KULI ACHILUMBWANA
9: Mbili yanu
VAMENE VUCHITIKA
Kuzŵa munthu kutanthauzalini kungomuziŵa zina yake olo mawonekedwe ŵake. Koma vukhuza mbili yake, nkhalidwe yake, vakukhulupilila—komasoti mwakuchitila vinthu na ŵanthu ayakine.
NDAŴA YANJI KUGANIZILA NKHANI YAMENE IYI N’KOFUNIKA?
Munthu wamene oteteza mbili yake, oyeja-yeja kukonkheja vakukhulupilila ndipo ololalini kuti ayake akomusankhila vochita.
Adrian enena kuti—“Ŵanthu anyinji onkhala monga ni vikadoli va m’mashopu vamene vudalila munthu muyakine kuti avisankhile vochita.”
Courtney enena kuti—“Nuwona kuti ni bwino kuchita vinthu viweme olo kuti n’kovuta. Ndipo nukwanisha kuziwa azishamwali ngawo-ngawo nikawona vakuchita komasoti powona mwamene mwanumasukilana nawo.”
MFUNDO YA M’BAIBOLO: “Osatolela nzelu za nthawe ino, koma chinjani mwa kusintha maganizo ŵanu.”—Aroma 12:2.
VAMUNGACHITE
Mufunika kulifufuza kuti muziŵe kuti nimwe munthu wotyani palipano komasoti kuti mufuna kuzankhala munthu wotyani kusogolo. Mungachite vamene ivi powona vamuchita luweme, vamusachita bwino komasoti vamukhulupilila. Makonsho aŵa okonkhapo angakuyavyeni.
Vinthu vamuchita luweme: Kansi nili na luso yotyani? Kansi ni vinthu votyani vanuchita luweme? (Mwachisanzo: Nine wosunga nthawe? Wolilesha? Wokata ntchito mwakhama? Komasoti wopasa?) Lomba palipano kansi ni vinthu votyani viweme vanuchita?
YEJANI IVI: Kansi pamweka mukangiwa kufwana vinthu viweme vamuchita olo kulaŵila? Konshani makolo ŵanu olo muyanu wodalilika kuti akuujeni.
MFUNDO YA M’BAIBOLO: “Koma aliyense payeka ayese ntchito yake, kuti awone kuti ni yotyani. Akachita tetyo azankhale na chifukwa chosangalalila na ntchito yake, osati molilinganija na munthu muyakine.”—Agalatiya 6:4.
Vinthu vamusachita luweme: Kansi ni vinthu votyani vanufunika kuwamya? Kansi ni nthawe yotyani yanuyesewa kuti nichite vinthu viipa? Kansi nufunika kulilesha pa nkhani zotyani?
MFUNDO YA M’BAIBOLO: “Tikanena kuti: ‘Tiliye uchimo,’ niye kuti tulitalijila wenye.”—1 Yohane 1:8.
Vamene vamukhulupilila: Kansi nukatishila ntchito mfundo zotyani, lomba ndaŵa yanji nuyendela mfundo zamene izi? Kansi nukhulupilila Mulungu? N’chinji chunichitisha kuti nikokhulupilila kuti aliko chendi? Ni vinthu votyani vanuwona kuti viliye chilungamo, ndipo ndaŵa yanji nuwona tetyo? Kansi nukhulupilila kuti kusogolo uku kuzachitike votyani?
MFUNDO YA M’BAIBOLO: “Kuganiza luweme kuzakusogolele, ndipo kuzindikila kuzakuteteze.”—Miyambo 2:11.
