Kansi Mulungu ni ŵani?
Ŵanthu anyinji olaŵila kuti omukhulupilila Mulungu. Koma mukaŵakonsha ove oyankha mosiyana-siyana. Ayakine oganiza kuti Mulungu ni woweluza wankhanza, ndipo yove angoganizila zopeleka chilango kuli ŵanthu ophoniya. Koma palisoti ayakine amene owona kuti Mulungu okonda ŵanthu ndipo oŵakhululukila nthawe zonse, viliye kanthu kuti ŵanthu amene awo ochita vinthu votyani. Koma palisoti ayakine amene owona kuti Mulungu ali kutali ngako ndipo aliye nase chidwi. Chifukwa chakuti pali maganizo osiyana-siyana teti onena za Mulungu, ŵanthu anyinji owona kuti n’vosakwanishika kuziŵa kuti Mulungu niwotyani ngako-ngako.
Kansi kuziŵa vachendi kuli na pindu iliyonse? Eye. Kuziŵa vachendi vokhuza Mulungu kungakuyavyeni ngako. (Mach. 17:26-28) Keno muyeja-yeja kuti muvwendele ngako kuli Mulungu, yove akokukondani ngako komasoti akokuyavyani mukakumana na mavuto. (Yako. 4:8) Ndipo chinthu chofunika ngako n’chakuti mukamuziŵa luweme Mulungu, mwewo muzafwane moyo wosasila.—Yoh. 17:3.
Kansi n’chinji chingakuyavyeni kuti mumuziŵe Mulungu? Ganizilani za muyanu wapantima wamene mumuziŵa luweme. Kansi n’chinji chechitisha kuti yove ankhale muyanu? Payakine poyamba, mweziŵa zina yake, minkhalidwe yake, vinthu vakukonda, vinthu vasakonda, vinthu vakuchita palipano, na vinthu vakufuna kuti azachite kusogolo, komasoti viyakine vinyinji. Tetyo, tinganene kuti mwewo mweyamba kumukonda munthu wamene uyo chifukwa—mwephunzila vokhuza yove.
N’chimozi-mozisoti na kuziŵa Mulungu. Kuziŵa mayankho amakonsho monga ni aŵa okonkhapo, kungatiyavye kuti timuziŵe luweme:
Magazini ino yapangiwa na cholinga chakuti itiyavye kufwana mayankho am’Baibolo a makonsho amene aŵa. Nkhani zamene zili m’magazini ino zikuyavyeni kuziŵa vachendi vokhuza Mulungu. Zikuyavyenisoti kuziŵa mwamene kunkhala naye paushamwali wotang’a mwakungakuyavyileni.
Mungakondesoti kuwona izi
NSANJA YA MULONDA
Kansi zina ya Mulungu niŵani?
Kansi mwewo muziwa kuti Mulungu ali na zina yamene niyove yeka wamene oziŵika nayo?
