifukwa chakuti ni udindo wake tyala? Kansi ndaŵa yanji Yehova otichitila vamene ivi?
6. Kansi tuphunzila chinji pa Mateyo 6:25, 26?
6 Mwachidule, Yehova otipasa vinthu vatufunikila chifukwa chakuti otikonda. Ganizilani mawu ŵechilaŵila Yesu pa Mateyo 6:25, 26. (Ŵelengani.) Yesu ekatishila ntchito chisanzo cha vinthu vam’chilengedwe. Ponena zatunyoni, Yesu elaŵila kuti “tukomolalini mbewu, olo kuweja, tusungalinisoti chakulya m’ng’anda zosungilamo vinthu.” Koma onani mawu ŵechilaŵila pasogolo pake akuti “Atata ŵanu akululu otulyeshela.” Pavuli pake, Yesu ekonsha kuti, “Kansi mwewo nimwelini antengo wapatali kupambana tunyoni?” Kansi tuphunzilapo chinji? Yehova owona kuti ŵanthu ŵake ni antengo wapatali ngako kupambana vinyama vam’chilengedwe. Keno Yehova osamalila vinyama, nasesoti osati tikokaikila kuti azatisamalile! Molingana na tata wachikondi, Yehova osamalila banja yake yauzimu chifukwa chakuti oikonda.—Sal. 145:16; Mat. 6:32.
7. Kansi ninjila yotyani yatingakonkhejele Yehova pankhani yopasa? (Onanisoti chithunzi)
7 Sewo tingamukonkheje Yehova popeleka vinthu vasu kuti tiyavye ayakine chifukwa choŵakonda. Mwachisanzo, kansi pali Nkhilisitu aliyense wamuziŵako wamene ovutika kuti afwane chakulya komasoti vovwala? Yehova angakukatishileni ntchito kuti mumuyavye. Ŵanthu a Yehova oziŵika na mbili yopeleka thandizo kuli Akhilisitu ayawo, ngako-ngako keno pachitika ngozi zam’chilengedwe. Mwachisanzo, panthawe ya mulili wa COVD-19, akwasu na akalongosi enzeyaŵilana vovwala, vakulya, komasoti vinthu viyakine na ŵanthu amene enzevutika. Anyinji enzepeleka vinthu vawo mofunishisha kuti viyavye pantchito yapachalo chonse. Vamene ivi veyavya kuti ntchito yopeleka thandizo pachalo chonse iyende luweme. Ove ekonkheja mawu apa Ahebeli 13:16 akuti: “Osati mukoluŵa kuchita vinthu viweme komasoti kuyaŵila ayakine vinthu vamuli navo, chifukwa nsembe zotetyo Mulungu osangalala nazo.”
Aliyense wa sewo angakwanishe kukonkheja Yehova pankhani yopasa (Onani ndime 7.)
8. Kansi sewo tupindula tyani na mphamvu za Yehova? (Afilipi 2:13)
8 Yehova otipasa mphamvu. Yehova osangalala kuyaŵila atumiki ŵake okhulupilika mphamvu zake ziliye malile. (Ŵelengani Afilipi 2:13.) Kansi mwemusengapo kale Mulungu kuti akupaseni mphamvu kuti mukwanishe kulimbana na mayeselo, kapena kuti akuyavyani kupilila mavuto akulu? Payakine mwemusengasoti Yehova kuti akupaseni mphamvu kuti mukwanishe kuchita chinthu chemwenzefunika kuti muchite nsiku iyakine. Mulungu pechiyankha pemphelo yanu yosenga mphamvu, payakine mwelimvwa monga ni ntumwi Paulo wamene elemba kuti: “Pavinthu vili vonse nufwana mphamvu kuli Mulungu wamene onipasa mphamvu zanufunikila.”—Afil. 4:13.
9. Kansi ninjila zotyani zatingakonkhejele Yehova pokatishila ntchito mphamvu zasu kuti tiyavye ayakine? (Onanisoti chithunzi)
9 Olo kuti tiliye ungwilo, tingamukonkheje Yehova pokatishila ntchito mphamvu zasu molipeleka. N’chendi kuti sewo tingakwanishelini kupeleka mphamvu ngazo-ngazo kuli ayakine. Koma tingakatishile ntchito mphamvu zamene izo poŵayavya. Mwachisanzo, tingalipeleke kuti tikate ntchito ziyakine, monga kuyavya mkwasu wamene niwokalamba olo wolwala ntchito zapamuliyango. Keno vinthu pamoyo wasu vutilola, tingakate nawo ntchito zotuŵisha olo kuwamyasoti vinthu viyakine pa Ng’anda ya Ufumu. Kukatishila ntchito mphamvu mwanjila yamene iyi, kupindulisha ŵanthu ayakine amene olambila Yehova.
Sewo tingakatishile ntchito mphamvu zasu kuti tiyavye ayakine (Onani ndime 9.)
10. Kansi tingakatishile ntchito tyani mphamvu ya mawu kuti tiyavye ayakine?
10 Komasoti mukokumbukila kuti mawu ali na mphamvu. Kansi pali munthu muyakine wamuziŵa wamene angatang’ishiwe na mawu otembeja ofumila pansi pantima? Kansi pali muyakine wamene ali na chisoni ndipo ofunikila kutonthojewa? Keno n’tetyo, chitani vonse vamungakwanishe kuti munthu wamene uyo aziŵe kuti mumuganizila. Mungalute kuyamutandaja, kumutumila foni, kumulembela mawu otang’isha pakhadi, imelo, olo mesedji. Osati mukoyopa ngako kuti mumuuje chinji. Mawu achidule ofumila pansi pantima ŵamungalaŵile, angankhale mawu ngawo-ngawo ŵakufunikila Nkhilisitu muyanu kuti apitilije kulimbana na mavuto ŵake mosangalala.—Miy. 12:25; Aife. 4:29.
11. Kansi Yehova okatishila ntchito mphamvu zake pochita tyani?
11 Yehova otipasa nzelu. Ntumwi Yakobo elemba kuti: “Keno munthu muyakine osoŵa nzelu, akosenga kwa Mulungu ndipo azamupase chifukwa yove opeleka mosayumila kuli munthu aliyense, komasoti opezelalini munthu aliyense vifukwa.” (Yako. 1:5; mawu amnyansi.) Mokatijana na mwakunenela mawu amene aŵa, Yehova otanalini nzelu zake, koma ozipeleka na ntima wonse. Komasoti onani kuti Yehova akafuna kupeleka nzelu “opeleka mosatonja” komasoti ‘paliye kupezela munthu aliyense vifukwa.’ Yove otinyozalini tikalichefya nosenga malangizo ŵake. Ndipo yove otiuja yeka kuti tikosenga malangizo ŵake.—Miy. 2:1-6.
12. Kansi tili na mwayi wotyani watingakatishile ntchito mphamvu zasu?
12 Tyani ponena za sewo, kansi tingakwanishe kumukonkheja Yehova pankhani yoyaŵila ayakine nzelu zasu? (Sal. 32:8) Ŵanthu a Yehova ali na mwayi woujako ayakine vinthu vakuphunzila. Mwachisanzo, nthawe zinyinji tunkhala na mwayi wophunzisa ofalisa anyowani mwangalalikilile. Akulu owonesha kuleza ntima akafuna kuyavya atumiki othandiza komasoti enekwasu obatizika kuti aphunzile mwangachitile mautumiki ŵawo mumpingo. Komasoti ŵanthu amene ali na luso yomanga noŵamya Ng’anda za Ufumu, angaphunziseko ayawo mwangakatile ntchito zamene izo.
13. Kansi tingakonkheje tyani vakuchita Yehova popeleka nzelu kuli ayakine?
13 Ŵanthu amene ophunzisa ayawo, angachite luweme kukonkheja vakuchita Yehova popeleka nzelu zake kuli ŵanthu. Kumbukilani kuti Yehova opeleka nzelu zake mosayumila. Molingana na vamene ivi, sewo tuphunzisa ayasu na ntima wonse vinthu vatuziŵa komasoti maluso ŵasu. Tuyejalini kufisa vinthu viyakine vatuziŵa poyopa kuti munthu watuphunzisa angezetiloŵa m’malo kusogolo. Tupeŵa kunkhala na maganizo akuti: “Newo paliye munthu eniphunzisa! Mulekeni, yove naye aphunzile yeka.” Maganizo otetyo ni osafunika m’gulu ya Yehova. M’malo mwake, tulipeleka mosangalala kuti tiphunzise ayakine vinthu vatuziŵa paliye kuŵafisila kalikonse. (1 Ates. 2:8) Cholinga chasu n’chakuti “nawosoti azankhale oyenelela kuphunzisa ayakine.” (2 Tim. 2:1, 2) Keno tonse tuyaŵilana mosayumila nzelu zatili nazo, tizankhale ŵanthu anzelu komasoti osangalala ngako.
VATINGACHITE KENO ŴANTHU OTITEMBEJALINI
14. Kansi ŵanthu ayakine ochita tyani tikaŵayavya?
14 Tikapeleka mphaso kuli mkwasu olo kalongosi, nthawe zinyinji otitembeja. Nthawe ziyakine, angatitembeje kupitila m’kalata olo m’njila ziyakine. (Akol. 3:15) Mawu otembeja monga ni amene awo angatiyavye kunkhala osangalala ngako.
15. Kansi tikokumbukila chinji keno munthu muyakine aliye titembeje?
15 Koma osati tikoyembekezela kuti ŵanthu akotitembeja nthawe zonse tikaŵayavya. Nthawe ziyakine tingakatishile ntchito nthawe yasu, mphamvu zasu, komasoti katundu kuti tiyavye munthu muyakine, koma munthu wamene uyo osatitembeja mwanjila iliyonse. Vamene ivi vikachitika, kansi n’chinji chingatiyavye kuti tipitilije kunkhala osangalala nopewa kukalipa? Kumbukilani mawu ali pa Machitidwe 20:35, pafumila mutu wa ino nkhani. Chisangalalo chatufwana chifukwa chopasa, chudalilalini vangatichitile ŵanthu. Sewo tingankhale mphela osangalala olo kuti ŵanthu aliyetembeje vatachita. Motyani? Tiyeni tikambilane njila izi zokonkhapo.
16. Kansi tikoganizila ngako chinji pankhani yopeleka mphaso?
16 Mukoganizila ngako vamungachite pokonkheja Yehova. Yove opeleka vinthu viweme kuli ŵanthu otembeja komasoti asatembeja. (Mat. 5:43-48) Yehova otilonjeza kuti keno sewo tupeleka mphaso “paliye kuyembekezela kuti tilondele kalikonse”, vizachitishe kuti ‘mphaso yasu izankhale ikulu.’ (Luk. 6:35) Mawu akuti “kalikonse”, angatanthauze mawu aliwonse otembeja aŵanthu ayakine. Keno ŵanthu atitembeje olo yayi, nthawe zonse Yehova akotipasa mphaso chifukwa cha vinthu ‘vatupeleka mosangalala’ kuti tiyavye ayakine.—Miy. 19:17; 2 Ako. 9:7.
17. Kansi chifukwa chikulu ngako chopelekela mphaso kuli ayakine n’chinji? (Luka 14:12-14)
17 Pa Luka 14:12-14 pali mfundo yofunika yamene ingatiyavye kuti tikoganizila vinthu viweme. (Ŵelengani) N’kuphoniyalini kulondela luweme olo kupasa mphaso munthu wamene angakwanishe kutichitila chimozi-mozi. Koma kansi tufunika kuchita tyani keno nthawe ziyakine tikapasa munthu mphaso tuyembekezela kuti atiwejele? Tingachite luweme kuyeja kukatishila ntchito malangizo ŵechipeleka Yesu. Tingapeleke mphaso kuli munthu wamene angakwanishelini kutiwejela kalikonse. Vamene ivi vingatiyavye kunkhala osangalala chifukwa chokonkheja Yehova. Kuwona vinthu mwanjila iweme monga ni kwamene uku, kungatiyavyesoti kupewa kukhumudwa keno munthu aliyetitembeje pa viweme vatachita.
18. Kansi tikoyeja-yeja kupewa chinji, ndipo ndaŵa yanji?
18 Mukopeŵa kukaikila volinga va ŵanthu ayakine. (1 Ako. 13:7) Keno ŵanthu aliyetitembeje, tingachite luweme kulikonsha kuti: ‘Kansi yove ni munthu wosatembeja, olo ŵangoluŵa kuti anitembeje?’ Nthawe ziyakine ponkhala vifukwa viweme vamene vingachitishe munthu kuchita vinthu mosiyana na mwetenzeganizila. Ŵanthu ayakine angatembeje chamuntima, koma nokanga kuti atiuje pavifukwa viyakine. Ŵanthu amene poyamba enzeyavya ayawo akafunikila thandizo, angochita nsoni akayavyiwa ni ove. Koma keno tukonda chendi enekwasu na akalongosi, tizapewe kuŵaganizila vinthu viipa ndipo tizapitilije kunkhala osangalala chifukwa chopeleka mphaso.—Aife. 4:2.
19-20. Ndaŵa yanji tupindula ngako tikankhala oleza ntima tikapeleka mphaso kuli ŵanthu ayakine? (Onanisoti chithunzi.)
19 Mukonkhala oleza ntima. Pankhani yopasa, Mfumu yanzelu Solomo ilemba kuti: “Nkate wako uwuponye pamanzi, chifukwa uzaufwanesoti pakapita masiku anyinji.” (Mlal. 11:1) Monga nimwakunenela mawu amene aŵa, nthawe ziyakine pangapite “masiku anyinji” ngako kuti ŵanthu atitembeje pa vetiŵachitila. Tiyeni tikambilane chochitika chiyakine chamene chuwonesha kuti mfundo yamene iyi niyachendi.
20 Vyaka vinyinji kuvuli, nkazi wa wopanamila dela, elembela kalata kalongosi muyakine wamene enze echingobatizika kwalombapano pomutang’isha kuti apitilije kunkhala wokhulupilika. Pepita vyaka pafupi-fupi 8, kuti kalongosi wamene uyo ayankhe kalata yake, ndipo enena kuti: “Nakonda kuti nikulembeleni kalata kuti nikuujeni mweiniyavyila kalata yemwinilembela vyaka vinyinji kuvuli.” Yove enenasoti kuti: “[Mawu ŵemwilemba] enze aweme ngako ndipo nuluŵalini lemba yemwitomola mukalata yanu.” a Pavuli pofotokoza mavuto ŵechikumana nawo, kalongosi wamene uyo enena kuti: “Nthawe ziyakine, newo nenzefuna kuti nileke chonadi kuti nimasuke kuvinthu viyakine. Koma lemba yemwinilembela yenikhuza ntima ndipo yenipasa mphamvu kuti nipitilije . . . kutumikila Yehova.” Yove enenasoti kuti: “Paliye chinthu chilichonse pavyaka vonse 8 vamene ivi, chamene chaniyavya ngako monga ni mweiniyavyila kalata yanu.” Ganizilani tyala mwechisangalalila nkazi wa wopanamila dela pechilondela kalata yamene iyo ‘pavuli pa masiku anyinji.’ Sewo nase munthu angatitembeje pakapita nthawe itali kufumila petimuyavya.
Nthawe ziyakine, ŵanthu angatitembeje pakapita nthawe itali kufumila panthawe yetiŵayavya (Onani ndime 20.) b
21. Ndaŵa yanji mwewo mufuna kunkhala opasa monga ni Yehova?
21 Monga nimwatawonela, Yehova etilenga mwapadela. Olo kuti kulondela mphaso n’kokondwelesha, sewo tufwana chisangalalo chikulu ngako tikapeleka nisewo mphaso yamene iyo. Tikumvwa bwino muntima mwasu tikayavya Akhilisitu ayasu. Komasoti tusangalala akawonesha ntima wotembeja. Viliye kanthu kuti munthu watapasa mphaso wawonesha kutembeja olo yayi, sewo tunkhala mphela osangalala chifukwa choziŵa kuti tachita vinthu viweme. Mukokumbukila kuti ‘Yehova angakwanishe kukupasani vinthu vinyinji kupambana vamungapeleke mwewo kuli ayakine.’ (2 Mbiri 25:9) Tetyo, mphaso yakutipasa Yehova yunkhala ikulu ngako nthawe zonse kupambana mphaso iliyonse yatingapeleke sewo kuli muyasu. Ndipo paliyesoti chinthu chiyakine chokondwelesha ngako kupambana kujoshelewa na Yehova. Tiyeni tonse tisimikije m’mitima yasu kuti tipitilije kukonkheja Atata ŵasu akululu amene niwopasa.
NYIMBO N.° 17 “Nufuna”
a Lemba yechilembelewa kalongosi wamene uyo na nkazi wa wopanamila dela, yenze 2 Yohani 8, yamene yunena kuti: “Nkhalani osamala kuti osatimutaye vinthu vetikuyavyani kuti muvifwane kuti mukalondele madaliso onse aŵakukonzelani Mulungu.”
b MAWU OFOTOKOZA CHITHUNZI: Pachithunzi chamene ichi, mwanakazi wa wopanamila dela otembeja kalongosi mofumila pansi pantima. Pavuli pavyaka vinyinji, yove olondela kalata yomutembeja kufumila kuli kalongosi wamene uyo.
