Mukafuna kuti mumuziŵe luweme munthu muyakine, vunkhala luweme mukaziŵa vinthu vawachita kale pamoyo wake, mavuto awakumana nawo, komasoti vechichita polimbana na mavuto ŵake. N’chimozi-mozisoti na Mulungu. Keno mufuna kuti mumuziŵe luweme, mufunika kuziŵa vinthu vawachita kale. Mwewo mungadabwe kuziŵa kuti vinthu vechichita kale kuvuli, vingakuyavyeni palipano komasoti vingezekuyavyani kusogolo.

Yehova Mulungu ni Nyamalenga nkulu, ndipo ‘kufumila pechilenga chalo minkhalidwe ya Mulungu yosawoneka na menso yuwonekela luweme kupitila m’vinthu vechipanga.’ (Alo. 1:20) Yove niye “wamene epanga chalo pokatishila ntchito mphamvu zake, wamene enkhazikisha chalo pokatishila ntchito nzelu zake. Wamenesoti etambulula kululu chifukwa cha kuziŵa vinthu kwake.”  (Yer. 10:12) Vinthu vechilenga Mulungu vuwonesha kuti otikonda.

Mwachisanzo, ganizilani mwechitilengela mwapadela ngako. Yove etilenga “m’chifanizilo chake.” (Gen. 1:27) Vamene ivi vuwonesha kuti etilenga munjila yakuti tikokwanisha kuwonesha minkhalidwe yake yapalulu. Yove etilengasoti mwanjila yakuti tikokwanisha kuziwa mfundo za minkhaliswe yake iweme, olo kuti tingakwanishelini kuzimvwisha zonse. Tikoyeja-yeja kukonkheja mfundo zake pa moyo wasu, tunkhala osangalala ngako ndipo moyo wasu unkhala watanthauzo. Chinthu chiyakine chofunika ngako n’chakuti Mulungu etilenga mwanjila yakuti tikokwanisha kunkhala naye paushamwali.

Vinthu vechilenga Mulungu pano pa chalo vuwoneshasoti kuti otikonda. Ntumwi Paulo enena kuti ‘Mulungu aliyenkhale tyala paliye umboni wakuti echita vinthu viweme. Ekupasani nvula kufumila kululu na nyengo yamene voweja vanu vunkhala vinyinji. Ezuja mitima yanu na chakulya komasoti chisangalalo.’ (Mach. 14:17) Mulungu aliyetipase tyala vinthu vofunikila kuti tinkhale na moyo. Yove etipasa vinthu vinyinji komasoti vosiyana-siyana kuti tikosangalala na moyo. Koma olo n’tetyo, vinthu vamene ivi n’vitontho ngako tikayelekezela na vinthu venzefuna kuti tinkhale navo.

 Yehova elenga chalo kuti ŵanthu akonkhalamo mpaka kale-kale. Baibolo yunena kuti: “Chalo echipeleka kuli ŵana aŵanthu” ndipo “aliyechilenge paliye cholinga koma echiumba kuti ŵanthu ankhalemo.” (Sal. 115:16; Yes. 45:18) Kansi Mulungu enzefuna kuti pachalo pankhale ŵanthu otyani, komasoti ankhale kwanthawe itali tyani? Baibolo yunena kuti: “Olungama azalondele chalo, ndipo azankhale mwamene umo mpaka kale-kale.”—Sal. 37:29.

Mokatijana na vamene ivi, Yehova elenga Adamu na Hava amene enze ŵanthu oyambilila, ndipo eŵaika m’munda uweme ngako “kuti akoulima nousamalila.” (Gen. 2:8, 15) Mulungu eŵapasa vochita. Yove eŵauja kuti: “Muvyalane, mupake, muzuje chalo, ndipo mukochilolela.” (Gen. 1:28) Tetyo, Adamu na Hava enze na mwayi wakuti ankhale pano pachalo mpaka kale-kale. Koma n’vomvwisha chisoni kuti ove aliye mvwile Mulungu ndipo etaya mwayi wonkhala m’gulu ya ŵanthu “olungama” amene akuti ‘azalondele moyo wosasila.’ Koma olo n’tetyo, molingana na vatikuti tiphunzile, vinthu vechichita ove viliyechitishe kuti Mulungu achinje cholinga chake chokhuza ŵanthu. Koma poyamba, tiyeni tikambilane chinthu chiyakine chechichita Mulungu.

Baibolo yutomolewa soti kuti Mawu a Mulungu. Kansi ndaŵa yanji Yehova etipasa Baibolo? Chifukwa chikulu ni chakuti itiyavye kuphunzila za yove. (Miy. 2:1–5) N’chendi kuti Baibolo yuyankhalini konsho iliyonse yatingankhale nayo yokhuza Mulungu—ndipo paliye buku yamene ingachite vamene ivi. (Mlal. 3:11) Koma olo n’tetyo, vinthu vilembewa m’Baibolo vutiyavya kuti tikwanishe kumuziŵa luweme Mulungu. Sewo tukwanisha kuziŵa mwalili Mulungu tikawona mwakuchitila vinthu na ŵanthu. Tukwanishasoti kuziŵa ŵanthu wakukonda komasoti ŵasakatijana nawo. (Sal. 15:1–5) Tukwanisha soti kuziŵa maganizo ŵake pa nkhani ya kulambila, minkhalidwe iweme, komasoti vinthu vakuthupi. Komasoti Baibolo yutiyavya kuziŵa luweme mwalili Yehova kupitila m’volaŵila komasoti vochita va Mwana wake Yesu Khilisitu.—Yoh. 14:9

Chifukwa chiyakine chechitipasila Baibolo Yehova, n’chakuti itiyavye kuziŵa vatingachite kuti tinkhale na moyo wosangalala. Kupitila m’Baibolo Yehova otiuja vatingachite kuti tikokhutila na vatili navo, komasoti kuti tinkhale na banja yosangalala. Otiujasoti vatingachite tikankhala na nkhaŵa. Ndipo molingana na vatikuti tiphunile m’magazini ino, m’Baibolo mulisoti mayankho amakonsho ofunika ngako monga akuti: Ndaŵa yanji pachalo pali mavuto anyinji teti? Ndipo kusogolo kuchitike chinji? Yufotokoza soti vawachita Mulungu pofuna kuti cholinga chake chizakwanilishiwe.

Palisoti vinthu viyakine vinyinji vamene vuwonesha kuti Baibolo—ni buku yapadela komasoti ni yofumila kwa Mulungu. Pepita vyaka 1,600 kuti Baibolo isile kulembewa, ndipo ilembewa na ŵanthu pafupi-fupi 40. Koma chifukwa chakuti Mulembi wake nkulu ni Mulungu, vinthu vayulaŵila n’vokatijana ndipo nfundo yake ikulu ni imozi (2 Tim. 3:16) Mosiyana na mabuku ayakine akale, Baibolo ikalipo mpaka pano ndipo uthenga wake uliye chinjiwe. Umboni wa vamene iyi ni mipukutu inyinji ngako ya Baibolo yechifwana ŵanthu. Komasoti Baibolo ikalipo mpaka pano olo kuti penze ŵanthu anyinji amene enzefunalini kuti imasuliliwe, ifalisiwe, komasoti kuti ŵanthu osati akoiŵelenga. Koma olo n’tetyo, Baibolo yafalisiwa ngako palipano komasoti yamasuliliwa mu vilaŵilo vinyinji kupambana buku iliyonse. Mfundo yakuti Baibolo ikalipo mpaka pano ni umboni wakuti “Mawu a Mulungu wasu azankhalepo mpaka kale-kale.”—Yes. 40:8.

Mulungu echita chinthu chiyakine chapadela pofuna kuti cholinga chake chizakwanilishiwe. Molingana na mwatafokozela kale, Mulungu enzefuna kuti ŵanthu akonkhala na moyo mpaka kale-kale pano pachalo. Koma Adamu pechisankha kuti osati amvwile Mulungu nochita chimo, etaya mwayi wonkhala na moyo kosasila, osati wake tyala, komasoti wa ŵana ŵake. “Uchimo weloŵa m’chalo kupitila muli munthu mmozi, ndipo uchimo wamene uyo wileta imfwa. Tetyo imfwa yamene iyo ifalikila kuli ŵanthu onse chifukwa onse echimwa.” (Alo. 5:12) Kuchimwa kwa Adamu sembe kwechitisha kuti cholinga cha Mulungu chikange. Lomba kansi Yehova echita tyani?

Vinthu vechichita Yehova venze vokatijana na minkhalidwe yake. Mwachilungamo, Mulungu eweluza Adamu na Hava noŵapasa chilango, koma mwachikondi ekonza njila yopulumushila ŵana ŵawo. Mwanzelu zake, Yehova efwana njila iweme yosilijila vuto yamene iyi, ndipo etomola njila yamene iyo pa nthawe  yamene iyo. (Gen. 3:15) Mulungu echizapeleka njila yopulumushila ŵanthu ku uchimo na imfwa kupitila muli Mwana wake Yesu Khilisitu. Kansi vamene ivi vechitika tyani?

Kuti awombole ŵanthu ku vokonkhapo vauchimo wa Adamu, Yehova etumija Yesu pano chalo kuzaphunzisa ŵanthu njila yangapezele moyo komasoti “kuzapeleka moyo wake dipo kuti awombole ŵanthu anyinji.” a (Mat. 20:28; Yoh. 14:6) Yesu ekwanisha kupeleka dipo chifukwa enze wangwilo monga ni mwenzele Adamu poyamba. Koma mosiyana na Adamu, Yesu enkhala mphela wokhulupilika mpaka elolela kufwa. Chifukwa chakuti Yesu aliyephoniye chinthu kuti apaiwe, Yehova emuusha ndipo ejokela kululu. Yesu ekwanisha kuchita vinthu vechikangiwa Adamu. Yove echitisha—kuti ŵanthu omvwila ankhake na chiyembekezo chakuzankhala na moyo kosasila. “Pakuti kusamvwila kwa munthu mmozi wamene uyo kwechitisha kuti anyinji ankhale ochimwa, kumvwila kwa munthu mmozi wamene uyu kuzachitishesoti kuti anyinji ankhale olungama.” (Alo. 5:19) Kupitila mu nsembe ya dipo ya Yesu, Mulungu azakwanilishe cholinga chake chakuti ŵanthu ankhale pano pachalo mpaka kale-kale.

Tuziŵa vinthu vinyinji vokhuza Yehova tikaganizila vechichita pavuli pakuti Adamu wawonesha kusamvwila. Sewo tuwona kuti paliye chinthu chilichonse chamene chingamukangishe kusilija ntchito yawayamba kale, ndipo Mawu ŵake ‘azakwanilishe chendi chilichonse chakufuna yove.’ (Yes. 55:11) Tuwonasoti kuti Yehova otikonda ngako sewo taŵanthu. “Vinthu vechichita Mulungu powonesha chikondi chake ni ivi: Etumija Mwana wake wovyalika yeka pano pachalo kuti tizafwane moyo wosasila kupitila muli yove. Mulungu etumija Mwana wake monga nsembe yoziŵilija machimo ŵasu. Echita vamene ivi chifukwa chakuti etikonda, osati chifukwa chakuti sewo niye amene timukonda yove.”—1 Yoh. 4:9, 10.

Mulungu “aliyeyumile olo Mwana wake koma emupeleka mmalo mwa sewo tonse.” Tetyo, tili na chikhulupililo kuti yove ‘angakangelini kutipasa soti mowama ntima vinthu viyakine vonse’ vamene vawatilonjeza.” (Alo. 8:32) Kansi Mulungu watilonjeza vinthu votyani? Pitilijani kuŵelenga magazini ino kuti muziŵe vinthu vamene ivo.