KULI ACHILUMBWANA
12: Kunkhala na volinga
VAMENE VUCHITIKA
Volinga ni vinthu vamufuna kuti muzakwanilishe. Mufunika kukonzekela luweme, kuchinja viyakine na viyakine komasoti kuchita khama kuti muzakwanilishe volinga vamene ivo.
Volinga vunkhala vosiyana-siyana. Viyakine vutola nthawe itontho, payakine masiku olo masondo atontho kuti vikwanishike. Koma viyakine vutola nthawe itali, payakine miyezi olosoti vyaka. Nthawe zinyinji tufunika kukwanilisha volinga vitontho-vitontho poyamba kuti tizakwanilishe luweme vikulu-vikulu.
NDAŴA YANJI KUGANIZILA NKHANI YAMENE IYI N’KOFUNIKA?
Mukakwanilisha volinga vanu munkhala otang’a ntima, vuchitisha kuti ayanu akokudalilani komasoti munkhala osangalala.
Kutang’a ntima: Mukakwanilisha volinga vanu vitontho-vitontho, munkhala otang’a ntima kuti mungakwanishesoti volinga vanu vikulu-vikulu. Munkhalasoti otang’a ntima mukokumana na mavuto a nsiku na nsiku—mwachisanzo, mungalolelini kuti ayanu akukakamijeni kuti muchite vinthu viipa.
Ayanu: Ŵanthu anyinji okatijana na ŵanthu amene ali na volinga viweme—komasoti amene oyeja-yeja kukwanilisha volinga vamene ivo. Koma mukoyavyana na munthu muyakine pokwanilisha cholinga chanu, muyamba kukatijana naye ngako munthu wamene uyo.
Kunkhala osangalala: Volinga vewenze navo vikakwanilishika, ukumvwa luweme ngako mu ntima mwako.
Christopher enena kuti—“Nukonda kunkhala na volinga vakuti nivikwanilishe. Vamene ivi vuniyavya kuti nikolimvwa kuti nili na chinthu chiyakine chofunika kuchikwanilisha. Ndipo ukakwanilisha cholinga chamene icho vunkhala vokondwelesha ngako, mu ntima unena kuti: ‘Yaa! Nakwanisha chendi chenenzefuna.’”
MFUNDO YA M’BAIBOLO: “Ololeshesha mphepo akomolelini mbewu, ndipo ololeshesha mikumbi awejelini.”—Mlaliki 11:4.
VAMUNGACHITE
Mungakatishile ntchito njila izi zili mnyansi kuti mukwanilishe volinga vanu.
Volinga. Lembani volinga vamufuna kukwanilisha poyamba—pavuli pake sankhani vamufuna kuika panamba 1, panamba 2, panamba 3 mpaka vonse kusilija.
Konzani pulani. Pa cholinga chilichonse, chitani ivi:
-
Lembani nthawe yamufuna kuti muzakwanilishe cholinga chamene icho.
-
Lembani njila zamufuna kukonkheja kuti mukwanilishe cholinga chanu.
-
Konzekelani mavuto amungazakumana nawo komasoti vamungazachita.
Yambani mokulumija. Osayembekezela kuti vonse vinkhale m’malo kuti muyambepo. Payakine mungalikonshe kuti, ‘kansi n’chinji chaningayambilile kuchita?’ Mukafwana poyambila yambamponi. Mukolemba mwavuyendela vonse komasoti njila zamwakonkheja.
MFUNDO YA M’BAIBOLO: “Volinga va munthu wakhama vumupindulila.”—Miyambo 21:5.
