Kansi chilengedwe chankhala chilipo kufumila kale-kale?

Lemba ya Genesis 1:1 yunena kuti: “Poyamba, Mulungu elenga kululu na chalo.”

Vikaliyefwika vyaka vam’ma 1950, asayansi anyinji oziŵika luweme enzekhulupilila kuti chilengedwe ichi chiliye chiyambi. Koma chifukwa cha vinthu vafwana kwalombapano, asayansi anyinji ayamba kuvomekeja kuti chino chilengedwe, chenze na chiyambi.

Kansi chalo chenzewoneka tyani poyamba?

Lemba ya Genesis 1:2, 9 yufotokoza kuti poyamba, chalo “Chenzeve mawonekedwe ngawo-ngawo komasoti chenzeve kanthu,” ndipo penze manzi ŵeka-ŵeka.

Mokatijana na vafwana, asayansi ovomekeja vamene ivi masiku ŵano. Wasayansi muyakine zina yake Patrick Shih elemba kuti “mumlenga-lenga mwenzeve umphuye wa okisidjeni kuti munthu angaŵese . . . komasoti chalo chenzeve mawonekedwe ngawo-ngawo.” Magazini iyakine ya sayansi (Astronomy) inena kuti: “Pakafuku-fuku muyakine wechitika kwalombapano efwana kuti chalo chenze na manzi ŵeka-ŵeka, ndipo payakine ntunthu wenzewoneka patontho.”

 Kansi mmalele mwechinja tyani mkupita kwa nthawe?

Lemba ya Genesis 1:3-5 yuwonesha kuti kungweleŵela pekwiyamba kupita mmalele, kwenzefumila kungweleŵela kwenzewonekalini pachalo. Koma pavuli pake zuŵa na mwezi viyamba kuwoneka pano pachalo.—Genesis 1:14-18.

Bungwe iyakine yuchita kafuku-fuku inena kuti poyamba, kungweleŵela kutontho tyala niye kwenzekwanisha kutendesha mmalele nofwika pachalo. Bungwe yamene iyi ilaŵila kuti: “Chalo pechinkhazikishiwa chenzezengulukiwe na umphuye wa Methane, pavuli pake umphuye wamene uyo wefumapo ndipo kululu kweyamba kuwoneka kwa buluu.”—Smithsonian Environmental Research Center.

Kansi nivamoyo votyani veyamba kupezeka pano pachalo?

Lemba ya Genesis 1:20-27 yunena kuti nsomba niye ziyamba kulengewa nowela tunyoni, nyama za kuntunthu, ndipo posilijila pake elenga ŵanthu. Asayansi okhulupilila kuti nsomba peziyamba kuwoneka pachalo pepita nthawe kuti nyama ziwonekele ndipo ŵanthu echizayamba kuwonekela pavulipake.

Ŵanthu ayakine olaŵila kuti vayulaŵila Baibolo vusiyana na vapeza asayansi masiku ŵano. Koma nthawe zinyinji, ŵanthu onena vamene ivi chifukwa chosamvwisha vayufotokoza Baibolo.

Baibolo yunenalini kuti vinthu vakululu vankhalapo kwa vyaka 6.000 tyala. Koma mmalo mwake, yulaŵila tyala kuti vakululu komasoti vinthu vapachalo vilengewa “poyamba.” (Genesis 1:1) Baibolo yunenalini kuti vamene ivi vechitika nthawe yanji.

Baibolo yunenalini kuti vamoyo vilengewa masiku 6 yama awazi 24.Koma mmalo mwake, yukatishila ntchito mawu akuti “nsiku” ponena za nthawe itali. Mwachisanzo, yunena—kuti m’masiku 6 olenga vinthu amene otomolewa pa Genesis chapitala 1—Mulungu elenga chalo komasoti vamoyo. Pavuli pake, yunena kuti vonse vamene ivi vichitika mu “nsiku yamene Yehova a Mulungu elenga kululu komasoti chalo.” (Genesis 2:4) Tetyo nsiku iliyonse pa “masiku” 6 yenzepanga chalo nolenga vinthu vamoyo angatanthauze nthawe itali ngako.

Baibolo yushushalini kuti pakapita nthawe vamoyo vingachinje mwevipangiliwa.Buku ya Genesis yufotokoza kuti nyama zilengewa “monga mwa mitundu yake.” (Genesis 1:24, 25) Mawu am’Baibolo akuti “mitundu” ni mawulini asayansi, koma vuwoneka kuti otanthauza magulu osiyana-siyana avamoyo. Ndipo ntundu umozi ungankhale na mitundu iyakinesoti itontho-itontho. Mawu amene aŵa owonesha kuti ni vokwanishika kuti vamoyo va “ntundu” umozi mkupita kwanthawe vikochinja nopanga mitundu itontho-itontho mokatijana na malo ŵazunkhala.

 Kansi mwewo muganiza tyani?

Monga ni mwatawonela, Baibolo yufotokoza vachendi komasoti mosavuta kumvwa ponena za mweviyambila vinthu vakululu, mwechenzele chalo poyamba, komasoti mweviyambila vamoyo. Kansi Baibolo yulaŵilasoti vachendi ponena za wamene elenga vinthu vamene ivi? Buku iyakine inena kuti: “mfundo yakuti muyakine wamphamvu ngako kupambana ŵanthu niye echitisha kuti vamoyo vinkhaleko, yushushanalini ngako na vafwana asayansi kwalombapano.” b—Encyclopædia Britannica.