NKHANI YOPHUNZILA N.° 36
NYIMBO N.° 89 Nkhalani omvwila kuti mulondele madaliso
“Mukochita vakunena Mawu a Mulungu”
‘Mukochita vakunena Mawu a Mulungu.’ —YAKO. 1:22.
CHOLINGA CHA NKHANI
Nkhani ino itiyavye kuti tikoŵelenga Mawu a Mulungu nsiku iliyonse mwakhama nokatishila ntchito vataphunzila pamoyo wasu.
1-2. Kansi n’chinji chuyavya atumiki a Yehova kuti akosangalala? (Yakobo 1:22-25)
YEHOVA na Mwana wake wokondewa Yesu ofuna kuti tikosangalala. Munthu wamene elemba Salimo 119:2, enena kuti: “Osangalala ni ŵanthu amene osunga vikumbuso vake komasoti amene omusakila-sakila na ntima wawo wonse.” Yesu esimikijilasoti pechilaŵila kuti: “Osangalala ni ŵanthu amene akumvwa Mawu a Mulungu noŵasunga!”—Luk. 11:28.
2 Sewo atumiki a Yehova tili na moyo wosangalala. Ndaŵa yanji? Pali vifukwa vosiyana-siyana, koma chimozi chofunika ngako n’chakuti tuŵelenga Mawu a Mulungu nthawe zonse komasoti tuyeja-yeja kukatishila ntchito vatuphunzila.—Ŵelengani Yakobo 1:22-25.
3. Kansi tupindula tyani keno tukatishila ntchito vatuŵelenga m’Mawu a Mulungu?
3 Tingafwane madaliso anyinji keno tuchita “vakunena Mawu a Mulungu.” Chinthu chimozi n’chakuti Yehova okondwela nase. Kuganizila vamene ivi kutichitisha kunkhala osangalala. (Mlal. 12:13) Keno tuchita vinthu mokatijana na vatuŵelenga m’Mawu oujiliwa a Mulungu, vutiyavya kunkhala osangalala m’banja komasoti tunkhala okatijana na Akhilisitu ayasu. Payakine vamene ivi niye vachitika pa moyo wanu. Kuyangijila pamene apo, tupewa mavuto anyinji ŵakukumana nawo ŵanthu asakatishila ntchito mfundo za Yehova pa moyo. Chosilijila n’chakuti tukatijana na vechilemba mfumu Davide. Pavuli pakuti watomola malamulo a Yehova, mfundo, komasoti viweluzo vake mu nyimbo yake, yove esilija na mawu akuti: “munthu wamene osunga vigamulo vamene ivo ofwana mphaso ikulu.”—Sal. 19:7-11.
4. Ndaŵa yanji n’kovuta nthawe ziyakine kukatishila ntchito vatuŵelenga m’Mawu a Mulungu?
4 Kulaŵila chilungamo, kuchita vakulaŵila Mawu a Mulungu n’kupepulini nthawe ziyakine. Tufunika kufwana nthawe yoŵelenga nophunzila Baibolo kuti tiziŵe vakufuna Yehova. Tetyo, tiyeni tikambilane vinthu viyakine vamene vingatiyavye kuti tikoŵelenga Baibolo nthawe zonse. Tikambilanesoti vingatiyavye kuti tikoganizila vataŵelenga nowona mwatingavikatishile ntchito pa moyo wasu.
MUKOPATULA NTHAWE YOŴELENGA MAWU A MULUNGU
5. Kansi ni maudindo otyani ŵatili nawo amene otiwonongela nthawe ikulu?
5 Atumiki anyinji a Yehova ali na vochita vinyinji pamoyo wawo. Tukatishila ntchito nthawe yasu ikulu kuti tichite vayunena Baibolo kuti ni vofunika. Mwachisanzo, anyinji a sewo tukata ntchito zolembewa kuti tifwane vofunika pamoyo wasu na wa ŵanthu am’banja mwasu. (1 Tim. 5:8) Akhilisitu anyinji okata ntchito yosamalila achibale ŵawo amene ni olwala olo okalamba, komasoti aliyense wa sewo ofunika kusamalila thanzi yake, ndipo navosoti vamene ivi vufuna nthawe. Kuyangijila pali maudindo amene aŵa, tilisoti na maudindo ayakine mumpingo. Udindo uyakine wofunika ngako watili nawo ni kulalikila mwakhama uthenga uweme. Mukaganizila za maudindo onse amene aŵa ŵamuli nawo, kansi mungachite tyani kuti mukoŵelenga Baibolo nthawe zonse, kuganizila, komasoti kukatishila ntchito vamwaŵelenga?
6. Kansi mungachite tyani kuti mukoika kuŵelenga Baibolo pa malo oyamba? (Onanisoti chithunzi.)
6 Kuŵelenga Baibolo n’chimozi mwa “vinthu vamene ni vofunika chendi ngako” kuli sewo Akhilisitu, tetyo tikokuika pamalo oyamba. (Afil. 1:10) Ponena za munthu wosangalala, amozi mwa mawu oyambilila m’buku ya Masalimo, onena kuti: “Okonda ngako chilamulo cha Yehova ndipo oŵelenga noganizila ngako za chilamulo chamene icho usiku na nzuŵa.” (Sal. 1:1, 2) N’chendi, vamene ivi vutanthauza kuti tufunika kupatula nthawe yoŵelenga Baibolo. Kansi nthawe iweme ngako yoŵelenga Baibolo niyotyani? Vingadalile nthawe yamuwona mwewo kuti ni iweme. Koma chofunika ngako ni kusankha nthawe yakuti mukokwanisha kuŵelenga Baibolo monkhazikika. Mkwasu muyakine zina yake Victor enena kuti: “Nukonda kuŵelenga Baibolo kummawa. Olo kuti nukondalini kuchelela mmawa ngako, nthawe yamene iyi ni iweme chifukwa usokonezewalini na vinthu vinyinji. Maganizo ŵangu onkhala kuti akali mmalo ndipo nukwanisha kumvwisha luweme.” Kansi namwe muwona tetyo? Mungachite luweme kulikonsha kuti, ‘Kansi ni nthawe yotyani iweme ngako kuli newo yaningoŵelenga Baibolo?’
Kansi ni nthawe yotyani iweme ngako yamungoŵelenga Baibolo? Kansi ni nthawe yotyani yamungokwanisha kuŵelenga Baibolo monkhazikika? (Onani ndime 6.)
MUKOGANIZILA VAMUŴELENGA
7-8. Kansi n’chinji chingatikangishe kuti tikopindula ngako na vatuŵelenga? Fotokozani.
7 Sewo tingakwanishelini kuŵelenga vinthu vinyinji panthawe imozi novimvwisha. Kansi mwiŵelengapo kale chofalisa chiyakine noluŵa mfundo zinyinji? Vamene ivi vuchitikila aliyense wasewo. Komasoti vingatichitikile patuŵelenga Baibolo. Mwachisanzo, payakine tuŵelenga machapitala anyinji a m’Baibolo nsiku iliyonse. Vamene ivi ni viweme ngako. Tufunika kunkhala na volinga nochita khama kuti tivikwanilishe. (1 Ako. 9:26) Koma pali vinyinji vatufunika kuchita kuti tikopindula ngako poŵelenga Baibolo kuyangijila pa kuiŵelenga.
8 Ganizilani chisanzo ichi: Manzi a nvula ni ofunika ngako kuli vinthu vomela. Koma keno nvula yulokwa inyinji m’kanthawe katontho, lito ingawonongeke. Nvula yoteti niyosayavya kuli vomela. Keno nvula yulokwa mwamphanvu lito yunkhala iliye mphanvu ndipo vomela vingakulelini bwino. Vunkhala luweme keno nvula yulokwa patontho-patontho chifukwa manzi oloŵa pansi ndipo vomela vukula luweme. Molingana na vamene ivi, tikopewa kuŵelenga Baibolo moutuka kuti pavuli pake tikokwanisha kukumbukila vataŵelenga novikatishila ntchito.—Yako. 1:24.
Molingana na lito yamene yufuna nthawe kuti imwe manzi mokwanila noŵakatishila ntchito, nase soti tufunikila nthawe kuti tikoganizila vatuŵelenga m’Mawu a Mulungu novikatishila ntchito (Onani ndime 8.)
9. Kansi tufunika kuchita tyani keno tuŵelenga Baibolo moutuka ngako?
9 Kansi muwona kuti nthawe ziyakine muŵelenga Baibolo moutuka ngako? Lomba mungachite tyani? Mukopewa kuŵelenga moutuka. Mukoŵelenga luweme-luweme nacholinga chakuti mukasilija kuŵelenga mukokumbukila noganizila vamwaŵelenga. Kuchita vamene ivi n’kosavuta. Mungapatule nthawe ikulu kuti muganizile vamwaŵelenga. Mukasankha kuŵelenga mavesi atontho mungakatishile ntchito nthawe yasala kuti muganizile vamwaŵelenga. Victor watatomola poyamba enena kuti: “Nthawe ziyakine nuŵelenga tyala chapitala chimozi. Chifukwa chakuti nuŵelenga Baibolo kummawa nukwanisha kuganizila vanaŵelenga nsiku yonse.” Chofunika nikuŵelenga luweme-luweme kuti mukwanishe kuganizila vamwaŵelenga, osati kupaka kwa vinthu vamuŵelenga.—Sal. 119:97; onani bokosi yakuti “ Makonsho ŵamungaganizile.”
10. Pelekani chisanzo chuwonesha vatingachite kuti tikokatishila ntchito vatuphunzila. (1 Atesalonika 5:17, 18)
10 Viliye kanthu kuti muŵelenga Baibolo nthawe yanji ndipo muiŵelenga kwa nthawe itali tyani, mufunika kuwona njila yamungakatishile ntchito vamuŵelenga. Pamuŵelenga Mawu a Mulungu mungalikonshe kuti, ‘Kansi ningachite tyani kuti nikatishile ntchito mfundo zamene izi lomba teti komasoti kusogolo?’ Mwachisanzo, tiyelekezele kuti muŵelenga Baibolo pa 1 Atesalonika 5:17, 18. (Ŵelengani.) Pavuli poŵelenga mavesi aŵili amene aŵa mungapaname noganizila vamungachite kuti mukopemphela pafupi-pafupi komasoti mofumila pansi pa ntima. Ndipo mungaganizile vinthu vamungatembeje kwa Mulungu. Payakine mungaganizile vinthu vitatu vamungatomole m’pemphelo powonesha kutembeja. Ziŵani kuti kuganizila vamwaphunzila m’Baibolo olo kwa nthawe itontho, kungakuyavyeni kumvwisha Mawu a Mulungu nochita vakunena. Ndipo keno nsiku iliyonse mukatishila ntchito vamuŵelenga m’Baibolo, m’kupita kwa nthawe muzankhale ntumiki muweme wa Yehova! Lomba tyani keno muwona kuti pali vinthu vinyinji vamufunikila kuchinja?
MUKOLIIKILA VOLINGA VAMUNGAKWANISHE
11. Ndaŵa yanji nthawe ziyakine tingafoke? Pelekani chisanzo.
11 Pamuŵelenga Baibolo, nthawe ziyakine mungafoke chifukwa chowona kuti pali vinthu vinyinji vamufunikila kuchinja pa moyo wanu. Ganizilani chochitika ichi: Tiyelekezele kuti lelo mwaŵelenga malangizo am’Baibolo olesha kukondela. (Yako. 2:1-8) Pavuli pake, muwona kuti mufunika kuchinja mwamuchitila vinthu na ŵanthu ayakine, tetyo mwasankha kuti muchinje vinthu viyakine pamoyo wanu. Vamene ivi niviweme ngako! Nsiku yokonkhapo, mwaŵelenga za kufunika kolamulila lilimi yanu. (Yako. 3:1-12) Tetyo, mukumbukila kuti vinthu vamulaŵila nthawe ziyakine vunkhala viipa. Chifukwa cha vamene ivi, mwasankha kuti muchinje mwamulaŵilila kuti mukolaŵila vinthu viweme komasoti volimbikisa. Nsiku yokonkha, muŵelenga chenjezo ya m’Baibolo yulesha kupanga ushamwali na chalo. (Yako. 4:4-12) Pavuli pake, muwona kuti mufunika kusankha mosamala ngako vinthu vosangalasa. Pa nsiku yanamba 4 mungachite ulesi ndipo mungayambe kuwona kuti mukwanishelini kuchija.
12. Ndaŵa yanji mufunikalini kufoka mukaziŵa kuti mufunika kuchinja minkhalidwe iyakine kuti ikokatijana na vamuŵelenga? (Onanisoti mawu amnyansi.)
12 Mukawona kuti pali vinthu vinyinji vamufunikila kuwamya pa moyo wanu, osataya ntima. Wamene uyo ni umboni uwonesha kuti muli na ntima uweme. Munthu wolichefya komasoti muweme ntima oŵelenga Malemba na cholinga chakuti awone mbali yakufunikila kuwamya pa moyo wake. a Kumbukilani kuti kuvwala “umunthu wanyowani” kuliye polekejela. (Akol. 3:10) Kansi n’chinji chingatiyavye kuchita vakunena Mawu a Mulungu?
13. Kansi n’chinji chingakuyavyeni kuti muliikile volinga vamungakwanishe? (Onanisoti chithunzi.)
13 Mmalo moyeja kuchita vinthu vonse vamwaŵelenga kamo na kamo, mukoliikila volinga vamungakwanishe. (Miy. 11:2) Yejani kuchita ivi: Lembani mndandanda ya vinthu vamufunika kuwamya, ndipo pavuli pake sankhani chinthu chimozi olo viŵili poyamba, ndipo viyakine mungavikwanilishe pavuli pake. Kansi mungayambile pani?
Tyani kuliikila volinga vamungakwanishe, mmalo moyeja kukatishila ntchito vinthu vonse vamwaŵelenga m’Baibolo pa nthawe imozi? Payakine mungaganizile cholinga chimozi olo viŵili nokwanilisha vamene ivo poyamba (Onani ndime 13-14.)
14. Kansi mungayambe na volinga votyani?
14 Mungayambe na cholinga chosavuta kuchikwanilisha. Mungayambe kuwamya mbali iyakine yofunika ngako pamoyo wanu. Mukaziŵa vinthu vamufunikila kuchinja pa moyo wanu, mungakatishile ntchito vofalisa vasu monga Índice de Publicações da Torre de Vigia olo Buku Lofufuzira Nkhani la Mboni za Yehova kuti muziŵe vinyinji pa nkhani yamene iyo. Muujeni Yehova volinga vamuli navo nomusenga kuti akupaseni “ntima wofuna kuchita vinthu vakukonda komasoti mphanvu zochitila vinthu vamene ivo.” (Afil. 2:13) Pavuli pake, mukokatishila ntchito vinthu vamuphunzila. Mukawona kuti mwakwanisha kuchinja nkhalidwe iyakine yemwenzefunikila kuwamya, muzatang’e ntima kuti mupitilije kuchinja mbali ziyakine. Ndipo muzakwanishe kuchinja mosavuta mbali zokonkhapo.
MUKOLOLA KUTI MAWU A MULUNGU “AKATE NTCHITO MULI MWEWO”
15. Kansi ŵanthu a Yehova osiyana tyani na ŵanthu anyinji amene oŵelenga Baibolo? (1 Atesalonika 2:13)
15 Ŵanthu anyinji okwanisha kuŵelenga Baibolo yonse kwa maulwendo oweleja-weleja ngako. Koma kansi ove okhulupilila chendi vayunena Baibolo? Kansi ove okatishila ntchito vakuphunzila nolola kuti Mawu a Mulungu achinje moyo wawo? N’vomvwisha chisoni kuti okwanishalini. Ŵanthu anyinji okatishilalini ntchito malangizo a m’Baibolo! Koma ŵanthu a Yehova owona Baibolo mwanjila yosiyana ngako. Monga ni mwenzele Akhilisitu oyambilila, sewo tukhulupilila kuti vayuphunzisa Baibolo ni ‘Mawu a Mulungu chendi.’ Komasoti tuyeja-yeja kukatishila ntchito vatuphunzila pamoyo wasu.—Ŵelengani 1 Atesalonika 2:13.
16. Kansi n’chinji chingatiyavye kuti tikochita vatuŵelenga m’Mawu a Mulungu?
16 Nthawe ziyakine vunkhala vovuta kuŵelenga nochita vakunena Mawu a Mulungu. Nthawe ziyakine tingaisoŵe nthawe kuti tiŵelenge Mawu a Mulungu. Nthawe ziyakine tingaŵelenge Baibolo moutuka ngako nokangiwa kumvwa vatuŵelenga. Nthawe ziyakinesoti tingachite ulesi poganizila kupaka kwa vinthu vatufunika kuchinja pa moyo wasu. Koma tikokumbukila kuti vuto iliyonse ingasile, olo kuti ikule tyani. Yehova angakuyavyeni kuti mupambane. Tiyeni tonse tivomele kulondela thandizo yake na ntima wonse kuti tipewe kunkhala ŵanthu akumvwa Mawu a Mulungu noluŵa, koma akumvwa nochita.—Yako. 1:25.
NYIMBO N.° 94 Tutembeja Mulungu potipasa Mawu ŵake
a Lolelani vidiyo yapa jw.org yakuti Vakulaŵila achilumbwana ayanu—Kuŵelenga Baibolo.
