Kansi Angelo ni chinji?
Yankho, ya m’Baibolo
Angelo ni volengewa vamene vili na mphamvu ngako komasoti ochita vinthu kupambana ŵanthu. (2 Petulo 2:11) Angelo onkhala kululu, kumalo kwamene kunkhala volengewa vauzimu, nikutali ngako kupambana kwatinga kwanishe kuwona na menso. (1 Mafumu 8:27; Yohane 6:38) N’chifukwa chake Angelo otomolewa soti kuti mizimu.—1 Mafumu 22:21; Salimo 18:10.
Kansi Angelo efumila kuni?
Mulungu elenga Angelo pokatishila ntchito Yesu, wamene Baibolo yumuita kuti “woyamba kuvyalika wa chilengedwe chonse.” Pofotokoza mwamene Mulungu mwechikatishilila ntchito Yesu polenga vinthu, Baibolo yunena kuti: “kupitila mwa [Yesu] vinthu viyakine vonse vilengewa, vakululu na vapano pachalo. Eye vinthu vuwoneka kapena visawoneka,” kupamikijapo Angelo. (Akolose1:13-17) Angelo olungula lini kapena kuvyalana. (Maliko 12:25) M’malo mwake, aliyense wa “ŵana a Mulungu wachendi” amene aŵa elengewa mwachindunji.—Yobu 1:6.
Angelo elengewa kale-kale ngako, chalo chikaliye pangiwa. Mulungu pechilenga chino chalo, Angelo “eyamba kuŵilikija na chisangalalo.”—Yobu 38:4-7.
Kansi Angelo alipo angani?
Baibolo yutomola lini chiŵelengelo ngacho-ngacho cha Angelo, koma yuwonesha kuti alipo anyinji ngako. Mwachisanzo, mtumwi Yohane ewona mamiliyoni anyinji ŵa Angelo m’mesomphenya ŵake.—Chivumbulutso 5:11,.
Kansi Angelo ali na mazina komasoti minkhalidwe yosiyana-siyana?
Eye. Baibolo yutomola mazina aŵili ŵa Angelo: Mikayeli komasoti Gabirieli. (Danieli 12:1; Luka 1:26) a Angelo ayakine evomekeja kuti enze na mazina, koma aliyefune kuŵatomola.—Genesis 32:29; Oweruza 13:17, 18.
Angelo ni osiyana-siyana ndipo okwanisha kulaŵijana. (1 Akarinto 13:1) Okwanisha kuganiza komasoti kupanga mawu otamanda Mulungu. (Luka 2:13, 14) Ndipo ali na ufulu wokwanisha kusankha pakati pa chiweme na chiipa, monga mwevenzele pamene Angelo ayakine pechimwa no pandukila Mulungu pamozi na Satana Mdyelekezi.—Mateyu 25:41; 2 Petulo 2:4.
Kansi pali magulu osiyana-siyana wa Angelo?
Eye. Mikayeli wamene ni nkulu wa Angelo, niye ali na ulamulilo komasoti mphamvu zinyinji. (Yuda 9; Chivumbulutso 12:7) Aserafi ni Angelo amphamvu ngako amene onkhala pafupi na mpando wachifumu wa Yehova. (Yesaya 6:2, 6) Akerubi ni gulu iyakine soti ya Angelo apalulu amene okata ntchito za padela. Mwachisanzo, Akerubi niye enzelondela pamuliyango woloŵela m’munda wa Edeni panthawe yamene Adamu na Hava pechipitikishiwa m’munda wamene uyo.—Genesis 3:23, 24.
Kansi Angelo oyavya ŵanthu?
Eye, Mulungu okatishila ntchito Angelo ŵake okhulupilika poyavya ŵanthu okhupilika masiku ŵano.
Mulungu okatishila ntchito Angelo posogolela Atumiki ŵake pa ntchito yolalikila uthenga uweme wa Ufumu wa Mulungu. (Chivumbulutso 14:6, 7) Vamene ivi vuyavya ŵanthu olalikila komasoti ŵala omvwishila uthenga uweme.—Machitidwe 8:26, 27.
Angelo oyavya kuti mpingo wa Chikhilisitu unkhale wosaipishiwa na ŵanthu aipa.—Mateyu 13:49.
Angelo osogolela komasoti kuteteza ŵanthu amene ni okhulupilika kwa Mulungu.—Salimo 34:7; 91:10, 11; Aheberi 1:7, 14.
Lombapano, Angelo azaniyate nkhondo pamozi na Yesu yochosa ŵanthu onse aipa ndipo vamene ivi vizayavye kuti ŵanthu akosangalala.—2 Atesalonika1:6-8.
Kansi munthu aliyense ali na Mngelo amene omuteteza?
Olo kuti Angelo ochita chidwi na vinthu vauzimu vakuchita Atumiki a Mulungu, vamene ivi vutanthauza lini kuti Mulungu opeleka Mngelo kuli Khilisitu aliyense na cholinga chakuti akomuteteza. b (Mateyu 18:10) Angelo oteteza lini Atumiki a Mulungu kumavuto olo kumayeselo aliwonse. Baibolo yuwonesha kuti nthawe zinyinji Mulungu “opeleka njila yopulumukila” kumayeselo amene awo, opasa munthu nzelu komasoti mphamvu kuti akwanishe kupilila.—1 Akorinto 10:12, 13; Yakobo 1:2-5.
Maganizo ophoniyeka okhuza Angelo
Maganizo ophoniyeka: Angelo onse ni aweme.
Chendi chake: Baibolo yunena za “magulu a mizimu iipa” komasoti “Angelo amene echimwa.” (Aefeso 6:12; 2 Petulo 2:4) Angelo aipa amene aŵa ni viŵanda vamene vinkhala kumbali ya Satana nopandukila Mulungu.
Maganizo ophoniyeka: Angelo akufwa lini.
Chendi chake: Angelo aipa, kupamikijapo Satana Mdyelekezi, azawonongewe.—Yuda 6.
Maganizo ophoniyeka: Ŵanthu akafwa oyaluka Angelo.
Chendi chake: Angelo ni volengewa vapadela va Mulungu, osati ŵanthu amene akufwa pavuli pake noushiwa. (Akolose 1:16) Ŵanthu amene oukishiwa kuti akankhale na moyo kululu, Mulungu oŵapasa mphaso ya moyo wamene ukufwa lini. (1 Akorinto 15:53, 54) Ove azankhale na malo apalulu kupambana Angelo.—1 Akorinto 6:3.
Maganizo ophoniyeka: Angelo elengewa kuti akotumikila ŵanthu.
Chendi chake: Angelo okonkheja malamulo a Mulungu, osati ŵanthu. (Salimo 103:20, 21) Olo Yesu pa nthawe iyakine enena kuti angakwanishe kusenga thandizo kwa Mulungu, osati kuli Angelo.—Mateyu 26:53.
Maganizo ophoniyeka: Tingakwanishe kupemphela kwa Angelo kuti atiyavye.
Chendi chake: Kupemphela ni mbali ya kulambila kwasu, ndipo tufunika kulambila Yehova Mulungu tyala. (Chivumbulutso 19:10) Tufunika kupemphela kwa Mulungu yeka, kupitila mwa Yesu.—Yohane 14:6.
a Pa Yesaya 14:12 m’ma Baibolo ayakine okatishila ntchito mawu akuti “Lusifala” amene ŵanthu ayakine onena kuti ni zina ya mngelo wamene enkhala Satana Mdyelekezi. Koma lomba, mawu Achiheberi oyambilila amene ekatishiliwa ntchito palemba yamene iyi otanthauza kuti “kuyezimila.” Nkhani yamene iyi yuwonesha lini kuti mawu amene aŵa onena za Satana, koma onena za mzela wa Mafumu a Babulo, amene Mulungu enzefuna kuzaŵachitisha nsoni chifukwa cha kumeka kwawo. (Yesaya 14:4, 13-20) Mawu akuti “woyezimila wewo” eŵakatishila ntchito pa nthawe yamene Mafumu a Babulo pechichonsewa pa maudindo, powonesha kuti enze opusa.
b Ŵanthu ayakine oganiza kuti nkhani yofotokoza za kufummyiwa mudjeli kwa Petulo yutanthauza kuti Petulo enze na Mngelo wake-wake amene enzemuteteza. (Machitidwe 12:6-16) Koma lomba, ophunzila amene awo pechinena kuti “Mngelo [wa Petulo],” payakine enzeganiza mophoniyeka kuti Mngelo wamene enze nthumi yopanamila Petulo wawela, osati Petulo ngaye-ngaye.
Mungakondesoti kuwona izi
KUYANKHA MAKONSHO AM’BAIBOLO
Kansi Mikayeli nkulu wa Angelo ni ŵani?
Oziŵika soti na zina, iyakine yamene payakine muiziŵa luweme.