KULI ACHILUMBWANA
11: Kulimbikila ntchito
VAMENE VUCHITIKA
Ŵanthu olimbikila kukata ntchito onkhalalini manja peteke yayi. Mmalomwake, ove owamijiwa kukata ntchito mwakhama kuti afwane vosoŵa pa moyo wawo komasoti kuti ayavyeko ayawo—olo ntchito yamene iyo ingawoneke kuti ni yonyozeka.
NDAŴA YANJI KUGANIZILA NKHANI YAMENE IYI N’KOFUNIKA?
Kuti tifwane vofunika pa moyo tufunikila mphela kukata ntchito. Ŵanthu anyinji uku ku chalo owamijiwalini na kukata ntchito, koma olo n’tetyo munthu wamene ni wakhama pa ntchito vinthu vumuyendela luweme.—Mlaliki 3:13.
Reyon enena kuti—“Nuwona kuti munthu wakhama pa ntchito onkhala wosangalala komasoti onkhala na ntendele wamuntima. Vamene ivi vunichitisha kuti nikokonda ngako kukata ntchito. Ndipo ŵanthu omulemekeza munthu okata ntchito luweme.”
MFUNDO YA M’BAIBOLO: “Kukata ntchito iliyonse kupindulisha.”—Miyambo 14:23.
VAMUNGACHITE
Mfundo izi zokonkhapo zingakuyavyeni kuti kukata ntchito kukokukondweleshani.
Mukoyeja-yeja kukata luweme ntchito yanu. Keno mukata ntchito yochitalembewa, yapang’anda olo kulemba homuweki (olo kuti, TPC), mukoikilapo ntima ngako. Mukasilija kukata ntchito yamene iyo, mukoganizila vamungachite kuti nthawe iyakine muzaikate mokulumija komasoti mwaluso. Mukochita vamene ivi muzankhale osangalala ngako.
MFUNDO YA M’BAIBOLO: “Kansi wamuwona munthu waluso pa ntchito yake? Yove azapaname pamenso pa mafumu. Azapanamelini pamenso pa ŵanthu wamba.”—Miyambo 22:29.
Mukoganizila mwaingayavyile ŵanthu ayakine ntchito yamene iyo. Nthawe zinyinji mukokwanilisha udindo wanu vuyavyasoti ŵanthu ayakine. Mwachisanzo, keno mukata mwakhama ntchito zapang’anda, muchefyako ntchito za ŵanthu ayakine pang’anda pamene apo.
MFUNDO YA M’BAIBOLO: “Kupasa kuleta chisangalalo chikulu kupambana kulondela.”—Machitidwe 20:35.
Mukochita vinyinji kupitilila vemwenzefunikila kuchita. Mmalo mokata tyala ntchito yamwaujiwa, mukowonakosoti viyakine vamungayangijile pa ntchito yamene iyo. Mukachita tetyo, muwoneshe kuti nimwe munthu woliimila pamweka—chifukwa muchitalinikakamijiwa kuti mukate ntchito yamene iyo yoyangijila.—Mateyu 5:41.
MFUNDO YA M’BAIBOLO: “Chiweme chaungachite osati chinkhale chokukakamija, koma uchite mwa kufuna kwa ntima wako.”—Filimoni 14.
Mukonkhala na malile. Ŵanthu olimbikila kukata ntchito onkhalalini aulesi komasoti osati kuti akungonkhalila kukata ntchito yamene iyo mpaka kufwika pofuna kufwa nayo. Onkhala na nthawe yokata ntchito komasoti nthawe yopumulako.
MFUNDO YA M’BAIBOLO: “Kupumula patontho, kuli bwino kupambana kukata ntchito mwakhama na kupitikisha mphepo.”—Mlaliki 4:6.
