KULI MWANALUME NA MWANAKAZI WAKE
2: Kuchita vinthu mokatijana
VAMENE VUCHITIKA
Mwanalume na nkazi wake akochita vinthu mokatijana, onkhala monga ni ŵanthu aŵili oyendesha ndeke amene ali na cholinga chimozi. Olo akakumana na mavuto, mwanalume olo mwanakazi oganizilalini za yove “yeka,” koma oganizila vangachite onse “aŵili.”
MFUNDO YA M’BAIBOLO: “Alilini soti aŵili, koma muŵili umo.”—Mateyu 19:6.
A Christopher enena kuti: “Chikumo chimo chufwayalini inda. Tetyo, kuti vinthu vikoyenda luweme m’banja, mwanalume na mwanakazi ofunika kuchitila vinthu pamozi.”
NDAŴA YANJI KUGANIZILA NKHANI YAMENE IYI N’KOFUNIKA?
Banja ikakumana na mavuto, mwanalume na mwanakzi amene ochitalini vinthu mokatijana oyamba kulimbana, mmalo mofwana njila yosilijila vuto yamene iyo. Nkhani itontho yukula-kula mpaka kufwika poipa ngako.
Alexandra enena kuti: “Kuchita vinthu mokatijana n’kofunika ngako m’banja. Kuti newo na mwanalume wangu aliyense akungochita vake, sembe tikungonkhala monga ni ŵanthu aŵili amene onkhala ng’anda imo tyala—mwakuti sembe tukwanishalinisoti kukambilana vinthu vofunika.”
VAMUNGACHITE
LIKONSHENI KUTI
-
Kansi nikapeza ndalama, nikungowona kuti “ni zangu neka tyala”?
-
Kansi nikankhala neka paliye mwanalume olo mwanakazi wangu, nuwona kuti niye panufwana ntendele?
-
Kansi nukondalini kutandala na achibale a mwanalume olo a mwanakazi wangu, olo kuti yove okatijana nawo ngako?
VAMUNGAKAMBILANE
-
Kansi ni vinthu votyani vatuchitila pamozi monga banja?
-
Kansi ni vinthu votyani vatingafunikile kuwamya?
-
Kansi tingachite tyani kuti tikoyeja-yeja kuchitila vinthu pamozi?
VAMENE VINGAKUYAVYENI
-
Tiyelekezele kuti mutchaya bola m’matimu aŵili osiyana. Aliyense ali mu timu yake, lomba kansi pali vamungachite kuti monse mukotchaya mu timu imozi?
-
Mmalo moganiza kuti, ‘ningachite tyani kuti timu yangu iwine?’ mukolikonsha kuti, ‘tichite tyani kuti timu yasu iwine?’
A Ethan enena kuti: “Osati mukolimbana na zakuti mufwane ophoniyesha na asaphoniyesha. Vamene ivi vufunikalini. Chofunika ngako ni kunkhala mwantendele komasoti mokatijana na muyanu wamene uyo.”
MFUNDO YA M’BAIBOLO: “Osati mukoganizila vofuna vanu veka, koma mukoganizilasoti vofuna va ayanu.”—Afilipi 2:3, 4.
