1. Tikayamba kukalamba, kansi ni cholinga chiweme chotyani chatingankhale nacho?

TIKAYAMBA kukalamba, tingayambe kunkhala na nkhaŵa yakuti tileke kunkhala wofunika kwa Yehova monga ni mwetenzele kale. Olo kuti tiliye mphamvu zinyinji monga ni mwetenzele kale petenze tikali achilumbwana, tingakatishile ntchito nzelu komasoti maluso ŵataphunzila kuti tiphunzise achilumbwana kunkhala ofunika ngako mu gulu ya Yehova komasoti kuvomela maudindo ayakine. M’bale muyakine wamene wankhala nkulu kwa nthawe itali enena kuti: “Newo peniwona kuti lomba ningakwanishelini kuchita vinyinji monga ni mwenenzechitila kale chifukwa cha ukalamba, nenzelimvwa kunkhala wosangalala ngako chifukwa chakuti mumpingo mwenze achilumbwana anyinji oyenelela amene angakwanishe kukata ntchito.”

2. Kansi mu nkhani ino tikambilane chinji?

² Mu nkhani yapita, tiwona mwangapindulile achilumbwana chifukwa chotandala na achikulile. Mu nkhani ino, tiwone mwamene minkhalidwe monga kulichefya, kuziŵa vatingalekekwanisha kuchita, ntima wotembeja komasoti kunkhala wopasa mwaingayavyile achikulile kuti akokata ntchito mwakhama pamozi na achilumbwana, vamene vingachitishe kuti vinthu vikoyenda luweme mumpingo.

3. Mokatijana na lemba ya Afilipi 2:3, 4, kansi kulichefya ni chinji, ndipo kansi wachikulile angawoneshe tyani kulichefya?

³ Kuti ayavye achilumbwana, achikulile ofunika kunkhala olichefya. Munthu wolichefya ni wala owona ayake kunkhala omupambana. (Ŵelengani Afilipi 2:3, 4.) Pali njila zinyinji zangawoneshele achikulile nkhalidwe yamene iyi. Mwachisanzo, ntchito zinyinji mumpingo, zingakatiwe mu njila zosiyana-siyana ndipo njila zonse zamene izi ni zokatijana na mfundo za  m’Malemba ndipo zukata ntchito luweme. Wachikulile wamene ni wolichefya, oyembekezelalini kuti munthu aliyense akate ntchito zamene izi ndendende monga ni mwenzechitila yove. (Mlal. 7:10) Olo kuti ankhale na vinthu vinyinji vangafune kuphunzisa achilumbwana, wachikulile wolichefya oziŵa kuti “vochitika va pano pachalo vuchinja.” Niye chifukwa chake angafunike kuphunzila njila zanyowani zochitila vinthu.—1 Akor. 7:31.

4. Kansi opanamila madela owonesha tyani ntima wenzenawo Alevi?

⁴ Achikulile amene ni olichefya, oziŵa kuti ove akayamba kukalamba payakine angakwanishelinisoti kuchita vinthu vinyinji monga ni mwenzechitila kale. Mwachisanzo, ganizilani vamene vuchitikila opanamila madela. Akakwanisha vyaka 70, ove osengewa kuti apasiwe utumiki uyakine. Vamene ivi vingankhale vovuta. Tunena tetyo chifukwa chakuti ove enzekondwela ngako kutumikila abale ŵawo. Wamene uyu ni utumiki wamene enzeukonda ndipo muntima mwawo ofunishisha kupitilija kuuchita. Olo n’tetyo, ove omvwisha kuti ntchito yamene iyi yufunika kukatiwa na abale achilumbwana. Akochita vamene ivi owonesha ntima wenzenawo Alevi mu nthawe ya Aisiraeli, keno akwanisha vyaka 50, ove enzefunikila kupanama kutumikila pachihema. Koma chisangalalo cha Alevi achikulile amene awo chenzelini pa utumiki wenzechita. Mosiyana na vamene ivi, ove enzechita vonse vangakwanishe pa utumiki uliwonse wangapasiwe komasoti kuyavya achilumbwana. (Num. 8:25, 26) Masiku ŵanosoti abale amene enze opanamila madela, olo kuti otumikilalinisoti m’mipingo  yosiyana-siyana, ove oyavya abale na alongo mumpingo wakusonkhana komasoti kuŵalimbikisa.

5. Kansi tuphunzila chinji pa chisanzo cha Dan na Katie?

⁵ Ganizilani chisanzo cha Dan wamene etumikila monga wopanamila dela kwa vyaka 23. Dan pechikwanisha vyaka 70, yove pamozi na nkazi wake Katie, esengewa kuti akatumikile monga apainiya apadela. Kansi ove ochita tyani kuti akosangalala na utumiki wawo wamene uyu wanyowani? Dan enena kuti palipano yove ni wotangwanika ngako kupambana kale yonse! Yove onkhala na vochita vinyinji mumpingo, oyavya abale kuti ayenelele kunkhala atumiki othandiza komasoti ophunzisa ayakine kuti akolalikila mmalo opezeka ŵanthu anyinji komasoti m’madjeli. Mwewo abale achikulile, keno muli mu utumiki wa nthawe zonse olo yayi, mwewo mungachite vinyinji kuti muyavye ayakine. Kansi mungaŵayavye tyani? Mukosangalala na mwavilili vinthu pa moyo wanu palipano, mukonkhala na volinga vanyowani komasoti mukoganizila ngako vinthu vamungakwanishe kuchita osati vamungalekekwanisha.

6. Ndaŵa yanji n’kuweme kuziŵa vatingalekekwanisha kuchita? Pelekani chisanzo.

⁶ Munthu wolichefya oziŵa kuti pali vinthu viyakine vangalekekwanisha kuchita. (Miy. 11:2) Chifukwa chonkhala wolichefya, yove oyembekezelalini kuti achite vinthu vinyinji kupambana vangalekekwanisha kuchita. Monga vokonkhapo vake, yove opitilija kunkhala wosangalala komasoti opitilija kukata ntchito mwakhama. Tingalinganije munthu wolichefya na munthu wamene oyendesha motoka kumakata. Kuti akwejeke makata, dilaiva ofunika kuchinja magiya noika mugiya itontho yamene yunkhala yamphamvu. N’chendi kuti motoka yuyamba kuyenda patontho-patontho, koma opitilija mphela kuluta kusogolo. Molingana na vamene ivi, munthu wamene oziŵa vangalekekwanisha kuchita, oziŵa nthawe “yochinja magiya noika mugiya itontho” na cholinga chakuti apitilije kutumikila Yehova komasoti kutumikila ayakine.—Afil. 4:5.

7. Kansi Barizilai ewonesha tyani kuti enzeziŵa vinthu vangalekekwanisha kuchita?

⁷ Ganizilani chisanzo cha Barizilai, yove penze na vyaka 80 esengewa na Mfumu Davide kuti akankhale pang’anda yachifumu. Chifukwa chonkhala wolichefya, Barizilai ekana mwayi wechipasiwa na mfumu. Yove eziŵa kuti chifukwa cha nsinkhu wake penze vinthu vangalekekwanisha, tetyo Barizilai esenga kuti mwanalume muyakine wachilumbwana, zina yake Chimamu, alute mmalo mwa yove. (2 Sam. 19:35-37) Molingana na Barizilai, analume achikulile onkhala osangalala ngako kupeleka mwayi kuli analume achilumbwana kuti akosamalila ntchito ziyakine.

8. Kansi Mfumu Davide ewonesha tyani kuti enzeziŵa malile ŵake pa nthawe yenzefuna kumanga kachisi?

⁸ Mfumu Davide naye ni chisanzo chiweme ngako pa nkhani yoziŵa malile ŵake. Chimozi mwa vinthu venzefuna ngako yove, chenze chakuti amange ng’anda ya Yehova. Koma yove pechiujiwa kuti mwayi wamene uyu uzapelekewe kuli mwana wake Solomo, wamene enze wachilumbwana, Davide evomela chosankha chamene ichi cha Yehova ndipo echita vonse vangakwanishe kuti ayavye pa ntchito yamene iyi yomanga. (1 Mbiri 17:4; 22:5) Davide aliyewone kuti ni yove tyala woyenelela wamene angachite utumiki wamene uyu powona kuti Solomo enze “ntontho komasoti asaziŵa vinthu vinyinji.” (1 Mbiri 29:1) Davide enzeziŵa kuti chingachitishe kuti ntchito yomanga iyende luweme, venzedalila daliso ya Yehova, osati nsinkhu olo luso ya ŵala ŵanthu osogolela ntchito yamene iyo. Pokonkheja Davide, ŵala amene lomba ni achikulile opitilija kunkhala akhama, olo kuti utumiki wawo wachinja. Ndipo ove oziŵa kuti Yehova aŵadalise achilumbwana amene osamalila ntchito yenzekata ove.

9. Kansi m’bale wa m’Komiti ya Nthambi ewonesha tyani kuti ni wolichefya?

⁹ Chisanzo cha masiku ŵano cha munthu wamene  ewonesha kuziŵa vinthu vatingalekekwanisha kuchita, ni cha m’bale muyakine zina yake Shigeo. Mu 1976, penze na vyaka 30, yove eyamba kutumikila m’Komiti ya Nthambi. Mu 2004 enkhala wogwilizanisa wa Komiti ya Nthambi. Papita nthawe, yove echizaziŵa kuti aliye mphamvu monga ni kale ndipo enzechita vinthu mochelwa kuti akate ntchito yake. Lomba Shigeo eipemphelela nkhani yamene iyo ndipo eganizila kuti vingankhale luweme kuti m’bale muyakine wachilumbwana apasiwe udindo wamene uyo. Palipano, Shigeo otumikilalinisoti monga wogwilizanisa koma akalipitilija mphela kutumikila mwakhama m’Komiti ya Nthambi. Monga ni mwatawonela mu chisanzo cha Barizilai, Mfumu Davide komasoti Shigeo, munthu wamene ni wolichefya komasoti wamene oziŵa vinthu vangalekekwanisha kuchita oikilalini nzelu pa luso yalinayo achilumbwana, koma oikila nzelu pa mbali zala zakuchita luweme. Yove oŵawonalini monga ŵanthu opikishana nawo, koma oŵawona monga ayake okata nawo ntchito pamozi.—Miy. 20:29.

10. Kansi achikulile oŵawona tyani achilumbwana mumpingo?

¹⁰ Kuli achikulile, achilumbwana ni mphaso zofumila kwa Yehova ndipo ove otembeja ngako pa vonse vakuchita achilumbwana. Pa nthawe yamene mphamvu zawo zuyamba kuchepa, achikulile onkhala osangalala poziŵa kuti mumpingo muli achilumbwana amene ali na mphamvu komasoti okonzeka kukata ntchito iliyonse ingafunikile.

11. Kansi lemba ya Rute 4:13-16, yuwonesha tyani kuti n’kuweme kuwonesha kutembeja pa thandizo yakupeleka achilumbwana?

¹¹ M’Baibolo, Naomi ni chisanzo chiweme ngako cha munthu wachikulile wamene ewonesha kutembeja, yove evomela thandizo ya mpongozi wake Rute wamene enze ntontho ngako polinganija na yove. Poyamba, Naomi elimbikisa mpongozi wake Rute kuti ajokele ku ŵanthu a ntundu wake. Koma Rute pechiyumilila kuti alute naye pamo Naomi ku Betelehemu, Naomi  evomela  thandizo yofumila pansi pa ntima ya Rute. (Rute 1:7, 8, 18) Ndipo yamene iyi yenze daliso ikulu kuli anakazi aŵili amene aŵa! (Ŵelengani Rute 4:13-16.) Achikulile amene ni olichefya, okonkheja chisanzo cha Naomi.

12. Kansi ntumwi Paulo ewonesha tyani kuti enzetembeja?

¹² Ntumwi Paulo enzetembeja ngako pa thandizo yenzelondela. Mwachisanzo, yove etembeja abale aku Filipi chifukwa cha mphaso zechimutumijila. (Afil. 4:16) Yove etembejasoti thandizo yechilondela kwa Timoteyo. (Afil. 2:19-22) Penzetumijiwa ku Roma monga wadjeli, Paulo etembejasoti Mulungu chifukwa cha abale amene ewela kuzamulimbikisa. (Mac. 28:15) Paulo enze munthu wamphamvu wamene enze eyendapo kale maulwendo makilomita masauzande anyinji kuti  akalalikile komasoti kuti akalimbikise mipingo. Koma olo n’tetyo, yove enze wolichefya ndipo enzevomela kulondela thandizo kufumila kuli abale ŵake na alongo.

13. Kansi achikulile angawoneshe tyani kuti oŵatembeja achilumbwana?

¹³ Keno mwewo nimwe wachikulile, pali njila zinyinji zamungawoneshele kuti muŵatembeja achilumbwana a mumpingo mwanu. Mwachisanzo, ayakine mwa achilumbwana amene aŵa angalipeleke kuti akutakulenkoni, akakugulileni vinthu olo payakine kuti akuchitilenkoni chinthu chiyakine. Tetyo, mukotembeja ndipo mukolondela thandizo yawo. Mukowona thandizo yawo monga umboni wakuti Yehova okukondani. Ndipo vamene ivi mpaka vingachitishe kuti munkhale pa ushamwali wotang’a na munthu wamene okuyavyani. Nthawe zonse, mukoyavya azishamwali ŵanu achilumbwana kunkhala pa ushamwali wotang’a na Yehova ndipo mukoŵauja kuti mwewo musangalala ngako kuwona achilumbwana oyeja-yeja kuti akochita vinyinji mumpingo. Ndipo nthawe zonse keno n’vokwanishika, mukoŵaujako visanzo va vinthu vakuchitikilani pa moyo wanu. Mukochita vamene ivi, mwewo ‘muwoneshe kuti mumutembeja’ Yehova chifukwa cha achilumbwana amene yove eŵaleta mumpingo.—Akol. 3:15; Yoh. 6:44; 1 Ates. 5:18.

14. Kansi Mfumu Davide ewonesha tyani kuti enze wopasa?

¹⁴ Chisanzo cha Mfumu Davide chuwonesha nkhalidwe yofunika ngako yakufunikila kunkhala nayo achikulile—yamene ni kupasa. Pa nkhani yomanga kachisi, Davide epeleka ndalama komasoti vinthu viyakine vamene vechichosa pa chuma chake. (1 Mbiri 22:11-16; 29:3, 4) Yove echita vamene ivi olo kuti enzeziŵa kuti ulemelelo wonse ulute kuli mwana wake Solomo. M’masiku ŵano vingachitike kuti tiliye mphamvu zoyavya pa ntchito zomanga malo olambilila Yehova, koma olo n’tetyo tingayavye pa ntchito yomanga yamene iyi pochita vopeleka vasu kulingana na mwavilili vinthu pa moyo wasu. Tingayavyesoti achilumbwana na maluso osiyana-siyana ŵatafwana pa vyaka vatankhala tutumikila.

15. Kansi ni mphaso ya ntengo wapatali yotyani yamene Paulo yechipasako Timoteyo?

¹⁵ Pa nkhani ya kupasa, ganizilani chisanzo cha ntumwi Paulo. Yove esenga Timoteyo kuti akate naye pamozi ntchito ya umishonale ndipo ewonesha ntima wopasa pophunzisako mwanalume wachilumbwana wamene uyu njila zolalikilila komasoti zophunzisila luweme. (Mac. 16:1-3) Chifukwa chophunzisiwa na Paulo, Timoteyo enkhala mulaliki komasoti mphunzisi muweme wa uthenga uweme. (1 Akor. 4:17) Timoteyo naye, ekatishila ntchito njila zechiphunzisiwa na Paulo kuphunzisako ayakine.

16. Ndaŵa yanji Shigeo ephunzisa ayakine?

¹⁶ Achikulile masiku ŵano, oyopalini kuti aleke kunkhala ofunika mumpingo keno angaphunzise achilumbwana ntchito yenzekata ove. Mwachisanzo, Shigeo wala watatomolako kale, etola vyaka vinyinji ophunzisa abale kuti ayenelele kunkhala m’Komiti ya Nthambi. Yove echita vamene  ivi chifukwa chakuti enzeziŵa kuti viyavye pa ntchito yolalikila za Ufumu mu chalo chamene icho chakutumikila. M’kupita kwa nthawe, pepezeka m’bale woyenelela wamene eloŵa mmalo mwake nopitilija kutumikila monga wogwilizanisa. Shigeo akalipitilija mphela kuphunzisa achilumbwana vinthu vaphunzila pa vyaka 45 vawatumikila m’Komiti ya Nthambi. Abale monga ni amene aŵa oyavya ngako ŵanthu a Mulungu!

17. Mokatijana na lemba ya Luka 6:38, kansi achikulile angaŵapase chinji achilumbwana?

¹⁷ Mwewo abale na alongo achikulile, mwewo nimwe umboni wowoneka na menso wakuti moyo unkhala uweme ngako keno tutumikila Yehova na chikhulupililo komasoti na ntima wosayaŵanika. Na chisanzo chanu, mwewo muwonesha kuti ni chinthu chiweme kuphunzila mfundo za m’Baibolo nozikatishila ntchito pa moyo wasu. Kufumila pa vinthu vamwakumana navo, mwewo muziŵa mwevenzechitikila vinthu kale komasoti mwaphunzila kuti ni chinthu chofunika kudjailasoti vinthu vanyowani va masiku ŵano. Komasoti mwewo achikulile amene mwabatizika kwalombapano muli na vinthu vinyinji vamungapeleke, mwewo mungafotokozeko chisangalalo chamene chuwela chifukwa choziŵa Yehova pa moyo wanu muli wachikulile. Achilumbwana angakondwele ngako kumvwa vinthu vamwakumana navo pa moyo wanu komasoti vinthu vamwaphunzilapo. Keno mungankhale na ‘nkhalidwe yopasa’ olo kuti, kupasako ayanu vinthu va m’chimphaka chanu cha vinthu vamwaphunzila pa moyo wanu, Yehova akudaliseni ngako.—Ŵelengani Luka 6:38.

18. Kansi achikulile na achilumbwana angayavyane tyani?

¹⁸ Keno mwewo achikulile mungankhale pa ushamwali na achilumbwana, niyekuti mukokwanisha kuyavyana muyake na muyake. (Aro. 1:12) Aliyense ali na chinthu chofunika ngako chamene muyake aliye. Achikulile oziŵa vinthu vinyinji komasoti ali na nzelu zamene zafwana pa nthawe yonse yankhala otumikila pa moyo wawo, pamene achilumbwana ali na mphamvu. Keno achilumbwana na achikulile ochitila pamozi vinthu monga azishamwali, ove otamanda Atata ŵasu ŵakululu achikondi komasoti onkhala daliso kuli abale mumpingo.