Kansi asayansi olaŵila mwechiyambila chilengedwe komasoti mweveyambila vamoyo? Yankho yachidule niyakuti yayi. Ŵanthu ayakine onena kuti asayansi amene ephunzila za vinthu vakululu niye angalaŵile mwechiyambila chilengedwe. Koma pulofesa muyakine wakukoledji ya Dartmouth zina yake Marcelo Gleiser, wamene okaikila kuti kuli Mulungu, enena kuti: “tikalikangiwa kufotokoza mwechiyambila chilengedwe.”

Komasoti pofotokoza mwewiyambila moyo, nkhani iyakine ya m’magazini ya sayansi (Science News) inena kuti: “N’vosakwanishika kuziŵa mwewiyambila moyo pano pachalo. Myala komasoti vinthu viyakine vakale vamene vefwichilika mulito vamene sembe vuwonesha mwevenzele vinthu masiku oyambilila achalo, vupezeka lini.” Vamene ivi vuwonesha kuti pofwika pano sayansi yakangiwa kufwana Yankho ya konsho yakuti, Kansi chilengedwe komasoti moyo viyamba tyani?

Koma payakine mungadabwe kuti: ‘Keno vamoyo vechita kulengewa, lomba niŵani evilenga?’ Payakinesoti mwelikonshapo kale makonsho aŵa: ‘Keno kuli chendi Nyamalenga wamene ni wanzelu ngako komasoti wachikondi, ndaŵa yanji olola kuti ŵanthu ŵechilenga yeka akovutika? Ndaŵa yanji olola kuti ŵanthu akolambila munjila zosiyana-siyana? Ndaŵa yanji yove olola kuti ŵanthu ayakine amene onena kuti omulambila akochita vinthu vinyinji viipa?’

Sayansi ingakwanishelini kufwana mayankho amakonsho amene aŵa. Koma vamene ivi vutanthuzalini kuti mungafwanelini mayankho omvwika luweme. Ndipo ŵanthu anyinji afwana mayankho m’Baibolo amene eŵafwika pantima.

Keno mungakonde kuziŵa chifukwa chake asayansi ayakine amene ephunzila Baibolo okhulupilila kuti kuli Nyamalenga, lutani pa jw.org. Sakilani mawu akuti “zokhudza mmene moyo unayambira.”