1. Kansi ŵanthu okhulupilika angankhale pa ushamwali wotyani na Yehova?

M’BANJA ya Yehova muli Yesu, wamene ni “woyamba kuvyalika wa chilengedwe chonse,” komasoti magulu ŵa angelo. (Akol. 1:15; Sal. 103:20) Kuyangijila pali vamene ivi, Yesu penze pano pachalo, yove ephunzisasoti kuti ŵanthu okhulupilika nawo angowona Yehova monga Atata ŵawo. Penzelaŵila na ophunzila ŵake, Yesu enzetanthauza kuti “Yehova ni Atata ŵake komasoti Atata ŵa ophunzila ŵake.” (Yoh. 20:17) Petilipeleka kwa Yehova nobatizika, tiyamba kunkhala mbali ya banja ya abale na alongo amene otikonda.—Mk. 10:29, 30.

2. Kansi mu nkhani ino tikambilane chinji?

² Ayakine vuŵavuta kuwona Yehova monga Atata ŵawo achikondi. Ayakine angaziŵelini mwangakondele abale na alongo ŵawo. Muli ino nkhani, tikambilane mwangatiyavyile Yesu kuwona kuti Yehova ni Atata achikondi wamene tingankhale naye pa ushamwali wotang’a. Tiwonesoti njila ziyakine zatingakonkhejele Yehova pochita vinthu na abale na alongo ŵasu.

3. Kansi pemphelo yachisanzo ya Yesu yutiyavya tyani kunkhala pa ushamwali na Yehova?

³ Yehova ni Atata achikondi. Yesu ofuna kuti tikowona Yehova molingana na mwakumuwonela yove—monga kolo yachikondi komasoti iweme ntima yamene tingalaŵile nayo nthawe iliyonse, osati monga munthu waudindo muyumu ntima wamene akungouja ayake vochita. Ivi vuwonekela luweme pa mawu ŵechinena Yesu kuuja ophunzila ŵake pa vinthu vangapemphelele. Yove eyamba pemphelo yachisanzo na mawu akuti: “Atata ŵasu.” (Mt. 6:9) Yesu sembe etiuja kuti tikotomola Yehova kuti “Wamphamvuzonse,” “Nyamalenga,” olo kuti “Mfumu yosasila”—onse amene aŵa ni mazina oyenelela audindo ndipo opezeka  m’Baibolo. (Gen. 49:25; Yes. 40:28; 1 Tim. 1:17) Koma mmalomwake Yesu etiuja kuti tikoita Yehova kuti “Atata.”

4. Kansi tuziŵa tyani kuti Yehova ofuna kuti tinkhale naye pa ushamwali?

⁴ Kansi mwewo muwona kuti n’kovuta kuwona Yehova monga Atata ŵanu achikondi? Ayakine a sewo tuwona tetyo. Keno atata ŵasu enzeve chikondi, ivi vingachitishe kuti vinkhale vovuta kuganizila kuti kuli atata amene otikonda. N’volimbikisa ngako kuziŵa kuti Yehova omvwisha luweme mavuto ŵasu. Yove ofuna kunkhala nase pa ushamwali. N’chifukwa chake Mawu ŵake otilimbikisa kuti: “Vwendelani kuli Mulungu, ndipo yove naye akuvwendeleleni.” (Yak. 4:8) Yehova otikonda, ndipo yove ofuna kunkhala Atata aweme ngako kuli sewo.

5. Mokatijana na lemba ya Luka. 10:22, kansi Yesu angatiyavye tyani kunkhala pa ushamwali na Yehova?

⁵ Yesu angatiyavye kuti tinkhale pa ushamwali na Yehova. Yesu omuziŵa luweme ngako Yehova ndipo ewonesha minkhalidwe Yake mwaungwilo mwakuti yove enena kuti: “Wala wawona newo wawonasoti Atata.” (Yoh. 14:9) Yesu ali monga ni mwana nkulu m’banja wamene otiphunzisa mwatingalemekezele komasoti kumvwila Atata ŵasu, mwatingamukondweleshele komasoti kuti tinkhale ovomelejeka kuli Yove. Komasoti chofunika ngako n’chakuti, Yesu otiyavya kumvwisha minkhalidwe ya Yehova, monga chikondi komasoti kuwama ntima. (Ŵelengani Luka 10:22.) Tiyeni tikambilane visanzo viyakine vamene vuwonesha kuti Yehova ni Atata achikondi.

6. Kansi tuziŵa tyani kuti Yehova enzemvwishila mapemphelo ŵa Yesu?

⁶ Yehova omvwishila ŵana ŵake. Onani vechichita yove pomvwishila Mwana wake woyamba kuvyalika. Mosakaikila Yehova enzemvwishila mapemphelo anyinji ngako a Mwana wake penze pano pachalo. (Lk. 5:16) Yove echimvwa Yesu penzepemphelela vosankha vikulu-vikulu, monga posankha atumwi ŵake 12. (Lk. 6:12, 13) Komasoti Yehova echimvwa Yesu penzepemphela pa nthawe yenze pa mavuto. Penze esala patontho kupelekewa, Yesu epemphela kuli Atata ŵake na ntima wonse za mayeselo ovuta amene ŵenze esala patontho kukumana nawo. Yehova aliyeumvwe tyala pemphelo ya Yesu na kuŵankhale, koma etumijasoti mngelo  kuti akalimbikise Mwana Wake wamene uyu wapantima.—Lk. 22:41-44.

7. Kansi mwewo mukumvwa tyani chifukwa choziŵa kuti Yehova omvwishila mapemphelo ŵa atumiki ŵake?

⁷ Masiku ŵano, Yehova opitilija kumvwishila mapemphelo ŵa atumiki ŵake, ndipo yove oyankha mapemphelo ŵawo, pa nthawe iweme komasoti mu njila iweme ngako. (Sal. 116:1, 2) Mulongo muyakine wa ku India, ewona mwechiyankhila Yehova mapemphelo ŵake. Yove enze na mavuto akulu ngako a m’maganizo. Tetyo, yove epemphela kwa Yehova kufumila pansi pa ntima kumufotokozela za vuto yake yamene iyo. Yove elemba kuti: “Pulogilamu ya JW Broadcasting^® ya May 2019 yamene yunena za mwatingasilijile nkhaŵa, kulaŵila chendi inkhala chinthu ngacho-ngacho chenenzefunikila newo. Pulogilamu yamene iyi inkhala yankho ya mapemphelo ŵangu kwa Yehova.”

8. Kansi Yehova ewonesha tyani kuti enzemukonda Yesu?

⁸ Yehova owonesha chikondi chake kuli sewo monga ni mwechiwoneshela chikondi chake kuli Yesu pa moyo wake wonse pano pachalo. (Yoh. 5:20) Yehova eyavya Yesu kuti apitilije kunkhala na chikhulupililo chotang’a, pa nthawe yenze na nkhaŵa komasoti ewoneshesha kuti ali na vinthu vonse vofunika pa moyo. Yehova enzemuujasoti Mwana wake wamene uyu kuti omukonda ndipo enzesangalala naye. (Mt. 3:16, 17) Chifukwa chakuti nthawe zonse enzedalila Atata ŵake ŵakululu achikondi, Yesu aliyelimvwe kuti ali yeka olo patontho.—Yoh. 8:16.

9. Kansi tuziŵa tyani kuti Yehova otikonda?

⁹ Molingana na Yesu, sewo tonse tankhala tuwona kuti Yehova otiwonesha chikondi mu njila zosiyana-siyana. Ganizilani ivi: Yehova watilola kuti tinkhale azishamwali ŵake komasoti watipasa abale na alongo anyinji amene otiyavya kunkhala osangalala komasoti otilimbikisa tikakumana na mavuto. (Yoh. 6: 44) Yehova otipasasoti vonse vatufunikila kuti tinkhale na chikhulupililo chotang’a. Yove otiyavyasoti kuti tikofwana vinthu vatufunikila pa moyo wasu wa nsiku na nsiku. (Mt. 6:31, 32) Tikoganizila chikondi chakutiwonesha Yehova, sewo nase tuyamba kumukonda ngako.

10. Kansi tuphunzilapo chinji pa mwakuchitila vinthu Yehova na abale ŵasu komasoti alongo?

¹⁰ Yehova okonda abale na alongo ŵasu. Koma nthawe ziyakine payakine sewo vingotivuta kuti tikoŵakonda. Payakine vamene ivi vingachitike chifukwa chosiyana chinkhalidwe na kwetifumila. Komasoti tonse tingachite vinthu viyakine vamene vingakalipishe ŵanthu ayakine olo kuŵakhumudwisa. Olo n’tetyo, tonse tingachite vinthu vamene vingayavye kuti abale na alongo akokondana. Kansi tingachite tyani? Tingachite tetyo pokonkheja Atata ŵasu nokonda abale na alongo. (Aef. 5:1, 2; 1 Yoh. 4:19) Tiyeni tiwone vatuphunzilapo pa chisanzo cha Yehova.

11. Kansi Yesu ewonesha tyani “chifundo chikulu” cha Yehova?

¹¹ Yehova ni ‘wachifundo chikulu.’ (Lk. 1:78) Munthu wachifundo okhuzika akawona ayakine ovutika ndipo osakila-sakila njila yakuti aŵayavye komasoti kuŵalimbikisa. Mwenzechitila vinthu Yesu na ŵanthu, venzewonesha mwakuŵakondela Yehova. (Yoh. 5:19) Pa nthawe iyakine Yesu pechiwona gulu ya ŵanthu, “yove eŵamvwila chisoni, chifukwa enze onyukanyuka na otayika monga ni mbelele zamene ziliye chiŵeta.” (Mt. 9:36) Kuyangijila pa kuŵachitila chifundo, Yesu echitasoti vinthu viyakine poŵayavya. Yove epojeka olwala komasoti kuyavya ŵanthu “okata ntchito yoŵeŵesha na olemewa.”—Mt. 11:28-30; 14:14.

12. Kansi tingawoneshe tyani chifundo kuli abale ŵasu na alongo?

¹² Poyamba tufunika kuganizila mavuto ŵakukumana nawo abale na alongo ŵasu kuti tikwanishe kuŵachitila chifundo. Mwachisanzo, vingachitike  kuti mulongo muyakine ovutika na matenda akulu. Payakine yove angolaŵilalini kaŵili-kaŵili za vuto yake yamene iyo, koma angatembeje ngako keno ayakine angamuyavye. Kuti tiziŵe mwatingamuyavyile tingachite luweme kulikonsha kuti: Kansi yove okwanisha kukata ntchito zosamalila banja yake? Kansi tingamuyavye kupika chakulya olo kukonza m’ng’anda? Olo payakine m’bale muyakine ntchito yamusilila. Kansi tingamupase mphaso ya ndalama, payakine olosoti osamuuja kuti yafumila kuli sewo, na cholinga chofuna kumuyavya mpaka azafwanesoti ntchito iyakine?

13-14. Kansi tingachite tyani kuti tinkhale opasa monga ni Yehova?

¹³ Yehova ni wopasa. (Mt. 5: 45) Molingana na Yehova, tufunika tikoyavya ayakine olo akaliyetisenga. Osati tikochitayembekezela kuti abale ŵasu komasoti alongo ayambe atisenga kuti tiŵawoneshe chifundo. Yehova otiŵalishila zuŵa yake nsiku iliyonse ndipo tuchitalini kumusenga! Komasoti kuthuma kwa zuŵa kwamene uko kuyavya aliyense, osati tyala ŵanthu amene otembeja. Kansi mwewo muvomekejalini kuti Yehova owonesha kuti otikonda potipasa vatufunikila? Sewo tumukonda ngako Yehova chifukwa chakuti ni muweme ntima komasoti wopasa!

¹⁴ Pokonkheja Atata ŵasu ŵakululu, abale na alongo ŵasu anyinji owonesha ntima wopasa. Mwachisanzo mu 2013, chimphepo champhamvu ngako chuitiwa kuti Haiyan, chiwononga ngako vinthu ku Philippines. Mang’anda komasoti katundu munyinji wa abale na alongo ewonongeka. Koma banja yawo ya pachalo chonse iŵayavya mokulumija. Anyinji epeleka ndalama zawo komasoti kukatako ntchito zomanga, mwakuti ng’anda pafupi-fupi 750 zikonzewa olo kumangiwasoti pakaliyepita chaka! Muno nkati mwa mulili wa COVID-19, a Mboni za Yehova ochita khama kuti apeleke thandizo iliyonse yakufunikila abale na alongo ŵawo. Keno tuyavyana mokulumija tuwonesha kuti tukondana.

15-16. Kansi lemba ya Luka 6:36, yutiuja kuti tikochita chinji pokonkheja Atata ŵasu ŵakululu?

¹⁵ Yehova ni wachifundo komasoti wokhululuka. (Ŵelengani Luka 6:36.) Nsiku iliyonse Atata ŵasu ŵakululu otiwonesha kuti ni achifundo. (Sal. 103:10-14) Ophunzila a Yesu enzelini ŵanthu angwilo; olo n’tetyo, Yesu enzeŵawonesha chifundo komasoti kuŵakhululukila. Yove  enze wofunishisha olo kupeleka moyo wake na cholinga chakuti machimo ŵasu akhululukiwe. (1 Yoh. 2:1, 2) Ntima wokhululukila ayakine komasoti chifundo cha Yehova na Yesu vutichitisha kuti tinkhale nawo pa ushamwali.

¹⁶ Tuyamba kukondana ngako na abale ŵasu ‘tikokhululukilana na ntima wonse.’ (Aef. 4:32) N’chendi kuti nthawe ziyakine kukhululukila ayakine kungankhale kovuta ngako, koma tufunika kuyeja-yeja kuti tikokhululuka. Mulongo muyakine ewona kuti nkhani ya mu Nsanja ya Olonda, ya mutu wakuti, “Muzikhululukirana ndi Mtima Wonse” imuyavya ngako. * Yove elemba kuti: “Nkhani yamene iyi yaniyavya kumvwisha mwamene kukhululukila ayakine mwakuyavyila. Nkhani yamene iyi ifotokoza kuti kukhululukila ayakine kutanthauzalini kuti uwona kuti vamene ivo vawachitiliwa ni viweme olo ni vitontho. M’malomwake, kutanthauza kusasunga vifukwa nopitilija kunkhala na ntendele wamuntima.” Keno sewo tukhululukila abale ŵasu komasoti alongo na ntima wonse, tuwonesha kuti tuŵakonda komasoti kuti tukonkheja Atata ŵasu, Yehova.

17. Mokatijana na Mateyu 5:16, kansi tingachite tyani kuti tikolemekeza Atata ŵasu ŵakululu?

¹⁷ Tutembeja ngako kunkhala m’banja ya pachalo chonse yamene ŵanthu ŵake okondana. Tufunishisha kuyavya ŵanthu anyinji mulimonse mwatingakwanishile kuti nawosoti ayambe kulambila Mulungu wasu. Poganizila mfundo yamene iyi, tufunika kunkhala osamala kuti osati tikochita chilichonse chamene chingachitishe kuti ŵanthu akoganiza vinthu viipa vokhuza ŵanthu a Yehova olo vokhuza Atata ŵasu ŵakululu. Nthawe zonse tufunika kuyeja-yeja kuchita vinthu vamene vingayavye ŵanthu kuti akochita chidwi na uthenga uweme.—Ŵelengani Mateyu 5:16.

18. Kansi n’chinji chingatiyavye kuti osati tikochita wowa polalikila?

¹⁸ Nthawe ziyakine, ayakine otinyoza olo kutitamanisha chifukwa chomvwila Atata ŵasu ŵakululu. Kansi tingachite tyani keno tili na wowa tikolaŵila na ayakine vokhuza chikhulupililo chasu? Tufunika kudalila Yehova na Mwana wake kuti atiyavye. Yesu esimikijila ophunzila  ŵake kuti ove enzefunikalini kudela nkhaŵa mwangalaŵilile olo vangalaŵile. Ndaŵa yanji? Yesu efotokoza kuti: “Pa nthawe yamene iyo, muzapasiwe vakuti mulaŵile, pakuti wolaŵila muzankhalelini mwewo pamweka, koma mzimu wa Atata ŵanu uzalaŵile kupitila muli mwewo.”—Mt. 10:19, 20.

19. Pelekani chisanzo cha munthu muyakine wamene elalikila motang’a ntima.

¹⁹ Ganizilani vichitikila Robert. Pa nthawe iyakine, pechingoyamba kuphunzila Baibolo eitiwa kukhoti iyakine ya masodja ku South Africa. Pa nthawe yamene iyo, yove enzeziŵalini vinyinji vokhuza Baibolo. Yove efotokoza motang’a ntima kuli woweluza kuti enzefunalini kuloŵa usodja chifukwa chakuti okonda abale ŵake. Robert enzetembeja kunkhala m’banja ya Yehova! Woweluza wamene uyo emukonsha kuti: “Kansi abale ŵako amene awo ni ŵani?” Yove enzeiyembekezelalini konsho yamene iyi, koma mokulumija ekumbukila lemba ya nsiku yamene iyo. Yenze lemba ya Mateyu 12:50, yamene yunena kuti: “Aliyense ochita chifunilo cha Atata ŵangu ŵakululu, wamene uyo niye m’bale wangu, mulongosi wangu na amayi ŵangu.” Olo kuti Robert enze echingoyamba kwalombapano kuphunzila Baibolo, mzimu wa Yehova wimuyavya kuti ayankhe konsho yamene iyi komanso makonsho ayakine ŵenzelekayembekezela. Vuwoneka kuti Yehova ekondwela ngako na vechichita Robert! Yehova okondwelasoti keno tumudalila nolalikila motang’a ntima olo pa nthawe yovuta.

20. Kansi tufunika kunkhala osimikija ntima kuchita chinji? (Yohane 17:11, 15)

²⁰ Tiyeni tipitilije kutembeja mwayi wasu wonkhala m’banja yauzimu yamene ŵanthu ŵake okondana. Tili na Atata aweme ngako komasoti abale na alongo ŵasu anyinji amene otikonda. Nthawe zonse tufunika kutembeja ngako chifukwa cha vamene ivi. Satana na ŵanthu ŵake aipa amene omukonkhelela, oyeja-yeja kutichitisha kuti tikokaikila chikondi cha Atata ŵasu ŵakululu komasoti ofuna kusokoneza mgwilizano watili nawo. Olo n’tetyo, Yesu esenga Atata ŵasu kuti akotilolela na cholinga chakuti banja yasu inkhale yokatijana. (Ŵelengani Yohane 17:11, 15.) Yehova oyankha pemphelo yamene iyi. Molingana na Yesu, osati tikokaikila olo patontho kuti Atata ŵasu ŵakululu otikonda komasoti kutiyavya. Tiyeni tinkhale osimikija ntima kuti tipitilije mphela kukatijana na ŵanthu a m’banja yasu yauzimu.