Pa 1  Akorinto 15:8, Paulo enena kuti: “Pamapeto pake, ewonekela kuli newo monga kalucheche kovyalika masiku akaliyekwana.” Poyamba, tenzefotokoza kuti pamene apa vuwoneka kuti Paulo enzenena za vichitika pa nthawe yechiwona mensomphenya a Yesu mu ulemelelo wake kululu. Venze monga wapasiwa mwayi wovyalika, kapena kuti kuushiwa mwauzimu, ntundu wa kuuka wamene wenzefunikila kuzachitika pakazapita vyaka vinyinji kusogolo. Koma olo n’tetyo, kufufuza mfundo zoyangijilika pa vesi yamene iyi kwawonesha kuti pofunika kuchinja mwetenzeifotokozela.

N’chendi kuti pa lemba yamene iyi Paulo enzefotokoza za vichitika pa nthawe yechitembenuka kunkhala Mkhilisitu. Koma kansi enzetanthauza chinji pechinena kuti enze monga ni “kalucheche kovyalika masiku akaliyekwana”? Vingachitike kuti enzetanthauza vinthu vinyinji.

Kutembenuka kwake kwichitika mwazizizi komasoti mosayembekezeleka. Kanyinji-kanyinji, kuti mwana avyalike masiku akaliyekwana vuchitika mwazizizi. Saulo (wamene pavuli pake eyamba kuziŵika kuti Paulo) penzekuya ku Damasiko kuti akatamanishe Akhilisitu, enzeyembekezelalini kuti awone mensomphenya a Yesu Khilisitu wamene enze eushiwa. Kutembenuka kwa Paulo kwenzelini kodabwisa kuli yove yeka, koma kwenzesoti kodabwisa kuli Akhilisitu ŵenzefuna kutamanisha mu tauni yamene iyo. Kuyangijila pamene apo, vamene ivi vimuchitikila venze vochitisha wowa mwakuti mpaka eleka kulola kwakanthawe.—Mac. 9:1-9, 17-19.

Yove etembenuka “pa nthawe yolakwika.” Mawu a Chigiriki ŵechimasulila kuti ‘kuvyalika masiku akaliyekwana,’ angamasuliliwesoti kuti “kuvyalika pa nthawe yolakwika.” Baibolo iyakine imasulila mawu amene aŵa kuti: “Venze monga navyalika pa nthawe yamene paliye wamene enzeyembekezelako” (The Jerusalem Bible). Pa nthawe yenzetembenuka Paulo, Yesu enze ejokela kale kululu. Mosiyana na ŵanthu ŵechitomola Paulo m’mavesi oyambilila, yove aliyemuwone Yesu penze akaliyeluta kululu. (1 Akor. 15:4-8) Kuwonekela mwazizizi kwechichita Yesu, kwimupasa mwayi Paulo wowona Yesu olo kuti vingawoneke monga vichitika “pa nthawe yolakwika.”

Enzefotokoza vokhuza yove molichefya. Mokatijana na vakunena akaswili ayakine, mawu amene aŵa ŵechikatishila ntchito Paulo angawoneshe kulipepusha. Keno umu niye mwenzeganizila yove, niye kuti enzevomeleja kuti enzelini woyenelela kupasiwa mwayi wamene uyu. Ndipo yove epitilija kunena kuti: “Newo nine ntontho ngako pa atumwi onse, ndipo nine wosayenelela kuitiwa kuti ntumwi chifukwa nitamanisha mpingo wa Mulungu. Koma mwa kuwama ntima kukulu kwa Mulungu nili monga ni mwanilili muno.”—1 Akor. 15:9, 10.

Tetyo, vuwoneka kuti Paulo enzenena za vinthu vichitika Yesu pechiwonekela kuli yove mwazizizi, kutembenuka kwake pa nthawe yosayembekezeleka, olosoti kuti enze wosayenelela mwauzimu kuti awone mensompheya ochitisha chidwi amene aŵa. Mulimonse, Paulo enzewona kuti vamene ivi vimuchitikila venze vantengo wapatali. Vimuyavya kuti osati akokaikila olo patontho kuti Yesu eushiwa. N’vosadabwisa kuti kanyinji-kanyinji, enzetomola vamene ivi vimuchitikila akolalikila ayakine vokhuza kuushiwa kwa Yesu.—Mac. 22:6-11; 26:13-18.