MAVUTO A MULI ICHI CHALO
2 | Mukosamala ndalama
CHIFUKWA CHAKE NI VOFUNIKA
Nsiku iliyonse ŵanthu ovutika kuti afwane vinthu vofunika pa moyo. N’vomvwisha chisoni kuti mavuto a muli ichi chalo angaŵachitishe kuti akovutika ngako. Ndaŵa yachinji?
-
Kukankhala mavuto, vinthu monga vakulya komasoti ng’anda vunkhala vodula ngako.
-
Mavuto akapaka, ŵanthu ochosewa ntchito olo kuchefyelewa malipilo.
-
Kukachitika ngozi za chilengedwe, mabizinesi osokonezeka komasoti mang’anda na katundu uyakine vuwonongeka, ndipo vamene ivi vuchitisha kuti ŵanthu anyinji ankhale na wamba.
Vamufunika kuziŵa
-
Mukokatishila ntchito luweme ndalama, vizakuvuteni lini mukezekumana na mavuto.
-
Kufwana ndalama zinyinji, kusunga ndalama komasoti kunkhala na katundu unyinji, nthawe ziyakine n’kosadalilika chifukwa vusila mphamvu.
-
Pali vinthu viyakine vaisakwanisha kugula ndalama monga kunkhala wosangalala komasoti kunkhala na banja yokatijana.
Vamungachite pali pano
Baibolo yunena kuti: “Tetyo, tikaŵa na chakulya, vovwala na poyona, tikokhutila na vinthu vamene ivi.”—1 Timoteyo 6:8.
Kunkhala wokhutila kupamikijapo kuliikila malile pa vinthu vatufuna, nonkhala wokhutila na vinthu vatufunikila chendi nsiku na nsiku. Vamene ivi ni vofunika ngako maka-maka tikankhala kuti tukumana na vuto ya zachuma.
Kuti munkhale wokhutila mufunika kuchinja vamuchita pa moyo wanu. Mukafuna kunkhala moyo wapalulu wopambana ndalama zamufwana mavuto ŵanu a zachuma angasile lini.