1-2. (a) Kansi tingaphunzilepo chinji pa lemba ya Miyambo 16:31, pa nkhani ya mwatufunika kuŵawonela abale na alongo ŵasu achikulile? (b) Kansi mu nkhani ino tiyankhe makonsho otyani?

KU UNITED STATES, kuli malo ayakine amene mungafwaneko miyala ya daimondi pansi. Koma olo n’tetyo, miyala yamene iyi ya daimondi, yunkhala kuti ikaliyepukutiwa kuti iyambe kukatishiliwa ntchito monga chuma cha ntengo wapatali. Tetyo, ŵanthu amene oiwona miyala yamene iyi angaziŵelini kuti ili na ntchito yanji ndipo angangoipitilila osaikilako nzelu.

² Molingana na vamene ivi, achikulile okhulupilika ŵatili nawo ali monga ni miyala ya daimondi yamene iyi; ove ni chuma cha ntengo wapatali. Mawu a Mulungu olinganija imvwi zawo na chisote chachifumu. (Ŵelengani Miyambo 16:31; 20:29) Koma olo n’tetyo, nthawe ziyakine tingachiwonelini chuma chamene ichi. Achilumbwana amene oziŵa kuti achikulile ni ofunika ngako, angafwane chinthu chofunika ngako kupambana chuma ngacho-ngacho. Mu nkhani ino, tiyankhe makonsho atatu aŵa: Ndaŵa yanji Yehova owona achikulile amene ni okhulupilika kuti ni chuma cha ntengo wapatali? Ndaŵa yanji abale na alongo achikulile ni ofunika ngako mu gulu ya Yehova? Kansi sewo tingachite chinji kuti tipindule mokwanila na chisanzo chawo?

3. Mokatijana na lemba ya Salimo 92:12-15, ndaŵa yanji achikulile amene ni okhulupilika ni antengo wapatali kwa Yehova?

³ Achikulile amene ni okhulupilika ni antengo wapatali kwa Yehova. Yove oŵaziŵa mwalili ndipo otembeja minkhalidwe yawo iweme ngako. Yove okondwela keno achikulile oujako achilumbwana nzelu zafwana pa vyaka vinyinji vatumikila  mokhulupilika. (Yobu 12:12; Miy. 1:1-4) Yehova owonasoti kupilila kwawo kuti ni chuma. (Mal. 3:16) Abale na alongo amene aŵa akumana na mavuto osiyana-siyana pa moyo wawo, koma ove aliyeleke kutumikila Yehova. Palipano, chiyembekezo chawo ni chotang’a ngako kusiyana na pa nthawe yechiyamba kuphunzila chonadi. Ndipo Yehova oŵakonda chifukwa chakuti opitilija mphela kulalikila za zina yake ‘olo kuti achita imvwi,’ kapena kuti, ni achikulile.—Ŵelengani Salimo 92:12-15.

4. Kansi ni mfundo zotyani zamene zingalimbikise abale ŵasu komasoti alongo achikulile?

⁴ Keno mwewo mukalamba, ziŵani kuti Yehova okumbukila vonse vamwachita kuvuli. (Ahe. 6:10) Atata ŵasu ŵakululu osangalala kuti mukatako ntchito yolalikila mwakhama. Mwapilila mayeselo anyinji—olosoti ovuta ngako—mwankhala mukonkheja mokhulupilika mfundo zolungama za m’Baibolo, kutumikila pa maudindo akulu-akulu, kuphunzisa ayakine komasoti kuchita vinthu mokatijana na kuchinja kwa vinthu kwamene kwankhala kuchitika mu gulu ya Yehova. Mwankhalasoti muyavya komasoti kulimbikisa ŵanthu amene ochita utumiki wa nthawe zonse. Yehova Mulungu okukondani ngako mwewo chifukwa chopitilija kunkhala okhulupilika. Yove olonjeza kuti, “asiyelini ŵanthu ŵake okhulupilika”! (Sal. 37:28) Yove okusimikijilanisoti kuti: “Munthu wa imvwi numunyamula nthawe zonse.” (Yes. 46:4) Tetyo, osaganiza kuti, pakuti lomba mwakalamba, nimwelini wofunika mu gulu ya Yehova. Nimwe wofunika ngako!

5. Kansi achikulile ofunika kukumbukila chinji?

⁵ Achikulile angayavye ngako mu gulu ya Yehova. Olo kuti ove payakine aliyesoti mphamvu monga ni kale, oziŵa vinthu vinyinji vamene ankhala oviphunzila pa moyo wawo. Yehova angaŵakatishile ntchito mu njila zosiyana-siyana, monga ni mwavuwoneshela visanzo vokonkhapo va atumiki akale komasoti a masiku ŵano.

6-7. Tomolani visanzo va m’Baibolo va achikulile amene edalisiwa chifukwa chotumikila Yehova mokhulupilika.

⁶ M’Baibolo muli visanzo viweme va ŵanthu okhulupilika amene epitilija kutumikila Yehova mwakhama olo kuti enze okalamba.  Mwachisanzo, Mose enze na vyaka pafupi-fupi 80 pechinkhala mneneli wa Yehova komasoti nsogoleli wa Aisiraeli. Olo kuti Danieli enze na vyaka vam’ma 90, Yehova epitilija kumukatishila ntchito monga mneneli. Ndipo ntumwi Yohane naye, vuwoneka kuti enze na vyaka vam’ma 90 pechiujiliwa kuti alembe buku ya Chivumbulutso.

⁷ Atumiki anyinji okhulupilika enzelini otchuka komasoti payakine ŵanthu anyinji enzeŵaziŵalini. Koma Yehova enzeŵaziŵa ndipo eŵapasa madaliso chifukwa cha kukhulupilika kwawo. Mwachisanzo, Simiyoni wamene enze “wolungama na woyopa Mulungu,” otomolewalini kaŵili-kaŵili m’Baibolo. Koma Yehova enzemuziŵa ndipo emupasa mwayi wowona Yesu akali kalucheche komasoti wolosela vokhuza mwana wamene uyu na amayi ŵake. (Lk. 2:22, 25-35) Ganizilanisoti za mneneli mwanakazi zina yake Anna, wamene enzesoti wamasiye. Yove enze na vyaka 80 koma “enzeshotalini pa kachisi.” Pakuti ‘enzepezeka pa kachisi’ nthawe zonse, naye epasiwasoti mwayi wowona Yesu akali kalucheche. Simiyoni na Anna, enze antengo wapatali kwa Yehova.—Lk. 2:36-38.

8-9. Kansi alongo amasiye oyavya tyani gulu ya Yehova?

⁸ Masiku ŵano, pali achikulile anyinji okhulupilika amene opeleka chisanzo chiweme kuli achilumbwana. Ganizilani chisanzo cha Mulongo Lois Didur. Yove enze na vyaka 21 tyala pechiyamba kutumikila monga mpainiya wapadela ku Canada. Pavuli pake, yove na mwanalume wake John, etumikila monga opanamila dela kwa vyaka vinyinji. Pavuli pake echiyatumikila ku Beteli ya ku Canada kwa vyaka vopitilila 20. Penze na vyaka 58, Lois na mwanalume wake esengewa kuti akatumikile ku Ukraine. Kansi ove echita tyani? Kansi ove sembe eganiza kuti akula mwakuti angakwanishelini kuyatumikila m’chalo chiyakine? Ove evomela ndipo John enzetumikila mu Komiti ya Nthambi kwamene uko. Papita vyaka 7, John emwalila ndipo Lois esankha kupitilija mphela kutumikila kwamene uko. Palipano yove ali na vyaka 81, ndipo opitilija mphela kutumikila Yehova mokhulupilika komasoti abale na alongo ku Beteli ya ku Ukraine omukonda ngako.

⁹ Payakine ŵanthu anyinji owonalini vakuchita anakazi amasiye amene ali monga ni Lois, kusiyana na mwevenzele pamene analume ŵawo penze akali moyo. Koma olo n’tetyo, kunkhala amasiye kuŵachitishalini kuti osati ankhale antengo wapatali. Yehova oŵatembeja ngako alongo amene aŵa, amene eyavya analume ŵawo kwa vyaka vinyinji ndipo palipano opitilija mphela kumutumikila mokhulupilika. (1 Tim. 5:3) Kuyangijila pali vamene ivi, ove olimbikisa ngako achilumbwana.

10. Kansi Tony epeleka chisanzo chiweme chotyani?

¹⁰ Achikulile okhulupilika amene angakwanishelini kufuma pang’anda, nawosoti ni antengo wapatali. Mwachisanzo, m’bale muyakine zina yake Tony, palipano onkhala kung’anda zosamalililako okalamba. Yove ebatizikila ku  Pennsylvania, U.S.A., mu August 1942 penze na vyaka 20. Pakaliyepita nthawe kufumila pechibatiziwa, emangiwa chifukwa chokana kuloŵa usodja ndipo enkhala mu djeli kwa vyaka viŵili na hafu. Yove na nkazi wake Hilda eyavya ŵana ŵawo aŵili kuphunzila chonadi. Kwa vyaka vinyinji, Tony etumikila m’mipingo itatu monga wosogolela (wamene palipano oziŵika kuti wogwilizanisa ntchito za akulu) komasoti wopanamila nsonkhano wadela. Yove enzechitisha misonkhano komasoti maphunzilo a Baibolo ku djeli iyakine. Palipano Tony ali na vyaka 98, koma opitilija mphela kutumikila Yehova mwakhama. Yove opitilija kuchita vonse vangakwanishe potumikila Yehova pamozi na abale na alongo a mumpingo wake.

11. Kansi tingawoneshe tyani kuti tulemekeza achikulile amene angakwanishelini kufuma pang’anda?

¹¹ Kansi tingawoneshe tyani kuti tulemekeza achikulile amene angakwanishelini kufuma pang’anda? Keno n’vokwanishika, akulu angayavye achikulile amene aŵa kuti akochita misonkhano komasoti kulalikila. Tingawoneshesoti kuti tuŵaganizila keno tuluta kuyaŵawona olo kutandala nawo kupitila pa videoconference. Tufunikasoti kuwonesha chidwi kuli achikulile amene onkhala pang’anda zosamalililako okalamba zamene zili kutali na mpingo wa kwawo. Koma keno tingaleke kusamala, tingoŵaluŵa. Ayakine mwa achikulile amene aŵa vuŵavuta olosoti payakine okondalini kuti akokungonkhalila kulaŵila vachitako potumikila Yehova. Koma tingapindule ngako keno tuŵachitisha kuti ankhale omasuka nomvwishila akotifotokozela vinthu vokondwelesha vakumana navo mu gulu ya Yehova.

12. Kansi mumpingo mwasu tingafwanemo abale na alongo otyani?

¹² Tingadabwe kuwona kuti mumpingo mwasu tilisoti na visanzo viweme va achikulile okhulupilika. Mulongo muyakine zina yake Harriette, etumikila Yehova kwa vyaka vinyinji mumpingo wa kwawo ku New Jersey, U.S.A. Pavuli pake efuluka na kuyankhala pamozi na mwana wake mwanakazi. Abale amumpingo wake wamene uyu wanyowani, enzefwana nthawe yotandala naye kuti amuziŵe luweme ndipo ewona kuti ni wantengo wapatali. Mulongo wamene uyu eŵalimbikisa poŵafotokozela vinthu vosiyana-siyana vechikumana navo mu utumiki pechingophunzila chonadi cha m’ma 1920. Pa nthawe yamene iyo, yove enzenyamula nswachi nthawe iliyonse akokuya mu utumiki—kuyopela kuti payakine angayakatiwa novaliliwa mu djeli. Ndipo emangiwa kaŵili mu 1933, mwakuti ulwendo uliwonse enkhala mu djeli kwa sondo imozi. Pa nthawe monga ni yamene iyi, mwanalume wake wamene enzelini wa Mboni enzemuyavya kusamalila ŵana ŵawo atontho-atontho okwana atatu. Kulaŵila chendi, achikulile okhulupilika monga ni Harriette ofunika kuti tikoŵalemekeza!

13. Kansi taphunzila kuti achikulile ni ofunika tyani mu gulu ya Yehova?

¹³ Abale na alongo ŵasu achikulile ni ofunika ngako kwa Yehova komasoti ku gulu yake. Ove awona mwaŵadalisila Yehova komasoti mwakudalisila gulu yake mu njila zosiyana-siyana. Aphunzilasoti mfundo zofunika kufumila pa vinthu vaphoniyesha. Mukowona kuti ove ni “chisime cha nzelu” ndipo mukophunzilapo kanthu pa vinthu vamene vankhala vuŵachitikila. (Miy. 18:4) Keno mufwana nthawe yotandala nawo, mungatang’ishe chikhulupililo chanu komasoti mungaphunzile vinthu vinyinji!

14. Kansi lemba ya Deuteronomo 32:7, yulimbikisa achilumbwana kuchita chinji?

¹⁴ Mukoyeja-yeja kuyamba ni mwewo kutandala na achikulile. (Ŵelengani Deuteronomo  32:7.) N’chendi kuti payakine palipano menso ŵawo owonalini bwino, ofwamba patontho-patontho komasoti mawu ŵawo omvwikalini ngako. Koma ove ofunishisha kuti akochita vinyinji ndipo opanga “mbili iweme” pamenso pa Yehova. (Mlal. 7:1) Mukokumbukila chifukwa chake Yehova oŵawona kuti ni antengo wapatali. Pitilijani kuŵalemekeza. Mukonkhala monga ni Elisa, wamene efunishisha kupitilija kunkhala na Eliya pa nsiku yawo yosilijila kuchitila vinthu pamozi. Katatu konse Elisa elaŵila kuti “nikusiyenilini.”—2 Maf. 2:2, 4, 6.

15. Kansi ni makonsho otyani ŵatingakonshe achikulile?

¹⁵ Tingawoneshe chidwi kuli achikulile poŵakonsha makonsho mwaulemu. (Miy. 1:5; 20:5; 1 Tim. 5:1, 2) Mungaŵakonshe makonsho monga akuti: “Kansi pemwenze wachilumbwana, n’chinji chikusimikijilani kuti mwafwana chonadi?” “Kansi vinthu vamene vakuchitikilani pa moyo wanu vakuyavyani tyani kunkhala pa ushamwali wotang’a na Yehova?” “Kansi ni chisinsi chotyani chamwafwana kuti mupitilije kunkhala osangalala potumikila Yehova?” (1 Tim. 6:6-8) Tetyo, mukomvwishila akokufotokozelani.

16. Kansi achikulile akotandala na achilumbwana, onse opindula tyani?

¹⁶ Achikulile akotandala na achilumbwana, onse olimbikisana. (Aro. 1:12) Mwewo achilumbwana, vamene ivi vikuyavyeni kusimikijila kuti Yehova osamalila atumiki ŵake okhulupilika, ndipo wachikulile wamene uyo awone kuti mumukonda. Yove asangalale kukufotokozelani mwamudalisila Yehova.

17. Ndaŵa yanji tinganene kuti achikulile okhulupilika opitilija kuwoneka luweme olo papite vyaka vinyinji?

¹⁷ Tikokalamba, muŵili uleka kuwoneka luweme. Koma kuli ŵanthu amene otumikila Yehova mokhulupilika, kuwoneka luweme kwawo kupitilija kuyangijilika kuli yove olo papite vyaka vinyinji. (1 Ates. 1:2, 3) Ndaŵa yanji vili tetyo? Vili tetyo ndaŵa yakuti kwa vyaka vinyinji, ove alola kuti mzimu wa Mulungu ukoŵaphunzisa komasoti kuŵayavya kunkhala na minkhalidwe iweme. Keno tuyeja-yeja kuŵaziŵa luweme abale na alongo ŵasu achikulile, kuŵalemekeza komasoti kuphunzila vinthu kufumila kuli ove, niye patuyambasoti kuŵawona kuti ni chuma cha ntengo wapatali.

18. Kansi tizakambilane chinji mu nkhani ikuza?

¹⁸ Mpingo unkhala wotang’a ngako keno achilumbwana owona kuti achikulile ni ofunika komasoti keno achikulile nawo owona kuti achilumbwana ni ofunika. Mu nkhani ikuza tizakambilane mwangawoneshele achikulile kuti owona achilumbwana kunkhala ofunika mumpingo.