Munthu akakhululukila muyake oganizilalinisoti za nkhani yamene iyo olo kumusungila chifukwa. Kukhululuka kutanthauzalini kuichefya nkhani yamene iyo yachitika olo kungochita tyala monga paliye chilichonse chaphoniyeka.

MFUNDO YA M’BAIBOLO: “Pitilijani kulolelana muyake na muyake nokhululukilana na ntima wonse, olo kuti muyakine alinacho chifukwa chodandawulila za muyake.”—Akolose 3:13.

Aaron enena kuti: “Keno ukonda munthu muyakine, uganizilalini ngako vakuphoniyesha. Mmalomwake, ukungowona viweme vakuye-jayeja kuchita.”

Kusunga vifukwa kungakulwalisheni komasoti kukusokonezani maganizo—ndipo kungasokoneze ngako banja yanu.

A Julia enena kuti: “Nsiku iyakine mulume wangu enikhumudwisa pavuli pake nonipepesa. Vinivuta ngako kuti nimukhululukile. Koma papita nthawe nimukhululukila. Koma olo n’tetyo, niliimba mphela mulandu kuti niliyechite vamene ivi mokulumija chifukwa visokoneza ngako ushamwali wasu.”

YEJANI KUCHITA IVI

Keno nthawe iyakine mwanalume olo mwanakazi wanu angazalaŵila olo kuchita vinthu vamene mungazakhumudwa navo, muzalikonshe kuti:

• ‘Kansi nakhumudwa pa chifukwa chomvwika?’

• ‘Kansi ni nkhani ikulu mwakuti ningafune kuti anipepese olo ningakwanishe kungoiluŵako?’

VAMUNGAKAMBILANE

• Kansi vutitolela nthawe itali tyani kuti tikhululukilane?

• Kansi tingachite tyani kuti tikokhululukilana mokulumija tikaphoniyelana?

VAMENE VINGAKUYAVYENI

• Keno munthu muyakine wakukhumudwisani, osakalipila mwanalume olo mwanakazi wanu.

• Mukomumvwisha mwanalume olo mwanakazi wanu chifukwa chakuti “tonse tuphoniyesha nthawe zinyinji.”—Yakobo 3:2.

A Kimberly enena kuti: “Vunkhala vosavuta kukhululukilana keno tonse taphoniyesha, koma keno waphoniya ni mmozi vunkhalako vovuta. Pofunika kulichefya kuti uvomekeje pakukupepesa muyako komasoti kuti umukhululukile.”

MFUNDO YA M’BAIBOLO: “Silija nkhani mokulumija.”—Mateyu 5:25.