Kansi Mulungu akungopezeka paliponse
Yankho ya m’Baibolo
Mulungu okwanisha kuwona chilichonse komasoti kuchita vinthu kulikonse kwakufuna. (Miyambo 15:3; Aheberi 4:13) Koma olo n’tetyo, Baibolo yuphunzisalini kuti Mulungu akungopezeka paliponse nthawe iliyonse. Mmalomwake, yuwonesha kuti Mulungu ali na malo ŵake onkhala monga ni mwatilili sewo taŵanthu.
Mwalili Mulungu: Mulungu ni mzimu. (Yohane 4:24) Paliye munthu wamene angakwanishe kumuwona. (Yohane 1:18) Mensomphenya onena za Mulungu amene ali m’Baibolo nthawe zonse owonesha kuti Mulungu ali na malo ŵake ngawo-ngawo ŵakunkhala. Baibolo yunenalini kuti akungopezeka paliponse.—Yesaya 6:1, 2; Chivumbulutso 4:2, 3, 8.
Kwakunkhala Mulungu: Mulungu onkhala kumalo onkhala volengewa vauzimu ndipo malo amene aŵa ni osiyana ngako na malo onkhala ŵanthu na vinyama. Mulungu ali na malo ŵake “onkhala, kululu” kwamene kuli volengewa vauzimu. (1 Mafumu 8:30) Baibolo yunena kuti pa nthawe iyakine volengewa vauzimu viluta “kuyawonekela pamenso pa Yehova.” a Vamene ivi vuwonesha kuti Mulungu ali na malo ŵake ngawo-ngawo ŵakunkhala.—Yobu 1:6.
Lomba keno Mulungu opezekalini paliponse, kansi newo paneka anganisamalile?
Eye. Mulungu osamalila munthu aliyense payeka. Olo kuti yove onkhala kululu kwamene ni kwa volengewa vauzimu, Mulungu ochita chidwi na ŵanthu ali pano pa chalo amene ochita vinthu vumukondwelesha ndipo oŵasamalila. (1 Mafumu 8:39; 2 Mbiri 16:9) Onani mwakuwoneshela Yehova kuti oŵadela nkhaŵa ŵala ŵanthu omulambila na ntima wonse:
Pa nthawe yamupemphela: Yehova okwanisha kumvwa pemphelo yanu pa nthawe yamene iyo yamupemphela.—2 Mbiri 18:31.
Pa nthawe yamwasokonezeka maganizo: “Yehova ali pafupi na ŵanthu ali na ntima wofwaika. Ndipo olimvwila chisoni muntima mwawo oŵapulumusha.”—Salimo 34:18.
Pa nthawe yamufunikila malangizo: Yehova enena kuti: “Nizakupase nzelu na kukulatija njila yakuti uyendemo.” Yove ochita vamene ivi pokatishila ntchito Mawu ŵake Baibolo.—Salimo 32:8.
Maganizo ophoniyeka pa nkhani ya vinthu vamene vupezeka paliponse
Maganizo ophoniyeka: Mulungu opezeka paliponse m’chilengedwe.
Chendi chake: Mulungu onkhalalini pano pa chalo olo payakine paliponse m’chilengedwe chatukwanisha kuwona na menso. (1 Mafumu 8:27) N’chendi kuti nyenyezi komasoti vinthu viyakine va m’chilengedwe “vulengeza ulemelelo wa Mulungu.” (Salimo 19:1) Munthu akalemba chithunzi chiyakine, yove onkhalalini m’chithunzi chamene icho chawalemba. Koma olo n’tetyo, chithunzi chamene icho chutiuja vinthu viyakine ponena za munthu wamene uyo wachilemba. Molingana na vamene ivi, Mulungu naye onkhalalini m’vinthu vechilenga. Koma olo vili tetyo, chilengedwe chutiuja ‘minkhalidwe yosawoneka’ ya Nyamalenga monga mphamvu zake, nzelu komasoti chikondi chake.—Aroma 1:20.
Maganizo ophoniyeka: Mulungu ofunika kupezeka paliponse kuti akoziŵa vinthu vonse komasoti kuti ankhale wamphamvuzonse.
Chendi chake: Mzimu utuŵa wa Mulungu, ni mphamvu yakukatishila ntchito yove. Pokatishila ntchito mzimu wake, Mulungu angakwanishe kuziŵa olo kuchita chinthu chilichonse, kulikonse komasoti pa nthawe iliyonse, paliye kufuna kuti yove ankhale ku malo kwamene uko.—Salimo 139:7.
Maganizo ophoniyeka: Lemba ya Salimo 139:8 yunena kuti Mulungu opezeka paliponse ndaŵa yunena kuti: “Keno ningakwele kululu, mwewo munkhale kwamene uko. Ndipo keno ningayanjike bedi yangu ku Manda, onani! namwe munkhale kwamene uko.”
Chendi chake: Iyi lemba yunenalini za malo ŵakupezeka Mulungu. Koma mmalomwake, ikungowonesha kuti Mulungu angakangiwelini kutichitila vinthu viyakine chifukwa cha malo ŵatili.
a Yehova ni zina ya Mulungu otomolewa m’Baibolo.
Mungakondesoti kuwona izi
KUYANKHA MAKONSHO AM’BAIBOLO
Kansi mzimu utuŵa n’chinji?
Pa chifukwa chiweme, Baibolo yutomola mzimu utuŵa monga “manja” a Mulungu
ZA SEWO
Sengani kuti muzatandajiwe na wa Mboni za Yehova
Sengani kuti muzatandajiwe nokambilana mfundo za m’Baibolo na wa Mboni za Yehova, olo yesani pulogilamu yasu yophunzila Baibolo kwamahala.