Aramagedo ni nkhondo yosilijila ya pakati pa maboma a ŵanthu na Mulungu. Olo palipano, maboma amene aŵa pamozi na okonkhapo ŵawo oshusha Mulungu pokana kugonjela ulamulilo wake. (Masalimo 2:2) Koma nkhondo ya Aramagedo izasilije ulamulilo wonse wa ŵanthu.—Danieli 2:44.

 Mawu akuti “Aramagedo” opezeka tyala kamozi m’Baibolo, pa Chivumbulutso 16:16. Ulosi wa m’buku ya Chivumbulutso uwonesha kuti “mafumu a pachalo chonse” azawunganishiwe “pamozi kumalo amene m’chiheberi otomolewa kuti Aramagedo” “kunkhondo ya nsiku ikulu ya Mulungu wa mphamvu zonse.”—Chivumbulutso 16:14.

 Ni ŵani akuti azaniyate nkhondo ya Aramagedo? Yesu Khilisitu azasogolele gulu ya nkhondo ya kululu pogonjesa adani a Mulungu. (Chivumbulutso 19:11-16, 19-21) Adani amene aŵa ni amene oshusha ulamulilo wa Mulungu komasoti amene olemekeza lini Mulungu wamene uyu.—Ezekieli 39:7.

 Kansi nkhondo ya Aramagedo izachitikile ku vyalo va ku Middle East kweka? Yayi. Nkhondo ya Aramagedo izachitikile lini mudela imozi pachalo chonse. M’malo mwake, nkhondo yamene iyi izachitike pachalo chonse.—Yeremiya 25:32-34; Ezekieli 39:17-20.

 Mawu akuti Aramagedo, amene nthawe ziyakine olembewa kuti “Haramagedo” (m’Chiheberi Har Meghiddohn), otanthauza “Lupili ya Megido.” Pa nthawe iyakine kale-kale kuvuli ngako, Megido yenze tauni ya Isiraeli. Mbili yakale yuwonesha kuti nkhondo zoyofwa ngako zenzechitikila mudela yamene iyi. Ndipo nkhondo ziyakine zenzechitikila mudela yamene iyi zutomolewa m’Baibolo. (Oweruza 5:19, 20; 2 Mafumu 9:27; 23:29) Koma lomba, mawu akuti Aramagedo angatanthauze lini malo ngawo-ngawo a pafupi na tauni yakale ya Megido. Kudela yamene iyo kuliye lupili ikulu yamene adani a Mulungu angakwanepo, Olo kuti tipamikije malo onse anshambo wa Yezereeli. M’malomwake, mawu akuti Aramagedo otanthauza vikuti vizachitike pachalo chonse, ŵanthu a mitundu yonse akazawungana pofuna kulimbana kosilijila na ulamulilo wa Mulungu.

 Kansi chikuti chizachitike n’chinji pa Aramagedo? Olo kuti tuziŵa lini kuti Mulungu azakatishile ntchito tyani mphamvu zake powononga adani ŵake, tuziŵa kuti ali navida vechikatishilapo kale ntchito kuvuli, monga matalala, vivomezi, mvula yoyofwa, mulilo na sulufule, kaleza, komasoti milili. (Yobu 38:22, 23; Ezekieli 38:19, 22; Habakuku 3:10, 11; Zekariya 14:12) Tuziŵa soti za kuti adani ayakine a Mulungu azapayane ŵeka-ŵeka chifukwa chosokonezeka koma pamapeto pake azaziŵe kuti Mulungu niye ochitisha vamene ivo.—Ezekieli 38:21, 23; Zekariya 14:13.

 Kansi chalo chizasile pa Aramagedo? Sikuti Aramagedo izawononge kapena kusilija chalo yayi. Vili tetyo chifukwa Mulungu elenga chalo na cholinga chakuti ŵanthu akonkhalamo mpaka kale-kale. (Masalimo 37:29; 96:10; Mlaliki 1:4) Ndipo nkhondo ya Aramagedo sikuti izawononge ŵanthu onse, koma izayavye kuti ŵanthu ayakine azapulumuke. Baibolo yuwonesha kuti “gulu ikulu” ya atumiki a Mulungu izapulumuke.—Chivumbulutso 7:9, 14; Salimo 37:34.

 Olo kuti nthawe zinyinji m’Baibolo mawu akuti, “chalo”, otanthauza chalo ngacho-ngacho, nthawe ziyakine otanthauza ŵanthu ochita viipa amene omvwila lini Mulungu. (1 Yohane 2:15-17) Tetyo tinganene kuti nkhondo ya Aramagedo, izachitishe kusila kwa chino chalo “kutanthauza ŵanthu ochita viipa.”—Mateyu 24:3, Chipangano Chatsopano Cholembedwa M’Chichewa Chamakono.

 Kansi Aramagedo izachitike nthawe yanji? Pofotokoza za “chisauso chikulu” chamene chikuti chizafwike pa nkhondo ya Aramagedo, Yesu echiti: “Za nsiku na nthawe yake paliye oziŵa, olo angelo akululu olo soti Mwana, koma Atata ŵeka.” (Mateyu 24:21, 36) Olo vili tetyo, Baibolo yuwonesha kuti nkhondo ya Aramagedo izachitike pa nthawe yamene Yesu’ pati azankhale pampando wachifumu, koma mosawonekela kuli ŵanthu. Nthawe yamene iyi iyamba mu 1914.—Mateyu 24:37-39.