Kansi Mulungu ekatishila ntchito chisinthiko kuti alenge vinthu vamoyo vamitundu yosiyana-siyana?
Yankho ya m’Baibolo
Yayi. Baibolo yufotokoza momvwika luweme kuti Mulungu elenga ŵanthu komasoti “mitundu” ya vinyama na mbewu zosiyana-siyana. a (Genesis 1:12, 21, 25, 27; Chivumbulutso 4:11) Yunenasoti kuti ŵanthu onse efumila kwa Adamu na Hava amene ni makolo ŵasu oyambilila. (Genesis 3:20; 4:1) Baibolo yunenalini kuti Mulungu okatishila ntchito vamoyo viyakine polenga mitundu iyakinesoti ya vamoyo. Komasoti yushushalini vakulaŵila asayansi vakuti mitundu ya vamoyo yufumyasoti vamoyo viyakine volingana na va ntundu wamene uyo. b
Kansi Mulungu ekatishila ntchito chisinthiko?
Ŵanthu amene okhulupilila kuti Mulungu elenga vamoyo kufumila ku vamoyo viyakinesoti ali na maganizo osiyana-siyana pa nkhani yamene iyi, monga ni mwayunenela buku iyakine ya Encyclopædia Britannica. Ayakine okhulupilila kuti Mulungu niye “osogolela vamoyo vonse mu chilengedwe ichi kuti vikochinja potolela malo ŵavili.”
Maganizo ayakine ŵali nawo ŵanthu angapamikijeposoti akuti:
Vamoyo vonse vifumila ku vamoyo viyakinesoti vakale-kale.
Chamoyo chiyakine chingakwanishe kuchinjilatu kunkhala chamoyo cha ntundu uyakine wa nyowani.
Mulungu owamila kuti niye ochitisha kuti vamene ivi vikwanishike.
Kansi mfundo yakuti vamoyo vichita chinja ni yokatijana na vayunena Baibolo?
Mfundo yakuti vamoyo vichita chinja ni yosakatijana na vayunena Baibolo m’buku ya Genesis, kuti vamoyo vichita lengewa. Ndipo Yesu ekatishila ntchito mfundo za m’buku yamene iyi posimikijila kuti ni vachendi. (Genesis 1:26, 27; 2:18-24; Mateyu 19:4-6) Baibolo yunena kuti Yesu akaliyewela pano pa chalo enzenkhala kululu na Mulungu ndipo eyavya Mulungu kulenga “vinthu vonse.” (Yohane 1:3) Tetyo, mfundo yakuti Mulungu echinja vamoyo viyakine polenga mitundu iyakinesoti ya vamoyo ni yosiyana na vayuphunzisa Baibolo.
Lomba tyani vomela na nyama vukwanisha kuchinja vikankhala pa malo ayakine anyowani?
Baibolo yufotokozalini kupaka kwa mitundu iyakinesoti ya vamoyo yamene ingapangiwe kufumila pa ntundu umozi wa chamoyo. Koma yushushalini mfundo yakuti vinyama komasoti vomela viyakine vechipanga Mulungu, vingakwanishe kuchinja mawonekedwe pavuvyalana olo chifukwa chakuti vankhala malo ayakine. Olo kuti ŵanthu ayakine owona kuti vamoyo vamene ivi vikachinja potolela malo, niye kuti ntundu wanyowani wa chamoyo upangiwa, vamene ivi ni vachendilini.
a M’Baibolo mawu akuti “ntundu,” otanthauza vinyinji kupambana vakulaŵila asayansi. Nthawe zinyinji asayansi olaŵila kuti vamoyo vuchinja kunkhala ntundu uyakine wa vamoyo va nyowani.
b Koma buku ya Genesis yuwonesha kuti kungonkhala kusiyana tyala mawonekedwe ya vamoyo vamene vapangiwa kufumila mu vamoyo va ntundu wamene uyo.
Mungakondesoti kuwona izi
ZA SEWO
Sengani kuti muzatandajiwe na wa Mboni za Yehova
Sengani kuti muzatandajiwe nokambilana mfundo za m’Baibolo na wa Mboni za Yehova, olo yesani pulogilamu yasu yophunzila Baibolo kwamahala.