Chifukwa chake yankho ya konsho yamene iyi niyofunika
Ndaŵa yanji n’kofunika kuziŵa kuti kuli Nyamalenga? Keno mukhutila na umboni wakuti kuIi Mulungu wamene ni wamphanvu zonse niye kuti mungakonde kuziŵasoti umboni wakuti Baibolo yeujiliwa na yove. Keno mukhulupilila vayunena Baibolo vingakuyavyeni munjila izi zokonkhapo:
Muzayambe kusangalala ngako na moyo wanu
BAIBOLO YUNENA KUTI: “[Mulungu] echita viweme. Ekupasani mvula kufumila kululu na nyengo yamene voweja vanu vunkhala vinyinji. Ezuja mitima yanu na chakulya komasoti chisangalalo.”—Mach. 14:17.
KANSI VAMENE IVI VUTANTHAUZA CHINJI: Vinthu vonse vatusangalala navo m’chilengedwe ichi ni mphaso zofumila kuli Nyamalenga. Mungakwanishe kutembeja mukaziŵa kuti wamene epeleka mphaso zamene izi okuganizilani.
Muzafwane malangizo odalilika amene angakuyavyeni
BAIBOLO YUNENA KUTI: “Uzamvwishe vinthu volungama, vachendi, komasoti viweme. Uzamvwishe njila iweme yofunikila kuyendamo.”—Miy. 2:9.
KANSI VAMENE IVI VUTANTHAUZA CHINJI?:Monga Nyamalenga wanu, Mulungu oziŵa vamufunikila kuti mukosangalala. Mukoŵelenga Baibolo mungaphunzile vinthu vamene vingakuyavyeni pamoyo wanu.
Muzafwane mayankho amakonsho ŵanu
BAIBOLO YUNENA KUTI:“Uzamuziŵe chendi Mulungu.”—Miy. 2:5.
KANSI VAMENE IVI VUTANTHAUZA CHINJI?:Kuziŵa kuti Nyamalenga aliko kungakuyavyeni kufwana mayankho amakonsho ofunika ngako monga ni aŵa: Kansi cholinga chamoyo n’chinji? Ndaŵa yanji tutamana? Kansi chuchitika n’chinji munthu akafwa? Mungafwane mayankho okata ntima m’Baibolo.
Muzankhale na chiyembekezo chavinthu vakusogolo
BAIBOLO YUNENA KUTI: “‘Nuziŵa luweme vanuganiza vokhuza mwewo. Nuganiza zokupasani ntendele osati masoka komasoti sogolo iweme na chiyembekezo chiweme.’”—Yer. 29:11.
KANSI VAMENE IVI VUTANTHAUZA CHINJI?:Mulungu olonjeza kuti kusogolo uku azafumyepo vinthu viipa, azafumyepo mavuto komasoti imfwa. Keno mukhulupilila malonjezo a Mulungu, chiyembekezo chanu cha vinthu vakusogolo chizakuyavyeni kupilila motang’a ntima mavuto ŵamukumana nawo nsiku na nsiku.
