NKHANI YOPHUNZILA N.° 39
Keno munthu wamukonda wasiya kutumikila Yehova
“Kaŵili-kaŵili . . . enzemukhumudwisa.”—SAL. 78:40.
NYIMBO N.° 107 Mulungu niye chisanzo chikulu cha chikondi
VATIKUTI TIPHUNZILE *
1. Kansi ayakine akumvwa tyani munthu wakukonda akachosewa mumpingo?
KANSI munthu muyakine wamukonda echosewapo mumpingo? Vamene ivi vunkhala voŵaŵa ngako! Mulongo muyakine zina yake Hilda, enena kuti: “Mwanalume wangu wokhulupilika wamene ninkhala naye pa banja kwa vyaka 41 pechimwalila, nenzewona kuti chamene ichi ni chinthu choŵaŵa ngako chamene chenze chikaliyenichitikilapo. * Koma mwana wangu, nkazi wake komasoti ŵana ŵake pechisiya chonadi viniŵaŵa ngako kupambana pamene apa.”
Yehova omvwisha kuti vunkhala voŵaŵa ngako keno munthu wamukonda wasiya kumutumikila (Onani ndime 2-3) *
2-3. Mokatijana na Salimo 78:40, 41, kansi Yehova akumvwa tyani keno ntumiki wake wasiya kumutumikila?
2 Ganizilani mwevimuŵaŵila Yehova kuwona angelo ŵake ayakine omupandukila! (Yuda 6) Lomba ganizilanisoti mwechimvwila kuwona ŵanthu ŵake apantima Aisiraeli omupandukila moweleja-weleja. (Ŵelengani Salimo 78:40, 41.) Osakaikila kuti Atata ŵasu achikondi akumvwasoti kuŵaŵa muntima keno munthu wamukonda wasiya kumutumikila. Yove omvwisha ululu wamukumvwa mwewo muntima mwanu. Mowama ntima, yove akulimbikiseni na kukuyavyani.
3 Mu nkhani ino tikambilane vatingachite kuti Yehova akotiyavya tikakumana na vuto yamene iyi. Tiwonesoti mwatingayavyile ayakine mumpingo, amene achibale ŵawo achosewa. Koma choyamba tiyeni tikambilane maganizo ophoniyeka ŵatufunika kupewa.
MUKOPEWA KULIIMBA MULANDU
4. Kansi makolo anyinji akumvwa tyani mwana wawo akasiya kutumikila Yehova?
4 Mwana akasiya kutumikila Yehova, kanyinji-kanyinji makolo oliimba mulandu poganiza kuti pali vinthu venzefunikila kuchita kuti amuyavye kuti apitilije kunkhala m’chonadi. M’bale muyakine zina yake Luke, mwana wake pechichosewa, yove enena kuti: “Newo nenzewona kuti vuto ni newo. Nthawe ziyakine nenzelota maloto aipa, nenzelila komasoti ntima wenzeniŵaŵa.” Mulongo muyakine zina yake Elizabeth, wamene vamene ivi vimuchitikilasoti enena kuti: “Nthawe ziyakine nenzelikonsha kuti, ‘kansi newo niphoniyesha chinji monga kolo?’ Nenzelimvwa kuti niliyechite vonse vofunikila kuti niphunzise mwana wangu kukonda Yehova.”
5. Kansi yunkhala vuto ya ŵani munthu akasiya kutumikila Yehova?
5 Tufunika kukumbukila kuti tonse Yehova etipasa ufulu wosankha. Vamene ivi vutanthauza kuti aliyense angasankhe kumumvwila olo yayi. Ŵana ayakine amene makolo ŵawo enzelini a chisanzo chiweme, osankha kutumikila Yehova ndipo onkhala mphela okhulupilika kuli yove. Koma ayakine amene makolo ŵawo eyeja-yeja kuŵaphunzisa mfundo za m’Malemba, akakula osankha kusiya kutumikila Yehova. Vamene ivi vuwonesha kuti aliyense wa sewo ofunika kusankha yeka kuti akotumikila Yehova. (Yos. 24:15) Tetyo, mwewo makolo amene muli na chisoni chifukwa chakuti ŵana ŵanu asiya chonadi, osaganiza kuti yamene iyi ni vuto yanu!
6. Kansi mwana angamvwe tyani keno amayi ŵake olo atata ŵake asiya kutumikila Yehova?
6 Nthawe ziyakine atata olo amama angasiye chonadi payakine olosoti kusiya banja yawo. (Sal. 27:10) Vamene ivi vingasokoneze ngako ŵana amene owona kuti kolo yawo yamene iyo ni chisanzo chawo. Esther, wamene atata ŵake echosewa, enena kuti: “Nthawe zinyinji nenzelila chifukwa chakuti atata aliyepatuke tyala pa chonadi, koma ove enze asankha kusiyilatu kutumikila Yehova. Newo nuŵakonda atata, tetyo ove pechichosewa, newo nenzedela nkhaŵa ngako za moyo wawo ndipo nthawe zinyinji nenzevutika maganizo.”
7. Kansi Yehova akumvwa tyani akawona mwana ntontho wamene kolo yake yachosewa mumpingo?
7 Ŵanamwe, ziŵani kuti atata ŵanu olo amayi ŵanu akachosewa mumpingo, nase vutikhuza ngako! Osakaikila kuti Yehova naye oziŵa mwamumvwila. Yove okukondani komasoti osangalala mukapitilija kunkhala mphela okhulupilika ndipo sewo tonse—abale ŵanu na alongo tusangalalasoti. Mukokumbukilasoti kuti ni mwewolini mwachitisha kuti makolo ŵanu asankhe mophoniyeka. Monga ni mwatanenela kale, Yehova epasa aliyense ufulu wosankha. Komasoti Mkhilisitu aliyense wamene elipeleka kwa Yehova nobatiziwa, “ofunika kunyamula katundu wake.”—Aga. 6:5.
8. Kansi ŵanthu ayakine m’banja angochita chinji poyembekezela kuti wachibale wawo ajokele kwa Yehova? (Onanisoti bokosi yakuti “ Jokelani kwa Yehova.”)
8 Munthu muyakine wamukonda akasiya kutumikila Yehova, n’vomvwika kuti muyembekezela kuti nsiku iyakine azajokele kuli Yove. Lomba kansi mufunika kuchita chinji pamuyembekezela vamene ivo? Mukochita vonse vamungakwanishe kuti chikhulupililo chanu chinkhale chotang’a. Keno muchita vamene ivi mukopeleka chisanzo chiweme kuli ŵanthu a m’banja yanu, olosoti kuli wala wamene wachosewa. Vamene ivi vingachitishesoti kuti mufwane mphamvu zingakuyavyeni kupilila ululu wamukumvwa. Tiyeni tikambilane vinthu viyakine vamungachite kuti chikhulupililo chanu chipitilije kunkhala chotang’a.
VAMUNGACHITE KUTI MUPITILIJE KUNKHALA NA CHIKHULUPILILO CHOTANG’A
9. Kansi mungachite tyani kuti Yehova akokupasani mphamvu? (Onanisoti bokosi yakuti, “ Malemba amene angakutang’isheni keno munthu wamukonda wasiya kutumikila Yehova.”)
9 Nthawe zonse mukoyeja-yeja kuchita vinthu vokhudza kulambila. N’vofunika ngako kuti mupitilije kutang’isha chikhulupililo chanu komasoti cha ŵanthu ayakine a m’banja mwanu. Kansi mungachite tyani vamene ivi? Yehova angakupaseni mphamvu keno muŵelenga Mawu ŵake nthawe zonse, kuŵaganizila ngako komasoti kupezeka pamisonkhano. Joanna, wamene atata ŵake komasoti nsaza wake esiya chonadi, enena kuti: “Ntima wangu unkhala m’malo nikoŵelenga nkhani za ŵanthu otomolewa m’Baibolo monga Abigayeli, Esitere, Yobu, Yosefe na Yesu. Visanzo va ŵanthu amene aŵa vunitang’isha mwakuti nuyamba kuganiza luweme. Nuwonasoti kuti nyimbo zasu zunitang’isha ngako.”
10. Kansi lemba ya Salimo 32:6-8, yuwonesha kuti tufunika kuchita chinji tikankhala na nkhaŵa?
10 Mukomufotokozela Yehova mwamumvwila. Mukankhala na nkhaŵa osaleka kupemphela kuli yove. Mukosenga Mulungu wasu wachikondi kuti akuyavyeni kuwona vinthu mwakuviwonela yove komasoti kuti ‘akupaseni nzelu na kukulangizani njila yakuti muyendemo.’ (Ŵelengani Salimo 32:6-8.) N’chendi kuti nthawe ziyakine vingankhale vovuta kuti mumufotokozele luweme Yehova mwamumvwila. Koma Yehova omvwisha luweme mwamumvwila muntima mwanu. Yove okukondani ngako mwewo ndipo okulimbikisani kuti mukomuuja vili muntima mwanu.—Eks. 34:6; Sal. 62:7, 8.
11. Mokatijana na Aheberi 12:11, ndaŵa yanji tufunika kukhulupilila kuti Yehova opeleka chilango chifukwa cha chikondi? (Onanisoti bokosi yakuti, “ Kuchosewa mumpingo—ni chilango chuwonesha kuti Yehova otikonda.”)
11 Mukokatijana na chigamulo chapeleka akulu. Yehova niye epanga makonzedwe akuti ŵanthu osalapa akochosewa mumpingo. Chilango chakupeleka chuyavya ŵanthu onse kupamikijapo wamene uyo wophoniya. (Ŵelengani Aheberi 12:11.) Ŵanthu ayakine mumpingo angonena kuti akulu aliyeweluze luweme kuti munthu achosewe. Koma kumbukilani kuti ŵanthu amene aŵa, onkhala kuti enzefunalini kuwulula vinthu viipa venzechita munthu wamene uyo wophoniya. Nthawe zinyinji tuziŵalini vonse vamene vachitika. Tetyo, ni chinthu chanzelu kukhulupilila kuti akulu amene eweluza nkhani yamene iyo, echita vonse vangakwanishe pokonkheja mfundo za m’Malemba komasoti ‘kuweluzila Yehova.’—2 Mbiri 19:6.
12. Kansi ni madaliso otyani ŵafwana ayakine chifukwa chokatijana na chilango cha Yehova?
12 Keno mukatijana na chosankha cha akulu chakuti munthu wamukonda achosewe, mungamuyavye kuti ajokele kwa Yehova. Elizabeth, wala watatomolako kale, evomekeja kuti: “Venze vovuta ngako kuti osati tikolaŵijana na mwana wasu nkulu. Koma yove pechijokela kwa Yehova, evomekeja kuti enzefunika chendi kuchosewa. Pamapeto pake, yove enena kuti otembeja chifukwa cha vinthu vinyinji vechiphunzilapo. Newo niziŵa kuti nthawe zonse chilango chofumila kwa Yehova chunkhala choyenelela.” Mwanalume wake zina yake Mark, eyangijila kuti: “Papita nthawe, mwana wasu eniuja kuti chinthu chiyakine chamene chimuyavya kuti ajokele kwa Yehova ni chakuti tenzechitalini naye pamozi vinthu olo patontho. Nusangalala kuti Yehova etiyavya kunkhala omvwila.”
13. Kansi n’chinji chingakuyavyeni kuti mukowona vinthu moyenela?
13 Mukofotokoza mwamumvwila kuli ayanu amene okumvwishani. Mukotandala na Akhilisitu otang’a mwauzimu amene angakuyavyeni kuti mupitilije kuwona vinthu moyenela. (Miy. 12:25; 17:17) Joanna, wala watatomolako kale, enena kuti: “Muntima mwangu, newo nenzekumvwa monga nili neka tyala. Koma kutandala na azishamwali odalilika kwiniyavya kuti nipilile.” Lomba kansi mwewo, mungachite chinji keno muwona kuti ayakine mumpingo alaŵila vinthu vamene vachitisha kuti mumvwe kuŵaŵa ngako?
14. Ndaŵa yanji tufunika “kulolelana na kukhululukilana na ntima wonse”?
14 Mukoŵalezela ntima abale na alongo ŵanu. Tingayembekezelelini kuti aliyense angolaŵila vinthu voyenela. (Yak. 3:2) Tonse niselini angwilo. Tetyo, osadabwa keno ayakine vuŵavuta kulaŵila vinthu voyenela, olosoti keno mosaziŵa alaŵila vinthu vamene vakukhumudwisani. Mukokumbukila malangizo a ntumwi Paulo akuti: “Pitilijani kulolelana na kukhululukilana na ntima wonse, keno muyakine ali na chifukwa chodandaulila va muyake.” (Akol. 3:13) Mulongo muyakine wamene wachibale wake echosewa, efotokoza kuti: “Yehova eniyavya kuti nikhululukile abale amene enikhumudwisa pa nthawe yenzeyeja kunilimbikisa.” Lomba kansi ŵanthu a mumpingo angayavye tyani achibale a munthu wamene wachosewa?
ŴANTHU A MUMPINGO ANGATIYAVYE NGAKO
15. Kansi tingachite tyani kuti tiyavye achibale a munthu wamene wachosewa kwalombapano mumpingo?
15 Mukochita vinthu mowama ntima na achibale a munthu wamene wachosewa. Mulongo muyakine zina yake Miriam, enena kuti mulongosi wake pechichosewa, yove enzedela nkhaŵa akaganiza zoluta kumisonkhano. Yove enena kuti: “Newo nenzeyopa vinthu vangolaŵila ŵanthu. Koma penze azishamwali ŵangu aweme amene ekhuziwa na vamene ivo vichitika ndipo ove enzelaŵilalini vinthu viipa vokhuza mulongosi wangu wamene echosewa. Chifukwa cha vamene ivi vechichita ove, newo nenzeliwonalini kuti nili neka.” Mulongo muyakine enena kuti: “Mwana wasu mwanalume pechichosewa, ayasu ewela kuzatilimbikisa. Ayakine enzevomekeja kuti enzeziŵalini changalaŵile. Ove enzelila nane pamozi olo kunilembela kalata yonilimbikisa. Vamene ivi vechichita ove viniyavya ngako!”
16. Kansi ŵanthu a mumpingo angachite chinji kuti apitilije kuyavya achibale a munthu wamene wachosewa?
16 Mukopitilija kuyavya achibale okhulupilika a munthu wamene wachosewa. Pa nthawe yamene iyi niye pofunika kuŵakonda komasoti kuŵalimbikisa kupambana kale yonse. (Ahe. 10:24, 25) Nthawe ziyakine achibale a munthu wamene wachosewa, payakine angolimvwa kuti oikiliwalini nzelu mumpingo. Koma osalola kuti akokumvwa tetyo! Achilumbwana amene makolo ŵawo esiya kutumikila Yehova, ofunikila ngako kuŵatembeja komasoti kuŵalimbikisa. Maria, wamene mwanalume wake echosewa komasoti kusiya banja yake, enena kuti: “Azishamwali ŵangu ayakine enzewela kung’anda, kutipikila chakulya ndipo enzeniyavya nikophunzila na ŵana ŵangu. Ove enzekumvwa ululu monga ni wenenzekumvwa newo ndipo enzelila nane pamozi. Ove enzelaŵila vinthu viweme keno ŵanthu olaŵila vinthu vawenye vokhuza newo ndipo enzenitang’isha ngako!”—Aro. 12:13, 15.
Abale na alongo mumpingo angawoneshe kuti okonda achibale a munthu wamene wachosewa poŵayavya (Onani ndime 17) *
17. Kansi akulu angachite tyani kuti akolimbikisa ŵanthu amene wachibale wawo wasiya kutumikila Yehova?
17 Mwewo akulu, mukokatishila ntchito mpata uliwonse wamene wapezeka kuti mukolimbikisa achibale a munthu wamene wachosewa. Mwewo muli na udindo wapadela wotonthoja achibale a munthu wamene wasiya kutumikila Yehova. (1 Ates. 5:14) Mukoyeja-yeja kuŵalimbikisa misonkhano ikaliyeyamba komasoti ikasila, ndipo mukoŵayendela komasoti kuŵapemphelela. Mukolutako nawo mu utumiki olosoti nthawe ziyakine mungaŵaiteko kuti muzankhale nawo pamozi pa kulambila kwanu kwa pabanja. Akulu ofunika kuwonesha chikondi, chifundo komasoti kusamalila mbelele za Yehova zamene zili na chisoni.—1 Ates. 2:7, 8.
OSATAYA NTIMA NDIPO PITILIJANI KUDALILA YEHOVA
18. Mokatijana na lemba ya 2 Petulo 3:9, kansi Mulungu ofuna kuti ŵanthu amene esiya kumutumikila achite chinji?
18 Yehova “ofunalini kuti aliyense azawonongeke, koma ofuna kuti ŵanthu onse alape.” (Ŵelengani 2 Petulo 3:9.) Olo kuti munthu achite chimo ikulu tyani, moyo wake unkhala mphela wantengo wapatali kwa Mulungu. Kumbukilani kuti Yehova elipila ntengo ukulu ngako—wamene ni moyo wa Mwana wake wapantima—kuti awombole aliyense wa sewo. Mwachifundo, Yove oyeja kuchita vonse vangakwanishe kuti ayavye ŵanthu amene esiya kumutumikila kuti ajokele kuli yove. Ndipo monga ni mwayuwoneshela fanizo ya Yesu ya mwana woloŵelela, Yehova oyembekezela kuti ove achite chendi vamene ivo. (Lk. 15:11-32) Anyinji amene esiya chonadi, pavuli pake ejokela kuli Atata ŵawo achikondi ndipo abale na alongo eŵalondela na manja aŵili. Elizabeth, wala watatomolako kale, ekondwela ngako mwana wake pechijoshelewa. Pokumbukila vamene ivi, yove enena kuti: “Nutembeja ngako abale na alongo amene enzenitang’isha kuti osati nitaye ntima.”
19. Ndaŵa yanji tufunika kupitilija kudalila Yehova?
19 Nthawe zonse tufunika tikodalila Yehova. Yove angatipaselini malangizo amene angachitishe kuti tikumane na mavuto. Yove ni wopasa komasoti ni Atata wamene okonda ngako ŵanthu amene omukonda komasoti kumulambila. Osakaikila kuti Yehova akusiyenilini pa nthawe ya mavuto. (Ahe. 13:5, 6) Mark, wala watatomolako kale, enena kuti: “Yehova otisiyalini tikakumana na mavuto ndipo onkhala nase pafupi.” Yove apitilije kukupasani “mphamvu yopambana yachibadwa.” (2 Akor. 4:7) Tetyo, mungapitilije mphela kunkhala okhulupilika komasoti osataya ntima olo pamene munthu wamukonda wasiya kutumikila Yehova.
NYIMBO N.° 43 Pemphelo yotembeja Mulungu
^ ndime 5 Vunkhala vokhumudwisa ngako keno munthu muyakine watukonda wasiya kutumikila Yehova! Nkhani ino ifotokoze mwakumvwila Mulungu vamene ivi vikachitika. Ifotokozesoti vangachite achibale okhulupilika a munthu wamene uyo kuti apilile ululu wamene unkhalapo nopitilija mphela kunkhala otang’a mwauzimu. Komasoti tiwone vangachite onse mumpingo kuti akolimbikisa noyavya achibale a munthu wamene wasiya kutumikila Yehova.
^ ndime 1 Mazina ayakine mu nkhani ino achinjiwa.
^ ndime 79 MAWU OFOTOKOZA VITHUNZI: Keno m’bale wasiya banja yake komasoti kutumikila Yehova, nkazi wake na ŵana ŵake otamana.
^ ndime 81 MAWU OFOTOKOZA VITHUNZI: Akulu aŵili olimbikisa banja iyakine ya mumpingo mwawo.
